អស់រយៈពេល២១ឆ្នាំហើយ អ្នកគ្រូ ស្រី បូរ៉ានី បានបង្រៀន សង្កេត និងវាយតម្លៃសិស្ស ហើយអ្នកគ្រូក៏បានទារលុយពីពួកគេដើម្បីជួយឲ្យពួកគេទទួលបាននិទ្ទេសល្អអស់រយៈពេល២១ឆ្នាំដែរ។
ទោះជាយា៉ងណានៅឆ្នាំនេះ គឺជាលើកដំបូងហើយដែលប្រាក់ចំណូលដ៏ធំតែមួយគត់របស់អ្នកគ្រូ បូរ៉ានី ក្រៅពីប្រាក់ខែគ្រូបង្រៀនបន្តិចបន្តួចរបស់អ្នកគ្រូ ត្រូវបានកាត់ផ្ដាច់ នៅពេលដែលក្រសួងអប់រំស្នើឲ្យអង្គភាពប្រឆាំងអំពើពុករលួយជួយទប់ស្កាត់ការសូកប៉ាន់ និងការលួចចម្លង ដែលបានធ្វើឲ្យប៉ះពាល់ដល់ការប្រឡងមធ្យមសិក្សាទុតិយភូមិជាយូរមកហើយ។
អ្នកគ្រូ បូរ៉ានី អាយុ៤៣ឆ្នាំបាននិយាយនៅក្នុងបរិវេណវិទ្យាល័យបាក់ទូក ក្រោយការបិទការប្រឡងកាលពីថ្ងៃអង្គារថា ” ខ្ញុំអាចរកលុយបានប្រហែល២០០.០០០រៀលពីសិស្សអំឡុងពេលប្រឡងថ្នាក់ជាតិម្ដងៗ ប៉ុន្តែឆ្នាំនេះខ្ញុំមិនអាចរកលុយបានពីសិស្សទាល់តែសោះ។ ពីមុន ការប្រឡងមិនសូវតឹងរ៉ឹងទេ ឥឡូវនេះវាបានប្រែក្លាយ១៨០ដឺក្រេ”។
តាមសំណើរបស់ក្រសួងអប់រំ ដែលដឹកនាំដោយលោក ហង់ ជួន ណារ៉ុន រដ្ឋមន្ត្រីកែទម្រង់ដែលទើបតែងតាំងថ្មី និងមានសញ្ញាបត្របរិញ្ញាបត្រជាន់ខ្ពស់ផ្នែកសេដ្ឋកិច្ចពីទីក្រុងមូស្គូ នោះ អង្គភាពប្រឆាំងអំពើពុករលួយបានដាក់មន្ត្រីនៅតាមមណ្ឌលប្រឡងនីមួយៗក្នុងចំណោមមណ្ឌលទាំង១៥៤នៅទូទាំងប្រទេស ហើយបានដាក់អ្នកស្ម័គ្រចិត្តជាង២.០០០នាក់ឲ្យឃ្លាំមើលការប្រឡងនេះ។
ក្រុមការងាររបស់អង្គភាពប្រឆាំងអំពើពុករលួយបានសហការជាមួយក្រុមការងាររបស់ក្រសួង ដែលមានគ្រូបង្រៀនពីរនាក់នៅក្នុងបន្ទប់នីមួយៗ អ្នកត្រួតពិនិត្យអគារនីមួយៗ អធិការកិច្ចម្នាក់ និងប្រធានម្នាក់នៅតាមមណ្ឌលប្រឡងនីមួយៗ។
ក្រុមការងាររបស់អង្គភាពប្រឆាំងអំពើពុករលួយត្រូវបានគេជូនដំណឹងថា គ្រូនិងមេប្រយោគត្រូវបានឃ្លាំមើលយ៉ាងដិតដល់ដូចបេក្ខជនប្រឡងដែរ ព្រោះពួកគេជាប់ពាក់ព័ន្ធនៅក្នុងការឃុបឃិតធ្វើឲ្យសិស្សទទួលបាននិទ្ទេសខ្ពស់ ដោយធ្វើឲ្យគ្រូបង្រៀនត្រឡប់ទៅផ្ទះវិញទាំងកាបូបស្វិត។គ្រូបង្រៀនមិនចូលចិត្តការសង្កេតការណ៍របស់អ្នកស្ម័គ្រចិត្តក្មេងៗទាំងនេះទេ។
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ ដែលមានសមាជិកជាង១០.០០០នាក់ និងដើរតួជាអ្នករិះគន់យ៉ាងខ្លាំងចំពោះការប្រព្រឹត្តរបស់រដ្ឋាភិបាលចំពោះគ្រូបង្រៀនរបស់ខ្លួននោះ បានមានប្រសាសន៍ថា ” គ្រូខឹង ពីព្រោះអ្នកសង្កេតការណ៍ទាំងនោះបានបញ្ជាពួកគាត់។
លោក រ៉ុង ឈុន ក៏ដូចជាគ្រូបង្រៀនជាច្រើនទៀត ដែលគេបាននិយាយជាមួយអំឡុងពេលប្រឡងពីរថ្ងៃនេះ បានមានប្រសាសន៍ថា អ្នកសង្កេតការណ៍វ័យក្មេងចូលមកគ្រប់គ្រងគ្រូបង្រៀន និងបញ្ជាអ្នកមានវិជ្ជាជីវៈ ដែលអ្នកខ្លះបានបម្រើការងារជាច្រើនទសវត្សរ៍មកហើយ ហើយការធ្វើបែបនេះធ្វើឲ្យប៉ះពាល់ដល់សេចក្ដីថ្លៃថ្នូររបស់ពួកគាត់។
អ្នកគ្រូ បូរ៉ានី បាននិយាយថា ” ខ្ញុំមិនសប្បាយចិត្តទេ ដោយសារអង្គភាពប្រឆាំងអំពើពុករលួយអនុញ្ញាតឲ្យអ្នកសង្កេតការណ៍ក្មេងៗត្រួតត្រាខ្ញុំ ព្រោះខ្ញុំមានបទពិសោធន៍ជាគ្រូបង្រៀនប្រហែល២០ឆ្នាំមកហើយ”។
នៅពេលទាក់ទងកាលពីម្សិលមិញ លោក រស់ សាលីន ប្រធានខុទ្ទកាល័យរបស់លោក ហង់ ជួន ណារ៉ុន និងជាអ្នកនាំពាក្យក្រសួងអប់រំ បានអះអាងថា តាមពិតគ្រូបង្រៀនបានកោតសរសើរដល់ការជួយរបស់អង្គភាពប្រឆាំងអំពើពុករលួយនៅពេលប្រឡងនេះ។
លោក សាលីន បានមានប្រសាសន៍ថា ” ប្រសិនបើពួកគេធ្វើតែឯង ឬមានតែអនុរក្សពីរនាក់នៅក្នុងបន្ទប់នោះ ពួកគាត់ច្បាស់ជាពិបាកធ្វើការហើយ។ អង្គភាពប្រឆាំងអំពើពុករលួយ និងអនុរក្សធ្វើការរួមគ្នាដើម្បីធ្វើឲ្យការប្រឡងនេះស្អាតស្អំ”។
ទោះជាយ៉ាងណា ហេតុការណ៍មួយដែលបានកើតឡើងនៅសាលាបឋមសិក្សាចតុមុខ គឺជាភ័ស្តុតាងបង្ហាញថា ទំនាក់ទំនងរវាងក្រុមទាំងពីរជួនកាលមិនសូវជាល្អទេ។
អ៊ុន ទូច អាយុ២៧ឆ្នាំ ជាភ្នាក់ងារអង្គភាពប្រឆាំងអំពើពុករលួយដែលបានដឹកនាំក្រុមអ្នកសង្កេតការណ៍នៅសាលាចតុមុខ បានលើកឡើងអំពីកំហឹងរបស់មេប្រយោគមួយចំនួនក្នុងរយៈពេលពីរថ្ងៃនេះ ហើយជួនកាលបានជាប់ពាក់ព័ន្ធក្នុងការប៉ះទង្គិចសម្ដីគ្នាយ៉ាងខ្លាំង ដោយសារសកម្មភាពសង្កេតការណ៍ហួសហេតុរបស់កញ្ញាទៅលើបេក្ខជន។
ក្រោយការប្រឡងនេះ កញ្ញា អ៊ុន ទូច ក៏ដូចជាអ្នកស្មគ្រចិត្តអង្គភាពប្រឆាំងអំពើពុករលួយទាំងអស់បានធ្វើរបាយការណ៍បញ្ជាក់ពីអ្វីដែលកញ្ញាបានឃើញ។ កញ្ញាបានវាយតម្លៃថា មេប្រយោគមួយចំនួនមិនរារាំងបេក្ខជនមិនឲ្យចម្លងគ្នាទេ។
កញ្ញា ទូច បាននិយាយថា ” វាគឺជារឿងពិតនៅក្នុងបន្ទប់។ ខ្ញុំគ្រាន់តែធ្វើរបាយការណ៍អំពីអ្វីដែលខ្ញុំបានឃើញប៉ុណ្ណោះ”។
លោក នាង សាខន ប្រធានមណ្ឌលចតុមុខ មិនចាប់អារម្មណ៍ចំពោះការវិនិច្ឆ័យរបស់កញ្ញា ទូច ទេ ហើយលោកមិនព្រមចុះហត្ថលេខាលើរបាយការណ៍នោះឡើយ។
លោក សាខន បានប្រាប់កញ្ញា ទូច ថា ” របាយការណ៍នេះមិនអាចទទួលយកបានទេ ហើយខ្ញុំមិនចុះហត្ថលេខាឡើយ។ ប្រសិនបើខ្ញុំចុះហត្ថលេខាលើរបាយការណ៍នេះ លើកក្រោយគ្មានគ្រូបង្រៀនចូលរួមទៀតទេ។
ទោះជាយ៉ាងណា កញ្ញា ទូច នៅតែគាំទ្ររបាយការណ៍របស់ខ្លួន ហើយបានបញ្ជូនរបាយការណ៍នោះទៅឲ្យអង្គភាពប្រឆាំងអំពើពុករលួយ ដោយគ្មានហត្ថលេខារបស់លោក សាខន។
អ្នកសង្កេតការណ៍ជាច្រើនដែលត្រូវបានសាកសួរបានរាយការណ៍ថា មេប្រយោគមិនសប្បាយចិត្តនឹងវត្តមានរបស់អង្គភាពប្រឆាំងអំពើពុករលួយ ដែលរារាំងបានច្រើនដល់ទម្លាប់រកលុយនៅពេលប្រឡងនោះទេ។
កញ្ញា គាំ ច័ន្ទរស្មី អ្នកសង្កេតការណ៍នៅសាលាបឋមសិក្សាព្រះនរោត្តម នៅក្នុងទីក្រុងភ្នំពេញ បាននិយាយថា មន្ត្រីក្រសួងអប់រំដែលទទួលបន្ទុកឆេកបេក្ខជនប្រឡង នៅពេលពួកគេចូលក្នុងបរិវេណសាលានេះ មិនឆេកបានល្អិតល្អន់ទេ។ កញ្ញា រស្មី បាននិយាយថា ” ពួកគេបិទភ្នែកម្ខាងបើកភ្នែកម្ខាង”។
កញ្ញាបាននិយាយថា គ្រូនិងសិស្សនៅមណ្ឌលប្រឡងនេះ បានបង្កើតប្រព័ន្ធមួយដើម្បីឲ្យដំណឹងគ្នាអំពីការចល័តរបស់អ្នកសង្កេតការណ៍អង្គភាពប្រឆាំងអំពើពុករលួយ និងបានលើកឡើងថា មានការសូកប៉ាន់នៅទីនោះ។
កញ្ញាបាននិយាយថា ” គ្រូបង្រៀនមួយចំនួនបានឲ្យសញ្ញាទៅសិស្សនៅពេលយើងទៅជិតដល់បន្ទប់ពួកគេ។ មេប្រយោគធ្វើឲ្យយើងដឹងច្បាស់ថា ពួកគេមិនចូលចិត្តយើងនៅពេលដែលពួកគេមើលមកយើង”។
លោក សាលីន មកពីក្រសួងអប់រំ បានបញ្ជាក់ថា មានទំនាក់ទំនងល្អរវាងក្រសួង និងអង្គភាពប្រឆាំងអំពើពុករលួយ ហើយគ្រូបង្រៀនបានបំពេញការងាររបស់ខ្លួនបានយ៉ាងល្អ។
ប៉ុន្តែសម្រាប់អ្នកគ្រូ បូរ៉ានី ក៏ដូចជាគ្រូបង្រៀនភាគច្រើនទៀតក្នុងចំណោមគ្រូបង្រៀនទូទាំងប្រទេសប្រហែល៨៨.០០០នាក់ពឹងផ្អែកលើការយកលុយក្រៅផ្លូវការ ដើម្បីបន្ថែមលើប្រាក់ខែប្រហែល១២០ដុល្លាររបស់គាត់។
អ្នកគ្រូ បូរ៉ានី បាននិយាយថា ” ឆ្នាំក្រោយមិនចាំបាច់ឲ្យក្រសួងប្រើយើងជាមេប្រយោគទៀតទេ ទុកឲ្យពួកគេប្រើអ្នកសង្កេតការណ៍ក្មេងៗទាំងនោះទៅ”៕ គឹមហឿន
(រាយការណ៍បន្ថែមដោយ MattBlomberg)