កសិករមួយក្រុមដែលត្រូវបានបណ្តេញចេញដើម្បីបើកផ្លូវឲ្យក្រុមហ៊ុនចម្ការកៅស៊ូវៀតណាមមួយនៅក្នុងខេត្តក្រចេះ សុខចិត្តទទួលយកសម្បទានដីសង្គមកិច្ចមួយពីរដ្ឋាភិបាលកាលពីម្សិលមិញ ប៉ុន្តែនឹងមិនចាកចេញពីមូលដ្ឋានតវ៉ារបស់ខ្លួននៅក្នុងរាជធានីភ្នំពេញទេ លុះត្រាពួកគាត់ឃើញប្លង់រឹងដែលបញ្ចាក់ថា ដីនោះជាដីថ្មីរបស់ខ្លួនសិន។
លោក ងួន វិបុល តំណាងប្រជាពលរដ្ឋគ្មានទីជម្រកចំនួន៣០១គ្រួសារបានឲ្យដឹងថា កសិករមួយក្រុមនឹងទៅកាន់ទីកន្លែងសម្បទានដីទំហំ៧៥០ហិកតា នៅក្នុងស្រុកស្នួលនៅថ្ងៃនេះ និងទាមទាមឯកសារសមស្របនិងការសាងសង់លំនៅដ្ឋានជាបណ្តោះអាសន្ន។
ប្រសិនបើការទាមទាររបស់ពួកគាត់មិនត្រូវបានដោះស្រាយទេ ពួកគាត់នឹងត្រឡប់មកភ្នំពេញវិញ ជាទីដែលពួកគាត់បានបោះជំរំនៅក្នុងវត្តសាមគ្គីរង្សី សង្កាត់ស្ទឹងមានជ័យអស់រយៈពេលជិតពីរសប្តាហ៍។
លោក វិបុល បានមានប្រសាសន៍ថា “យើងយល់ព្រមទទួលយកសម្បទាននេះ ពីព្រោះយើងមិនចង់ខ្ជះខ្ជាយពេលវេលាច្រើន ឬធ្វើឲ្យប្រទេសមានអស្ថិរភាពទេ។ ប៉ុន្តែប្រសិនបើអាជ្ញាធរ រំពឹងថា យើងដេកនៅក្នុងសាលាស្រុកស្នួល យើងតវ៉ា។ នៅពេលយើងត្រឡប់ទៅខេត្តក្រចេះវិញ មន្ត្រីមូលដ្ឋានត្រូវផ្តល់តង់និងអាហារនៅលើដីថ្មី បើមិនអីចឹងទេយើងនឹងត្រឡប់មកភ្នំពេញវិញ”។
ក្រុមគ្រួសារទាំងនេះ ដែលភាគច្រើនក្នុងចំណោមនោះបានធ្វើចំណាកស្រុកទៅរស់នៅក្នុងស្រុកស្នួល ពីខេត្តកំពង់ចាមក្នុងឆ្នាំ២០០៨ ត្រូវបានបណ្តេញចេញកាលពីថ្ងៃទី២ ខែឧសភា ដើម្បីបើកផ្លូវឲ្យក្រុមហ៊ុន Binh Phouc 2។ នៅពេលពួកគាត់បដិសេធមិនព្រមចេញ ផ្ទះរបស់ពួកគាត់ត្រូវបានដុតកម្ទេចចោល។
លោក ស ចំរុង អភិបាលខេត្តក្រចេះបានមានប្រសាសន៍កាលពីម្សិលមិញថា ក្រុមមន្ត្រីនឹងត្រៀមរៀបចំឯកសារចាំបាច់សម្រាប់សម្បទានដីសង្គមកិច្ច និងប្រគល់ដីនេះឲ្យប្រជាកសិករនៅថ្ងៃនេះ។
លោក ចំរុង បានមានប្រសាសន៍ថា ” ប្រសិនបើពួកគាត់ចង់រស់នៅទីនោះ ពួកគាត់អាចទៅ និងស្វែងរកអ្វីផ្សេងទៀតដោយខ្លួនឯង។ ពួកគាត់អាចទៅកន្លែងណាមួយ ដែលពួកគេចង់ មិនមែនតែសម្បទានដីរបស់ក្រុមហ៊ុន[Binh Phuoc2] ប៉ុណ្ណោះទេ”។
លោក ចាន់ សុវ៉េត ប្រធានផ្នែកស៊ើបអង្កេតប្រចាំអង្គការសិទ្ធិមនុស្សអាដហុក បានមានប្រសាសន៍ថា លោកនឹងអមដំណើរក្រុមកសិករទៅកាន់ដីថ្មីរបស់ពួកគាត់ ដែលកសិករនិយាយថា មានចម្ងាយមិនដល់១០គីឡូម៉ែត្រពីដីសម្បទានរបស់ក្រុមហ៊ុន Binh Phouc2។ លោក សុវ៉េត បានមានប្រសាសន៍ថា ” ប្រសិនបើមន្ត្រីមូលដ្ឋានរៀបចំឯកសារបានរហ័សប្រជាពលរដ្ឋនឹងត្រឡប់ទៅកាន់ខេត្តនេះវិញ”៕ ប៊ុននី