កាលពីម្សិលមិញ នគរបាលនៅក្នុងខេត្តកំពង់ឆ្នាំងត្រូវបានរារាំងមិនឲ្យចាប់ខ្លួនកម្មករ និងសមាជិកសហជីពនៅខាងក្រៅរោងចក្រកាត់ដេរមួយក្នុងស្រុកសាមគ្គីមានជ័យដោយក្រុមអ្នកតវ៉ាពោរពេញដោយកំហឹង ដែលបានទាញយកអ្នករួមការងារពីរនាក់របស់ខ្លួនចេញពីរថយន្តនគរបាលមកវិញ។
កម្មករប្រហែល៣.០០០នាក់ដែលធ្វើការនៅក្នុងរោងចក្រកាត់ដេរ Jiun Ye គ្រប់គ្រងដោយចិនបាននាំគ្នាធ្វើបាតុកម្មតាំងពីថ្ងៃច័ន្ទ មកម្លេ៉ះជុំវិញរឿងដែលរោងចក្រនេះមិនបានបញ្ចូលប្រាក់ឧបត្ថម្ភប្រចាំខែរបស់ពួកគេក្នុងក្រដាសបើកប្រាក់ខែចុងក្រោយ។
រោងចក្របានបន្ទោសលើបញ្ហាបច្ចេកទេសដែលមិនត្រូវបានបញ្ជាក់ឲ្យច្បាស់លាស់ ហើយបានស្នើឲ្យកម្មករយោគយល់ ខណៈរោងចក្រកំពុងកែតម្រូវកំហុសឆ្គង ប៉ុន្តែ កម្មករបានលើកឡើងថា រោងចក្រកំពុងព្យាយាមបោកប្រាស់ពួកគេ។
ការជួបចរចាគ្នារវាងសហជីព និងតំណាងរោងចក្រនៅរោងចក្រនេះកាលពីថ្ងៃពុធ មិនអាចដោះស្រាយបញ្ហានេះបានទេ។ តែផ្ទុយទៅវិញសហជីពទទួលបានដីកាបង្គាប់មួយពីសាលាដំបូងខេត្ត ដោយបង្គាប់ឲ្យកម្មករបញ្ឈប់ការបិទផ្លូវជាតិលេខ៥ ហើយត្រឡប់មកធ្វើការវិញ។
កម្មករដែលដឹកនាំដោយសហព័ន្ធសហជីពស្មារតីកម្មករខ្មែរមិនបានយកចិត្តទុកដាក់ចំពោះដីកាបង្គាប់នោះទេ ហើយបានបន្តកូដកម្មរបស់ខ្លួននៅខាងក្រៅរោងចក្រកាលពីព្រឹកម្សិលមិញ ដោយនៅពេលមួយនគរបាលបានមកដល់ ហើយបានចាប់ផ្ដើមធ្វើការចាប់ខ្លួនតែម្តង។
លោក មុំ សៀក ប្រធានសហជីពបានឲ្យដឹងថា នៅម៉ោងប្រហែល៩ព្រឹក នគរបាលបានចាប់ខ្លួន លោក អំ វុទ្ធី តំណាងសហជីពនៅរោងចក្រ និងសមាជិកសហជីពម្នាក់ទៀតដែលលោកមិនចាំឈ្មោះ ហើយបញ្ជូនពួកគេទាំងពីរចូលក្នុងរថយន្តនគរបាល។ ប៉ុន្តែ អ្នកតវ៉ាមួយចំនួនបានព័ទ្ធរថយន្តនេះ ហើយយកដុំថ្មគប់ និងវាយបំបែកកញ្ចក់រថយន្ត ដើម្បីរំដោះអ្នកទាំងពីរ។
លោក សៀក បានលើកឡើងថា បន្ទាប់មកមន្ត្រីនគរបាលស្រុកប្រហែល២០០នាក់បានព្យាយាមសម្រុកចូលក្នុងក្រុមកម្មករធ្វើកូដកម្ម ដើម្បីព្យាយាមចាប់ខ្លួនបន្ថែមទៀត ប៉ុន្តែត្រូវបានរារាំង។
លោកបានមានប្រសាសន៍ថា “នគរបាលមិនបានបង្ហាញដីកាចាប់ខ្លួនណាមួយដល់តំណាងសហជីពរបស់យើងទេ។ប្រសិនបើពួកគេមានដីកាចាប់ខ្លួននោះ ម្លេ៉ះពួកគេមិនបានគេចខ្លួនឡើយ”។
លោក សៀក បានឲ្យដឹងទៀតថា បន្ទាប់មកកម្មករប្រហែល១.០០០នាក់បាននាំគ្នាហែក្បួនទៅខេត្តកំពង់ស្ពឺ ដែលជាប់ខេត្តកំពង់ឆ្នាំងដើម្បីគេចចេញពីដែនសមត្ថកិច្ចនគរបាល ហើយនៅតាមផ្លូវពួកគេបានការពារសមាជិកសហជីព និងអ្នករួមការងារជាមួយ ដែលនគរបាលកំពុងតាមចាប់ខ្លួន។
លោក គង់ ច័ន្ទមុនី អ្នកសម្របសម្រួលរបស់អង្គការលីកាដូប្រចាំខេត្តកំពង់ឆ្នាំង បានលើកឡើងថា លោកបានឃើញព្រឹត្តិការណ៍នោះ ហើយអាចផ្តល់ភ័ស្តុតាងទាក់ទិននឹងរឿងដែលលោក សៀក បានរៀបរាប់។
លោកបានមានប្រសាសន៍ថា “យើងបានឃើញមន្ត្រីនគរបាលខេត្ត និងស្រុកប្រហែល២០០នាក់មកបំបែកកូដកម្ម ហើយស្វែងរកសមាជិកសហជីព ហើយបន្ទាប់មកទៀតបានដេញតាមកម្មករដែលកំពុងហែក្បួន និងដែលបានការពារសមាជិកសហជីព”។
លោក ង៉ែត រស្មី ប្រធានគ្រប់គ្រងផ្នែកធនធានមនុស្សនៅ រោងចក្រ Jiun Ye បានឲ្យដឹងថា រោងចក្របានដាក់ពាក្យបណ្ដឹងទើបមានដីកាបង្គាប់ពីតុលាការឲ្យចាប់ខ្លួនលោក វុទ្ធី និងសមាជិកសហជីពជាង១០នាក់ផ្សេងទៀត។
លោកបាននិយាយថា “យើងបានដាក់ពាក្យប្ដឹងពួកគេពីបទញុះញង់ និងបំផ្លិចបំផ្លាញទ្រព្យសម្បត្តិ ព្រោះពួកគេបានញុះញង់កម្មករឲ្យចូលរួមធ្វើកូដកម្ម និងបំផ្លិចបំផ្លាញទ្រព្យសម្បត្តិក្រុមហ៊ុន”។
លោក រស្មី បានឲ្យដឹងទៀតថា កម្មករបានវាយបំបែកកញ្ចក់នៅប៉ុស្តិ៍យាមមួយដែលស្ថិតនៅខាងក្រៅរោងចក្រ Yiun Ye ហើយបានវាយរំលំខ្លោងទ្វាររោងចក្រ។
លោក ដួង ហុង អធិការនគរបាលស្រុកបានបញ្ជាក់ថា នគរបាលបានទៅរោងចក្រដើម្បីបំបែកកូដកម្ម។ លោកបានមានប្រសាសន៍ថា “កងកម្លាំងរបស់យើងបានទៅទីនោះដើម្បី រារាំងកម្មករកុំឲ្យធ្វើបាតុកម្មខុសច្បាប់ ព្រោះកម្មករបំផ្លិចបំផ្លាញទ្រព្យសម្បត្តិរោងចក្រ”។
លោក ដួង ហុង ក៏បានលើកឡើងដែរថា បុរសពីរនាក់ត្រូវបានឃាត់ខ្លួនមួយរយៈពេលខ្លីប៉ុន្តែបានបដិសេធមិនរៀបរាប់លម្អិតឡើយ។
លោក សៀក បានឲ្យដឹងបន្តទៀតថា កម្មករនឹងបន្តធ្វើការតវ៉ាទៀតនៅថ្ងៃនេះ៕គឹមហឿន