30 C
Phnom Penh

អ្នក​កាសែត​ស៊ើប​អង្កេត​ការ​កាប់​ឈើខុស​ច្បាប់​ត្រូវ​គេ​បាញ់​សម្លាប់

ដោយ ឌឹ ខេមបូឌា ដេលី

បទវិភាគ

ក្រុម​មន្ត្រី​បាន​និយាយថា អ្នក​កាសែត​អាយុ​៤៩​ឆ្នាំ​ម្នាក់​ដែល​តាម​សេចក្តី​រាយការណ៍​ថា​កំពុង​ស៊ើប​អង្កេត​ការ​កាប់​ឈើ​ខុស​ច្បាប់​ក្នុង​ខេត្ត​ក្រចេះ​នោះ ត្រូវ​បាន​គេ​បាញ់​សម្លាប់​កាលពី​រំលង​អធ្រាត្រ​ឈាន​ចូល​ថ្ងៃ​អាទិត្យ។ តែ​ក្នុង​ពេល​ប៉ុន្មាន​ម៉ោង​ប៉ុណ្ណោះ នគរបាល​បាន​ចាប់​ខ្លួន​បុរស​៣​នាក់ មាន​មេ​ប៉ុស្តិ៍​ឃុំ​ម្នាក់ មន្ត្រី​រាជ​អាវុធហត្ថ​ម្នាក់ និង​ទាហាន​ម្នាក់។

Khim Mab
Khim Mab

យោងតាម​លោក សុខ សុវណ្ណ ប្រធាន​សមាគម​អ្នក​កាសែត​ខ្មែរ​ប្រជាធិបតេយ្យ ដែល​មាន​អ្នក​កាសែត​ត្រូវ​គេ​ធ្វើ​ឃាត​រូប​នេះ​ជា​សមាជិក​ម្នាក់​ដែរ​នោះ បាន​មាន​ប្រសាសន៍​ថា លោក តាំង ទ្រី ដែល​បាន​សរសេរ​អត្ថបទ​ព័ត៌មាន​ឲ្យ​កាសែត​មួយ​ចំនួន ត្រូវ​បាន​គេ​បាញ់​ចំ​ថ្ងាស​នៅ​ម៉ោង​ប្រហែល​មួយ​យប់ នៅ​ឃុំ​ខ្សឹម ស្រុក​ស្នួល បន្ទាប់ពី​រូប​លោក​និង​អ្នក​កាសែត​៥​នាក់​អ្នក​ផ្សេង​ទៀត​ចុះ​ទៅ​ស៊ើប​អង្កេត​ការ​កាប់​ឈើ​ខុស​ច្បាប់។

លោក​បាន​មាន​ប្រសាសន៍​ថា លោក សា ពិសិដ្ឋ និពន្ធ​នាយក​កាសែត​និស្សិត ខ្មែរ បាន​ធ្វើ​ដំណើរ​តាម​រថយន្ត​ជាមួយ​ជន​រងគ្រោះ ប៉ុន្តែ​បាន​ដើរ​ទៅ​ចម្ការ​ដើម្បី​សុំ​ឲ្យ​ប្រជាពលរដ្ឋ​ជួយ​រុញ​ឡាន ពេល​ដែល​រថយន្ត តូយ៉ូតា កាមឺរី របស់​ពួកគេ​ជាប់​ផុង​តាម​ផ្លូវ។

លោក ពិសិដ្ឋ ដែល​បាន​ត្រឡប់​មក​រថយន្ត​វិញ​ស្រាប់តែ​ឃើញ​មិត្ត​របស់​ខ្លួន​ដេក​លើ​ដី បាន​មាន​ប្រសាសន៍​ថា “សហការី​របស់​ខ្ញុំ តាំង ទ្រី ត្រូវ​គេ​បាញ់​តែ​មួយ​គ្រាប់​ចំ​ក្បាល ហើយ​ស្លាប់​ក្បែរ​រថយន្ត​កាមឺរី​របស់​គាត់”។

នគរបាល​បាន​ឲ្យ​ដឹង​ថា នៅ​ចម្ងាយ​ប្រហែល​២០០​ម៉ែត្រ​ពី​ទីកន្លែង​កើត​ហេតុ មាន​រថយន្ត Lexus LX470 SUV ក្រឡាប់​ផ្ងារ​កង់​មួយ​គ្រឿង​គ្មាន​ផ្លាក​លេខ ដែល​អ្នក​បើក​រថយន្ត​នេះ​បាន​បើក​ក្រឡាប់​ក្នុង​ពេល​ព្យាយាម​បើក​គេច​ចេញពី​កន្លែង​កើតហេតុ។

យោងតាម​លោក អ៊ុំ ភី ស្នងការ​រង​ខេត្ត​ក្រចេះ​បាន​ឲ្យ​ដឹង​ថា រថយន្ត SUV នោះ​ជា​របស់​លោក បែន ហៀង អាយុ​៣១​ឆ្នាំ ជា​ប្រធាន​នគរបាល​ឃុំ​ស្រែ​ឈូក​នៅ​ស្រុក កែវ សីមា ខេត្ត​មណ្ឌលគិរី ។ អ្នក​រួម​ដំណើរ​ពីរ​អ្នក​ផ្សេងទៀត​គឺ ឃឹម ភក្តី អាយុ​២៧​ឆ្នាំ ជា​មន្ត្រី​រាជ​អាវុធ​ហត្ថ​រាជធានី​ភ្នំ​ពេញ និង​ខ្នាន់​កាំភ្លើង ឈ្មោះ ឡា ណារ៉ុង អាយុ​៣២​ឆ្នាំ ជា​ទាហាន​កង​កម្លាំង​ខេមរភូមិន្ទ នៅ​ខេត្ត​មណ្ឌលគិរី។

លោក ភី បាន​មាន​ប្រសាសន៍​ថា “នគរបាល​ខេត្ត​បាន​ចាប់​ខ្លួន​អ្នក​ទាំង៣​ម្តង​ម្នាក់ៗ​នៅ​ថ្ងៃ​នេះ ហើយ​ឥឡួវ​នេះ​គេ​បាន​បញ្ជូន​អ្នក​ទាំង​៣​ទៅស្នងការ​នគរបាល​ខេត្ត​ក្រចេះ ហើយ​នឹង​ត្រូវ​បញ្ជូន​ទៅ​តុលាការ​បន្ត​ទៀត”។ លោក​បាន​មាន​ប្រសាសន៍​ថា ក្នុង​អំឡុង​ពេល​សាកសួរ អ្នក​ទាំង​៣​សុទ្ធតែ​បាន​សារភាព​ថា​មាន​ចំណែក​ក្នុង​ការ​សម្លាប់​នេះ ប៉ុន្តែ​គេ​នៅ​កំពុង​ស៊ើប​អង្កេត​មូលហេតុ​នៃ​ការ​សម្លាប់​នេះ​នៅ​ឡើយ។

យោងតាម​សហការី​របស់​ជន​រងគ្រោះ​បាន​ឲ្យ​ដឹង​ថា អ្នក​យក​ព័ត៌​មាន​៦​នាក់​បាន​ជិះ​រថយន្ត​៣​គ្រឿង ក្នុង​មួយ​គ្រឿង​២​នាក់ ដើម្បី​ស៊ើប​អង្កេតឃ្លាំង​មួយ​របស់​ឈ្មោះ ឈុន ភឿន ជា​បង​ប្រុស​របស់​លោក ឈុន ឃឿន មេបញ្ជា​ការ​រង​កម្លាំង​កង​រាជអាវុធហត្ថ​ស្រុក​ស្នួល នៅពេល​ដែល​ពួកគេ​បាន​ទទួល​ព័ត៌​មាន​ថា រទេះ​គោ​ជាច្រើន​បាន​និង​កំពុង​ដឹក​ឈើ​ប្រណីត​នៅ​ទី​នោះ​នៅ​ពេល​យប់។

យោងតាម​លោក ពិសិដ្ឋ និង​អ្នក​ផ្សេងទៀត​ក្នុង​ក្រុម​បាន​ឲ្យ​ដឹងថា ប៉ុន្តែ​នៅពេល​ដែល​អ្នក​យក​ព័ត៌មាន​បាន​ទៅ​ដល់​ឃ្លាំង​នោះ អ្នក​យក​ព័ត៌មាន​ម្នាក់​បាន​ទទួល​ការ​ហៅ​ទូរស័ព្ទ​ពី​លោក ឃឿន ដែល​បញ្ជា​ឲ្យ​ពួកគេ​ត្រឡប់​មក​ផ្ទះ​វិញ ហើយ​បាន​អះអាង​ថា “ទំនិញ”​នោះ​ជា​របស់​គាត់​ទេ។

អង្គការ​សិទ្ធិ​មនុស្ស​និង​អង្គការ​ឃ្លាំ​មើល​ព័ត៌មាន​បាន​ថ្កោល​ទោស​ភ្លាមៗ​ចំពោះ​ការ​សម្លាប់​លោក តាំង ទ្រី កាលពី​ម្សិលមិញ ដែល​ការ​សម្លាប់​នេះ​កើត​ឡើង​បន្ទាប់ពី​ការ​សម្លាប់​អ្នក​យក​ព័ត៌មាន​វីរៈជន​ខ្មែរ លោក ហង្ស សេរីឧត្តម កាលពី​ឆ្នាំ២០១២ នៅ​ខេត្ត​រតនៈគិរី ដែល​ពេល​នោះ​លោក​ក៏​បាន​ស៊ើប​អង្កេត​ការ​រកស៊ី​ឈើ និងក្រោយ​មក​ទៀត​មាន​ការ​បាញ់​សម្លាប់​លោក ឈុត វុទ្ធី សកម្មជន​ការពារ​បរិស្ថាន ក្នុង​ឆ្នាំ​ដដែល​នោះ​នៅ​ក្នុង​ខេត្ត​កោះកុង​ផង​ដែរ។

លោក ហ្វិល រ៉ូប៊ឺត​សុន នាយករង​អង្គការ​សិទ្ធិ​មនុស្ស Human Rights Watch ផ្នែក​អាស៊ី បាន​មាន​ប្រសាសន៍ថា “ការ​សម្លាប់​គ្មាន​មេត្តា​នេះ​ជាថ្មី​ម្តងទៀតបង្ហាញ​ថា ប្រទេស​កម្ពុជា​គឺ​គ្រោះ​ថ្នាក់​សម្រាប់​អ្នក​កាសែត ជាពិសេស អ្នកដែល​ស៊ើប​អង្កេត​ការ​ប្រព្រឹត្ត​ខុស​ច្បាប់​ក្នុង​បញ្ហា​ដីធ្លី​និង​ព្រៃឈើ​របស់​ប្រទេស​នេះ”។

“នគរបាល​ត្រូវ​ធ្វើ​ការ​ស៊ើប​អង្កេត​ប្រកប​ដោយ​វិជ្ជា​ជីវៈ​និង​ឥត​លម្អៀង​អំពី​ការ​ធ្វើ​ឃាត​នេះ ហើយ​រដ្ឋាភិបាល​ត្រូវ​ប្តេជ្ញា​បញ្ចប់​និទណ្ឌ​ភាព ដែល​ថា​ពួកអ្នក​វាយ​ប្រហារ​លើ​អ្នក​កាសែត ​ជា​ញឹក​ញាប់​ច្រើនតែ​រួច​ខ្លួននោះ”។

មជ្ឈមណ្ឌល​ព័ត៌មាន​ឯករាជ្យ​កម្ពុជា និង​សម្ព័ន្ធ​ព័ត៌មាន​អាស៊ី​អាគ្នេយ៍​បាន​អំពាវនាវ​ឲ្យ​មាន​ការ​កាត់​ទោស​អ្នក​ដែល​ទទួល​ខុសត្រូវ។

សេចក្តី​ថ្លែងការណ៍​រួម​បាន​លើក​ឡើង​ថា “យើង​អំពាវនាវ​ដល់​អាជ្ញាធរ​ឲ្យ​ចាត់​វិធាន​ការ​ឆាប់​រហ័ស​ក្នុង​ការ​នាំ​យក​ពួកឃាតករ​សម្លាប់​លោក ទ្រី មក​កាត់ទោស និង​បញ្ចប់​និទណ្ឌភាព​ដដែលៗ ចំពោះ​អ្នក​ដែល​ប្រព្រឹត្ត​ហិង្សា​លើ​កាសែត​នៅ​កម្ពុជា”។

មាន​ការ​គំរាមកំហែង​ជាច្រើន​ក្នុង​ពេល​ប៉ុន្មាន​ខែ​ថ្មីៗ​នេះ​លើ​អ្នក​យក​ព័ត៌មាន​ដែល​រាយ​ការណ៍​អំពី​ការ​កាប់​ឈើ​ខុស​ច្បាប់។

កាលពី​ខែ​មេសា ក្លឹប​អ្នក​កាសែត​ខ្មែរ​បាន​ចេញ​សេចក្តី​ថ្លែងការណ៍​មួយ​សំដែង​កង្វល់​ដែល​អ្នកកាសែត​បី​នាក់​នៅ​ខេត្ត​ព្រះវិហារ ខេត្ត​ពោធិ៍សាត់ និង​ខេត្ត​កំពង់ចាម ត្រូវ​បាន​គេ​រំខាន​យាយី។ ហើយ​នៅ​ខែ​មិថុនា អ្នក​យក​ព័ត៌មាន​ម្នាក់​នៅ​កាសែត​ការពិត ក្នុង​ខេត្ត​ពោធិ៍សាត់​បាន​ចោទ​ថា ទាហាន​ម្នាក់​បាន​គំរាម​សម្លាប់​ខ្លួន​ទាក់ទិន​នឹង​រឿង​ដែល​ភ្ជាប់​ទាហាន​ម្នាក់​នោះ​ទៅនឹង​ការ​រកស៊ី​ឈើ​ក្រញូង​ខុស​ច្បាប់។

លោក មឿន ឈាន​ណា​រិទ្ធ​ នាយក​វិទ្យាស្ថាន​កម្ពុជា​សម្រាប់​ការសិក្សា​ផ្នែក​សារព័ត៌មាន បាន​មាន​ប្រសាសន៍​ថា មាន​អ្នក​យក​ព័ត៌មាន​សេរី​ជាច្រើន​នាក់​នៅ​តាម​ខេត្ត​នានា ដែល​ស៊ើប​អង្កេត​សកម្ម​ភាព​ខុស​ច្បាប់ ហើយ​ជា​ញឹកញាប់​ធ្វើ​ការ​ដោយ​ឯករាជ្យ ដែល​អាច​ធ្វើ​ឲ្យ​ពួកគេ​ងាយ​រងគ្រោះ។

លោក ណារិទ្ធ បាន​មាន​ប្រសាសន៍​ថា ក្នុង​ពេលដែល​អ្នកកាសែត​មួយ​ចំនួន​នៅ​តាម​ខេត្ត​ច្រើនតែ​គ្មាន​ប្រាក់​ខែ តែ​ត្រូវ​ទាក់ទាញ​ឲ្យ​ក្បត់​នឹង​ក្រម​សីលធម៌​កាសែត និង​ឆ្លៀត​រក​ប្រយោជន៍​ពី​ព័ត៌មាន​របស់​ខ្លួន​ដែល​ពួកគេ​ប្រឹង​ស្វែង​រក​ឆ្កឹះ​កកាយនោះ ចំណែក​អ្នក​កាសែត​ដែល​មិន​ព្រម​ទទួល​សំណូក ប្រឈម​នឹង​គ្រោះ​ថ្នាក់​ពិត​ប្រាកដ គឺ​ត្រូវ​គេ​ទម្លាក់​កំហុស​លើ ឬ​ត្រូវ​គេ​វាយ​ប្រហារ ពេល​ដែល​អ្នក​កាសែត​ទាំង​នោះ​បើកកកាយ​បទ​ល្មើស​នោះ។

លោក តាំង ទ្រី ត្រូវ​បាន​ចាប់​ខ្លួន​ពី​បទ​កំហែង​យក​ប្រាក់​កាលពី​ឆ្នាំ​២០១០ ហើយ​ត្រូវ​តុលាការ​ខេត្ត​កំពង់​ឆ្នាំង​កោះ​ហៅ​កាលពី​ខែ​មុន​ពាក់ព័ន្ធ​នឹង​ការ​ចោទ​បួន​ឆ្នាំ​មកហើយ។ លោក​បាន​អះអាង​ដដែលៗ​ថា លោក​ត្រូវ​បាន​គេ​ចាប់​ខ្លួន ព្រោះតែ​លោក​បាន​ឃើញ​ផ្ទាល់​ភ្នែក​នូវ​ការ​​ជួញ​ឈើ​ខុស​ច្បាប់​នៅ​ក្នុង​ខេត្ត​នេះ៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស