ក្រុមមន្ត្រីបានឲ្យដឹងថា កាលពីព្រឹកម្សិលមិញ អាជ្ញាធររាជធានីភ្នំពេញបានចាប់ខ្លួនសកម្មជនប្រឆាំងការបណ្ដេញចេញចំនួនប្រាំពីរនាក់ ដែលនាំគ្នាតវ៉ាចំពោះទឹកជំនន់ដែលជន់លិចតំបន់បឹងកក់ក្នុងពេលថ្មីៗនេះ ដោយពួកគាត់បានបន្ទោសលើសមាជិកព្រឹទ្ធសភាមួយរូបមកពីគណបក្សប្រជាជនកម្ពុជា ដែលបានបូមខ្សាច់ចាក់លុបបឹងកក់។ ក្រុមសកម្មជនដែលត្រូវបានចាប់ខ្លួនទាំងនេះនឹងត្រូវបញ្ជូនទៅតុលាការដើម្បីចោទប្រកាន់នៅថ្ងៃនេះ។
សកម្មជនប្រហែល២០នាក់បាននាំគ្នាអូសគ្រោងគ្រែមួយដាក់លើមហាវិថីព្រះមុនីវង្ស នៅខាងមុខសាលារាជធានី ដើម្បីទាមទារឲ្យរដ្ឋាភិបាលបូមទឹកជំនន់ដែលជន់លិចផ្ទះសំបែងមួយចំនួនរបស់ពួកគាត់ចេញ។ អ្នកតវ៉ាបានប៉ះទង្គិចជាមួយសន្តិសុខខណ្ឌប្រហែលកន្លះម៉ោង បន្ទាប់ពីសន្តិសុខបានរុញគ្រែចេញពីផ្លូវរួចវាយបំបាក់ជើងគ្រែចោល។
បន្ទាប់មក អ្នកតវ៉ាបានចេញពីផ្លូវ ហើយបន្តការតវ៉ារបស់ខ្លួននៅខាងមុខសាលារាជធានីទៀត ជាទីដែលសកម្មជនចំនួនប្រាំពីរនាក់ដែលរួមមានទាំងសកម្មជនដ៏ល្បីឈ្មោះ គឺអ្នកស្រី ទេព វន្នី ផងត្រូវបានចាប់ខ្លួន។
លោក ឡុង ឌីម៉ង់ អ្នកនាំពាក្យសាលារាជធានីបានមានប្រសាសន៍ថា “យើងបានចាប់ខ្លួនមនុស្សប្រាំពីរនាក់ដែលរំលោភច្បាប់ ដោយនាំគ្នាទៅបិទផ្លូវសាធារណៈ។ យើងបានបញ្ជូនពួកគេទៅឲ្យនគរបាលរាជធានីរួចហើយ ហើយនគរបាលរាជធានីនឹងធ្វើរបាយការណ៍”។
ឧត្តមសេនីយ៍ឯក ជួន សុវណ្ណ ស្នងការនគរបាលរាជធានីភ្នំពេញបានលើកឡើងថា អ្នកតវ៉ាដែលត្រូវបានចាប់ខ្លួន និងដែលសុទ្ធតែជាស្ត្រីទាំងអស់នោះនឹងត្រូវបញ្ជូនទៅតុលាការនៅថ្ងៃនេះ ដោយសារការធ្វើឲ្យមានការរំខានដល់ចរាចរណ៍។
លោកបានមានប្រសាសន៍ថា “ពួកគេមិនដែលគោរពច្បាប់ទេ។ យើងនឹងបញ្ជូនពួកគេទៅតុលាការ [នៅថ្ងៃនេះ] ដោយយោងតាមមាត្រា៧៨នៃច្បាប់ចរាចរណ៍ដែលចែងយ៉ាងច្បាស់ថា អ្នកដែលប្រើប្រាស់អ្វីមួយទៅរារាំងចរាចរណ៍សាធារណៈនឹងត្រូវផ្ដន្ទាទោសឲ្យជាប់ពន្ធនាគារចន្លោះពី១ខែដល់១ឆ្នាំ”។
អ្នកភូមិបឹងកក់បានលើកឡើងថា រដូវវស្សាដែលធ្វើឲ្យជន់លិចតំបន់របស់ពួកគាត់ ដោយធ្វើឲ្យផ្ទះរបស់ពួកគាត់ពោរពេញទៅដោយទឹកស្អុយ និងសំរាមនោះបានចាប់ផ្ដើមកាលពីឆ្នាំ២០០៨ នៅពេលក្រុមហ៊ុនស៊ូកាគូអុីន របស់លោក ឡាវ ម៉េងឃិន ជាអ្នកជំនួញម្នាក់ និងជាសមាជិកព្រឹទ្ធសភាមកពីគណបក្សកាន់អំណាចបានចាប់ផ្ដើមបូមខ្សាច់ចាក់លុបបឹងសម្រាប់គម្រោងអចលនទ្រព្យរបស់លោក។
អ្នកភូមិបឹងកក់បានចោទប្រកាន់សាលារាជធានី ថាបានជួលតំបន់នេះដែលជាជម្រកសម្រាប់អ្នកភូមិប្រមាណ៤.០០០គ្រួសារទៅឲ្យសមាជិកព្រឹទ្ធសភារូបនេះ និងបានបណ្ដេញអ្នកភូមិភាគច្រើនចេញពីផ្ទះសំបែងដោយខុសច្បាប់។
នៅកន្លែងតវ៉ាកាលពីម្សិលមិញ មុនពេលត្រូវបានចាប់ខ្លួន អ្នកស្រី វន្នី បានលើកឡើងថា ផ្ទះរបស់ពួកគាត់ត្រូវជន់លិចដោយទឹកស្អុយតាំងពីថ្ងៃព្រហស្បតិ៍មកម្លេ៉ះ។ អ្នកស្រីបានលើកឡើងទៀតថា សាលារាជធានីជាអ្នកបង្កឲ្យមានទឹកជំនន់នេះ ដោយអនុញ្ញាតឲ្យក្រុមហ៊ុនស៊ូកាគូអុីនបូមខ្សាច់ចាក់លុបបឹង ហេតុដូច្នេះហើយសាលារាជធានីមានកាតព្វកិច្ចត្រូវតែបូមទឹកស្អុយនេះចេញ។
អ្នកស្រីបាននិយាយថា “យើងមិនអាចរស់នៅបែបនេះបានឡើយ។ យើងមិនអាចដេកពួនបាននោះទេ ហើយយើងគ្មានកន្លែងចម្អិនអាហារ ឬទៅបន្ទប់ទឹកឡើយ ហើយយើងកំពុងប្រឈមនឹងការឆក់ខ្សែភ្លើង។ ទឹកនេះស្អុយដូចអាចម៍អ៊ីចឹង។ យើងកំពុងតែរស់នៅជាមួយទឹកលូ”។
លោក គឹម វុត្ថា ប្រធានសន្តិសុខខណ្ឌបានប្រាប់អ្នកតវ៉ាថា មន្ត្រីមូលដ្ឋានកំពុងតែធ្វើការដើម្បីដោះស្រាយបញ្ហានេះឲ្យបានលឿនតាមដែលខ្លួនអាចធ្វើបាន ព្រោះថា ពិធីបុណ្យអុំទូកបានចប់ហើយ។ ពិធីបុណ្យអុំទូករយៈពេលបីថ្ងៃបានបញ្ចប់កាលពីថ្ងៃសុក្រ។
លោក វុត្ថា បានប្រាប់អ្នកតវ៉ាថា “បន្ទាប់ពីពិធីបុណ្យអុំទូកយើងបានទៅទីនោះដើម្បីជួយភ្លាមៗ។ កាលពីម្សិលមិញ ខ្ញុំបានទៅជាមួយមនុស្សរបស់ខ្ញុំដើម្បីសម្អាតតាំងពីព្រលឹមទល់យប់។ យើងកំពុងយកចិត្តទុកដាក់ខ្លាំងណាស់”។
លោក អំ សំអាត អ្នកគ្រប់គ្រងបច្ចេកទេសនៅអង្គការសិទ្ធិមនុស្សលីកាដូបានលើកឡើងថា អាជ្ញាធរគួរតែខិតខំបន្ថែមទៀតដើម្បីជួយអ្នកតវ៉ាមិនមែនទៅចាប់ខ្លួនពួកគេនោះទេ។ លោកបានមានប្រសាសន៍ថា “វាគឺជាការរំលោភសិទ្ធិរបស់ពួកគាត់ ដែលទៅចាប់ខ្លួនពួកគាត់នោះ ព្រោះសាលារាជធានីគឺជាអ្នកទទួលខុសត្រូវចំពោះការបូមទឹកចេញពីផ្ទះសំបែងរបស់ពួកគាត់ ដោយសារតែ សាលារាជធានីកំពុងអភិវឌ្ឍតំបន់នេះ។ សាលារាជធានីគួរតែរកដំណោះស្រាយជូនពួកគាត់ តែបែរជាអាជ្ញាធរទៅចាប់ខ្លួនពួកគាត់ទៅវិញ”។
យោងតាមលោក ឡុង គឹមហ៊ាង អ្នកនាំពាក្យក្រុមការងារពិសេសសិទ្ធិលំនៅដ្ឋានបានឲ្យដឹងថា ត្រឹមល្ងាចម្សិលមិញសាច់ញាតិប្រហែល៣០នាក់របស់ស្ត្រីដែលត្រូវបានគេចាប់ខ្លួនបានមកប្រមូលផ្ដុំគ្នានៅខាងក្រៅទីស្នាក់ការនៃការិយាល័យនគរបាលចរាចរណ៍រាជធានី ដើម្បីទាមទារឲ្យមានការដោះលែងស្ត្រីទាំងនេះវិញ។
ក្នុងចំណោមស្ត្រីទាំងប្រាំពីរនាក់ដែលត្រូវបានចាប់ខ្លួនកាលពីម្សិលមិញ មានប្រាំនាក់ស្ថិតក្នុងចំណោមសកម្មជនតំបន់បឹងកក់ចំនួន១៣នាក់ ដែលត្រូវបានចាប់ខ្លួនកាលពីខែឧសភា ឆ្នាំ២០១២ ដោយសារការតវា៉ប្រឆាំងក្រុមហ៊ុនស៊ូកាគូអុីននៅលើដីដែលត្រូវបានជួលទៅឲ្យក្រុមហ៊ុននេះ។
ពីរថ្ងៃបន្ទាប់ពីការចាប់ខ្លួនកាលពីឆ្នាំ២០១២នោះ សាលាដំបូងរាជធានីបានចោទប្រកាន់ស្ត្រីទាំងនោះពីបទរារាំងការបំពេញការងាររបស់មន្ត្រីសាធារណៈ ហើយកាន់កាប់ដីដោយខុសច្បាប់ ដោយផ្ដន្ទាទោសពួកគាត់ឲ្យជាប់ពន្ធនាគារក្នុងម្នាក់ៗពីរឆ្នាំកន្លះ។
សាលាឧទ្ធរណ៍បានដោះលែងពួកគាត់វិញមួយខែក្រោយមក បន្ទាប់ពីបន្ធូរបន្ថយទោសជាប់ពន្ធនាគាររបស់ពួកគាត់ ប៉ុន្តែបានតម្កល់ការផ្ដន្ទាទោសនេះរហូតមកទល់ថ្ងៃនេះ”៕ ស៊ុយឈាង