មន្ត្រីក្រសួងមហាផ្ទៃបានឲ្យដឹងកាលពីម្សិលមិញថា អ្នកស្វែងរកសិទ្ធិជ្រកកោនជនជាតិភាគតិចម៉ុងតាញ៉ាចំនួន១៣នាក់ ដែលបានមកដល់រាជធានីភ្នំពេញកាលពីល្ងាចថ្ងៃអាទិត្យ នៅមិនទាន់ដាក់ពាក្យសុំសិទ្ធិជ្រកកោននៅឡើយទេ ហើយនឹងត្រូវនិរទេសត្រឡប់ទៅប្រទេសវៀតណាមវិញ ប្រសិនបើពួកគេត្រូវបានចាត់ទុកថា ជាជនអន្តោប្រវេសន៍ខុសច្បាប់បន្ទាប់ពីពួកគេត្រូវបានសាកសួររួច។
លោក ខៀវ សុភ័គ អ្នកនាំពាក្យក្រសួងមហាផ្ទៃបានមានប្រសាសន៍ថា ” យើងនឹងបញ្ជូនអ្នកទាំងនោះត្រឡប់ទៅប្រទេសវៀតណាមវិញ ប្រសិនបើយើងរកឃើញថា ពួកគេមិនមែនជាជនភៀសខ្លួនទេនោះ”។
លោក កែម សារិន ប្រធាននាយកដ្ឋានជនភៀសខ្លួននៅក្រសួងមហាផ្ទៃបានលើកឡើងថា ការិយាល័យរបស់លោកនៅមិនទាន់មានផែនការសាកសួរអ្នកទាំង១៣នាក់នោះនៅឡើយទេ។ លោក សារិន បានមានប្រសាសន៍ទាក់ទិននឹងក្រុមជនជាតិភាគតិច ដែលបានលាក់ខ្លួននៅក្នុងព្រៃក្នុងខេត្តរតនគិរីអស់រយៈពេលជាច្រើនសប្ដាហ៍ថា ” ពួកគេទើបតែមកដល់យប់មិញ ហេតុដូច្នេះ យើងគួរតែទុកពេលឲ្យពួកគេបានសម្រាកពីរបីថ្ងៃសិន”។
លោកបានមានប្រសាសន៍បន្ថែមថា ” យើងនឹងអញ្ជើញពួកគេមកសាកសួរនៅពេលយើងមានពេល”។
លោកស្រី វីវៀន តាន (Vivian Tan) មន្ត្រីផ្នែកព័ត៌មានប្រចាំតំបន់នៅការិយាល័យឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បានលើកឡើងតាមរយៈអុីម៉េលថា ការិយាល័យរបស់លោកស្រីបានរៀបចំកន្លែងស្នាក់នៅសម្រាប់ក្រុមជនជាតិភាគតិចនេះនៅក្នុងរាជធានីភ្នំពេញ។
លោកស្រីបានមានប្រសាសន៍ថា ” UNHCR នឹងមើលការខុសត្រូវចំពោះសេចក្តីត្រូវការរបស់អ្នកស្វែងរកសិទ្ធិជ្រោកកោនម៉ុងតាញ៉ា ខណៈការអះអាងរបស់ពួកគេកំពុងត្រូវបានវាយតម្លៃ៕ ស៊ុយឈាង