29 C
Phnom Penh

ដោយសារ​មាន​ការ​គំរាមកំហែង​ គណបក្ស​សង្គ្រោះជាតិ​លុប​ចោល​ដំណើរ​ទស្សនកិច្ច​អតីត​តំបន់​​ខ្មែរ​ក្រហម​​​

ដោយ ឌឹ ខេមបូឌា ដេលី

បទវិភាគ

ស្រុកអន្លង់វែង, ខេត្តឧត្តរមានជ័យ-លោក សម រង្ស៊ី និងលោក កឹម សុខា មេដឹកនាំ​គណ​បក្ស​ប្រឆាំង​​បាន​លុប​ចោល​ដំណើរ​ទស្សនកិច្ច​ចំនួនពីរ​ថ្ងៃ​ នៅ​អតីត​តំបន់​ខ្មែរ​ក្រហម​នាភាគ​ពាយព្យ​នៃ​ប្រទេស​កម្ពុជា​កាលពីម្សិលមិញ បន្ទាប់ពី​អាជ្ញាធរ​មូល​ដ្ឋាន​ និង​បុរស​ដែល​ស្ថិត​ក្នុង​ឯក​សណ្ឋានស៊ីវិល​បាន​និយាយ​ថា ពួកគេ​នឹង​រារាំង​រាល់​ការ​ជួប​ជុំ​គ្នា​ទាក់ទិន​នឹង​រឿង​នយោបាយ​។

បុរសមួយ​ក្រុម​បាន​បិទផ្លូវជាតិ​លេខ​៦៧​ក្នុង​ខេត្ត​ឧត្តរ​មាន​ជ័យ​ រារាំង​មេដឹកនាំ​គណបក្ស​សង្គ្រោះ​ជាតិ​អំឡុង​ពេល​ចុះ​សួរ​សុខ​ទុក្ខ​សកម្ម​ជន​របស់​ខ្លួន​​កាល​ពីម្សិល​មិញ​ ។​ អេឡិក វិល្លីមមីនស៍/ ខេមបូឌា ដេលី
បុរសមួយ​ក្រុម​បាន​បិទផ្លូវជាតិ​លេខ​៦៧​ក្នុង​ខេត្ត​ឧត្តរ​មាន​ជ័យ​ រារាំង​មេដឹកនាំ​គណបក្ស​សង្គ្រោះ​ជាតិ​អំឡុង​ពេល​ចុះ​សួរ​សុខ​ទុក្ខ​សកម្ម​ជន​របស់​ខ្លួន​​កាល​ពីម្សិល​មិញ​ ។​ អេឡិក វិល្លីមមីនស៍/ ខេមបូឌា ដេលី

លោក សម រង្ស៊ី និង​លោក កឹម សុខា មានគម្រោង​ចាប់​ផ្ដើម​ដំណើរ​ទស្សនកិច្ច​របស់​ខ្លួន​​ដោយ​មាន​ពិធី​ជួប​ជុំគ្នា​មួយ​នៅ​ពេល​ព្រឹក​​ក្នុង​ស្រុក​អន្លង់វែង ដែល​ជាមូល​ដ្ឋាន​ដ៏រឹងមាំ​ចុង​ក្រោយ​របស់​ពួក​ទ័ពព្រៃ​ខ្មែរ​ក្រហម​ និង​ជា​កន្លែង​បូជា​សព​​ ប៉ុល ពត ប៉ុន្តែ​មេដឹក​នាំ​ទាំង​ពីរ​បាន​លុប​ចោល​ដំណើរ​ទស្សនកិច្ច​នេះ​ពី​ខេត្ត​សៀមរាប​ បន្ទាប់ពី​មិនអាច​ទទួល​បាន​ការ​ធានា​ពី​សុវត្ថិភាព​របស់​ខ្លួន​។

លោក សម រង្ស៊ី បាន​មាន​ប្រសាសន៍​តាម​ទូរស័ព្ទ​ពី​ខេត្ត​សៀម​រាប​មក​ថា ការ​ជជែក​គ្នា​រវាង​មន្ត្រី​ក្រសួង​មហាផ្ទៃ​ បាន​ផ្ដល​់​ការ​ធានា​ត្រឹម​តែ​ថា អាជ្ញាធរ​ស្រុក​និង​ខេត្ត​ នឹង​មិន​រារាំង​ដំណើរ​ចូល​ទៅ​កាន់​ស្រុក​អន្លង់វែង​របស់​ពួកគាត់​ប៉ុណ្ណោះ​។

លោក សម រង្ស៊ី បាន​មាន​ប្រសាសន៍​ថា “ស្ថានភាព​ទូទៅ​ឥឡូវ​នេះគឺ​មិន​ល្អទេ ពួកគេ​បាន​និយាយ​ថា មាន​កង​កម្លាំង​ដែល​មិន​ស្ថិត​នៅ​ក្រោម​ការ​គ្រប់​គ្រង​របស់​ខ្លួន ហើយ​ពួកគេ​មិន​អាច​ធ្វើ​អ្វី​បាន​ឡើយ។ ពួកគេ​អាច​គ្រប់​គ្រង​អភិបាល​ខេត្ត​ នគរ​បាល​ឃុំ​-ស្រុក ប៉ុន្តែ​​មិន​អាច​គ្រប់​គ្រង​ទាហាន​ដែល​ជា​អតីត​ទាហាន​ខ្មែរ​ក្រហម​បាន​ទេ។ មាន​ពាក្យ​ចចាមអារ៉ាម​ជា​ច្រើន ​ហេតុដូច្នេះ គួរ​តែ​ចាក​ចេញ​​ប្រសើរ​ជាង”។

ទាំង​លោក ខៀវ សុភ័គ អ្នកនាំពាក្យ​ក្រសួង​មហាផ្ទៃ​និង លោក ព្រំុ សុខា រដ្ឋលេខាធិការ​ក្រសួង​មហាផ្ទៃ​ ដែល​លោក សម រង្ស៊ី បាន​លើក​ឡើង​ថា លោក​បាន​​ទាក់​ទង​នោះ មិន​អាច​ទាក់ទង​សុំការ​បញ្ជាក់​ពីការ​អះអាង​ទំាង​នេះ​បានទេ។

តែ​ទោះជា​យ៉ាង​ណា នៅ​តាម​បណ្ដោយ​ផ្លូវ​ពីខេត្តសៀម​រាប​ទៅកាន់ស្រុក​អន្លង់វែង​ ដែល​មាន​ចម្ងាយ​ផ្លូវ​មិន​ដល់​១០០​គីឡូម៉ែត្រ​ផង​នោះ បុរស​មួយ​ក្រុម​ប្រហែល​២០០​នាក់​ ដែល​ស្លៀក​ឯកសណ្ឋាន​ស៊ីវិល​​បាន​នាំគ្នា​កាន់​ទង់ជាតិ​កម្ពុជា​ ហើយ​ដើរ​ក្រវែល​ក្បែរ​របាំង​ផ្លូវ​បណ្ដោះ​អាសន្ន​មួយ ដោយ​មាន​មន្ត្រី​មួយ​ចំនួន​នៅ​កន្លែង​នោះ បាន​បដិសេធ​មិន​ប្រាប់​ពី​អត្ត​សញ្ញាណ​ ឬក៏ថា នរណា​ជា​ថ្នាក់លើ​របស់​ខ្លួន​ឡើយ។

បុរស​ម្នាក់​បាន​រឹប​អូស​យក​ម៉ាស៊ីន​ថត​សំឡេង​ និង​កាមេរ៉ា​របស់​អ្នក​យក​ព័ត៌មាន​ម្នាក់ ហើយ​បាន​ប្រគល់​ឧបករណ៍​ទាំង​នេះ​វិញ​ ដោយ​ដាក់​លក្ខខណ្ឌ​ឲ្យ​អ្នក​យកព័ត៌​មាន​រូប​នេះ​ចាក​ចេញ​ជា​បន្ទាន់ពី​កន្លែង​បិទ​ផ្លូវ​ ដែល​ទំនង​ជា​ត្រូវ​បាន​គេ​ដាក់​ដើម្បី​បញ្ឈប់​រថយន្ត​ជាច្រើន​គ្រឿង​​។

ទាហាន​ឯក​សណ្ឋាន​មួយ​ក្រុម​ ដែល​មាន​កាន់​កាំភ្លើង​វែង​ក៏​បាន​បង្ហាញ​ខ្លួន​ម្ដង​ម្កាល​ផង​ដែរ​នៅ​តាម​ចិញ្ចើម​ផ្លូវ​នោះ ប៉ុន្តែ​ទាហាន​ភាគ​ច្រើន​គ្រាន់​តែ​អង្គុយ​លើ​ម៉ូតូ​របស់​ខ្លួន​ដោយ​​គ្មាន​ធ្វើ​អ្វីឡើយ​។ មន្ត្រី​កង​រាជ​អាវុធ​ហត្ថ​មួយ​ក្រុម​បានអង្គុយនៅ​ទីបញ្ជាការ​ដ្ឋាន​កង​រាជ​អាវុធ​ហត្ថ​ខេត្ត​ចម្ងាយ​ប្រហែល​៥០០​ម៉ែត្រ ពី​កន្លែង​បិទ​ផ្លូវ​នោះ។

លោក សឿន ហៃ មន្ត្រី​យាម​នៅ​ខាង​មុខ​ទីបញ្ជាការ​ដ្ឋានកង​រាជ​អាវុធ​ហត្ថ​ខេត្ត បាន​និយាយ​ថា “គ្មាន​បទ​បញ្ជា​ឲ្យ​យើង​បញ្ឈប់​ឡាន​ណាមួយឡើយ​។ យើង​នឹង​មិន​ត្រួត​ពិនិត្យ​រថយន្ត​ណា​ដែល​ពាក់​ស្លាក​លេខ​រដ្ឋនោះ​ទេ ពីព្រោះ​ឋានៈ​របស់​គេ​ខ្ពស់​ជាង​យើង​”។ មន្ត្រីរូប​នេះ​បាន​បន្ថែម​ថា ខ្លួនមិន​ដឹង​ថា មានការ​បិទ​ផ្លូវ​នៅ​ក្បែរ​ៗ​នោះឡើយ​។ លោក​ សឿន ហៃ បាននិយាយ​បន្ត​ថា “អ្នក​អាច​ធ្វើ​ដំណើរ​ចេញចូល​តាម​ផ្លូវនេះ​បាន​ដោយ​សុវត្ថិភាព​”។

នៅក្នុង​ស្រុក​អន្លង់វែង ​មន្ត្រី​នគរ​បាល​ស្រុក រួមទាំង​លោក សូ នៅ ដែល​ជា​អធិការ​រង​នគរ​បាល​ស្រុក​ផង​ដែរ​នោះ​ បាន​បដិសេធ​មិននិយាយ​ថា តើខ្លួនអាច​ធានា​សុវត្ថិភាព​ជូន​លោក សម រង្ស៊ី និង​លោក កឹម សុខា បាន​ឬក៏អត់​នោះទេ ប្រសិន​បើ​ពួកគាត់​ប៉ុន​ប៉ង​ចូល​មក​​ស្រុកអន្លង់វែង​នោះ​។

មុន​នេះ​មួយ​ថ្ងៃ នៅ​ពេល​អ្នក​គាំទ្រ​មាន​ផែន​ការ​ស្វាគមន៍​មេដឹកនាំ​គណបក្ស​សង្គ្រោះ​ជាតិ បុរស​ស្រវឹង​ស្រា​ស្លៀក​ស៊ីវិល​​ជាច្រើន​ក្រុម​បាន​នាំគ្នា​អង្គុយ​លើ​រថយន្ត​មួយ​បាំង​កន្លះ​នៅ​ខាង​មុខ​ការិយាល័យ​នគរ​បាល​ ឃាត់​អ្នកគាំទ្រ​​ដែលមក​ចូលរួម​ការជួប​​​ជុំ​ទាំង​នេះ។

ក្រុម​បុរស​ទាំង​នោះ​បាន​ប្រាប់​អ្នក​យក​ព័ត៌មាន​ថា ពួកគេ​ត្រូវ​បាន​ដាក់​ពង្រាយនៅ​ទីនោះ​ គឺ​ដើម្បី​ជួយ​នគរ​បាល​ការ​ពា​រ​ក្រុង​កុំ​ឲ្យ​លោក សម រង្ស៊ី និង​លោក កឹម សុខា បង្ក​បញ្ហា​។ បុរស​ម្នាក់​បាននិយាយ​ថា “យើង​បាន​​រារាំង​គណបក្ស​សង្គ្រោះ​ជាតិ ដែល​មក​​ទីនេះ​ដើម្បី​បង្ក​បញ្ហា”។

យោងតាម​លោក សម រង្ស៊ី បាន​ឲ្យ​ដឹង​ថា អ្នក​គាំទ្រ​ពី​១០ទៅ​១៥​នាក់​លែង​ចាក​ចេញ​ពី​ខេត្ត​នេះ​កាលពី​យប់​ថ្ងៃសៅរ៍ ដោយ​ព្រួយ​បារម្ភ​ខ្លាច​ក្រែង​អាច​មាន​បញ្ហា​កើត​ឡើង​។

លោក ញ៉ែន អេន អតីត​អភិបាល​រង​ស្រុក​​មកពី​គណបក្ស​ប្រជាជន​កម្ពុជា​ ដែល​បានចុះ​ចូល​ជាមួយ​គណបក្ស​ប្រឆាំង​កាល​ពី​ខែមីនា ​សង្ឃឹម​ថា នឹង​អាច​ទទួល​លោក សម រង្ស៊ី និង​លោក​ កឹម សុខា អំឡុង​ការ​មក​បំពេញ​ទស្សនកិច្ច​របស់​ពួកគាត់​ ប៉ុន្តែ​ទីបញ្ចប់​បាន​ភៀស​ខ្លួនទៅ​ខេត្ត​សៀមរាប។

លោក អេន ដែល​ជា​អ្នក​ថត​រូប​នៅ​គុក​ទួលស្លែង ក្នុង​ក្រុង​ភ្នំពេញ អំឡុង​សម័យ​ខ្មែរ​ក្រហម​ បាន​ឃើញ​ផ្ទះ​ជួល​របស់​ខ្លួន​​ត្រូវ​គេ​បិទ​កាលពីយប់​ថ្ងៃសៅរ៍ បន្ទាប់ពី​ព្យាយាម​លើក​ស្លាក​ដ៏ធំរបស់​គណបក្ស​សង្គ្រោះជាតិ មន្ត្រីម្នាក់​ដែល​ប្រាប់​ត្រឹម​ថា លោកឈ្មោះ អុល កាលពី​ថ្ងៃអាទិត្យ បាន​លេច​មុខ​ចេញ​ពីសាលា​ស្រុក​ ហើយ​បាន​និយាយ​ថា អាជ្ញាធរ​បាន​ចាក់​សោ​ផ្ទះ​ជួល​របស់​លោក អេន ដែលនៅ​ទល់​មុខនោះ​ ពីព្រោះ​គាត់​មិន​ស្ដាប់​ម្ចាស់​ផ្ទះ​ដែល​មិន​អនុញ្ញាត​ឲ្យ​លើក​ស្លាក​ដ៏ធំ​របស់​គណបក្ស​សង្គ្រោះជាតិ​។

នៅ​ព្រឹក​ថ្ងៃអាទិត្យ មន្ត្រី​ស្រុក​បាន​បើក​​រថយន្ត​ស៊េរីទំនើប​ដែល​មាន​ធុង​បាស់​ចេញពី​សាលា​ស្រុក​របស់​ខ្លួន ហើយ​តម្រង់​ទៅ​ផ្ទះ​របស់​លោក អេន​ ដែល​នៅទល់មុខ​នោះ ជាទី​ដែល​កូន​ស្រី​របស់​គាត់​បានព្យាយាម​​យកកាំបិត​ប៉័ង​តោ​កាប់​​សោ​​នោះចេញ​តែ​មិនបាន​​សម្រេច​។

បុរស​ម្នាក់​ដែល​ជិះ​នៅ​លើ​រថយន្ត​ទំនើប​មានធុងបាស់​បាន​ស្រែក​ទៅកាន់​មនុស្ស​មួយ​ក្រុម​តូច​នៅ​កន្លែង​នោះ​ថា “យើង​ប្រឆាំង​យ៉ាង​ដាច​់​អហង្ការ ប្រឆាំងយ៉ាង​ដាច់​អហង្ការ មិន​ឲ្យ​ កឹម សុខា និង​ សម រង្ស៊ី ចូល​ក្នុង​ទឹកដី​អន្លង់វែង​​ ជា​តំបន់​​បាន​​ធ្វើ​សមាហរណកម្ម​ ដែល​មាន​ភាព​សុខ​សាន្ត​ ហើយ​រដ្ឋាភិបាល​កំពុង​តែ​អភិវឌ្ឍហើយ​”។

តែទោះបីជា​ លោក សម រង្ស៊ី បាន​បដិសេធ​កាលពី​ថ្ងៃសុក្រថា ដំណើរ​ទស្សនកិច្ច​របស់​គណបក្ស​ប្រឆាំង​ទៅកាន់​តំបន់ភាគ​ពាយព្យ​មិន​មែន​មាន​បំណង​​ប្រមូល​ការ​គាំទ្រ​​ពី​អតីត​ខ្មែរ​ក្រហមក៏ដោយ ក៏​ដំណើរ​ទស្សនកិច្ច​​ទៅកាន់ភាគ​ពាយព្យ​របស់​លោក​ និង​លោក កឹម សុខា គួរតែ​បាន​ទៅ​ទស្សនកិច្ច​​ស្រុក​សំខាន់ៗ​ទាំង​អស់ដែល​ធ្លាប់​ស្ថិត​ក្រោម​ការ​គ្រប់​គ្រង​របស់​ទ័ព​ព្រៃ​ខ្មែរ​ក្រហម​ដែរ​។

ស្រុក​អន្លង់វែង​ជា​មូល​ដ្ឋាន​ដ៏រឹងមាំ​ចុង​ក្រោយ​របស់​ខ្មែរ​ក្រហម​បាន​ធ្លាក់​ក្រោម​ការ​គ្រប់​គ្រង​របស់រដ្ឋាភិបាល​វិញ​នៅ​ខែធ្នូ ឆ្នាំ​១៩៩៨ ដោយ​ ខៀវ សំផន និង​ នួន ជា បាន​ចុះ​ចូល​ជាមួយ​រដ្ឋាភិបាល​ បន្ទាប់ពី​ការ​ចរចា​គ្នា​យ៉ាង​យូរ​ ហើយ​​​ការ​ចុះចូល​របស់​ទាហាន​ជាច្រើន​នៅ​ក្នុង​ឆ្នាំនោះ​បាន​ធ្វើ​ឲ្យ​​មេដឹកនាំ​ដ៏ខ្លាំងរបស់​ខ្លួនគឺ តាម៉ុក រដ្ឋមន្ត្រីក្រសួង​ការ​ពារជាតិសម័យ​ខ្មែរ​ក្រហមគ្មាន​សល់​ទាហាន​ខ្លាំង​ៗឡើយ​។ ទាហាន​ចុង​ក្រោយ​របស់ខ្មែរ​ក្រហម​បាន​ធ្វើ​សមាហរណកម្ម​ចូល​ជាមួយរដ្ឋាភិបាល​ចុង​ក្រោយ​នៅ​ខែកុម្ភៈ ឆ្នាំ​១៩៩៩​។

នៅ​ថ្ងៃនេះ ​លោក សម រង្ស៊ី និង​លោក កឹម សុខា គួរតែ​បាន​​ចុះទៅ​ស្រុក​ម៉ាឡៃ ខេត្ត​បន្ទាយ​មានជ័យ ជាទី​ដែល​កូន​ស្រី​តែមួយគត់​របស់​ ប៉ុល ពត បានរៀប​មង្គល​ការ​កាលពី​ខែមីនា និង​ខេត្ត​ប៉ៃលិន ជាទី​ដែល​ អៀង សារី អតីត​រដ្ឋមន្ត្រីការ​បរទេស​នៅ​សម័យ​ខ្មែរ​ក្រហម​ បាន​ដឹក​នាំ​​ទាហាន​ខ្មែរ​ក្រហម​ជាច្រើន​​ចុះចូលជា​​លើក​ដំបូង​ជាមួយ​រដ្ឋាភិបាល​កាលពី​ខែ​កញ្ញា ឆ្នាំ​១៩៩៦។

គណបក្ស​ប្រឆាំង​របស់​លោក សម រង្ស៊ី ឈ្នះ​តែ​មួយ​អាសនៈគត់​នៅ​ក្នុង​ខេត្ត​ប៉ៃលិន អំឡុង​ការ​បោះឆ្នោត​ជាតិ​នៅ​ខែកក្កដា ឆ្នាំ​១៩៩៨ ​​ប៉ុន្តែ​តំណាង​រាស្ត្រ​ដែល​ឈ្នះ​ឆ្នោត​នៅ​ខេត្ត​នេះ​​ក្រោយ​មក​បាន​ចុះ​ចូលជាមួយ​គណបក្ស​ហនស៊ិនប៉ិច។ លោក សម រង្ស៊ី និង​លោក កឹម សុខា ក៏គួរ​តែ​បាន​​ធ្វើ​ដំណើរទៅកាន់​ស្រុក​សំឡូត​ ខេត្ត​បាត់​ដំបង​ផង​ដែរ​៕ ស៊ុយឈាង​​​​​​​​​​​

 

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស