កាលពីម្សិលមិញ លោក ជា មុនី ប្រធានសហជីពសេរីកម្មករ បានក្លាយជាមេដឹកនាំសហជីពទី២ ដែលត្រូវបានដាក់នៅក្រោមការឃ្លាំមើលរបស់តុលាការនៅក្នុងខែនេះ ដោយសាលាដំបូងរាជធានីភ្នំពេញ ពីបទពាក់ព័ន្ធក្នុងសកម្មភាពបទល្មើសអំឡុងការធ្វើកូដកម្មរបស់កម្មករកាត់ដេរនៅទូទាំងប្រទេសកាលពីខែធ្នូ និងខែមករា។
លោក ជា មុនី បានប្រាប់អ្នកយកព័ត៌មានបន្ទាប់ពីត្រូវបានសាកសួរអស់រយៈពេលបីម៉ោងថា លោកត្រូវបានហាមឃាត់មិនឲ្យជួបជាមួយមេដឹកនាំសហជីពផ្សេងៗ ឬចូលរួមនៅក្នុងការជួបជុំជាសាធារណៈណាមួយរហូតទាល់តែការបើកសវនាការជំនុំជម្រះរឿងក្ដីរបស់លោកពាក់ព័ន្ធនឹងការចោទប្រកាន់ពីបទបង្កអំពើហិង្សាដោយចេតនា គំរាម បំផ្លិចបំផ្លាញទ្រព្យសម្បត្តិ និងធ្វើឲ្យកកស្ទះចរាចរណ៍ត្រូវបានបញ្ចប់ជាមុនសិន។
លោកបានមានប្រសាសន៍ថា ” តុលាការបានដាក់ខ្ញុំនៅក្រោមការឃ្លាំមើល ហើយខ្ញុំត្រូវរាយការណ៍ទៅអាជ្ញាធរសង្កាត់ម្ដងក្នុងមួយខែ ហើយខ្ញុំត្រូវបានរារាំងមិនឲ្យចូលរួម ឬក៏រៀបចំការជួបជុំណាមួយឡើយ”។
កាលបរិច្ឆេទសម្រាប់ការបើកសវនាការជំនុំជម្រះរឿងក្ដីរបស់លោក ជា មុនី នៅមិនទាន់ត្រូវបានកំណត់នៅឡើយទេ ប៉ុន្តែការកំណត់ពេលវេលាកោះហៅលោក និងមេដឹកនាំសហជីពចំនួនប្រាំនាក់ផ្សេងទៀតគឺមានន័យថា មេដឹកនាំសហជីពដ៏លេចធ្លោបំផុតមួយចំនួននៅក្នុងប្រទេសកម្ពុជាត្រូវបានរារាំងមិនឲ្យចូលរួមនៅក្នុងយុទ្ធនាការទាមទារដំឡើងប្រាក់ខែគោល១៧៧ដុល្លារ ដែលគ្រោងនឹងធ្វើឡើងនៅថ្ងៃពុធ។
លោក ជា មុនី បានប្រកាសកាលពីដើមសប្ដាហ៍នេះថា សហជីពរបស់លោកនឹងមិនចូលរួមនៅក្នុងយុទ្ធនាការនេះឡើយ។
លោក ប៉ាវ ស៊ីណា ប្រធានសម្ព័ន្ធសហជីពចលនាកម្ពុជាត្រូវបានដាក់នៅក្រោមការឃ្លាំមើលរបស់តុលាការកាលពីថ្ងៃសុក្រ។ មន្ត្រីតុលាការមិនបានធ្វើអត្ថាធិប្បាយលើសេចក្ដីសម្រេចដែលដាក់បន្ទុកលើលោក ជា មុនី និងលោក ប៉ាវ ស៊ីណា ឡើយ។
មេដឹកនាំសហជីពមួយចំនួនទៀតដូចជា លោក អាត់ ធន់ លោកស្រី យ៉ាង សុភ័ណ្ឌ លោកស្រី ម៉ម ញឹម និងលោក រ៉ុង ឈុន ក៏នឹងត្រូវបង្ហាញខ្លួននៅក្នុងតុលាការនៅសប្ដាហ៍នេះដែរ ដើម្បីឲ្យតុលាការសាកសួរជុំវិញការជាប់ពាក់ព័ន្ធរបស់ពួកគេនៅក្នុងការតវ៉ាក្នុងវិស័យកាត់ដេរ ដែលត្រូវបានបង្ក្រាបយ៉ាងចាស់ដៃដោយកងកម្លាំងរបស់រដ្ឋាភិបាល ដែលបណ្ដាលឲ្យមានមនុស្សស្លាប់ បន្ទាប់ពីអ្នកតវ៉ាមួយចំនួនបានផ្ទុះអំពើហិង្សាកាលពីដើមខែមករា។
ទោះជាយ៉ាងណា លោក ហ្វា សាលី ប្រធានសម្ព័ន្ធសហជីពជាតិបានលើកឡើងថា សហជីពនឹងមិនខ្លាចរអាក្នុងការធ្វើឲ្យគេដឹងឮពីការទាមទាររបស់កម្មករឡើយ។
លោកបានមានប្រសាសន៍ថា ” យើងមិនខ្លាចនោះទេ ទោះបីជាតុលាការបានកោះហៅឬក៏គំរាមចាប់ខ្លួនយើងក៏ដោយ។ យើងនឹងធ្វើយុទ្ធនាការរបស់យើង ព្រោះថា យើងបានបាត់បង់កម្មករជាច្រើននាក់អំឡុងការតវ៉ានៅថ្ងៃទី២ និងទី៣ ខែមករា”។
លោក កេង ឆេងឡាង អនុប្រធានសហព័ន្ធសហជីពជាតិនៃឧស្សាហកម្មកាត់ដេរកម្ពុជា បានឲ្យដឹងថា សហជីពមាន ” ផែនការច្បាស់លាស់” សម្រាប់ការធ្វើយុទ្ធនាការ ដែលមានគោលដៅសំដៅទៅកាន់ការិយាល័យក្រុមហ៊ុនលក់សម្លៀកបំពាក់យីហោល្បីៗទូទាំងពិភពលោក និងស្ថានទូតបរទេសនានា។
រដ្ឋាភិបាលគ្រោងប្រកាសការដំឡើងប្រាក់ខែគោលពីលើប្រាក់ខែត្រឹមតែ១០០ដុល្លារនាពេលសព្វថ្ងៃនៅខែតុលា ដើម្បីឲ្យវាចូលជាធរមាននៅខែមករា។ ម្ចាស់រោងចក្រកាត់ដេរបានស្នើសុំឲ្យមានការដំឡើងត្រឹមតែ១០ដុល្លារទៀតប៉ុណ្ណោះ ដោយវាស្របទៅនឹងផែនការរបស់រដ្ឋាភិបាល ដែលមានបំណងដំឡើងប្រាក់ខែគោលឲ្យដល់១៦០ដុល្លារត្រឹមឆ្នាំ២០១៨។
ការសម្រេចដំឡើងប្រាក់ខែគោលដល់៩៥ដុល្លាររបស់រដ្ឋាភិបាលកាលពីខែធ្នូ ឆ្នាំ២០១៣ គឺវាខុសគ្នាឆ្ងាយទៅនឹងប្រាក់ខែគោល១៦០ដុល្លារ ដែលសហជីពបានទាមទារនៅពេលនោះ ហើយបានធ្វើឲ្យផ្ទុះការតវ៉ាដែលត្រូវបានបញ្ចប់ដោយមានការបង្ហូរឈាមនៅពេលកងរាជអាវុធហត្ថបានបាញ់សម្លាប់អ្នកតវ៉ាគប់ដុំថ្មចំនួនប្រាំនាក់ និងធ្វើឲ្យរបួសរាប់សិបនាក់ផ្សេងទៀតនៅលើផ្លូវវេងស្រេង។
លោកស្រី សានត្រា មីកូ សមាជិកគណៈកម្មាធិការប្រឹក្សាការងារ ជាស្ថាប័នដែលមានបីភាគី រួមមាន និយោជក រដ្ឋាភិបាល និងសហជីព ដែលកំណត់ប្រាក់ខែគោលរបស់កម្មករបានលើកឡើងថា ការចរចាចុងក្រោយស្ដីពីប្រាក់ខែគោលថ្មីនឹងត្រូវធ្វើឡើងនៅថ្ងៃទី២៦ និងទី២៧ ខែកញ្ញា ដោយមានការបោះឆ្នោត។
លោកស្រី ដាមីកូ បានឲ្យដឹងបន្តថា ប្រសិនបើគ្មានការព្រមព្រៀងគ្នាទេនោះ ការបោះឆ្នោតជាលើកទី២ និងលើកចុងក្រោយនឹងត្រូវធ្វើឡើងនៅថ្ងៃទី៨ ខែតុលា៕ ស៊ុយឈាង
(រាយការណ៍បន្ថែមដោយ Zsombor Peter)