កាលពីម្សិលមិញ លោក បា៉ា សុជាតិវង្ស អភិបាលរាជធានីភ្នំពេញ បានចែកប្រាក់សរុប៣០.០០០ដុល្លារ ដល់កងរាជអាវុធហត្ថប្រហែល១.០០០នាក់នៅក្នុងពិធីមួយ ដោយលើកសរសើរពីការបំពេញការងារ និងគោរពវិន័យ “បានល្អប្រសើរ” របស់ពួកគេបន្ទាប់ពីឆ្នាំដែលមានអំពើហិង្សាជាច្រើន និងនៅពេលខ្លះមានការតវ៉ា ដែលបានបណ្ដាលឲ្យបាត់បង់អាយុជីវិតមនុស្សផងនោះ។
ថ្លែងទៅកាន់កងរាជអាវុធហត្ថដែលឈរជាជួរៗនៅក្នុងបរិវេណទីបញ្ជាការដ្ឋានកងរាជអាវុធហត្ថរាជធានីភ្នំពេញ លោក ប៉ា សុជាតិវង្ស បានបន្ទោសភាពចលាចលភាគច្រើនកាលពីឆ្នាំមុនទៅលើគណបក្សសង្គ្រោះជាតិ។
គណបក្សនេះបានដឹកនាំបាតុកម្មជាច្រើន ដែលភាគច្រើនជាបាតុកម្មអហិង្សានៅក្នុងរាជធានីភ្នំពេញ ប្រឆាំងនឹងលទ្ធផលនៃការបោះឆ្នោតជាតិកាលពីខែកក្កដា ឆ្នាំ២០១៣ ដែលខ្លួនចាត់ទុកថា មានការបន្លំសន្លឹកឆ្នោត ដែលធ្វើឲ្យគណបក្សប្រជាជនកម្ពុជាអាចដឹកនាំប្រទេសបាន៥ឆ្នាំបន្តទៀតនោះ។
ប៉ុន្តែការធ្វើបាតុកម្មទ្រង់ទ្រាយធំៗទាំងនេះ ក៏ធ្វើឲ្យប៉ះពាល់ដល់ឧស្សាហកម្មកាត់ដេរក្នុងប្រទេសកម្ពុជាផងដែរ ដោយនាំឲ្យកើតមានការតវ៉ាដ៏ហិង្សាមួយចំនួន ដែលកងរាជអាវុធហត្ថ និងនគរបាលបានឆ្លើយតបដោយប្រើកម្លាំងហួសហេតុរបស់ខ្លួន ហើយបណ្ដាលឲ្យមនុស្សចំនួនប្រាំនាក់បានបាត់បង់ជីវិត និងរាប់សិបនាក់ទៀតបានរងរបួសកាលពីដើមខែមករានោះ។
លោក បា៉ សុជាតិវង្ស បានមានប្រសាសន៍ដោយមិនរៀបរាប់ច្រើនថា ” ការពិតទៅគណបក្សសង្គ្រោះជាតិបានដឹកនាំបាតុកម្មចំនួន៨៦លើក ហើយធ្វើឲ្យផ្ទុះអំពើហិង្សាចំនួនបីលើក”។
លោកបានមានប្រសាសន៍បន្តថា “ដើម្បីឆ្លើយតបនឹងសកម្មភាពអនាធិបតេយ្យ កងកម្លាំងនៃកងរាជអាវុធហត្ថរាជធានី និងនគរបាលបានបំពេញតួនាទីរបស់ខ្លួនបានយ៉ាងល្អប្រសើរ ហើយបានធ្វើឲ្យពលរដ្ឋប្រកបរបរចិញ្ចឹមជីវិតរបស់ខ្លួនបានជាធម្មតាវិញ។ ដោយការទទួលបានជោគជ័យដ៏ធំនេះ ខ្ញុំអាចនិយាយបានថា កងរាជអាវុធហត្ថរាជធានីភ្នំពេញមានវិន័យពិតប្រាកដ ហើយគោរពតាមបញ្ជាមន្ត្រីថ្នាក់លើ”។
លោកអភិបាលរាជធានីបានលើកឡើងទៀតថា ការសម្រេចចិត្តថ្មីៗនេះរបស់គណបក្សប្រឆាំងដើម្បីទទួលអាសនៈសភារបស់ខ្លួន បន្ទាប់ពីធ្វើពហិការអស់រយៈពេលមួយឆ្នាំមក បានជួយធ្វើឲ្យមានសណ្ដាប់ធ្នាប់មួយចំនួនឡើងវិញតាមផ្លូវនានាក្នុងរាជធានី ប៉ុន្តែលោកបានបន្ថែមថា ការងាររបស់កងរាជអាវុធហត្ថមិនទាន់ចប់នោះទេ។
លោកបានមានប្រសាសន៍ថា ” វាទំនងជាមានបាតុកម្មថ្មីៗទៀត។ កូដកម្មត្រូវបានដឹកនាំដោយសហជីពនៅតាមរោងចក្រ ហើយសកម្មជនសិទ្ធិមនុស្ស និងសកម្មជនការពារព្រៃឈើបានប្រមូលផ្ដុំគ្នាធ្វើបាតុកម្ម ដោយមានបំណងធ្វើឲ្យរាំងស្ទះដល់ការអភិវឌ្ឍប្រទេស និងធ្វើឲ្យមានអសន្តិសុខ”។
ឧត្តមសេនីយ៍ទោ រ័ត្ន ស្រា៊ង មេបញ្ជាការកងរាជអាវុធហត្ថរាជធានីក៏បានថ្លែងទៅកាន់កងរាជអាវុធហត្ថជាច្រើនដើម្បីការពារចំពោះការប្រើប្រាស់កាំភ្លើងរបស់ពួកគេផងដែរ។ លោកបានមានប្រសាសន៍ថា “ហេតុអ្វីបានជាយើងប្រើកំាភ្លើងអាកាបែបនេះ? យើងកាន់អាវុធបែបនេះដើម្បីប្រយុទ្ធប្រឆាំងនឹងឧក្រិដ្ឋជន ដែលចង់ប្រឆាំងនឹងកងរាជអាវុធហត្ថ”។
រដ្ឋាភិបាល និងកងសន្តិសុខត្រូវមជ្ឈដ្ឋានទូទៅរិះគន់ចំពោះការប្រើប្រាស់កម្លាំងហួសហេតុដើម្បីឆ្លើយតបនឹងអ្នកតវ៉ាកាលពីខែមករា។ រដ្ឋាភិបាលបានលើកឡើងថា ខ្លួនបានស៊ើបអង្កេតលើហេតុការណ៍បាញ់សម្លាប់ទាំងនោះហើយ ប៉ុន្តែនៅមិនទាន់បានចេញលទ្ធផលនៃការស៊ើបអង្កេតនៅឡើយទេ។
លោក បា៉ សុជាតិវង្ស បានបញ្ចប់ពិធីនេះដោយចែកប្រាក់សរុប៣០.០០០ដុល្លារទៅឲ្យមន្ត្រីកងរាជអាវុធហត្ថដែលបានមកជួបជុំគ្នា។ ប្រាក់នេះ គឺជាអំណោយរបស់លោកនាយករដ្ឋមន្ត្រី ហ៊ុន សែន ដែលយកមកចែកតាមរយៈលោក ប៉ា សុជាតិវង្ស៕ គឹមហឿន