បន្ទាប់ពីក្រុមហ៊ុនអភិវឌ្ឍន៍ 7NG បានបញ្ចប់ការបណ្ដេញចេញដ៏ហិង្សាលើអ្នកភូមិជាង១.៤០០គ្រួសារពីសហគមន៍ដីក្រហមក្នុងរាជធានីភ្នំពេញកាលពីឆ្នាំ២០០៩រួច ក្រុមហ៊ុននេះកំពុងចាប់អារម្មណ៍លើអគារ ប៊ូឌីង (Building) ដែលនៅជាប់នោះបន្តទៀត។
អគារប្រវត្តិសាស្ត្រដែលត្រូវបានសាងសង់ក្រោមគម្រោងលំនៅដ្ឋានដែលមានតម្លៃសមរម្យក្រោមការដឹកនាំរបស់ព្រះមហាក្សត្រ នរោត្តម សីហនុ ក្នុងឆ្នាំ១៩៦៣ ហើយឥឡូវនេះគឺជាកន្លែងសម្រាប់អ្នកភូមិជាង៦០០គ្រួសារនោះ គឺជាអគារចុងក្រោយ ដែលខណ្ឌចែកដីដ៏សំខាន់របស់ក្រុមហ៊ុន 7NG ពីមហាវិថីសុធារស។
លោក ស្រី សុធា ប្រធានក្រុមហ៊ុន 7NG បាននិយាយនៅពេលនោះថា “ក្រុមហ៊ុននឹងពិភាក្សាជាមួយសាលារាជធានីអំពីអ្នកភូមិទាំងនោះ ទាក់ទិននឹងការដែលអាចមានការផ្លាស់ទីលំនៅថ្មី”។
មកទល់នឹងពេលនេះ៥ឆ្នាំកន្លងមកហើយ ហើយដោយសារគម្រោងអភិវឌ្ឍន៍របស់ក្រុមហ៊ុន7NG សម្រាប់តំបន់នោះនៅមិនទាន់ចេញជារូបរាងអ្វីនៅឡើយ អ្នកភូមិ និងបុគ្គលិករបស់អង្គការក្រៅរដ្ឋាភិបាលនៅអគារប៊ូឌីង កំពុងព្រួយបារម្ភខ្លាចក្រែងក្រុមហ៊ុននេះផ្ដោតការចាប់អារម្មណ៍មកលើដីរបស់ពួកគាត់បន្តទៀត។ អ្នកភូមិមួយចំនួនដែលត្រូវបានសម្ភាសនៅក្នុងខែនេះបាននិយាយថា តំណាងក្រុមហ៊ុន 7NG កំពុងទិញយកលំនៅដ្ឋាននៅក្នុងអគារនេះដោយស្ងាត់ៗ។
ឃួន លីណា អាយុ២៥ឆ្នាំ ជាបុគ្គលិកបម្រើការងារសង្គម និងជាគ្រូបង្រៀននៅអគារប៊ូឌីងនេះបាននិយាយថា ” ពួកគេបានមកដោយស្ងាត់ៗបំផុត ហើយទិញយកលំនៅដ្ឋានម្ដងមួយៗ។ ជួនកាលវាដោយស្ងាត់ៗបំផុត ប៉ុន្តែនៅដំណាច់ឆ្នាំ២០១៣ និងក្នុងឆ្នាំ២០១៤មានការចរចាគ្នាជាច្រើន។ ពួកគេបានមកចរចារឿងតម្លៃ ទិញ និងលក់ ហើយវាប្រហែលជាពួកគេបានទិញលំនៅដ្ឋានប្រហែល២០ ឬក៏អាចច្រើនជាងនេះផងមើលទៅ”។
ឈួន ចាន់វណ្ឌី អាយុ២៧ឆ្នាំ ជាអ្នកភូមិនៅអគារប៊ូឌីងនេះបាននិយាយថា “ពួកគេបានមក ហើយឲ្យលុយ២០.០០០ដុល្លារដល់គ្រួសាររបស់ខ្ញុំ។ យើងមិនមានព័ត៌មានលម្អិតសម្រាប់ទាក់ទងពួកគេទេ ពីព្រោះពួកគេបានមកដោយស្ងាត់ៗបំផុត ហើយយើងមិនបានទទួលយកការផ្ដល់ប្រាក់ចំនួនប៉ុណ្ណឹងឡើយ”។
ចាន់វណ្ឌី ក៏បានលើកឡើងដែរថា គាត់គិតថា ក្រុមហ៊ុន 7NG ទទួលបានជោគជ័យក្នុងការទិញផ្ទះល្វែងផ្សេងៗទៀតក្នុងពេលថ្មីៗនេះ ព្រោះថា ផ្ទះមួយចំនួនដែលគេធ្លាប់កាន់កាប់ពីមុនមកឥឡូវនេះត្រូវបានចាក់សោហើយ។ គាត់បានបន្ថែមថា ” ក្រុមហ៊ុន 7NG បានមកទិញលំនៅដ្ឋាន បន្ទាប់មកចាក់សោ”។
នៅក្នុងអគារប៊ូឌីង ដែលបានក្លាយទៅជាកន្លែងសម្រាប់សិល្បករ និងមន្ត្រីរាជការស្នាក់នៅពេលរាជធានីភ្នំពេញមានប្រជាប្រិយភាពឡើងវិញក្រោយពេលរបបខ្មែរក្រហមបានដួលរលំក្នុងឆ្នាំ១៩៧៩ សាលារៀនដែលគ្រប់គ្រងដោយអង្គការក្រៅរដ្ឋាភិបាលមួយក៏ទទួលរងសម្ពាធពីក្រុមហ៊ុន 7NG ដែរ។
សាលា Aziza ដែលផ្ដល់ការអប់រំ និងសេវាថែទាំសុខភាពដោយឥតគិតថ្លៃដល់អ្នកភូមិរស់នៅអគារប៊ូឌីង និងតំបន់ជុំវិញនោះ គឺកំពុងតែចរចាជាមួយក្រុមហ៊ុន 7NG បន្ទាប់ពីក្រុមហ៊ុននេះបានទិញបន្ទប់ចំនួនពីរដែលសាលាបានជួល។
លោក ផា សុធា អ្នកគ្រប់គ្រងទូទៅនៅសាលានេះបាននិយាយថា “ប្រហែលជាបីខែកន្លងមកហើយ ក្រុមហ៊ុន 7NG បានហៅទូរស័ព្ទមកហើយប្រាប់ថា យើងត្រូវតែរើចេញនៅពេលចប់កិច្ចសន្យារបស់យើង”។
លោក សុធា បានឲ្យដឹងថា លោកគ្រាន់តែដឹងថា អ្នកគួកជេរបស់ក្រុមហ៊ុន 7NG ដែលលោកបានដោះស្រាយជាមួយគឺជាស្ត្រីម្នាក់មានឈ្មោះ ” បង នី” ប៉ុណ្ណោះ ហើយថា បន្ទាប់ពីការចរចាមួយចំនួនស្ត្រីរូបនេះបានគូសបញ្ជាក់ថា កិច្ចសន្យារបស់សាលានឹងត្រូវបន្ត។
លោកស្រី ស្រី ចន្ធូ នាយិកាក្រុមហ៊ុន 7NG បានបដិសេធថា ក្រុមហ៊ុនរបស់លោកស្រីមិនបានកាន់កាប់លំនៅដ្ឋានណាមួយនៅក្នុងអគារប៊ូឌីងនេះទេ ហើយបានលើកឡើងថា អ្នកដែលកំពុងនិយាយដូច្នោះ គឺកំពុងតែផ្សព្វផ្សាយ “ព័ត៌មានមិនពិត”។
លោកស្រី ចន្ធូ បានលើកឡើងទៀតថា ក្រុមហ៊ុន 7NG មានគម្រោងសាងសង់អគារលំនៅដ្ឋាននៅលើដីក្នុងសហគមន៍ដីក្រហមជាមួយ “ដៃគូបរទេស” ហើយថា សេចក្ដីលម្អិតនៃការអភិវឌ្ឍនោះនឹងត្រូវប្រាប់ឲ្យដឹងនៅខែក្រោយ។ លោកស្រីបានមានប្រសាសន៍ថា ” គម្រោងសាងសង់អគារលំនៅដ្ឋាននេះនឹងត្រូវសាងសង់តែនៅលើដីដែលយើងបានកាន់កាប់រួចហើយប៉ុណ្ណោះ”។
ប៉ុន្តែនៅក្នុងកិច្ចប្រជុំមួយនៅឯការិយាល័យរបស់លោកស្រីកាលពីសប្ដាហ៍មុន បុគ្គលិករបស់ក្រុមហ៊ុន 7NG ឈ្មោះ យុត ធានី អតីតអ្នករស់នៅក្នុងអគារប៊ូឌីងនេះបានពន្យល់ថា ក្រុមហ៊ុនបានបង្កើតអង្គការក្រៅរដ្ឋាភិបាលមួយឈ្មោះ សាមគ្គីដើម្បីសហព័ន្ធអ្នកក្រីក្ររស់នៅក្នុងតំបន់ក្រុង ដើម្បីជួយអ្នកក្រីក្រឲ្យក្លាយជាម្ចាស់ដីដោយការដោះដូរលំនៅដ្ឋានរបស់ពួកគាត់។
អង្គការក្រៅរដ្ឋាភិបាលដែលអ្នកស្រី ធានី ជាគណនេយ្យករនោះ កំពុងផ្ដល់រំលោះគ្មានការប្រាក់សម្រាប់ដីនៅក្នុងខេត្តកណ្ដាលដល់អ្នកភូមិរស់នៅអគារប៊ូឌីង និងអ្នកក្រីក្រក្នុងរាជធានីភ្នំពេញផ្សេងទៀត ជាថ្នូរនឹងលំនៅដ្ឋានសព្វថ្ងៃរបស់ពួកគាត់។ អ្នកស្រីបាននិយាយថា ” ក្រុមហ៊ុន 7NG ចង់ជួយអ្នកក្រីក្រ ដោយផ្ដល់រំលោះគ្មានការប្រាក់ ហើយនេះគឺជាឱកាសដ៏កម្រមួយ។ វាមិនគ្រាន់ជាឱកាសដ៏កម្រទេ ប៉ុន្តែវាមិនដែលមានពីមុនមកឡើយ”។
អ្នកស្រីបានបន្ថែមថា អ្នកភូមិដែលទទួលយកដំណោះស្រាយនេះ គឺតម្រូវឲ្យបង់មកឲ្យក្រុមហ៊ុនវិញត្រឹមតែ២០ដុល្លារប៉ុណ្ណោះក្នុងមួយខែ។
អ្នកស្រីបានបន្ថែមទៀតថា “គម្រោងរបស់ថៅកែខ្ញុំ គឺដើម្បីជួយអ្នកក្រីក្រ ដោយឲ្យពួកគាត់បង់ប្រាក់ត្រឹមតែ២០ដុល្លារប៉ុណ្ណោះ ហេតុដូច្នេះ ពួកគាត់គ្រប់គ្នាអាចមានលទ្ធភាព។ យើងមិនយកថ្លៃសេវា ឬថ្លៃរៀបចំឯកសារឡើយ”។
អ្នកស្រី ធានី បានលើកឡើងទៀតថា អ្នកភូមិជាច្រើននៅអគារប៊ូឌីង បានទទួលយកដំណោះស្រាយនេះ ហើយថា ក្រុមហ៊ុន 7NG បានកាន់កាប់លំនៅដ្ឋានចំនួន១១រួចហើយនៅក្នុងបរិវេណនេះ រួមទាំងលំនៅដ្ឋានចំនួនពីរ ដែលអ្នកស្រី ធានី បានកាន់កាប់ពីមុនមកផងដែរ។
អ្នកស្រីបានឲ្យដឹងបន្តទៀតថា សម្រាប់ពេលឥឡូវ សន្តិសុខរបស់ក្រុមហ៊ុន 7NG កំពុងរស់នៅក្នុងផ្ទះល្វែងទាំងនោះជាមួយគ្រួសាររបស់ពួកគេ។ សន្តិសុខត្រូវបានអនុញ្ញាតឲ្យរស់នៅទីនោះដោយឥតគិតថ្លៃ ហើយក្រុមហ៊ុនក៏អនុញ្ញាតឲ្យប្រើទឹក និងភ្លើងដោយឥតគិតថ្លៃផងដែរ។
អ្នកស្រី ធានី បានមានប្រសាសន៍ថា ” ឯកឧត្តម ដែលជាប្រធានសន្តិសុខគឺចិត្តល្អណាស់។ គាត់ដឹងពីការលំបាករបស់សន្តិសុខ”។ អ្នកស្រីក្រោយមកបានបញ្ជាក់ថា អ្នកស្រីកំពុងសំដៅទៅលើលោក ស្រី សុធា ប្រធានក្រុមហ៊ុន 7NG។
នៅពេលត្រូវបានសួរពីគោលបំណងរបស់អង្គការសាមគ្គីដើម្បីសហព័ន្ធអ្នកក្រីក្ររស់នៅតំបន់ក្រុង អ្នកគួកជេរូបនេះបានលើកឡើងថា អ្វីៗត្រូវបានធ្វើរួចហើយ ដោយមានការយល់ព្រមពីមន្ត្រីរដ្ឋាភិបាលដែលមានឋានៈខ្ពស់បំផុត។
អ្នកស្រី ធានី បានមានប្រសាសន៍ទៀតថា “វាគឺជាគំនិតផ្ដួចផ្ដើមរបស់លោកនាយករដ្ឋមន្ត្រី នេះបើតាមអ្វីដែលខ្ញុំបានដឹងពីប្រធានអង្គការរបស់ខ្ញុំ។ នៅពេលរដ្ឋាភិបាលតម្រូវឲ្យពលរដ្ឋផ្លាស់ប្ដូរទីលំនៅ យើងត្រូវការឲ្យអង្គការប្រមូលស្នាមមេដៃ និងត្រូវការឲ្យពលរដ្ឋយល់ព្រមចំពោះការដោះដូរនេះ”៕ គឹមហឿន