រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា ក្រសួងការងារបានសម្រេចកិច្ចព្រមព្រៀងមួយកាលពីម្សិលមិញជាមួយទីភ្នាក់ងារជ្រើសរើសពលករចំនួន៤០ ដោយផ្ដល់សិទ្ធិឲ្យទីភ្នាក់ងារទាំងនោះបញ្ជូនកម្មករចំណាកស្រុកទៅប្រទេសថៃ ផ្ដល់ប័ណ្ណពលករ និងឯកសារចាំបាច់ទាំងអស់ដែលមានតម្លៃត្រឹម៤៩ដុល្លារប៉ុណ្ណោះ។
កម្មករចំណាកស្រុកខ្មែរច្រើនជាង២៤០.០០០នាក់ ដែលភាគច្រើនគ្មានឯកសារនោះ បានភៀសខ្លួនចេញពីប្រទេសថៃនៅខែនេះ ដោយសារបារម្ភអំពីការបង្ក្រាបលើពលករខុសច្បាប់ពីសំណាក់យោធាថៃ។ កាលពីសប្ដាហ៍មុន រដ្ឋាភិបាលបានបញ្ចុះតម្លៃលិខិតឆ្លងដែនសម្រាប់កម្មករចំណាកស្រុកពី១២៤ដុល្លារមកត្រឹម៤ដុល្លារ ដើម្បីលើកទឹកចិត្តកម្មករឲ្យត្រឡប់ទៅធ្វើការវិញដោយស្របច្បាប់។
លោក អុិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍កាលពីម្សិលមិញថា តាមកិច្ចព្រមព្រៀងថ្មីនេះ ទីភ្នាក់ងារនានា នឹងកំណត់តម្លៃថេរ៤៩ដុល្លារសម្រាប់កម្មករដើម្បីទទួលបានប័ណ្ណពលករ និងឯកសារដែលចាំបាច់ដើម្បីបានចូលទៅធ្វើការនៅក្នុងប្រទេសថៃវិញ។ តម្លៃនេះក៏នឹងរួមបញ្ចូលការដឹកជញ្ជូន ព្រមទាំងថ្លៃអាហារពេលធ្វើដំណើរផងដែរ។
លោកបានមានប្រសាសន៍ថា “តម្លៃនេះចំណាយលើសេវា រួមមានលិខិតឆ្លងដែនពលករ៤ដុល្លារអាមេរិក ប័ណ្ណពលករកម្ពុជាទៅធ្វើការនៅបរទេស១០ដុល្លារអាមេរិក ទិដ្ឋាការការងារនៅស្ថានទូតថៃប្រចាំប្រទេសកម្ពុជាចំនួន២០ដុល្លារអាមេរិក សោហ៊ុយធ្វើដំណើរ ១០ដុល្លារនិងប្រាក់សម្រាប់អាហារពេលធ្វើដំណើរតាមផ្លូវ៥ដុល្លារ “។ លោក អុិត សំហេង បានមានប្រសាសន៍ថា កិច្ចព្រមព្រៀងនេះនឹងជួយពន្លឿនការវិលត្រឡប់របស់កម្មករទៅប្រទេសថៃវិញ ហើយលោកបានបន្ថែមថា មានតែក្រុមហ៊ុនស្របច្បាប់ប៉ុណ្ណោះនឹងផ្ដល់សេវានេះ។
លោកបានបន្ថែមថា ” ក្រសួងនឹងតម្រូវឲ្យបណ្ដាក្រុមហ៊ុនជ្រើសរើសពលករចែករំលែកព័ត៌មានពាក់ព័ន្ធទាំងអស់ដែលទាក់ទងនឹងកម្មករ និងក្រុមហ៊ុនថៃ ជាមួយក្រសួងការងារ”។
មុនពេលលិខិតឆ្លងដែននិងទិដ្ឋាការការងារត្រូវដំណើរការ កម្មករទាំងអស់ ត្រូវទទួលកិច្ចសន្យាដោយខ្លួនឯងផ្ទាល់ ឬតាមរយៈទីភ្នាក់ងារពីក្រុមហ៊ុនថៃដែលមានអាជ្ញាប័ណ្ណ ដែលចែងច្បាស់អំពីលក្ខខណ្ឌការងារ និងប្រាក់ខែស្របតាមច្បាប់ថៃ។
លោក សំហេង បានទទួលស្គាល់ថា គោលការណ៍ថ្មីនេះនឹងមិនអាចដោះស្រាយរាល់បញ្ហានោះទេ ប៉ុន្តែបើធ្វើបានត្រឹមត្រូវ គោលការណ៍ថ្មីនេះនឹងកាត់បន្ថយបានច្រើននូវការរំលោភសិទ្ធិកម្មករខ្មែរ ពីព្រោះពួកគេនឹងត្រូវជួលឲ្យធ្វើការដោយស្របច្បាប់។ លោករដ្ឋមន្ត្រីបានបន្ថែមថា ” ប្រសិនបើយើងអនុវត្តកិច្ចការនេះបានត្រឹមត្រូវ វានឹងជួយបន្ថយគ្រោះថ្នាក់ និងធ្វើឲ្យកម្មករមានសុវត្ថិភាពជាងមុន”។
លោក ពេជ្រ វណ្ណា ប្រធានការិយាល័យទំនាក់ទំនងព្រំដែនកម្ពុជា-ថៃ បានមានប្រសាសន៍ថា កម្មករច្រើនជាង២៤០.០០០នាក់បានភៀសខ្លួនពីប្រទេសថៃគិតមកត្រឹមថ្ងៃម្សិលមិញ ខណៈដែលកម្មករប្រហែល១០.០០០នាក់ប៉ុណ្ណោះបានធ្វើដំណើរចូលប្រទេសថៃវិញ។
លោកបានមានប្រសាសន៍ថា ” នេះជាគោលនយោបាយដ៏ល្អមួយ ដែលរដ្ឋាភិបាលបានបង្កើតឡើង”។ លោកបានបន្ថែមថា តម្លៃលិខិតឆ្លងដែន និងប័ណ្ណពលករថ្លៃហួសហេតុ បានបង្ខំឲ្យប្រជាជនខ្មែរជាច្រើននាក់ចូលទៅប្រទេសថៃដោយខុសច្បាប់ ជាញឹកញាប់ធ្វើការងារដែលត្រូវគេកេងប្រវ័ញ្ច។ លោកបានបន្ថែមថា “កាលពីមុន ពេលពួកគេទៅធ្វើការនៅទីនោះ ពួកគេជាច្រើននាក់ត្រូវបានបញ្ជូនទៅធ្វើការនៅលើកោះ ហើយមិនទទួលបានប្រាក់ខែទេ។ អ្នកផ្សេងទៀតត្រូវបានគេចាប់ខ្លួន និងជាប់ពន្ធនាគារ”។
ទោះជាយ៉ាងណា លោកស្រី ណាលី ពីឡូក ប្រធានអង្គការសិទ្ធិមនុស្សលីកាដូ បានចោទសួរអំពីសេចក្ដីសម្រេចរបស់រដ្ឋាភិបាលក្នុងការផ្ដល់ឲ្យទីភ្នាក់ងារជ្រើសរើសពលករនូវការគ្រប់គ្រងលើដំណើរការនៃការធ្វើចំណាកស្រុកទៅប្រទេសថៃ ហើយក្រុមហ៊ុនជាច្រើនមានប្រវត្តិសិទ្ធិមនុស្សមិនល្អ និងជាប់ចោទថាបានបញ្ជូនកម្មករទៅឲ្យគេធ្វើបាប។
លោកស្រីបានមានប្រសាសន៍ថា ” ដោយសារអសមត្ថភាពរបស់រដ្ឋាភិបាលក្នុងការគ្រប់គ្រងវិស័យនេះក្នុងពេលកន្លងមក និងការដោះស្រាយការរំលោភបំពានធ្ងន់ធ្ងរពីសំណាក់ទីភ្នាក់ងារបញ្ជូនពលករនោះ វាជាទង្វើគួរឲ្យព្រួយបារម្ភណាស់”។
លោក អាន ប៊ុនហាក់ នាយកទីភ្នាក់ងារជ្រើសរើសពលករ Top Manpower បានមានប្រសាសន៍ថា តាមកិច្ចព្រមព្រៀងនេះ ក្រុមហ៊ុនជ្រើសរើសពលករនឹងមិនយកកម្រៃសេវាពីកម្មករទេ និងពឹងផ្អែកលើប្រាក់កម្រៃពីនិយោជកថៃសម្រាប់ការជ្រើសរើសពលករខ្មែរ។
លោក ប៊ុនហាក់ បានមានប្រសាសន៍ថា កម្មករស្របច្បាប់នៅប្រទេសថៃរងការរំលោភបំពានតិចជាងនៅប្រទេសម៉ាឡេស៊ី ដែលនៅទីនោះលក្ខខណ្ឌការងារសម្រាប់អ្នកបម្រើការងារតាមផ្ទះអន់ណាស់ រហូតដល់លោកនាយករដ្ឋមន្ត្រី ហ៊ុន សែន បានប្រាប់ភ្នាក់ងារជ្រើសរើសពលករកាលពីខែតុលា ឆ្នាំ២០១១ ឲ្យបញ្ឈប់បញ្ជូនស្ត្រីបម្រើការតាមផ្ទះទៅធ្វើការនៅទីនោះ។
លោកបានមានប្រសាសន៍ថា ” ជាទូទៅ ប្រទេសថៃមិនដូចប្រទេសម៉ាឡេស៊ីទេ ពីព្រោះប្រភេទការងារដែលពួកគេទៅធ្វើគឺនៅក្នុងរោងចក្រ ដែលខុសគ្នាពីការងារជាស្ត្រីបម្រើតាមផ្ទះ”។
ក៏ប៉ុន្តែ លោក អានឌី ហល ជាអ្នកស្រាវជ្រាវ និងជាសកម្មជនសិទ្ធិចំណាកស្រុកមានមូលដ្ឋាននៅក្រុងបាងកក បាននិយាយថា ពលរដ្ឋខ្មែរនៅប្រទេសថៃបានរាយការណ៍អំពីការរំលោភបំពានជាច្រើនពីសំណាក់ក្រុមហ៊ុនបញ្ជូនពលករ។ លោកបានមានប្រសាសន៍ថា ផែនការរបស់រដ្ឋាភិបាលកម្ពុជានឹងបង្កើនការគ្រប់គ្រង ដែលក្រុមហ៊ុនឯកជនមានស្រាប់លើកម្មករចំណាកស្រុក។
លោកបានបន្ថែមថា ” ក្រុមហ៊ុនបញ្ជូនពលករខ្មែរជាច្រើនមានប្រវត្តិមិនល្អ ហើយភាគច្រើននៃកម្មករខ្មែរដែលខ្ញុំបានជួបនៅប្រទេសថៃរាល់ថ្ងៃ នៅពេលពួកគេកំពុងធ្វើការនោះ បានធ្លាក់ចូលក្នុងស្ថានភាពជំពាក់បំណុលគេ ហើយលិខិតឆ្លងដែន និងកាតអេធីអិម ត្រូវបានដកហូតដើម្បីធានាការបង់បំណុល”។ លោកបានបន្ថែមថា ការសុំការគាំទ្រពីអង្គការអន្តររដ្ឋាភិបាលឲ្យត្រួតពិនិត្យកម្មវិធីនេះ គួរតែជាអាទិភាព ពីព្រោះការត្រួតពិនិត្យរបស់រដ្ឋាភិបាលពីមុនមកសឹងតែមិនមានទេ។
លោក ប្រេដ ឌីកសុន ប្រធានក្រុមការងារនៅអង្គការអន្តរជាតិទេសន្តរប្រវេសន៍នៅក្រុងប៉ោយប៉ែត ទីដែលកម្មករភាគច្រើនបានវិលត្រឡប់មកវិញក្នុងពេលប៉ុន្មានសប្ដាហ៍ថ្មីៗនេះ បាននិយាយថា អង្គការអន្តរជាតិទេសន្តរប្រវេសន៍ កំពុងស្វែងរកមូលនិធិដើម្បីជួយរដ្ឋាភិបាលដែលជួបការលំបាកមួយចំនួន រួមមានទំាងការជួយកម្មករឲ្យទទួលបានឯកសារសម្គាល់ខ្លួនដែលពួកគេត្រូវការចាំបាច់ដើម្បីត្រឡប់ទៅប្រទេសថៃវិញ។ លោកបានមានប្រសាសន៍ថា ” តម្លៃខ្ពស់នឹងដំណើរការយូរគឺជាការរារាំងកម្មករមិនឲ្យធ្វើចំណាកស្រុកដោយស្របច្បាប់”៕ មានិត