យោងតាមការចុះបញ្ជីនៅក្នុងផ្សារមូលបត្រអូស្ត្រាលីកាលពីចុងខែមុន ក្រុមហ៊ុនរុករករ៉ែរបស់អូស្ត្រាលីឈ្មោះ Renaissance Minerals បានចាប់ផ្តើមបន្តការរុករករ៉ែនៅតំបន់ស្រទាប់រ៉ែមាសអូរខ្វាវក្នុងខេត្តមណ្ឌលគិរី បន្ទាប់ពីប្រើប្រាស់ចំនួន៦លានដុល្លារដើម្បីធ្វើការសាកល្បងរុករករ៉ែមាសនៅតំបន់ដែលអាចមានរ៉ែមាសច្រើនមួយចំនួន។
ក្រុមហ៊ុន Renaissance Minerals ដែលទទួលបានសិទ្ធិ១០០ភាគរយក្នុងគម្រោងរុករករ៉ែមាសនៅលើទឹកដីកម្ពុជាក្នុងដីទំហំ១.១០០គឺឡូម៉ែត្រក្រឡាបានលើកឡើងថា វាគឺជាជំហានបន្ទាប់នៃការរុករករ៉ែ ដោយចាប់ផ្តើមនៅក្នុងកម្មវិធីជីកយករ៉ែដ៏សំខាន់មួយក្បែរតំបន់ស្រទាប់រ៉ែមាសអូរខ្វាវ ដែលអាចមានរ៉ែមាសប្រមាណប្រហែល១,២លានអោន។
លោក Justin Tremain នាយកគ្រប់គ្រងក្រុមហ៊ុន Renaissance Minerals បានលើកឡើងនៅក្នុងសេចក្តីថ្លែងការណ៍មួយថា “កម្មវិធីជីកយករ៉ែនេះ និងជាកម្មវិធីដ៏ធំបំផុតមិនដែលធ្លាប់មានឡើយរបស់ក្រុមហ៊ុន Renaissance Minerals ដោយធ្វើការលាកល្បងនៅតំបន់ដែលអាចមានរ៉ែច្រើន នៅក្បែរតំបន់ស្រទាប់រ៉ែមាសអូរខ្វាវ”។
កាលពីឆ្នាំ២០១២ ក្រុម Renaissance Minerals បានទិញតំបន់រុករករ៉ែមាសនៅក្នុងខេត្តមណ្ឌលគិរីពីក្រុមហ៊ុនរុករ៉ែមាសរបស់អូស្ត្រាលីមួយទៀតឈ្មោះ OZ Minerals ក្នុងចំនួនទឹកប្រាក់១៩,២លានដុល្លារ។
ក្រុមហ៊ុន OZ Minerals បានលើកឡើងនៅពេលនោះថា ខ្លួនលក់តំបន់រុករករ៉ែនេះ ដោយសារតែពុំសូវមានរ៉ែមាស និងដោយសារតែខ្លួនចង់ផ្តោតទៅលើកការរុករករ៉ែទង់ដែង នៅក្នុងតំបន់ផ្សេង។
លោក Rechard Stanger ប្រធានសមាគមក្រុមហ៊ុនរុករ៉ែនៅកម្ពុជាបានលើកឡើងថា ទោះបីជាខេត្តមណ្ឌលគិរីជាខេត្តមួយស្ថិតក្នុងចំណោមខេត្តផ្សេងៗទៀតដែលសម្បូររ៉ែមាសក៏ដោយ ក៏ក្រុមហ៊ុន Renaissance NMinerals នៅមិនទាន់ជីកយកបានរ៉ែដែលមានតម្លៃណាមួយនៅឡើយទេមកទល់នឹងពេលនេះ។
លោកបានលើកឡើងនៅក្នុងអីុម៉េលមួយកាលពីម្សិលមិញថា “វាស្ថិតក្នុងដំណាក់កាលរុករក និងដំណាក់កាលសិក្សាជំហានដំបូងនៅឡើយ។ រ៉ែមាសនៅមិនទាន់ជីកបាននៅឡើយទេ។ [នៅក្នុងប្រទេសកម្ពុជា] មានការរុករកចាប់តាំងពីឆ្នាំ២០០៥មកម្លេ៉ះ។ ហើយជាធម្មតារយៈពេលនៃការអភិវឌ្ឍ រុករក និងជីកយករ៉ែមាស គឺមានយ៉ាងតិច១០ឆ្នាំ។
អំឡុងកិច្ចពិភាក្សារបស់ក្រុមអ្នកជំនាញស្តីពីឧស្សាហកម្មជីកយករ៉ែនៅសណ្ឋាគារអាំងទែកុងទីណង់តាល់ កាលពីសប្តាហ៍មុន លោក Tremain បានលើកឡើងថា គេនៅមិនទាន់ដឹងអំពីទំហំនៃតំបន់ស្រទាប់រ៉ែមាសនៅក្នុងប្រទេសកម្ពុជានៅឡើយទេ ដោយសារខ្វះការរុករកពីមុនមក ដោយសារតែមានជាការប្រឈម និងឱកាសសម្រាប់ក្រុមហ៊ុនថ្មី។
លោកបានមានប្រសាសន៍ថា “ប្រទេសកម្ពុជាគឺនៅមិនទាន់ត្រូវបានរុករកទាំងស្រុង។ តំបន់ភូមិសាស្ត្រនៅក្នុងប្រទេសកម្ពុជាគឺអំណោយផលណាស់ ប៉ុន្តែ នៅមិនទាន់មានការរុករកនៅឡើយទេដោយសារមូលហេតុទាក់ទិននឹងប្រវត្តិសាស្ត្រ”។
លោកបានមានប្រសាសន៍កាលពីម្សិលមិញថា “កាលពីជាងពីរឆ្នាំកន្លងទៅ បរិស្ថានសម្រាប់ការរុករករ៉ែគឺវាលំបាកខ្លាំងណាស់។ ទីតាំងដូចជាប្រទេសកម្ពុជា គឺមិនដែលមានការសាកល្បងនៅឡើយទេ។ កាលពីមុន គេមានក្តីព្រួយបារម្ភទាក់ទិននឹងតម្លាភាពនៃការទទួលបានការអនុញ្ញាត និងសុវត្ថិភាពនៃការទទួលបានសិទ្ធិ ហើយបញ្ហាទាំងនេះ គឺវាបន្ថែមឲ្យមានការប្រឈមទៅថ្ងៃខាងមុខ”៕ស៊ុយឈាង