តុលាការក្រុងភ្នំពេញ កាលពីថ្ងៃព្រហស្បតិ៍បានចាប់ផ្តើមនីតិវិធីសួរចម្លើយអង្គរក្ស៤នាក់ ដែលជាប់ចោទពីបទសម្លាប់ឧកញ៉ាម្នាក់ក្នុងក្រុងភ្នំពេញកាលពីខែមុនតាមបញ្ជាមេរបស់ខ្លួន ជាមន្ត្រីជាន់ខ្ពស់នៅក្រសួងការពារជាតិ ដែលកំពុងរត់គេចខ្លួន។
ឧត្តមសេនីយ៍ទោ ថោង សារ៉ាត់ នាយរងខុទ្ទកាល័យក្រសួងការពារប្រទេស ត្រូវគេសង្ស័យថា បានបញ្ជាអង្គរក្សរបស់ខ្លួនឲ្យបាញ់សម្លាប់លោក អឹុង ម៉េងជឺ ប្រធានក្រុមហ៊ុន ស៊ីមម៉ិច គ្រុប (Shimmex Group) នៅខាងក្រៅហាងលក់ផ្លែឈើមួយកន្លែងក្នុងខណ្ឌចម្ការមន នៅល្ងាចថ្ងៃទី២២ខែវិច្ឆិកា។
អង្គរក្ស៣នាក់ត្រូវបានចាប់ខ្លួននៅថ្ងៃច័ន្ទ ហើយអង្គរក្សទី៤ត្រូវចាប់ខ្លួនបានក្នុងការចូលឆែកភូមិគ្រឹះជាច្រើនកន្លែងរបស់គ្រួសារឧត្តមសេនីយ៍ទោ សារ៉ាត់ កាលពីយប់ថ្ងៃពុធ។
ឪពុកម្តាយរបស់ឧត្តមសេនីយ៍រូបនេះក៏ត្រូវនាំខ្លួនទៅស្នងការប៉ូលិសដែរ ហើយយ៉ាងហោចណាស់កាំភ្លើង៦ដើមត្រូវបានដកហូតក្នុងប្រតិបត្តិការនោះ។
ព័ត៌មានលើវិបសាយនគរបាលជាតិបង្ហាញអត្តសញ្ញាណបុរស៤នាក់ គឺ ឈ្មោះ សៀង វាសនា អាយុ៤៤ឆ្នាំ ជាជនដៃដល់ ឈ្មោះ លី សៅ អាយុ២៨ឆ្នាំ ជាអ្នកឌុបជនដៃដល់ និង អ្នករួមគំនិតឈ្មោះ មាស សម្បត្តិ អាយុ២៧ឆ្នាំ និង កូយ ចាន់ថុល អាយុ ២៩ឆ្នាំ។
លោក ជួន ណារិន ស្នងការរងនគរបាលរាជធានីភ្នំពេញបានប្រាប់អ្នកយកព័ត៌មាននៅតុលាការក្រុងភ្នំពេញកាលពីថ្ងៃព្រហស្បតិ៍ថា “យើងមានភ័ស្តុតាងគ្រប់ទាំងអស់ ហើយ[អង្គរក្ស]បានសារភាព”។
ពេលមុននោះ ប៉ូលិសបាននាំជនសង្ស័យទាំង៤ចេញពីរថយន្តប៉ូលិសទៅការិយាល័យព្រះរាជអាជ្ញារងតុលាការក្រុង កែវ សុជាតិ ដើម្បីសួរចម្លើយ។ លោក វាសនា បាននិយាយពេលគាត់ចេញពីរថយន្តថា “ខ្ញុំមិនមែនជាឃាតករទេ”។ លោក សៅ ជាអ្នកគេចោទថាឌុបជនដៃដល់ បានដើរខ្ចើចៗចេញពីរថយន្តដោយមានជំនួយពីប៉ូលិសផង។ លោកបាននិយាយថា “ប៉ូលិសធ្វើឲ្យបាក់ជើងខ្ញុំ។ ខ្ញុំចង់ឲ្យពេទ្យព្យាបាលជើងរបស់ខ្ញុំ”។
យោងតាមវិបសាយនគរបាលជាតិបានឲ្យដឹងថា លោក វាសនា និង លោក សៅ បានជិះម៉ូតូមួយគ្រឿងទៅហាងលក់ផ្លែឈើនោះក្នុងខណ្ឌចម្ការមន ទីដែលលោក វាសនា បានបាញ់លោក អុឹង ម៉េងជឺ ៦គ្រាប់ចំខ្លួន បន្ទាប់ពីឧកញ៉ារូបនេះដើរចេញពីរថយន្ត ឡិចស៊ិសរបស់ខ្លួន។
វិបសាយនេះឲ្យដឹងទៀតថា លោក សម្បត្តិ និងលោក ចាន់ថុល ជិះម៉ូតូទី២បិទគូទពីក្រោយដើម្បីការពារម៉ូតូទី១។ ក្រោយពីបាញ់សម្លាប់ហើយ លោក ចាន់ថុល បានត្រឡប់មកកន្លែងបាញ់វិញ ដើម្បីឲ្យដឹងប្រាកដថាជនរងគ្រោះស្លាប់មែន។
វិបសាយឲ្យដឹងថា “ព្រះរាជអាជា្ញរងអមសាលាដំបូងរាជធានីភ្នំពេញ លោក កែវ សុជាតិ នៅមិនទាន់ដាក់បទចោទប្រកាន់ជាផ្លូវការលើជនសង្ស័យទាំង៤នៅឡើយទេ ពីព្រោះតុលាការមិនទាន់បានបញ្ចប់ការសួរចម្លើយពួកគេ”។ “ជនសង្ស័យទាំង៤នាក់ត្រូវបានបញ្ជូនទៅឃុំខ្លួននៅស្នងការដ្ឋាននគរបាលក្រុង រង់ចាំការសួរចម្លើយបន្ថែម[នៅថ្ងៃនេះ]”។
ឧត្តមសេនីយ៍ត្រី ណារិន បានមានប្រសាសន៍តាមទូរស័ព្ទកាលពីថ្ងៃព្រហស្បតិ៍ថា ប៉ូលិសក្រុងបានស្នើឲ្យតុលាការចេញដីកាចាប់ខ្លួនឧត្តមសេនីយ៍ទោ ថោង សារ៉ាត់ ដែលបានគេចខ្លួនកាលពីយប់ថ្ងៃពុធ។
ឧត្តមសេនីយ៍ត្រី ណារិន បានបដិសេធមិននិយាយ ថាតើប៉ូលិសមានតម្រុយណាមួយអំពីកន្លែងលាក់ខ្លួនរបស់ឧត្តមសេនីយ៍ទោ សារ៉ាត់ ឬអត់នោះទេ។ លោកបានមានប្រសាសន៍ថា ឪពុកម្តាយជាជនជាតិវៀតណាមរបស់ឧត្តមសេនីយ៍រូបនេះ គឺលោក ថោង ចំរើន អាយុ៦៥ឆ្នាំ និង អ្នកស្រី កែវ សារី អាយុ៥៥ឆ្នាំ នឹងត្រូវឡើងតុលាការនៅថ្ងៃនេះដើម្បីប្រឈមនឹងបទចោទរារាំងការស៊ើបអង្កេតរបស់ប៉ូលិស និងមានអាវុធខុសច្បាប់។
តែប៉ុន្មានម៉ោងមុនពេលលោក ចំរើន និងអ្នកស្រី សារី ត្រូវបានចាប់ខ្លួនកាលពីថ្ងៃពុធនោះ ពួកគេបានធ្វើសន្និសីទកាសែតនៅផ្ទះរបស់ពួកគេក្នុងខណ្ឌមានជ័យ ដែលក្នុងពេលនោះ ពួកគេបានប្រកាសថា ពួកគេបានឲ្យកូនប្រុសរបស់ខ្លួនលាក់ខ្លួន និងបានរិះគន់ប៉ូលិសក្រុងព្រោះស្វែងរកចាប់ខ្លួនកូនប្រុសរបស់ពួកគាត់ និងបានទាមទារឲ្យលោក ជួន សុវណ្ណ ស្នងការប៉ូលិសក្រុងលាលែងពីតំណែងរបស់ខ្លួន។
គ្រួសាររបស់ឧត្តមសេនីយ៍ទោ សារ៉ាត់ បានបង្កើតមុខជំនួញដ៏ធំក្នុងក្រុងភ្នំពេញ តាមរយៈក្រុមហ៊ុនអចលនទ្រព្យនិងអាហារដ៏ជោគជ័យរបស់ខ្លួន រួមទាំងក្រុមហ៊ុន Meanchey Foods 999 ដែលផលិតសាច់ប៉ាតេមាននៅគ្រប់ទីកន្លែងលក់តាមផ្លូវក្នុងក្រុងភ្នំពេញផងដែរ។ គ្រួសារនេះក៏ជាម្ចាស់ក្រុមហ៊ុនអភិវឌ្ឍន៍ មានជ័យ អិុនធើនេសិនណល់ អិុនវេសមិន ដែរ។
យោងតាមសារមួយបង្ហោះនៅទំព័រហ្វេសប៊ុករបស់សាលាក្រុងកាលពីថ្ងៃព្រហស្បតិ៍បានឲ្យដឹងថា ឧត្តមសេនីយ៍ទោ សារ៉ាត់ បានប្រើព្រទ្យសម្បត្តិបញ្ចុះបញ្ចូលអង្គរក្សរបស់ខ្លួនឲ្យសម្លាប់លោក អឹុង ម៉េងជឺ ។ សារដដែលឲ្យដឹងថា “ក្រុមជនសង្ស័យដែលបានបាញ់សម្លាប់លោក អឹុង ម៉េងជឺ បានសារភាពថា ពួកគេមិនមែនជាឃាតករស៊ីឈ្នួលទេ ប៉ុន្តែ គ្រាន់តែធ្វើតាមបញ្ជារបស់មេខ្លួនជាថ្នូរនឹងផ្ទះម្នាក់មួយល្វែងប៉ុណ្ណោះ”៕(រាយការណ៍បន្ថែមដោយ ហ៊ុល រស្មី)