អ្នកភូមិប្រហែល៥០០នាក់ដែលបានជាប់ពាក់ព័ន្ធនៅក្នុងវិវាទដីធ្លីដ៏អូសបន្លាយជាមួយក្រុមហ៊ុនចម្ការកៅស៊ូ បានបិទផ្លូវជាតិលេខ៧ ក្នុងស្រុកមេមត់ ខេត្តត្បូងឃ្មុំ កាលពីម្សិលមិញ ដើម្បីទាមទារប័ណ្ណកម្មសិទ្ធិដីដែលពួកគាត់លើកឡើងថា ពួកគាត់បានរស់នៅតាំងពីឆ្នាំ១៩៨០មកម្លេ៉ះ។
ដោយកាន់រូបថតលោកនាយករដ្ឋមន្ត្រី ហ៊ុន សែន និងលោកស្រី ប៊ុន រ៉ានី ភរិយារបស់លោក ក្រុមអ្នកភូមិបានបិទផ្លូវដ៏សំខាន់នេះចាប់ពីម៉ោង៨និង៣០នាទីព្រឹករហូតដល់ម៉ោង១១និង៣០នាទីថ្ងៃត្រង់នៅមុខសាលាស្រុក ហើយបានស្រែកពីការទាមទាររបស់ខ្លួនតាមឧគ្ឃោសនសព្ទ។
អ្នកស្រី ព្រំ ដាណែត អាយុ៤៨ឆ្នាំ តំណាងអ្នកតវ៉ាបានមានប្រសាសន៍តាមទូរស័ព្ទបន្ទាប់ពីការតវ៉ាថា អ្នកភូមិប្រហែល៥០០គ្រួសារចាប់តាំងពីការដួលរលំរបបខ្មែរក្រហមមក បានរស់នៅលើដីដែលឥឡូវនេះកាន់កាប់ដោយចម្ការកៅស៊ូមេមត់ តាមរយៈការផ្ដល់សម្បទាន។
អ្នកស្រី ដាណែត បានមានប្រសាសន៍ថា “យើងបានទៅទីនោះដើម្បីសុំអន្តរាគមន៍ឲ្យជួយដោះស្រាយបញ្ហារបស់ពួកយើងជាមួយក្រុមហ៊ុនចម្ការកៅស៊ូមេមត់ ហើយបានទាមទារឲ្យអាជ្ញាធរចេញប័ណ្ណកម្មសិទ្ធិដីដល់ពួកយើង”។
អ្នកស្រីបានបន្ថែមថា ” យើងបានរស់នៅលើដីទំហំ២០ហិកតានេះតាំងពីឆ្នាំ១៩៨០មកម្លេ៉ះ ហើយយើងមិនដែលប្រឈមបញ្ហាណាមួយទេរហូតដល់ឆ្នាំ២០០៨។ ចាប់តាំងពីឆ្នាំ២០០៨មក គេបានព្យាយាមបណ្ដេញពួកយើងចេញដោយគ្មានផ្ដល់សំណង ដូច្នេះយើងនឹងមិនទៅណាឡើយ”។
អ្នកស្រី ដាណែត បានមានប្រសាសន៍ថា ក្រុមអ្នកភូមិបានរស់នៅក្នុងផ្ទះរបស់ពួកគាត់ ដែលស្ថិតនៅជាយអតីតចម្ការកៅស៊ូរបស់រដ្ឋនេះ ហើយបានរស់នៅរហូតដល់អាជ្ញាធរមូលដ្ឋានកាលពីឆ្នាំ១៩៨០ បានសុំឲ្យពួកគាត់ផ្លាស់ទៅទីនោះដើម្បីផ្តល់ជាតំបន់ទ្រនាប់ដល់ទាហានខ្មែរក្រហមដែលវិលត្រឡប់មកវិញ។
អ្នកស្រីបានមានប្រសាសន៍ថា “យើងចង់បានតែផ្ទះមួយខ្នងសម្រាប់គ្រួសារនីមួយៗ តែប៉ុណ្ណោះ ហើយចង់ឲ្យអាជ្ញាធរចេញប័ណ្ណកម្មសិទ្ធិដីធ្លីដល់ពួកយើង ដើម្បីការពារដីរបស់យើងមួយក្បាលតូចៗកុំឲ្យក្រុមហ៊ុនធំៗរំលោភយក។ អ្នកស្រីបានបន្ថែមថា “ប្រសិនបើគ្មានដំណោះស្រាយបន្ទាប់ពីពីរសប្ដាហ៍ទេនោះ យើងនឹងធ្វើការតវ៉ា ហើយបោះតង់ដាំបាយដាំទឹកនៅសាលាខេត្តតែម្ដង”។
លោក ស្រេង សយណេ តំណាងក្រុមហ៊ុនចម្ការកៅស៊ូមេមត់បានមានប្រសាសន៍ថា មានការផ្តល់ការតាំងទីលំនៅដ្ឋានថ្មីដល់អ្នកភូមិនៅលើដីមួយផ្នែកនៃដីសម្បទានឆ្នាំ២០០៨របស់ក្រុមហ៊ុននេះ។ លោកបានមានប្រសាសន៍ថា “យើងបានជួលដីនេះពីរដ្ឋាភិបាល ហើយអាជ្ញាធរបានឲ្យក្រុមអ្នកភូមិផ្លាស់ទៅកន្លែងថ្មីរួចហើយ ដូច្នេះហេតុអ្វីបានជាពួកគាត់នៅតែតវ៉ាទៀត?”។ លោកបានបន្ថែមថា “អ្នកភូមិប្រហែល៩០ភាគរយបានទទួលយកការចំណាត់ការនេះ។ មានអ្នកភូមិមួយចំនួនតូចប៉ុណ្ណោះនៅជំទាស់”។
លោក ចេង ប៊ុនតារា អភិបាលស្រុកមេមត់បានមានប្រសាសន៍ថា លោកនឹងលើកយកបញ្ហានេះទៅពិភាក្សាជាមួយមន្ត្រីខេត្ត ប៉ុន្តែត្រូវការពេលពីរសប្ដាហ៍តាមការស្នើសុំរបស់ក្រុមអ្នកតវ៉ា។ លោកបានមានប្រសាសន៍ថា ” យើងមិនអាចឆ្លើយតបទៅពួកគាត់បានទេក្នុងពេលឥឡូនេះ ពីព្រោះអាជ្ញាធរជាប់រវល់រៀបចំពិធីបុណ្យអុំទូក”៕ សារុន