កាលពីម្សិលមិញបុគ្គលិកសព្វថ្ងៃរបស់ក្រុមហ៊ុន ភ្នំពេញ-សូរិយា ដឹកជញ្ជូនអ្នកដំណើរ ប្រហែល៥០នាក់ បាននាំគ្នាធ្វើការតវ៉ាតបតមួយនៅខាងក្រៅការិយាល័យរបស់ខ្លួន ដើម្បីទប់ទល់នឹងការតវ៉ាកំពុងបន្តរបស់អ្នកបើកបររថយន្តចំនួន១៧នាក់ដែលត្រូវបានបណ្ដេញចេញ និងសមាជិកសហជីពរាប់សិបនាក់ផ្សេងទៀត។
កាលពីថ្ងៃអាទិត្យ សមាជិកសហជីពជាង១០០នាក់ ដែលបានចូលរួមនៅក្នុងការតវ៉ារបស់អតីតអ្នកបើកបរទាំងនេះបាននាំគ្នាបិទផ្លូវនៅខាងមុខចំណតរថយន្តក្រុងសូរិយា ក្នុងខណ្ឌដូនពេញ ហើយបានរារាំងមិនឲ្យរថយន្តក្រុងចាកចេញ ដោយធ្វើឲ្យភ្ញៀវទេសចរខឹងរួចចុះពីលើរថយន្ត ហើយទៅរករថយន្តក្រុងផ្សេង។
កាលពីម្សិលមិញ បុគ្គលិករបស់ក្រុមហ៊ុនដឹកជញ្ជូននេះប្រហែល៥០នាក់ បានចាក់ចម្រៀងចង្វាក់ញាក់តាមធុងបាស ដើម្បីតបតនឹងឧបករណ៍បំពងសំឡេងរបស់សមាជិកសហជីព ដែលកំពុងទាមទារឲ្យអ្នកបើកបរដែលត្រូវបានគេបណ្ដេញចេញនោះមានការងារធ្វើឡើងវិញ។
ខណៈអ្នកតវ៉ានៅទល់មុខនោះបានស្រែកតវ៉ាកាន់តែខ្លាំងឡើងៗ បុគ្គលិកស្រីម្នាក់របស់ក្រុមហ៊ុន ភ្នំពេញ-សូរិយា ដឹកជញ្ជូនអ្នកដំណើរ បានប្រាប់ឲ្យអ្នករួមការងាររបស់ខ្លួនជួយស្រែកឡើងថា ” ទៅឲ្យឆ្ងាយទៅ! ទៅឲ្យឆ្ងាយទៅ! យើងមិនចង់ឲ្យពួកអ្នកឯងនៅទីនេះទេ។ ប្រសិនបើពួកអ្នកឯងធ្វើឲ្យក្រុមហ៊ុនមានបញ្ហា អ៊ីចឹងពួកអ្នកឯងក៏ធ្វើឲ្យយើងទាំងអស់គ្នាមានបញ្ហាដែរ”។
ការតវ៉ាប្រឆាំងគ្នាទៅវិញទៅមកនេះបានធ្វើឲ្យទេសចរសម្ពាយជាច្រើននាក់ ដែលកំពុងតែរង់ចាំរថយន្តក្រុងនោះត្រូវខកខានដំណើររបស់ពួកគេ ទោះបីជាមានវត្តមានមន្ត្រីនគរបាលរាជធានីជាង១០នាក់ក៏ដោយ។
ភ្ញៀវទេសចរម្នាក់ឈ្មោះ Lynn Devlin អាយុ២៨ឆ្នាំ មកពីប្រទេសអៀរឡង់ ដែលនៅតែរង់ចាំដើម្បីជិះរថយន្តក្រុងទៅខេត្តព្រះសីហនុនៅម៉ោង១១ព្រឹក បាននិយាយថា ” ខ្ញុំគ្មានអ្វីត្រូវនិយាយទេ ទាក់ទិនទៅនឹងរឿងដែលកំពុងបន្តនេះ វាហាក់បីដូចជាការប្រារព្ធពិធីជាងការតវ៉ា”។
ភ្ញៀវទេសចរជនជាតិកាណាដាម្នាក់ទៀតឈ្មោះ Laksh Khatter អាយុ៣៣ឆ្នាំ បាននិយាយថា គាត់គិតថា ការចាក់តន្ត្រី និងការនិយាយបែបកំប្លុកកំប្លែងនេះ គឺជាផ្នែកនៃព្រឹត្តិការណ៍ដែលរៀបចំដោយក្រុមហ៊ុន ភ្នំពេញ-សូរិយា ដឹកជញ្ជូនអ្នកដំណើរ។
គាត់បាននិយាយថា ” ខ្ញុំគិតថា វាគឺជាព្រឹត្តិការណ៍ផ្សព្វផ្សាយមួយ ប៉ុន្តែខ្ញុំបានសួរបុគ្គលិកនៅកន្លែងលក់សំបុត្រប្រាំលើកហើយថា តើអ្វីកំពុងកើតឡើង ប៉ុន្តែគ្មាននរណាម្នាក់និយាយអ្វីឡើយ”។
សមាជិកសហជីពបានចែកខិត្តប័ណ្ណដល់អ្នកដំណើរ ហើយមានអ្នកដំណើរពីរបីនាក់បានមកចូលរួមការតវ៉ាជាមួយអតីតអ្នកបើកបរ ដែលត្រូវបានបណ្ដេញចេញ ដោយសារការតវ៉ាជុំវិញលក្ខខណ្ឌការងារ និងការប៉ុនប៉ងបង្កើតសហជីពមួយ។
ភ្ញៀវទេសចរម្នាក់ឈ្មោះ Sheila Grasso អាយុ២៣ឆ្នាំ ដែលជាអ្នកស្ម័គ្រចិត្តចូលរួមការតវ៉ា និងដែលបានរង់ចាំជិះរថយន្តក្រុងទៅខេត្តសៀមរាបនៅម៉ោង១និង៣០នាទីរសៀលបាននិយាយថា នាងសូមសរសើរចំពោះការព្រួយបារម្ភរបស់អ្នកបើកបររថយន្តដែលត្រូវគេបណ្ដេញចោល ប៉ុន្តែនៅតែជិះរថយន្តក្រុុងរបស់ក្រុមហ៊ុន ភ្នំពេញ-សូរិយា ដឹកជញ្ជូនអ្នកដំណើរ ដដែល។ គាត់បាននិយាយថា “ខ្ញុំចាប់អារម្មណ៍លើស្ថានភាពរបស់ពួកគេ ប៉ុន្តែវាមិនអាចធ្វើឲ្យខ្ញុំឈប់ជិះរថយន្តក្រុងនេះបានទេ”។
យោងតាមលោក ចាន់ សុផាន់ណា អ្នកគ្រប់គ្រងទូទៅរបស់ក្រុមហ៊ុនដឹកជញ្ជូននេះបានឲ្យដឹងថា អ្នកតវ៉ាបានធ្វើឲ្យអ្នកដំណើរជាច្រើនទៅជិះរថយន្តផ្សេង។ លោកបាននិយាយថា “ថ្ងៃនេះយើងត្រូវលុបចោលសេវាដឹកជញ្ជូនភ្ញៀវប្រហែល៤០ភាគរយ ព្រោះគ្មានអ្នកដំណើរមកជិះ។ យើងសូមអភ័យទោសចំពោះអតិថិជនរបស់យើងទាំងអស់ចំពោះការពន្យារពេល ឬការរំខានដល់សេវាកម្មរបស់យើង ដែលបង្កឡើងដោយអ្នកតវ៉ាទាំងនេះ”។
លោក សុផាន់ណា បានឲ្យដឹងទៀតថា ចាប់តាំងពីខែមេសាមក ការតវ៉ាបានធ្វើឲ្យក្រុមហ៊ុនខាតបង់ប្រាក់ចំណេញពី៧០.០០០ដុល្លារទៅ៨០.០០០ដុល្លារក្នុងមួយខែ ហើយប្រសិនបើពួកគេនៅតែបន្តទៀតនោះ ក្រុមហ៊ុននឹងត្រូវបង្ខំចិត្តបិទទ្វារ។
ទោះបីជាមានបញ្ហាបែបនេះក្ដី តែលោកនឹងមិនទទួលយកការសម្រេចដែលមិនភ្ជាប់កាតព្វកិច្ចរបស់ក្រុមប្រឹក្សាអាជ្ញាកណ្ដាលដែលថា គួរតែផ្ដល់ការងារឲ្យអ្នកបើកបរទាំងនេះវិញឡើយ។
លោកបាននិយាយបន្តថា “ក្រុមប្រឹក្សានាយកនឹងមិនយល់ព្រមជួលអតីតអ្នកបើកបរទាំងនេះវិញទេ ប៉ុន្តែយើងសូមអំពាវនាវឲ្យពួកគេឈប់ធ្វើការតវ៉ា ហើយយើងនឹងផ្ដល់ប្រាក់អតីតភាពការងារពេញលេញឲ្យពួកគេ។ ប្រសិនបើពួកគេមិនឈប់ទេ យើងត្រូវតែបិទក្រុមហ៊ុន ហើយលក់រថយន្តរបស់យើងទាំងអស់ដើម្បីផ្ដល់ប្រាក់អតីតភាពការងារឲ្យបុគ្គលិកចំនួន៤៥០នាក់របស់យើង ដែលកំពុងធ្វើការងារនៅទីនេះ។ យើងសង្ឃឹមថា អតីតអ្នកបើកបរទាំងអស់យល់ពីចំណុចនេះ”៕ គឹមហឿន