ខេត្តសៀមរាប– គណបក្សសម្ព័ន្ធដើម្បីប្រជាធិបតេយ្យ (LDP) បានរង់ចាំរយៈពេលបួនឆ្នាំមកហើយដើម្បីបង្កើនគោលនយោបាយរបស់ខ្លួនពីថ្នាក់ឃុំសង្កាត់ទៅថ្នាក់ស្រុកខណ្ឌ។
គណបក្សតូចមួយនេះ ដែលនិយាយអំពីអំណាចប្រជាពលរដ្ឋជាជាងអំណាចនាយករដ្ឋមន្ត្រីនោះ បាននៅស្ងៀមស្ងាត់ ខណៈពេលគណបក្សប្រជាជនកម្ពុជា និងគណបក្សសង្គ្រោះជាតិបានប្រឆាំងគ្នានៅក្នុងការបោះឆ្នោតជាតិកាលពីឆ្នាំ២០១៣។
ប៉ុន្តែនៅថ្ងៃទី១៨ ខែឧសភា សមាជិកក្រុមប្រឹក្សាឃុំសង្កាត់ទូទាំងប្រទេសនឹងបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ។ នៅក្នុងខេត្តសៀមរាប ដែលមានអ្នកគាំទ្រគណបក្សសម្ព័ន្ធដើម្បីប្រជាធិបតេយ្យ គណបក្សនេះមានសិទ្ធិដាក់លោក សៅ សុភិន អាយុ៣៧ឆ្នាំជាអ្នកស្មោះត្រង់គណបក្សឲ្យឈរឈ្មោះជាសមាជិកក្រុមប្រឹក្សាស្រុកសូទ្រនិគម។
នៅថ្ងៃបោះឆ្នោត សមាជិកក្រុមប្រឹក្សាឃុំ-សង្កាត់៨២រូបនឹងបោះឆ្នោតជ្រើសរើសក្រុមប្រឹក្សាស្រុកសូទ្រនិគមចំនួន១៩រូប មានន័យថា សំឡេងឆ្នោត៤សំឡេង នឹងទទួលបាន១អាសនៈ។ គណបក្សសម្ព័ន្ធដើម្បីប្រជាធិបតេយ្យ ដែលមានសមាជិកក្រុមប្រឹក្សាឃុំសង្កាត់ប្រាំរូបទៅបោះឆ្នោតនោះ ត្រៀមខ្លួនបង្កើនសំឡេងនយោបាយរបស់ខ្លួនទៅថ្នាក់លើបន្ទាប់ទៀតឲ្យតែសមាជិកក្រុមប្រឹក្សាយ៉ាងតិចបួនរូបនៅស្មោះត្រង់ចំពោះគណបក្សរបស់ខ្លួន។
លោក ស៊ុង ដានី ប្រធានគណបក្សសម្ព័ន្ធដើម្បីប្រជាធិបតេយ្យ ក្នុងខេត្តសៀមរាប បានមានប្រសាសន៍ថា “អ្វីក៏ដោយអាស្រ័យលើការទុកចិត្ត។ អ្នកទាំងប្រាំនាក់នេះស្មោះត្រង់ជានិច្ចចំពោះគណបក្សប៉ុន្តែពួកគេគិតថា ប្រសិនបើពួកគេក្បត់គណបក្ស ពួកគេក្បត់ខ្លួនឯង”។ លោកបានបន្ថែមថា “ដូច្នេះពួកគេដឹងថា ប្រសិនបើពួកគេព្យាយាមបំផ្លាញគណបក្ស មានន័យថា ពួកគេព្យាយាមបំផ្លាញខ្លួនឯង។ ពួកគេនឹងមិនធ្វើអ៊ីចឹងទេ”។
ស្រុកសូទ្រនិគមនៅចន្លោះស្រុកពីរនៅភាគខាងកើតក្រុងសៀមរាប ហើយភាគខាងត្បូងជាប់បឹងទន្លេសាប។ វាជាតំបន់ជនបទ ដែលញាំញីដោយវិវាទដីធ្លី និងកង្វះការងារធ្វើ។
ប៉ុន្តែ ថ្វីបើមានសង្ឃឹមថា គណបក្សសម្ព័ន្ធដើម្បីប្រជាធិបតេយ្យ នឹងទទួលបានសំឡេងគាំទ្រនៅថ្នាក់ស្រុកក៏ដោយ ក៏លោក សុភិន ដែលជាបេក្ខជន មិនមានសុទិដ្ឋិនិយមថា លោកអាចធ្វើឲ្យមានការផ្លាស់ប្ដូរបានឡើយ។
លោក សុភិន បានមានប្រសាសន៍ថា “មានបញ្ហាច្រើននៅក្នុងស្រុកនេះ ប៉ុន្តែខ្ញុំមិនអាចឈរមើលវិវាទដីធ្លី និងបញ្ហាដទៃទៀតបានឡើយ”។ លោកបានបន្ថែមថា “ខ្ញុំពិតជាគ្មានមធ្យោបាយដោះស្រាយបញ្ហាទាំងនោះទេ។ មានតែគណបក្សប្រជាជនកម្ពុជាប៉ុណ្ណោះមានអំណាច ប៉ុន្តែខ្ញុំអាចបន្តអប់រំប្រជាពលរដ្ឋឲ្យយល់ដឹងអំពីរបៀបទំនាក់ទំនងក្នុងសង្គម និងបង្រៀនពួកគាត់អំពីកម្មវិធីនយោបាយរបស់គណបក្សសម្ព័ន្ធដើម្បីប្រជាធិបតេយ្យ”។
គណបក្សសម្ព័ន្ធដើម្បីប្រជាធិបតេយ្យ មាន “យន្តការប្រាំបីចំណុច” ជាគោលនយោបាយរបស់ខ្លួន។ គោលបំណងនៃយន្តការទាំងនោះ គឺយកអំណាចពីនាយករដ្ឋមន្ត្រី ប្រគល់ទៅឲ្យប្រជាពលរដ្ឋសាមញ្ញ។ កម្មវិធីនយោបាយរបស់គណបក្សសម្ព័ន្ធដើម្បីប្រជាធិបតេយ្យ រួមមានការកំណត់អាណត្តិនាយករដ្ឋមន្ត្រី មិនអនុញ្ញាតឲ្យនាយករដ្ឋមន្ត្រីជួលអង្គរក្សផ្ទាល់ខ្លួន និងឲ្យរដ្ឋជាអ្នកកសាងនិងឃ្លាំមើលភូមិគ្រឹះរបស់នាយករដ្ឋមន្ត្រី ដើម្បីកុំឲ្យគាត់លាក់អាវុធ ដើម្បីប្រើប្រាស់ប្រឆាំងសត្រូវនយោបាយរបស់ខ្លួន។
ប៉ុន្តែ ខណៈដែលគោលនយោបាយរបស់គណបក្សសម្ព័ន្ធដើម្បីប្រជាធិបតេយ្យ មានគោលបំណងច្បាស់លាស់ក្នុងការកែទម្រង់រដ្ឋាភិបាលដែលដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន នោះ ការគំរាមកំហែងខ្លាំងក្លាចំពោះមហិច្ឆតាអំណាចថ្នាក់ស្រុករបស់ខ្លួន គឺជាគណបក្សប្រឆាំង ដែលដឹកនាំដោយលោក សម រង្ស៊ី។
ថ្លែងនៅក្រៅការជួបជុំគ្នារបស់គណបក្សសង្គ្រោះជាតិ កាលពីម្សិលមិញ លោក ឆុន គឹមឃន សមាជិកក្រុមប្រឹក្សាឃុំសង្កាត់គណបក្ស សម រង្ស៊ី ដែលនឹងបោះឆ្នោតនៅក្នុងស្រុកសូទ្រនិគម បានមានប្រសាសន៍ថា គណបក្សសង្គ្រោះជាតិមានជំនឿថា យ៉ាងហោចណាស់សមាជិកម្នាក់ក្នុងចំណោមសមាជិកក្រុមប្រឹក្សាប្រាំនាក់របស់គណបក្សសម្ព័ន្ធដើម្បីប្រជាធិបតេយ្យ នឹងបោះឆ្នោតឲ្យគណបក្សរបស់ខ្លួន។
លោក គឹមឃន បានមានប្រសាសន៍ថា “ប្រធានគណបក្សសម្ព័ន្ធដើម្បីប្រជាធិបតេយ្យ គាត់ដឹងពីអ្វីដែលគាត់ចង់បាន ប៉ុន្តែយើងដឹងថា សមាជិកមួយចំនួនរបស់លោក មានគម្រោងបោះឆ្នោតឲ្យគណបក្សសង្គ្រោះជាតិ”។
ហើយមិនដូចគណបក្សសង្គ្រោះជាតិ ដែលបានធ្វើយុទ្ធនាការតាមផ្លូវទូទាំងប្រទេស ដើម្បីកៀងគរអ្នកគាំទ្រនៅមុនការបោះឆ្នោតនៅចុងខែនេះនោះទេ គណបក្សសម្ព័ន្ធដើម្បីប្រជាធិបតេយ្យ បានធ្វើយុទ្ធនាការតិចតួចតែប៉ុណ្ណោះ។
នៅក្នុងក្រុងសៀមរាបកាលពីម្សិលមិញ ម៉ូតូមួយគ្រឿងដែលមានឧគ្ឃោសនសព្ទចងភ្ជាប់ទៅនឹងដៃម៉ូតូបានបើកទៅកាន់ទីស្នាក់ការគណបក្សសម្ព័ន្ធដើម្បីប្រជាធិបតេយ្យ ។ អ្នកបើកបរបានបើកជំុវិញក្រុងនេះ ដោយចាក់ចម្រៀងរៀបរាប់អំពីគោលនយោបាយគណបក្ស គឺ “យន្តការទាំងប្រាំបីចំណុច”។
លោក ដានី ជាប្រធានគណបក្សខេត្តនេះបានពន្យល់ថា “យើងមិនមានយុទ្ធនាការទ្រង់ទ្រាយធំទេ។ យើងគ្រាន់តែធ្វើយុទ្ធនាការនៅជុំវិញក្រុង ហើយចែកខិត្តប័ណ្ណតូចៗ និងមានបដាធំៗ ដើម្បីបង្ហាញពីគោលនយោបាយរបស់យើងតែប៉ុណ្ណោះ។ យើងបញ្ចុះបញ្ចូលប្រជាពលរដ្ឋឲ្យយល់ដឹងពីគោលនយោបាយរបស់យើងជាជាងការបោះឆ្នោត”។
លោក សន សុភាព អាយុ៣៤ឆ្នាំលក់ចំណីសត្វ និងស្រាបៀរនៅក្នុងតូបតូចមួយប្រឡាក់សុទ្ធតែធូលីនៅតាមផ្លូវទៅឃុំកៀនសង្កែ ស្រុកសូទ្រនិគម។ គាត់បាននិយាយថា “ជួនកាលគណបក្សសម្ព័ន្ធដើម្បីប្រជាធិបតេយ្យ មកឃោសនានៅទីនេះ ដោយជិះម៉ូតូផ្សព្វផ្សាយពីគោលនយោបាយរបស់គណបក្សដល់ប្រជាពលរដ្ឋ។ ប៉ុន្តែគ្មាននរណាម្នាក់ចាប់អារម្មណ៍ទេ”។ គាត់បានបន្ថែមថា “បើទោះជាគណបក្សសម្ព័ន្ធដើម្បីប្រជាធិបតេយ្យមានឱកាសឈរឈ្មោះក្នុងក្រុមប្រឹក្សាស្រុកក៏ដោយ ក៏ពួកគេមិនអាចជួយដោះស្រាយបញ្ហានៅទីនេះបានដែរ ពីព្រោះអំណាចទាំងអស់ស្ថិតក្នុងដៃគណបក្សប្រជាជនកម្ពុជា។
លោក សុភិន ជាអតីតយោធា ដែលអាចជាមនុស្សទី១តំណាងឲ្យគណបក្សសម្ព័ន្ធដើម្បីប្រជាធិបតេយ្យ នៅថ្នាក់ក្រុមប្រឹក្សាស្រុកនេះ បានមានប្រសាសន៍ថា ការឃោសនានិងក្ដីរំពឹងតិចតួច គឺជាមធ្យោបាយរបស់គណបក្សនេះ។ ដូចថ្នាក់លើរបស់លោកដែរ លោកមិនមែនជាអ្នកនយោបាយ ដែលចូលចិត្តការបង្ខិតបង្ខំឡើយ។
លោកបានមានប្រសាសន៍ថា “ប្រសិនបើសមាជិកក្រុមប្រឹក្សាឃុំសង្កាត់គណបក្សសម្ព័ន្ធដើម្បីប្រជាធិបតេយ្យ ចង់ផ្ដាច់ខ្លួនទៅកាន់គណបក្សដទៃ គឺដោយសារពួកគេពេញចិត្តទស្សនរបស់លោក សម រង្ស៊ី ដែលផ្ដល់ប្រាក់៣០.០០០រៀល ឬ៤០.០០០រៀលក្នុងមួយខែដល់អ្នកចូលនិវត្ត ដូច្នេះពួកគេអាចដេកនៅផ្ទះរាល់ថ្ងៃ នោះគឺជាសេរីភាពរបស់ពួកគេ។
លោកបានបន្ថែមថា “ពិតមែនហើយ វាលំបាកយល់ណាស់ថា តើពួកគេនឹងបោះឆ្នោតឲ្យខ្ញុំឬអត់នោះ។ ប្រសិនបើពួកគេចងចាំស្នាដៃដែលខ្ញុំបានធ្វើសម្រាប់គណបក្សសម្ព័ន្ធដើម្បីប្រជាធិបតេយ្យ ពួកគេនឹងបោះឆ្នោតឲ្យខ្ញុំ។ ប្រសិនបើពួកគេមិនចាំទេនោះ ក៏វាមិនអីដែរ”៕សារុន