មេដឹកនាំគណបក្សបៃតង (Greens Party) ដែលជាគណបក្សប្រឆាំងរបស់អូស្ត្រាលីបានរិះគន់ស្ថានភាពនយោបាយនៅក្នុងប្រទេសកម្ពុជាដោយលើកឡើងថា មាន “អំពើឃោរឃៅរំលោភសិទ្ធិមនុស្សគួរឲ្យតក់ស្លុត” នៅទីនេះ។ លោកស្រីបានថ្លែងបែបនេះនៅឯសន្និសីទកាសែតរួមគ្នាមួយកាលពីថ្ងៃអង្គារ ជាមួយលោក សម រង្ស៊ី ប្រធានគណបក្សសង្គ្រោះជាតិ ដែលកំពុងធ្វើដំណើរទស្សនកិច្ចនៅប្រទេសអូស្ត្រាលី និងប្រទេសនូវែលសេឡង់។
ថ្លែងនៅក្នុងទីក្រុងកង់បេរ៉ា ជាមួយលោក សម រង្ស៊ី លោកស្រី គ្រីស្ទីន មីន (Christine Milne) មេដឹកនាំគណបក្សបៃតងបានអំពាវនាវឲ្យរដ្ឋាភិបាលអូស្ត្រាលីដាក់គំនាបលើរដ្ឋាភិបាលគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន ឲ្យយល់ព្រមអនុញ្ញាតការស៊ើបអង្កេតឯករាជ្យលើការបោះឆ្នោតជាតិកាលពីឆ្នាំមុន និងដាក់គំនាបឲ្យបញ្ចប់ការបង្ក្រាបដោយហិង្សាលើបាតុកម្ម។
លោកស្រីបានមានប្រសាសន៍ថា “លោក ហ៊ុន សែន ដែលមានរដ្ឋាភិបាលខុសច្បាប់នៅទីនោះ [ក្នុងប្រទេសកម្ពុជា] បានបង្ក្រាបបាតុកម្ម។ គាត់បានចាត់ទុកថា វាជារឿងខុសច្បាប់ ដែលប្រជាពលរដ្ឋរួបរួមគ្នាចេញមកតវ៉ា [ហើយ] នៅដើមឆ្នាំនេះកម្មករប្រាំនាក់ត្រូវបានកងកម្លាំងរដ្ឋាភិបាលបាញ់ស្លាប់ដោយសារតែពួកគេចេញមកតវ៉ាតាមដងផ្លូវ ដើម្បីទាមទារប្រាក់ខែសមរម្យ”។ លោកស្រីបានមានប្រសាសន៍បន្ថែមទៀតថា “មានអំពើឃោរឃៅរំលោភសិទ្ធិមនុស្សគួរឲ្យតក់ស្លុតកំពុងកើតមាន ប៉ុន្តែប្រជាពលរដ្ឋកម្ពុជាចង់ការពារលទ្ធផលលទ្ធិប្រជាធិបតេយ្យជាខ្លាំង”។
ប្រធានគណបក្សនិងជាសមាជិកព្រឹទ្ធសភារូបនេះបានមានប្រសាសន៍បន្តទៀតថា “អូស្ត្រាលីត្រៀមខ្លួនរួចជាស្រេចដើម្បីជួយ ហើយសំណួរនៅត្រង់ថា តើរដ្ឋាភិបាលរបស់លោក តូនី អាបូត (Tony Abbott) នឹងក្រោកឈរឡើង ហើយជួយដល់កម្ពុជាដែរទេ?”។
បច្ចុប្បន្ន គណបក្សបៃតងរបស់អូស្ត្រាលី ដែលមានសមាជិកព្រឹទ្ធសភាចំនួនប្រាំបួនរូបនៅក្នុងសភាជាន់ខ្ពស់ ដែលមាន៧៦អាសនៈនៅក្នុងប្រទេសនេះ មានតុល្យភាពអំណាចរវាងសមាជិកព្រឹទ្ធសភា រដ្ឋាភិបាល៣៣រូប និងសមាជិកព្រឹទ្ធសភាមកពីគណបក្សប្រឆាំងចំនួន៣១រូប។ វាអនុញ្ញាតឲ្យពួកគេជំរុញគោលនយោបាយរបស់ខ្លួនដោយការរារាំងការអនុម័តច្បាប់ស្នើឡើងដោយគណបក្សធំទាំងពីរនេះ។
នៅមុននេះលោក សម រង្ស៊ី បានបង្ហាញខ្លួននៅចំពោះមុខគណៈកម្មាធិការទទួលបន្ទុកកិច្ចការបរទេសការពារជាតិ និងពាណិជ្ជកម្មនៃរដ្ឋសភា ហើយបានពណ៌នាពីស្ថានភាពនយោបាយនៅក្នុងប្រទេសកម្ពុជា។ លោកបានស្នើឲ្យលោកស្រី គ្រីស្ទីន មីន អំពាវនាវឲ្យរដ្ឋាភិបាលអូស្ត្រាលីកាត់ផ្ដាច់ជំនួយ។
លោក សម រង្ស៊ី បានថ្លែងទៅកាន់ក្រុមអ្នកយកព័ត៌មានថា “យើងនៅទីនេះដើម្បីអំពាវនាវឲ្យអូស្ត្រាលីដឹកនាំគេនៅក្នុងយុទ្ធនាការជាអន្តរជាតិមួយដើម្បីស្ដារលទ្ធិប្រជាធិបតេយ្យនៅកម្ពុជា។ អូស្ត្រាលី គឺជាកន្លែងដ៏ល្អសម្រាប់ការដឹកនាំបែបនេះ ដើម្បីជួយដល់ប្រទេសកម្ពុជា”។
មេដឹកនាំគណបក្សប្រឆាំងរូបនេះបានមានប្រសាសន៍ទៀតថា “អូស្ត្រាលីគឺជាកន្លែងល្អសម្រាប់ចាត់វិធានការជួយដល់ប្រទេសកម្ពុជា។ អូស្ត្រាលី គឺជាប្រទេសម្ចាស់ជំនួយដ៏ធំរបស់កម្ពុជា ដែលមិនអាចរស់រានបានឡើយ បើគ្មានជំនួយអន្តរជាតិទេនោះ”។
នៅក្នុងបទសម្ភាសមួយជាមួយវិទ្យុសាជីវកម្មផ្សាយសំឡេងអូស្ដ្រាលីហៅកាត់ថា ABC កាលពីម្សិលមិញ លោក សម រង្ស៊ី ក៏បានចាត់ទុកការប្រើអំពើហិង្សាក្នុងពេលថ្មីៗនេះលើជនជាតិភាគតិចវៀតណាមនៅក្នុងប្រទេសកម្ពុជាថា ជា “ឧបទ្ទវហេតុដែលកម្រកើតឡើង”។
លោក សម រង្ស៊ី បានមានប្រសាសន៍ថា “នៅពេលប្រជាពលរដ្ឋខ្មែររាប់ពាន់នាក់បាត់បង់ជីវិតដោយសារអំពើហិង្សា ជាពិសេសអំពើហិង្សាផ្នែកនយោបាយនោះ គ្មាននរណាម្នាក់ហ៊ាននិយាយអ្វីទាំងអស់ ប៉ុន្តែនៅពេលមានឧបទ្ទវហេតុដ៏កម្រកើតឡើងពាក់ព័ន្ធនឹងពលរដ្ឋផ្សេងៗទៀត អ្នកឯងចង្អុលម្រាមដៃ។ អ្វីៗត្រូវមើលលើបរិបទទូទៅ គឺបរិបទអំពើហិង្សានិងនិទណ្ឌភាព”។
គណបក្សរបស់លោក សម រង្ស៊ី ត្រូវបានចោទប្រកាន់ថា កំពុងតែព្យាយាមយកឈ្នះការបោះឆ្នោត ដោយការនិយាយមិនល្អពីគេនៅក្នុងប្រទេសកម្ពុជា។ នៅក្នុងឆ្នាំ១៩៨៥ លោក ហ៊ុន សែន ត្រូវបានរដ្ឋាភិបាលវៀតណាមលើកបន្តុបឲ្យធ្វើជានាយករដ្ឋមន្ត្រី។
អ្នកនយោបាយអូស្ត្រាលីសំខាន់ៗមួយចំនួនមកពីគណបក្សនយោបាយពីរផ្សេងគ្នាបានរិះគន់រដ្ឋាភិបាលរបស់លោក ហ៊ុន សែន ក្នុងរយៈពេលប៉ុន្មានខែថ្មីៗនេះចំពោះការបង្ក្រាបបង្ហូរឈាមរបស់ខ្លួនលើបាតុកម្មនិងការមិនយល់ព្រមស៊ើបអង្កេតការបោះឆ្នោតកាលពីឆ្នាំមុន។
នៅក្នុងអត្ថបទកាសែតចុះផ្សាយមួយកាលពីខែមុន លោក ហ្គារ៉េត អីុវែនស៍ (Gareth Evans) ដែលធ្លាប់បានកាន់មុខតំណែងជារដ្ឋមន្ត្រីការបរទេសអូស្ត្រាលីចន្លោះពីឆ្នាំ១៩៨៨ ដល់ឆ្នាំ១៩៩៦ បានរិះគន់លោក ហ៊ុន សែន ចំពោះឃាតកម្មទាក់ទិនរឿងនយោបាយថ្មីៗនេះ ហើយបានអំពាវនាវឲ្យដាក់ទណ្ឌកម្ម។ នៅក្នុងឆ្នាំ១៩៨៩ លោក អីុវែនស៍ គឺជាបុគ្គលអន្តរជាតិដ៏សំខាន់ ដែលត្រូវជំរុញឲ្យមានដំណោះស្រាយនយោបាយរហូតដល់សង្គ្រាមសីុវិលរុាំរៃ៉នៅក្នុងប្រទេសកម្ពុជា។
នៅក្នុងការពិភាក្សាដេញដោលក្នុងរដ្ឋសភាកាលពីដើមខែនេះ លោក ហ្វីលីប រូដក់ (Phillip Ruddock) ប្រធានក្រុមតំណាងរាស្ត្ររបស់រដ្ឋាភិបាល បានពណ៌នាអំពីរដ្ឋាភិបាលរបស់លោកនាយករដ្ឋមន្ត្រី ហ៊ុន សែន ថា ជា “រដ្ឋឯកបក្ស”៕ សុខុម