សាលាដំបូងរាជធានីភ្នំពេញបានបន្ថែមព្រះតេជគុណ លួន សុវ៉ាត សកម្មជនព្រះសង្ឃចូលទៅក្នុងបញ្ជីជនជាប់ចោទនៅក្នុងសវនាការជំនុំជម្រះរបស់លោក សួន សេរីរដ្ឋា អ្នកប្រឆាំងជនជាតិខ្មែរសញ្ជាតិអាមេរិក ដែលជាប់ចោទពីបទញុះញង់ និងមានផែនការវាយប្រហារនោះ ធ្វើឡើងនៅថ្ងៃទី១៨ ខែកញ្ញា។
លោក សេរីរដ្ឋា ប្រធានអំណាចពលរដ្ឋខ្មែរ ដែលមានមូលដ្ឋាននៅសហរដ្ឋអាមេរិកត្រូវបានចោទប្រកាន់ជុំវិញហេតុការណ៍ចំនួនពីរមុនពេល និងក្រោយពេលការបោះឆ្នោតជាតិកាលពីឆ្នាំមុន។
នៅមុនការបោះឆ្នោតកាលពីខែកក្កដា លោក សេរីរដ្ឋា បានបោះពុម្ពអាវយឺតដោយមានសរសេរពាក្យស្លោកជំរុញឲ្យពលរដ្ឋខ្មែរកុំទៅបោះឆ្នោត។ បន្ទាប់ពីការបោះឆ្នោតលោកបានព្យាយាមរៀបចំចែកផ្កាកូឡាបពណ៌លឿងដល់កម្លាំងសន្តិសុខដែលឈរជើងនៅក្នុងរាជធានីភ្នំពេញ ជាមួយនឹងស្ទីកគ័រជំរុញឲ្យពួកគេ ” បែរកាណុងកាំភ្លើងប្រឆាំងជនផ្ដាច់ការ”។ បច្ចុប្បន្ននេះ លោកកំពុងរស់នៅសហរដ្ឋអាមេរិក។
លោក មាស ច័ន្ទពិសិដ្ឋ ព្រះរាជអាជ្ញារងអមសាលាដំបូងរាជធានីបានមានប្រសាសន៍កាលពីម្សិលមិញថា ព្រះតេជគុណ លួន សុវ៉ាត នឹងត្រូវបើកសវនាការជំនុំជម្រះជាមួយលោក សេរីរដ្ឋា។ លោកបានមានប្រសាសន៍ពីព្រះសង្ឃអង្គនេះថា “យើងក៏បានកោះហៅព្រះអង្គឲ្យមកចូលរួមសវនាការនៅថ្ងៃទី១៨ ខែកញ្ញាផងដែរ”។
នៅពេលត្រូវបានសួរពីមូលហេតុដែលកោះហៅព្រះតេជគុណ លួន សុវ៉ាត នោះ លោក មាស ច័ន្ទពិសិដ្ឋ បានឆ្លើយតបថា ” ពីព្រោះព្រះអង្គពាក់ព័ន្ធនឹងករណីនេះ” ហើយលោកបានបដិសេធមិនឆ្លើយសំណួរបន្ថែមឡើយ។
លោក ឈុន ហេង ចៅក្រមប្រធានក្រុមប្រឹក្សាជំនុំជម្រះបានបដិសេធមិនធ្វើអត្ថាធិប្បាយ។
លោក សុក សំអឿន មេធាវីរបស់លោក សេរីរដ្ឋា ដែលនឹងចូលរួមសវនាការជំនួសកូនក្ដីរបស់លោកបានមានប្រសាសន៍ថា លោកនឹងមិនតំណាងឲ្យព្រះតេជគុណ លួន សុវា៉ត ទេ ប៉ុន្តែលោកបានឃើញដីកាកោះហៅព្រះសង្ឃអង្គនោះ។
លោកបានមានប្រសាសន៍ថា ” ខ្ញុំបានឃើញដីកាកោះរបស់សាលាដំបូងរាជធានីភ្នំពេញកោះហៅព្រះតេជគុណ លួន សុវ៉ាត ឲ្យចូលរួមសវនាការជាមួយលោក សួន សេរីរដ្ឋា។ ព្រះអង្គត្រូវបានចោទប្រកាន់ពីបទមានផែនការ ៉ [វាយប្រហារ]។
បទឧក្រិដ្ឋនេះមានទោសជាប់ពន្ធនាគារពី៥ឆ្នាំទៅ១០ឆ្នាំ។ ព្រះតេជគុណ លួន សុវ៉ាត អ្នកធ្វើយុទ្ធនាការសិទ្ធិមនុស្សដ៏ឆ្នើមមានសង្ឃដីកាថា ព្រះអង្គមិនបានទទួលដីកាកោះហៅនោះទេ ប៉ុន្តែបានច្រានចោលការចោទប្រកាន់នោះ។
ព្រះអង្គមានសង្ឃដីកាថា ” អាត្មាមិនអាចទទួលយកការចោទប្រកាន់នេះបានទេ ពីព្រោះអាត្មាមិនដែលប្រព្រឹត្តបទឧក្រិដ្ឋដូចនោះឡើយ”។ ព្រះអង្គបានបន្ថែមថា ប្រសិនបើត្រូវបានកោះហៅឲ្យទៅកាន់តុលាការ ព្រះអង្គនឹងស្នើឲ្យពន្យារពេលសវនាការនោះ ពីព្រោះវាប៉ះពាល់ជាមួយនឹងពិធីសាសនា ដែលព្រះអង្គគ្រោងទៅចូលរួមនៅប្រទេសកូរ៉េខាងត្បូង។
ព្រះតេជគុណ លួន សុវ៉ាត តែងតែមានវត្តមានជាប្រចាំនៅកន្លែងធ្វើបាតុកម្ម ថតវីដេអូ និងថតរូបអំពីហេតុការណ៍ទាំងនោះ។ ព្រះអង្គត្រូវបានជ្រើសរើសសម្រាប់ទទួលពានរង្វាន់សិទ្ធិមនុស្សអន្តរជាតិ ហើយត្រូវបានផ្ដល់កិត្តិយសដោយអង្គការក្រៅរដ្ឋាភិបាលមនុស្សធម៌ Witness.org សម្រាប់ការចងក្រងឯកសាររបស់ព្រះអង្គ។
បើទោះណាជាព្រះអង្គធ្លាប់បានជួបលោក សេរីរដ្ឋា ម្ដងនៅអាមេរិកកាលពីឆ្នាំ២០១១ក៏ដោយ ក៏ព្រះអង្គមានសង្ឃដីកាថា ព្រះអង្គបានប្តូរព្រះទ័យដោយសារមហិច្ឆតានយោបាយនិងការនិយាយពីការផ្ដួលរំលំរដ្ឋាភិបាលកម្ពុជារបស់ជនប្រឆាំងរូបនេះ។
ព្រះតេជគុណ លួន សុវ៉ាត មានសង្ឃដីកាថា ” អាត្មាមិនដែលគាំទ្រសកម្មភាពរបស់លោក សួន សេរីរដ្ឋា ទេ ពីព្រោះសកម្មភាពរបស់គាត់មិនត្រូវគ្នានឹងយោបល់របស់អាត្មាឡើយ។ អាត្មាជាព្រះសង្ឃមួយដែលចង់ជួយដល់ប្រជាពលរដ្ឋក្រីក្រ និងការពារសិទ្ធិមនុស្ស មិនមែនចូលរួមក្នុងគណបក្សនយោបាយណាមួយឡើយ”។
លោកនាយករដ្ឋមន្ត្រី ហ៊ុន សែន បានចាត់ទុកចលនាអំណាចពលរដ្ឋខ្មែរថា ជាអង្គការភេរវកម្ម ដែលមានផែនការផ្ដួលរំលំរដ្ឋាភិបាលរបស់លោក។ កាលពីខែឧសភាឆ្នាំមុន នគរបាលជាតិបានបង្ហោះរូបថតនៅក្នុងគេហទំព័ររបស់ខ្លួន ដោយបង្ហាញលោក សុន ឆ័យ សមាជិកសភាគណបក្សប្រឆាំង និងលោក ម៉ម សុណង់ដូ ម្ចាស់ស្ថានីយវិទ្យុឯករាជ្យជួបប្រជុំគ្នានៅសហរដ្ឋអាមេរិកជាមួយលោក សេរីរដ្ឋា និងសកម្មជនដទៃទៀត។
លោក សេរីរដ្ឋា ខ្លួនឯងអះអាងថា លោកចង់ជំរុញឲ្យមានចលនាបះបោរអារ៉ាប់ស្ព្រីងនៅក្នុងប្រទេសកម្ពុជា ដែលនឹងបង្ខំឲ្យនាយករដ្ឋមន្ត្រីចុះចេញពីអំណាច ប៉ុន្តែបានបដិសេធមិនគាំទ្រការប្រើអំពើហិង្សាឡើយ។ លោកបានមានប្រសាសន៍ថា ស្ទីកគ័រដែលមានខ្លឹមសារថា ” បែរកាណូងកាំភ្លើងប្រឆាំងជនផ្ដាច់ការ” មានបំណងជំរុញឲ្យនគរបាល និងទាហានការពារជនស៊ីវិលពីលោក ហ៊ុន សែន មិនមែនវាយប្រហាររូបលោកឡើយ។
កាលពីខែមេសា លោក សេរីរដ្ឋា បានប្រកាសថា លោកមានគម្រោងចុះបញ្ជីចលនាអំណាចពលរដ្ឋខ្មែរជាគណបក្សនយោបាយមួយក្នុងប្រទេសកម្ពុជា៕ សារុន