អ្នកភូមិ និងមន្ត្រីមូលដ្ឋានបានឲ្យដឹងកាលពីម្សិលមិញថា តំណាងសហគមន៍ដែលរស់នៅក្នុងតំបន់ទឹកធ្លាក់នៅជាយក្រុងព្រះសីហនុ បានបិទផ្លូវដ៏ធំមួយរយៈពេលពីរម៉ោងកាលពីថ្ងៃសៅរ៍ ដើម្បីតវ៉ានឹងការរុះផ្ទះ និងបំផ្លាញផលដំណាំពីសំណាក់អាជ្ញាធរនៅព្រឹកថ្ងៃនោះ។
យោងតាមលោក ឆេង សំណាង អាយុ៤៥ឆ្នាំ បានឲ្យដឹងថានៅម៉ោងប្រហែល៦ព្រឹកថ្ងៃសៅរ៍ នគរបាល កងរាជអាវុធហត្ថ និងមន្ត្រីរដ្ឋបាលព្រៃឈើបានរុះផ្ទះប្រាំបីខ្នង និងបំផ្លាញដំណាំហូបផ្លែមួយចំនួនស្ថិតនៅលើដីរបស់រដ្ឋក្នុងតំបន់ទឹកធ្លាក់ក្បាលឆាយ ជាកន្លែងទាក់ទាញភ្ញៀវទេសចរដ៏ពេញនិយម។
លោក សំណាង ស្ថិតនៅក្នុងចំណោមអ្នកភូមិ៧០នាក់ ដែលបានបិទផ្លូវជាតិលេខ៤ចាប់ពីម៉ោង១០ព្រឹកដល់ថ្ងៃត្រង់ថ្ងៃសៅរ៍ ដោយដុតកង់ឡាន និងមានកាន់រូបថតលោកនាយករដ្ឋមន្ត្រី ហ៊ុន សែន និងលោកស្រី ប៊ុនរ៉ានី ភរិយារបស់លោកដើម្បីទាក់ទាញចំពោះបុព្វហេតុរបស់ពួកគេ។ លោក សំណាង បានមានប្រសាសន៍ថា “យើងនឹងមិនទៅណាឡើយ។ យើងសុខចិត្តស្លាប់ដើម្បីការពារដី និងផ្ទះរបស់យើង”។
លោក ស្រ៊ុន ស្រ៊ន់ អភិបាលរងខេត្តព្រះសីហនុបានមានប្រសាសន៍ថា អ្នកតវ៉ាយល់ព្រមបើកផ្លូវវិញ ហើយបានត្រឡប់ទៅផ្ទះរបស់ខ្លួនបន្ទាប់ពីលោកសន្យាស្វែងរកដំណោះស្រាយជូនពួកគាត់។ លោកបានមានប្រសាសន៍ថា ក្រុមអ្នកភូមិបានជួបជាមួយលោក ឈិត សុខុន អភិបាលខេត្តកាលពីព្រឹកម្សិលមិញ ដើម្បីពិភាក្សាបញ្ហានេះបន្ថែមទៀត។ លោកបានមានប្រសាសន៍ថា “អាជ្ញាធរកំពុងគិតពីការផ្ដល់ដីសម្បទានសង្គមកិច្ចដល់ពួកគាត់”៕ សារុន