38 C
Phnom Penh

ព្រះសង្ឃ​ផ្កាប់​បាត្រ​តវ៉ា​ប្រឆាំង​ការ​ដាក់​ពន្ធនាគារ​សកម្មជន

ដោយ ឌឹ ខេមបូឌា ដេលី

បទវិភាគ

កាលពី​ថ្ងៃ​ព្រហស្បតិ៍ ព្រះសង្ឃ​មួយ​ក្រុម​បាន​ផ្កាប់​បាត្រ​របស់​ព្រះអង្គ​នៅ​ខាង​ក្រៅ​ក្រសួង​យុត្តិធម៌​ក្នុង​ក្រុង​ភ្នំេពញ ដើម្បី​តវ៉ា​ប្រឆាំង​​នឹង​ការ​ដាក់​ពន្ធនាការ​សកម្មជន សមាជិក​បក្ស​ប្រឆាំង និង​ព្រះ​សង្ឃ​១៨​អង្គ​និងនាក់​នា​ពេល​ថ្មីៗ​នេះ។

ព្រះសង្ឃ​ផ្កាប់​បាត្រ​របស់​ព្រះ​អង្គជា​កាយវិការ​ជម្នះ​ដែល​បង្ហាញ​ថា​ព្រះ​សង្ឃ​នឹង​មិន​ទទួល​ទេយ្យទាន​ពី​រដ្ឋមន្ត្រី​ក្រសួង​យុត្តិ​ធម៌​អំឡុង​ការ​ត​វ៉ា​កាល​ពី​ម្សិល​មិញ​។​ ស៊ីវ ​ចាន់​ណា​
ព្រះសង្ឃ​ផ្កាប់​បាត្រ​របស់​ព្រះ​អង្គជា​កាយវិការ​ជម្នះ​ដែល​បង្ហាញ​ថា​ព្រះ​សង្ឃ​នឹង​មិន​ទទួល​ទេយ្យទាន​ពី​រដ្ឋមន្ត្រី​ក្រសួង​យុត្តិ​ធម៌​អំឡុង​ការ​ត​វ៉ា​កាល​ពី​ម្សិល​មិញ​។​ ស៊ីវ ​ចាន់​ណា​

ព្រះសង្ឃ​និង​សកម្មជន​ជាង​១០០​អង្គ​និងនាក់​បាន​ធ្វើ​បាតុកម្ម​ជាលើក​ដំបូង​នៅ​ខាង​ក្រៅ​សភា​នៅ​ម៉ោង​ប្រហែល​៨​ព្រឹក​កាលពី​ថ្ងៃ​ព្រហស្បតិ៍ បង្ហាញ​ការ​ខក​ចិត្ត​ដែល​ញត្តិ​ដាក់​ទៅ​សភា​កាលពី​ខែ​មុន​មិន​មាន​ការ​ឆ្លើយតប មុនការ​ហែក្បួន​ទៅ​ក្រសួង​យុត្តិធម៌ ដោយ​សង្ឃឹម​ថា​នឹង​ប្រគល់​ញត្តិ​ទៅ​ លោក​​​ អង្គវង្ស វឌ្ឍានា រដ្ឋ​​​មន្ត្រី​​​ក្រសួងយុត្តិធម៌។ ញត្តិ​នោះ​អំពាវនាវ​សុំ​ឲ្យ​ដោះលែង​មនុស្ស​ទាំង​១៨​នាក់។

ព្រះតេជគុណ ហួ សុផាត់ បាន​មាន​សង្ឃ​ដីកា​ថា “គោល​បំណង​របស់​យើង​ថ្ងៃ​នេះគឺ​ចង់​ជួប​លោក អង្គវង្ស វឌ្ឍានា និង​ឲ្យ​លោក​ចេញ​មក​ទទួល​ញត្តិ​ដើម្បី​បង្ហាញ​ថា ក្រសួង​យុត្តិធម៌​អាច​រក​យុត្តិធម៌​ឲ្យ​ប្រជាពលរដ្ឋ”។

រយៈ​ពេល​ពីរ​ម៉ោង​បន្ទាប់មក នៅ​ពេល​លោក អង្គវង្ស វឌ្ឍានា មិន​បាន​ចេញ​បង្ហាញ​មុខ ព្រះសង្ឃ​ប្រហែល​៤០​អង្គ​បាន​ផ្កាប់​បាត្រ​របស់​ព្រះ​អង្គ ជា​កាយវិការ​ជម្នះ​ដែល​បង្ហាញ​ថា ព្រះសង្ឃ​នឹង​មិន​ទទួល​ទេយ្យទាន​ពី​រដ្ឋមន្ត្រី​រូប​នេះ​ទេ។

ព្រះអង្គ ហួ សុផាត់ បាន​ផ្តល់​ការ​ពន្យល់​បន្ថែម​អំពី​កាយវិការ​នេះ​ថា “គម្រប​បាត្រ​ពណ៌​ស​តំណាង​យុត្តិធម៌ រីឯ​បាត​ពណ៌​ខ្មៅ​តំណាង​អយុត្តិធម៌ ដូច្នេះ​ហើយ​យើង​ផ្កាប់​បាត្រ​របស់​យើង​ ដើម្បី​បង្ហាញ​ថា​ប្រទេស​របស់​យើង​ពោរពេញ​ដោយ​អយុត្តិធម៌ ហើយ​ប្រជាជន​បន្ត​រងគ្រោះ​បែប​ណា​នោះ”។

ក្្នុង​ពេល​តវ៉ា​ប្រឆាំង​រដ្ឋាភិបាល​នៅ​ប្រទេស​ភូមា​កាលពី​ឆ្នាំ២០០៧ ព្រះសង្ឃ​ជា​ច្រើន​អង្គ​បាន​ផ្កាប់​បាត្រ​របស់​ព្រះអង្គ ហើយមិន​ព្រម​ទទួល​យក​ទេយ្យទាន​ពី​សមាជិក​នៃ​រដ្ឋាភិបាល​យោធា​ទេ។

ក្នុង​អត្ថបទ​ទស្សនាវដ្តី​ឆ្នាំ​២០០៨ លោក​ស្រី អិុនគ្រិដ ចដធ៍ សាស្ត្រាចារ្យ​ផ្នែក​ព្រះពុទ្ធសាសនា​ដែល​ផ្តោត​លើ​ប្រទេស​ភូមា បាន​ពន្យល់​ថា ខ្លឹមសារ​នៃ​ការ​មិន​ទទួល​យក​ទេយ្យទាន មាន​ន័យ​ជា “ការ​ស្តី​បន្ទោស​ខាង​សីលធម៌”។

លោក​ស្រី​បាន​សរសេរ​អំពី​សកម្មភាព​នេះ ដែល​ភាសា​បាលី​ហៅថា “patam nikkujjana kamma” នោះ​ថា “មិន​ព្រម​ទទួល​យក​ទេយ្យទាន​របស់​អ្នកណា​ម្នាក់ គឺ​បដិសេធ​អ្នកនោះ​នូវ​ឱកាស​ទទួល​បុណ្យ។ បុណ្យ​គឺ​ជា​កុសល​កិច្ច​សម្រាប់​ជាតិ​ក្រោយ​របស់​ខ្លួន”។

លោក ​កឹម សន្តិភាព​ អ្នកនាំពាក្យ​ក្រសួង​យុត្តិធម៌​​បាន​ឲ្យ​ដឹង​តាម​ទូរស័ព្ទ​នៅ​ពេល​បន្ទាប់​នោះ​ថា តំណាង​អ្នក​តវ៉ា​ទាំង​នោះ​បាន​បដិសេធ​ការ​អញ្ជើញ​ឲ្យ​ចូល​ក្រសួង។ លោក​បាន​និយាយ​ថា “ក្រសួង​បាន​បញ្ជូន​អ្នក​តំណាង​ឲ្យ​ទទួល​ញត្តិ ប៉ុន្តែ​ពួកគេ​មិន​បាន​ប្រគល់​ឲ្យ​ឡើយ ហើយ​ក្រសួង​ក៏​បាន​អញ្ជើញ​តំណាង​[អ្នក​តវ៉ា]​ចូល​មក​ខាង​ក្នុង…​ប៉ុន្តែ​ពួកគេ​មិន​មក”។

បន្ទាប់ពី​ផ្កាប់​បាត្រ ក្រុម​នេះ​បាន​បន្ត​ដំណើរ​ទៅ​ព្រះ​បរម​រាជវាំង ​ដែល​នៅ​ទី​នោះ​ តំណាង​រាជវាំង​ម្នាក់​បាន​សន្យា​ថា​នឹង​បញ្ជូន​ញត្តិ​នោះ​ថ្វាយ​ព្រះមហាក្សត្រ នរោត្តម សីហមុនី។

បាតុកម្ម​កាលពី​ថ្ងៃ​ព្រហស្បតិ៍ ជា​ការ​អំពាវនាវ​ថ្មី​បំផុត​សុំ​ឲ្យ​ដោះ​លែង​មនុស្ស​១៨​នាក់ ដែល​អ្នកទាំង​អស់​នោះ​កំពុង​ត្រូវ​ឃុំ​ខ្លួន​នៅ​ពន្ធនាគារ​ព្រៃ​ស៕មានិត

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស