សវនាការជំនុំជម្រះទោសបុរសខ្មែរនិងខ្មែរកម្ពុជាក្រោមមួយក្រុម ដែលត្រូវបានចោទប្រកាន់ពីបទរួមគំនិតក្បត់ដើម្បីផ្តួលរំលំរដ្ឋាភិបាលកម្ពុជា បានបើក និងបិទវិញដោយលើកពេលប្រកាសសាលក្រម កាលពីថ្ងៃសុក្រ ម្សិលមិញនេះ។
មេធាវីម្នាក់ក្នុងចំណោមមេធាវីរបស់ជនជាប់ចោទបានឲ្យដឹងថា សវនាការនេះបានបើកដោយផ្អែកលើភ័ស្តុតាងមិនគ្រប់គ្រាន់ ដែលល្មមនឹងឲ្យជនសង្ស័យមានសេរីភាពវិញ។លោក ចាន់ រាសីភ័ក្ត្រ មេធាវីការពារក្ដី បានឲ្យដឹងថាជនសង្ស័យពីរនាក់អះអាងថានគរបាលបានធ្វើទារុណកម្មពួកគេ ដើម្បីទទួលបានចម្លើយសារភាព។
ការអះអាងនេះត្រូវបានបដិសេធដោយលោក រិន សាវឿន អនុប្រធានការិយាល័យសន្តិសុខផ្ទៃក្នុងនៃនាយកដ្ឋានសន្តិសុខផ្ទៃក្នុងនៅក្រសួងមហាផ្ទៃ។
លោកបានថ្លែងកាលពីថ្ងៃសុក្រជាការឆ្លើយតបទៅនឹងសំណួរពីមេធាវីការពារជនជាប់ចោទពីមូលហេតុនិងនីតិវិធីនៃការចាប់ខ្លួនបុរសទាំងនេះក្នុងប្រទេសថៃកាលពីខែមីនាថា “យើងមានភ័ស្តុតាងគ្រប់គ្រាន់ក្នុងការបញ្ជាក់ពីការជាប់ពាក់ព័ន្ធរបស់ពួកគេ។ វាជាបញ្ហាផ្ទៃក្នុងរបស់នគរបាល ដូច្នេះនគរបាលមិនអាចបរិយាយបានទេ”។
អំឡុងសវនាការនេះពុំមានសាក្សីឡើងផ្ដល់សក្ខីកម្មបញ្ជាក់ពីការជាប់ពាក់ព័ន្ធរបស់បុរសមួយក្រុម ដែលប្រឈមនឹងការជាប់ពន្ធនាគារអតិបរមា១០ឆ្នាំប្រសិនបើពួកគេត្រូវតុលាការរកឃើញពិរុទ្ធភាពដូចការចោទប្រកាន់ទេ។
គួររំឭកថា បុរសខ្មែរកម្ពុជាក្រោមឈ្មោះ សួន ផល អាយុ៥៣ឆ្នាំ និង យិន យ៉ាវ អាយុ៥៦ឆ្នាំ ត្រូវបានចាប់ខ្លួនកាលពីថ្ងៃទី១៨ ខែមីនា ឆ្នាំ២០១៣ ក្នុងខេត្តបា៉ទុមថានី ប្រទេសថៃ។ចំណែកឈ្មោះ យ៉ន គឹមស្រ៊ុន វ័យ២៨ឆ្នាំ យ៉ន យឿប អាយុ២៦ឆ្នាំ ថាច់ កុងភួង អាយុ៣៨ឆ្នាំ និងឈ្មោះ ខេម ម៉ា អាយុ២៩ឆ្នាំ ដែលជាបុរសខ្មែរត្រូវបានចាប់ខ្លួនរយៈ ពេលមួយសប្ដាហ៍ក្រោយមកក្នុងតំបន់តែមួយនោះ។ជនស្ស័យប្រាំមួយនាក់ទៀតនៅមិនទាន់ចាប់ខ្លួនបានទេ។
ពួកគេត្រូវបានចោទប្រកាន់ថា ជាសមាជិកក្រុមភេរវកម្មមួយដែលមានឈ្មោះថា ចលនារណសិរ្សរំដោះជាតិខ្មែរ។ពួកគេបានបដិសេធថា ខ្លួនមិនដឹងរឿងអ្វីពាក់ព័ន្ធនឹងសកម្មភាពក្បត់ដូចការចោទប្រកាន់ទេ។
លោក កុង ភឿង បាននិយាយសំដៅលើមេដឹកនាំចលនានេះថា “ខ្ញុំគ្រាន់តែស្គាល់សំ សេរី ប៉ុន្តែខ្ញុំមិនដឹងអំពីរចនាសម័្ពន្ធរបស់រណសិរ្សរំដោះជាតិខ្មែរឡើយ។ ខ្ញុំគ្រាន់តែបានដឹងថា សំ សេរី បានរៀបចំសិក្ខាសាលាមួយដើម្បីពិភាក្សាពីរណសិរ្សនេះ” ដោយបន្ថែមថា ខ្លួនមិនដែលឮលោក សេរី និយាយពីការជ្រើសរើសកងកម្លាំងប្រដាប់អាវុធទេ។ លោកបាននិយាយថា “ ខ្ញុំមិនដែលមានចេតនាផ្ដួលរំលំរដ្ឋាភិបាលកម្ពុជាទេ ព្រោះយើងគ្មានកម្លាំង ឬអាវុធសោះឡើយ”។
បងប្អូនប្រុសរបស់លោក សេរី គឺលោក យឿប បានឲ្យដឹងថា បងប្អូនរបស់លោកប្រើឈ្មោះផ្សេង ហើយថា គាត់មិនដែលបាននិយាយពីការប្រព្រឹត្តបទឧក្រិដ្ឋដូចការចោទប្រកាន់របស់នគរបាលទេ។
លោកបាននិយាយថា “បងប្អូនរបស់ខ្ញុំពុំដែលប្រាប់ខ្ញុំពីចលនានេះទេ ហើយខ្ញុំមិនបានចូលរួមឡើយ ព្រោះខ្ញុំជាប់រវល់ក្នុងការសិក្សានៅសាកលវិទ្យាល័យមួយក្នុងប្រទេសថៃឯណោះ”។ នៅក្នុងរង្វង់ក្រចកសេះ លោកគឹមស៊្រុន ក៏បានបដិសេធថា ខ្លួនគ្មានចេតនាណាមួយក្នុងការផ្ដួលរំលំរដ្ឋាភិបាលដែរ។
ប៉ុន្តែលោក គឺ បុណ្ណារ៉ា ព្រះរាជអាជ្ញាអមសាលាដំបូងបានបញ្ជាក់ថា ជនសង្ស័យពិតជាមានបំណងផ្ដួលរំលំរដ្ឋាភិបាលមែន និងថា ពួកគេគួរតែត្រូវបានផ្ដន្ទាទោសតាមច្បាប់។ លោកបាននិយាយថា“ ពួកគេពិតជាបានប្រព្រឹត្តបទឧក្រិដ្ឋ ដូចដែលតុលាការចោទប្រកាន់មែន”។
លោក ចាន់ រាសីភ័ក្ត្រ មេធាវីការពារលោក កុងភួង អះអាងថា “តុលាការគ្មានភ័ស្តុតាងគ្រប់គ្រាន់ និងសាក្សីណាម្នាក់ដើម្បីចោទប្រកាន់កូនក្ដីរបស់ខ្ញុំឈ្មោះ ថាច់ កុងភួង ទេ ដូច្នេះខ្ញុំសូមស្នើឲ្យចៅក្រមលើកលែងការចោទប្រកាន់លើកូនក្ដីរបស់ខ្ញុំ”។ លោក សេង នាង ចៅក្រមជំនុំជម្រះបានឲ្យដឹងថាសាលក្រមនឹងត្រូវបានប្រកាសនៅថ្ងៃទី១១ ខែមេសា ខាងមុខនេះ៕ សេរីវុធ