ក្នុងការចូលឆែកផ្ទះកាលពីយប់មិញ នគរបាលក្រុងភ្នំពេញបានចាប់ខ្លួនឪពុកម្តាយ របស់មន្ត្រីក្រសួងការពារប្រទេសជាន់ខ្ពស់ម្នាក់ ដែលគេសង្ស័យថាជា “មេខ្លោង” នៅពីក្រោយការសម្លាប់ឧកញ៉ាម្នាក់ក្នុងក្រុងភ្នំពេញកាលពីខែមុន គឺតែប៉ុន្មានម៉ោងប៉ុណ្ណោះបន្ទាប់ពីឪពុកម្តាយរបស់ជនសង្ស័យបានប្រកាសថា ពួកគេបានឲ្យកូនប្រុសរបស់ខ្លួនលាក់ខ្លួន។
ឧត្តមសេនីយ៍ទោ ថោង សារ៉ាត់ នាយរងខុទ្ទកាល័យក្រសួងការពារប្រទេស ត្រូវគេសង្ស័យថាបានរៀបចំឃាតកម្មព្រៃផ្សៃលើ ឧកញ៉ា អឹុង ម៉េងជឺ ដែលត្រូវបានគេបាញ់៦គ្រាប់នៅខាងក្រៅហាងលក់ផ្លែឈើមួយកន្លែងកាលពីល្ងាចថ្ងៃទី២២ខែវិចិ្ឆកា។
សារមួយបង្ហោះតាមទំព័រហ្វេសប៊ុករបស់សាលាក្រុងនៅម៉ោងប្រហែល៨យប់ ដែលមានទាំងរូបថតប៉ូលិសព័ទ្ធផ្ទះរបស់គ្រួសារឧត្តមសេនីយ៍ទោ ថោង សារ៉ាត់ ផងបានឲ្យដឹងថា “ស្នងការនគរបាលរាជធានីភ្នំពេញលោក ជួន សុវណ្ណ បានមានប្រសាសន៍ថា ឧកញ៉ា ថោង សារ៉ាត់ ជាមេខ្លោងក្នុងការសម្លាប់លោក អឹុង ម៉េងជឺ”។
ព័ត៌មានដដែលបានឲ្យដឹងថា “អាជ្ញាធរឃាត់ខ្លួនឪពុកម្តាយរបស់ឧកញ៉ា ថោង សារ៉ាត់ នៅពេលដែលឧកញ៉ា ថោង សារ៉ាត់ គេចខ្លួន”។
លោក ជួន ណារិន ស្នងការរងនគរបាលរាជធានីភ្នំពេញបានបញ្ជាក់ថា ឪពុកម្តាយរបស់ឧត្តមសេនីយ៍ទោរូបនេះ ត្រូវបានចាប់ខ្លួននៅភូមិគ្រឹះរបស់ពួកគេ ក្នុងសង្កាត់ចាក់អង្រែក្រោម ខណ្ឌមានជ័យ និងបាននិយាយថា ពួកគេត្រូវបាននាំខ្លួនទៅស្នងការដ្ឋានប៉ូលិសក្រុង ដើម្បីសាកសួរ។ លោកបានមានប្រសាសន៍ថា “យើងបានឃាត់ខ្លួនមនុស្ស៤នាក់និងអង្គរក្សប្រហែល៨នាក់ដើម្បីសួរចម្លើយ ហើយយើងបានរឹបអូសកាំភ្លើង៦ដើម និងកំពុងស្វែងរកចាប់ [ឧត្តមសេនីយ៍ទោ សារ៉ាត់]។
មន្ត្រីប៉ូលិសប្រដាប់អាវុធប្រហែល៥០នាក់ត្រូវបានគេឃើញនៅផ្ទះចាក់អង្រែក្រោមនោះមុនម៉ោង៩យប់បន្តិច ដោយខ្លះស្ពាយកាំភ្លើងអាកា៤៧យាមផ្ទះនោះ ខ្លះទៀតប្រើពិលស្វែងរកភ័ស្តុតាងក្នុងផ្ទះ។
ប៉ូលិសក៏បានឆែកភូមិគ្រឹះនៅសង្កាត់បឹងទំពុនរបស់ឧត្តមសេនីយ៍ទោ សារ៉ាត់ ដែលមានងារជាឧកញ៉ា ដែលទទួលបានកិត្តិយសជាពាណិជ្ជករមានទ្រព្យសម្បត្តិស្តុកស្តម្ភ ហើយដែលធម្មតាមានទំនាក់ទំនងជិតស្និទ្ធនឹងគណបក្សប្រជាជនកម្ពុជាកំពុងកាន់អំណាច។
លោក ឡុង ឌីម៉ង់ អ្នកនាំពាក្យសាលាក្រុងបាននិយាយតាមទូរស័ព្ទនៅម៉ោងប្រហែល៩យប់ថា “យើងមិនទាន់បានរកឃើញ [ឧត្តមសេនីយ៍ទោ សារ៉ាត់]នៅឡើយទេ។ អាជ្ញាធរកំពុងតែធ្វើការ”។
កាលពីរសៀលថ្ងៃច័ន្ទ ប៉ូលិសក្រុងបានឲ្យឧត្តមសេនីយ៍ទោ សារ៉ាត់ ឈប់អែបខាង ពេលគាត់កំពុងបើកបរតាមផ្លូវលេខ២៧១ ជិតមន្ទីរពេទ្យមិត្តភាពខ្មែរសូវៀត។ បន្ទាប់មក ពួកគេបានឃាត់ខ្លួនអង្គរក្ស៣នាក់របស់គាត់នៅស្នងការដ្ឋានប៉ូលិសក្រុង ហើយបានសាកសួរជំុវិញរឿងឃាតកម្មលើលោក អឹុង ម៉េងជឺ ប៉ុន្តែ បានអនុញ្ញាតឲ្យឧត្តមសេនីយ៍ទោ សារ៉ាត់ចាកចេញមកវិញ។
ការចាប់ខ្លួនកាលពីយប់មិញនេះ ធ្វើឡើងប៉ុន្មានម៉ោងបន្ទាប់ពីឪពុកម្តាយឧត្តមសេនីយ៍ទោ សារ៉ាត់ គឺលោក ថោង ចំរើន និង អ្នកស្រី កែវ សារី បានធ្វើសន្និសីទកាសែតនៅពេលរសៀលនៅផ្ទះរបស់ពួកគេ ដោយរិះគន់ប៉ូលិសក្រុងព្រោះស្វែងរកចាប់ខ្លួនកូនប្រុសរបស់ពួកគាត់ និងបានទាមទារឲ្យលោក ជួន សុវណ្ណ ស្នងការប៉ូលិសក្រុងលាលែងពីតំណែងរបស់ខ្លួនទាក់ទិននឹងករណីនេះ។
អ្នកស្រី សារី ជាម្តាយរបស់ឧត្តមសេនីយ៍ទោរូបនេះបាននិយាយថា “បើប៉ូលិសមើលងាយកូនប្រុសរបស់ខ្ញុំ វាដូចជាពួកគេមើលងាយ សម្តេចឪ។ អ្នកស្រីបានពន្យល់ថា គឺសម្តេចឪដែលឲ្យកូនប្រុសរបស់អ្នកស្រីធ្វើជាឧកញ៉ា។ អ្នកស្រីបាននិយាយថា ប៉ូលិសកំពុងប្រើ “ច្បាប់ព្រៃ”ដើម្បីធ្វើឲ្យកូនគាត់ជាប់ពាក់ព័ន្ធ។
អ្នកស្រី សារី បាននិយាយថា ឧត្តមសេនីយ៍ឯក សុវណ្ណ បានអញ្ជើញកូនប្រុសរបស់អ្នកស្រីទៅស្នងការដ្ឋានប៉ូលិសក្រុងកាលពីព្រឹកថ្ងៃពុធ ដើម្បីទទួលយកអង្គរក្ស៣នាក់របស់គាត់មកវិញ បណ្តាលឲ្យអ្នកស្រីមានការសង្ស័យ។
អ្នកស្រីបាននិយាយថា “ថ្ងៃនេះ លោក សុវណ្ណ បានកុហក និងបានឲ្យកូនប្រុសរបស់ខ្ញុំទៅយកអង្គរក្ស៣នាក់របស់គាត់។ ខ្ញុំមិនឲ្យកូនប្រុសរបស់ខ្ញុំទៅទេ ដោយសារចិត្តខ្មៅរបស់ប៉ូលិស”។ អ្នកស្រី សារី បាននិយាយថា អ្នកស្រីសុខចិត្តទៅស្នងការប៉ូលិសជំនួសវិញ ហើយលោក សុវណ្ណ បានស្នើអ្នកស្រីឲ្យនាំអង្គរក្សទី៤មកជាមួយ ហើយអ្នកស្រីបានធ្វើតាម។
អ្នកស្រី សារី បាននិយាយថា បន្ទាប់មក ប៉ូលិសបានឃាត់ខ្លួនអង្គរក្សទី៤ ហើយមិនបានដោះលែង៣នាក់ផ្សេងទៀតទេ។ បន្ទាប់ពីរង់ចាំអស់ពេលជាច្រើនម៉ោង អ្នកស្រីបានចាកចេញពីស្នងការដ្ឋាន ហើយបានប្រាប់កូនប្រុសរបស់អ្នកស្រីឲ្យគេចខ្លួន។ អ្នកស្រីបាននិយាយថា “ខ្ញុំបានប្រាប់កូនប្រុសរបស់ខ្ញុំឲ្យគេចខ្លួន”។
លោក ចំរើន ជាឪពុក បានប្រាប់អ្នកកាសែតថា ប៉ូលិសមិនគួរ “វាយដំនិងឲ្យប្រាក់ទៅអង្គរក្សរបស់កូនប្រុសខ្ញុំ ដើម្បីឲ្យសារភាព ហើយដាក់កំហុសលើកូនប្រុសរបស់ខ្ញុំទេ”។ លោកបាននិយាយថា “ថ្ងៃនេះ ពួកគេបានធ្វើខុសច្បាប់”។
លោក អឹុង ម៉េងជឺ ដែលជាប្រធានក្រុមហ៊ុន ស៊ីមម៉ិច គ្រុប (Shimmex Group) ដែលសាខាក្រុមហ៊ុនរបស់គាត់លក់សម្ភារសំណង់ គ្រឿងអលង្ការ គ្រឿងតុទូ និង អចលនទ្រព្យ ត្រូវឃាតករបាញ់សម្លាប់ បន្ទាប់ពីដើរចេញពីរថយន្តឡិចស៊ិសរបស់លោក ដើម្បីទិញផ្លែឈើនៅហាងមួយកន្លែងក្នុងខណ្ឌចម្ការមន ក្រុងភ្នំពេញ។
ឧត្តមសេនីយ៍ទោ សារ៉ាត់ ដែលគ្រួសាររបស់គាត់មានមុខជំនួញជាច្រើន រួមទាំងក្រុមហ៊ុន មានជ័យ អិុនធើនេសិនណល់ អិុនវេសមិន ផងនោះ កាលពីថ្ងៃអង្គារបានបដិសេធថា អង្គរក្សរបស់ខ្លួនមិនបានពាក់ព័ន្ធក្នុងរឿងឃាតកម្មនេះទេ។ គាត់បាននិយាយថា ប៉ូលិសបានសង្ស័យថា អង្គរក្សម្នាក់របស់គាត់ ដែលគាត់បានប្រាប់តែឈ្មោះ ស្នា នោះ នៅពីក្រោយឧក្រិដ្ឋកម្មនេះ។
បន្ទាប់ពីម៉ោង១០បន្តិចកាលពីយប់មិញ ជាថ្មីម្តងទៀតលើទំព័រហ្វេសប៊ុករបស់ខ្លួន សាលាក្រុងបានកំណត់ថា សៀង វាសនា ដែលជាអង្គរក្សម្នាក់ក្នុងចំណោមអង្គរក្សត្រូវឃាត់ខ្លួនរបស់ឧត្តមសេនីយ៍ទោ ថោង សារ៉ាត់ នោះ ជាខ្មាន់កាំភ្លើង។ ទំព័រហ្វេសប៊ុកដដែលឲ្យដឹងថា “ជនដៃដល់ដែលសម្លាប់ឧកញ៉ា អឹុង ម៉េងជឺ គឺ សៀង វាសនា”៕មានិត (រាយការណ៍បន្ថែមដោយ ម៉ិច ដារ៉ា និង Alex Consiglio)