30 C
Phnom Penh

រដ្ឋាភិបាល​​ផ្ដោត​គោលដៅ​លើ​គ្រូពេទ្យ​គ្មាន​អាជ្ញាប័ណ្ណ​ អំឡុង​ពេល​មាន​​ការ​ឆ្លង​រាលដាល​មេរោគ​អេដស៍​

ដោយ ឌឹ ខេមបូឌា ដេលី

បទវិភាគ

នៅ​ពេល​ចំនួន​អ្នកភូមិ​ដែល​ធ្វើ​តេស្ត​ឈាម​រក​ឃើញ​ថា ឆ្លង​មេរោគ​អេដស៍​នៅ​តែ​បន្ត​កើន​ឡើង​​ក្នុង​ឃុំរកា ខេត្ត​បាត់ដំបង ​ក្រសួង​សុខាភិបាល​​កំពុង​តែ​ចាត់វិធានការ​​ចុះ​ត្រួត​ពិនិត្យ​​ការ​ព្យាបាល​ដោយ​ខុស​ច្បាប់ ដែល​​ប្រហែល​ជាមូលហេតុ​នាំឲ្យមាន​ការ​ឆ្លង​រាលដាល​​នៃ​មេរោគ​អេដស៍​នេះ និង​ដែល​កំពុង​តែ​កើត​មាន​យ៉ាង​ច្រើន​នៅទូទាំង​ប្រទេស​។

លោក បេង សោ ​ប្រធាន​មណ្ឌល​សុខភាព​ឃុំ ​រកា​ និងខាងឆ្វេង​លោក​ អុឹម ចិត្រា ប្រធាន​​​​មណ្ឌល​សុខភាព​ស្រុក ​សង្កែ កំពុងពិនិត្យលិទ្ធផលតេស្ត​ឈាម​។ អេឡិក ខុនស៊ីកលីអូ
លោក បេង សោ ​ប្រធាន​មណ្ឌល​សុខភាព​ឃុំ ​រកា​ និងខាងឆ្វេង​លោក​ អុឹម ចិត្រា ប្រធាន​​​​មណ្ឌល​សុខភាព​ស្រុក ​សង្កែ កំពុងពិនិត្យលិទ្ធផលតេស្ត​ឈាម​។ អេឡិក ខុនស៊ីកលីអូ

លោក សឿម ឈុំ ជំទប់​ឃុំរកា​បាន​ឲ្យ​ដឹង​កាលពី​ម្សិលមិញ​ថា ​មក​ទល់​ពេល​នេះ អ្នកភូមិ​ចំនួន​២២៦​នាក់ នៅ​ក្នុង​ឃុំរកា ស្រុក​សង្កែ ត្រូវ​បាន​ធ្វើ​តេស្ត​ឈាម​​​រក​ឃើញ​ថា មាន​ផ្ទុក​មេរោគ​អេដស៍ ចាប់​តាំង​ពី​មណ្ឌល​សុខភាព​ឃុំ​បាន​ចាប់​ផ្ដើម​ធ្វើ​តេស្ត​ឈាម​ជា​លើក​ដំបូង​​កាលពី​ថ្ងៃ​ទី​៨ ខែធ្នូ​មក។

លោក យ៉ែម ជ្រិន គ្រូពេទ្យ​គ្មាន​អាជ្ញាប័ណ្ណ​ដែល​តែង​តែ​ទៅ​ព្យាបាល​អ្នកភូមិ​ដល់ផ្ទះ​ ហើយ​ព្យាបាល​អ្នក​ជំងឺ​របស់​លោក​ដោយ​ការ​ចាក់​ថ្នាំ​ បាន​សារភាព​​​ចំពោះ​​មុខ​នគរ​បាល​ថា ​លោក​បាន​ប្រើ​សឺរា៉ង​ឡើង​វិញ​ជាច្រើន​លើក​ច្រើន​សារ​ ហើយ​លោក​​ត្រូវ​បាន​ផ្ដន្ទាទោស​ឲ្យ​ជាប់​ពន្ធនាគារ​ពីបទ​មនុស្ស​ឃាត​កាលពី​​ថ្ងៃ​ទី​២២ ​ខែ​ធ្នូ​។

មូលហេតុ​ដែល​ធ្វើ​ឲ្យ​មាន​ការ​ឆ្លង​រាលដាល​នៃ​មេរោគ​អេដស៍​នេះ​នៅ​មិន​​ទាន់​ដឹង​នៅ​ឡើយ​ទេ ប៉ុន្តែ​ក្រុម​ការ​ងារ​​ដឹកនាំ​ដោយ​​រដ្ឋាភិបាល​ដែល​រួម​មាន​​ដូច​ជា មជ្ឈមណ្ឌល​គ្រប់​គ្រង​ជំងឺ​ឆ្លង​របស់​សហរដ្ឋអាមេរិក គឺ​កំពុង​តែ​ស៊ើបអង្កេត​លើ​ប្រភព​ដែល​អាច​នាំ​ឲ្យ​មាន​ការ​​ឆ្លង​រាលដាល​នេះ​ ហើយ​បាន​បញ្ជូន​សំណាក​ឈាម​ទៅ​ក្រៅ​ប្រទេស​​ដើម្បី​កំណត់​ថា​ តើ​អ្នក​ភូមិ​ឆ្លង​ចេញ​ពីប្រភព​តែ​មួយ​​​ឬយ៉ាង​ណា ដែល​អាច​ជួយ​ឲ្យ​ក្រុម​ការ​ងារ​​ឆ្ពោះ​ទៅ​រក​មូលហេតុ​ពិត​ប្រាកដ​នៃ​ការ​ឆ្លង​រាល​ដាល​នេះ។

អ្នកជំនាញ​ខាង​វេជ្ជសាស្ត្រ​បាន​លើក​ឡើង​ថា ការ​ប្រើ​ប្រាស់​សឺរ៉ាង​ឡើង​វិញ​​មិន​ទំនងជា​​មូលហេតុ​តែ​មួយ​គត់​​ដែល​ធ្វើ​​ឲ្យ​មាន​ការ​ឆ្លង​រាល​ដាល​នៃ​មេរោគ​អេដស៍​នេះ​ឡើយ ប៉ុន្តែ​វា​អាច​ទៅ​រួច​​ប្រសិន​បើ​​​​គ្រូពេទ្យ​មិន​អនុវត្ត​​ឲ្យ​បាន​ត្រឹម​ត្រូវ​តាម​​វិធីសាស្ត្រ​​ការ​ពារ​​កុំ​ឲ្យ​មេរោគ​ឆ្លង​។

លោក អុឹង ព្រហស្បតិ៍ ប្រធាន​ស្ដីទី​នៃ​គណៈកម្មាធិការ​សុខភាព​កម្ពុជា ជា​អង្គការ​ដែល​ផ្ដល់​ជំនួយ​ដល់​អ្នកភូមិ​នៅ​ក្នុង​ឃុំ​ក្រីក្រ​ ដែល​​​មាន​អ្នក​​ឆ្លង​មេរោគ​អេដស៍ និង​ជំងឺ​របេង​ បាន​មាន​ប្រសាសន៍​ថា “វា​អាច​កើត​ឡើង​គ្រប់ទីកន្លែង​។ យើង​ធ្លាប់​ឃើញ​រួច​មក​ហើយ​តាម​រយៈ​ការ​ងារ​របស់​យើង​ថា ​មាន​គ្រូពេទ្យ​គ្មានអាជ្ញាប័ណ្ណ​ជាច្រើន​ដើរ​ចាក់​ថ្នាំ​ឲ្យ​​ប្រជាជន។ ប្រសិន​បើ​ពួកគេ​មិន​អនុវត្ត​តាម​វិធីសាស្ត្រ​ការ​ពារ​កុំឲ្យ​មេរោគ​ឆ្លង​នោះ​ទេ ពួកគេ​ក៏​នឹង​អាច​​ធ្វើ​ឲ្យ​មេរោគ​អេដស៍​ឆ្លង​រាល​ដាល​នៅ​ក្នុង​ភូមិ​ផង​ដែរ​”។

កាលពី​សប្ដាហ៍​មុន ក្រសួង​សុខាភិបាល​បាន​ចេញ​សារាចរ​ណែនាំ​មួយ​ដល់​មន្ត្រី​មន្ទីរ​សុខាភិបាល​នេះ​​ខេត្ត​ក៏ដូច​ជា​​ព្រះរាជ​អាជ្ញា និង​នគរ​បាល​ខេត្ត​ផង​ដែរ ដោយ​ជំរុញ​ឲ្យ​ពួកគេ​ត្រូវ​បញ្ឈប់​គ្រូពេទ្យ​គ្មាន​អាជ្ញាប័ណ្ណ​​ឲ្យ​ឈប់​ព្យាបាល​នៅ​ក្នុង​ដែន​សមត្ថកិច្ច​របស់​ខ្លួន។

សារាចរ​ណែនាំ​ដែល​ចុះ​ហត្ថលេខា​ដោយ​លោក ម៉ម ប៊ុនហេង រដ្ឋមន្ត្រី​ក្រសួង​សុខាភិបាល​នេះ​​មាន​ខ្លឹមសារ​ដូច្នេះ​ថា “សូម​ចាត់​វិធានការ​ឲ្យ​បាន​តឹងរ៉ឹង​បំផុត​ចំពោះ​ការ​ព្យាបាល​ទាំង​ឡាយ​ណា​ដែល​គ្មាន​អាជ្ញាប័ណ្ណ និង​ដែល​មិន​អនុវត្ត​តាម​ច្បាប់​ ដោយ​ប្ដឹង​ករណី​ព្យាបាល​ដោយ​គ្មាន​អាជ្ញាប័ណ្ណ​នេះ​​ទៅ​កាន់​តុលាការ​”។

លោក អ៊ុំ សុភាព ប្រធាន​អង្គការ​ខាណា (Khanna) ជា​អង្គការ​​មិន​មែន​រដ្ឋាភិបាល​​​​ក្នុង​ស្រុក​ដែល​ផ្ដល់​ការ​ឧបត្ថម្ភ​គាំទ្រ​ និង​​ទង់​ស្កាត់​​ការ​ឆ្លង​មេរោគ​អេដស៍ និង​ដែល​​​កំពុង​​​​​ផ្ដល់​ជំនួយ​​ដល់​អ្នកភូមិ​ឃុំរកា ដែល​ធ្វើ​តេស្ត​ឈាម​រក​​ឃើញ​ថា ឆ្លង​​មេរោគ​អេដស៍​​នោះ​​បាន​លើក​ឡើង​ថា លោក យ៉ែម ជ្រិន អាច​ដើរ​ព្យាបាល​អ្នកភូមិ​អស់​ជាច្រើន​ឆ្នាំ​មក​ហើយ ព្រោះ​មន្ត្រី​សុខាភិបាល​​មិន​បាន​ចាត់​វិធានការ​យ៉ាង​សកម្ម​ ដើម្បី​​​ចុះ​ត្រួត​ពិនិត្យ​គ្រូពេទ្យ​គ្មាន​អាជ្ញាប័ណ្ណ​ឡើយ។

លោក​បាន​មាន​​ប្រសាសន៍​ថា “វា​មិន​មែន​ទាល់​តែ​មាន​រឿង​នេះ​កើត​ឡើង​ហើយ​​​ទើប​មាន​ការ​ឆ្លើយ​តប​ពី​រដ្ឋាភិបាល​​នោះ​ទេ​។ វា​គឺ​ជា​ការ​ទទួល​ខុស​ត្រូវ​របស់​លោក យ៉ែម ជ្រិន ចំពោះ​ការ​ប្រើ​​ម្ជុល​មិន​ស្អាត​។ ចាំបាច់​ត្រូវ​តែ​ឲ្យ​គាត់​​​ទទួល​ខុសត្រូវ​ ប៉ុន្តែ​វា​ក៏​ជា​ការ​ទទួល​​ខុស​ត្រូវ​របស់អាជ្ញាធរ​ផង​ដែរ​​។ វា​ហាក់បី​ដូច​ជា​គាត់​អាច​ដើរ​ព្យាបាល​អ្នកភូមិ​​អស់រយៈ​ពេល​​ជា​យូរ​មក​ហើយ​ដោយ​គ្មាន​ការ​ចុះ​ត្រួតពិនិត្យ​ឲ្យ​បាន​ត្រឹម​ត្រូវ​ណាមួយ​ឡើយ​”។

លោក ស្រុុ៊ុន សុក ​ប្រធាន​នាយកដ្ឋាន​ផ្ដល់​សេវា​ដល់​មន្ទីរ​ពេទ្យ​នៅ​ក្រសួង​សុខាភិបាល​ ដែល​ទទួល​បន្ទុក​​ត្រួត​ពិនិត្យ​​អាជ្ញាប័ណ្ណ​របស់​គ្រូពេទ្យ និង​គ្លីនិក​នានា​បាន​លើក​ឡើង​នៅ​ក្នុង​កិច្ច​សម្ភាស​​ក្នុង​ពេល​​ថ្មីៗ​នេះថា ក្រសួង​របស់​លោក​មិន​ដឹង​អំពី​ការ​ដើរ​ព្យាបាល​របស់​លោក យ៉ែម ជ្រិន ឡើយ​។

លោក​បាន​មាន​ប្រសាសន៍​ថា “យើង​មិន​បាន​ដឹង​ទេ ព្រោះ​គ្មាន​​សេចក្ដី​រាយការណ៍​ចំពោះ​បុគ្គល​នេះ​ឡើយ​។ វា​គឺ​ជា​បន្ទុក​របស់​មេឃុំ​​ឬប្រធាន​មណ្ឌល​សុខភាពឃុំ ដែល​ជា​អ្នក​ធ្វើ​សេចក្ដី​រាយការណ៍​នេះ​ជូន​ថ្នាក់​ស្រុក ដែល​​​បន្ទាប់​មក​​នឹង​ជូន​ដំណឹង​នេះ​ដល់​មន្ទីរ​សុខាភិបាល​ខេត្ត”។

ទោះ​ជា​យ៉ាង​ណា លោក ប៊ី បេងសោ ដែល​​​ទទួល​តំណែង​ជា​ប្រធាន​មណ្ឌល​សុខភាព​ឃុំ​រកា​អស់​រយៈ​ពេល​ប្រហែល​១ឆ្នាំ​កន្លង​មក​ហើយ បានលើក​ឡើង​ថា លោក​មិន​បាន​ដឹង​ទេ​ថា លោក​ត្រូវ​មាន​បន្ទុក​ទទួល​ខុស​ត្រូវ​ចំពោះ​ការ​ធ្វើ​សេចក្ដី​រាយការណ៍​អំពី​គ្រូពេទ្យ​គ្មាន​អាជ្ញាប័ណ្ណ​នោះ។ លោក​បាន​មាន​ប្រសាសន៍​ថា “ខ្ញុំ​មិនដែល​បាន​ធ្វើ​សេចក្ដី​រាយការណ៍​ណាមួយ​ឡើយ។ ប្រសិន​បើគេ​ដាក់​បទ​បញ្ជា​ឲ្យ​ខ្ញុំ​ធ្វើ​នោះ ខ្ញុំ​​នឹង​ធ្វើ​តាម​”។ លោក​បាន​គូស​បញ្ជាក់​ថា លោក យ៉ែម ជ្រិន បាន​ដើរ​ព្យាបាល​អ្នក​ភូមិ​អស់​រយៈពេល​ជាង​១ទសវត្សរ៍​មក​ហើយ​។

លោក សិទ្ធ សាវុធ អតីត​ប្រធាន​មណ្ឌល​សុខភាព​ឃុំ​នេះ​បាន​អះអាង​ថា កាលពី​ឆ្នាំ​២០១២​​ លោក​បាន​​ធ្វើ​សេចក្ដី​រាយការណ៍​​​អំពី​គ្រូពេទ្យ​​​គ្មាន​អាជ្ញាប័ណ្ណ​​យ៉ាង​តិច​ចំនួន​ពីរ​រូប​​ក្នុង​ឃុំរកា ក្នុង​នោះ​មាន​​រួម​ទាំង​លោក​ យ៉ែម ជ្រិន​ ផង​ដែរ​ជូន​មន្ត្រី​សុខាភិបាល​ស្រុក។

ប៉ុន្តែ​លោក​ អុឹម ចិត្រា ប្រធាន​​​​មណ្ឌល​សុខភាព​ស្រុក​សង្កែ ដែល​​គ្រប់គ្រង​មណ្ឌល​សុខភាព​​ឃុំ​រកា ​បាន​លើក​ឡើង​ថា លោក​មិន​ដែលទទួល​បាន​សេចក្ដី​​រាយការណ៍​ណាមួយ​ដែល​មាន​ឈ្មោះ​លោក យ៉ែម ជ្រិន នៅ​ក្នុង​នោះ​ឡើយ​។ លោក​ ចិត្រា បាន​មាន​ប្រសាសន៍​ថា “ខ្ញុំ​មិន​បាន​​ឃើញ​ឈ្មោះ​គាត់​នៅ​ក្នុង​សេចក្ដី​រាយការណ៍​ឡើយ​”។ លោក​បាន​បន្ថែម​ថា ការ​ដែល​​ចុះ​បង្ក្រាប​គ្លីនិក​គ្មាន​អាជ្ញាប័ណ្ណ​គឺ​ជារឿង​ងាយ​ស្រួល​ទេ ប៉ុន្តែ​ការ​តាមដាន​គ្រូពេទ្យ​គ្មាន​អាជ្ញាប័ណ្ណ​ដែល​ទៅ​ព្យាបាល​អ្នក​ភូមិ​ដល់​ផ្ទះ​មិន​មែន​ជារឿង​ងាយ​ស្រួល​ឡើយ​។

យោង​តាម​ក្រសួង​សុខាភិបាល​បាន​ឲ្យ​ដឹង​ថា ចំនួន​គ្លីនិក​គ្មាន​អាជ្ញាប័ណ្ណ​បាន​ថយ​ចុះ​ពី​៨៧​នៅ​ក្នុង​ឆ្នាំ​២០១០​មក​០​ក្នុង​ឆ្នាំ​២០១១​ ជាតួលេខ​មួយ​ដែល​​បាន​បញ្ជាក់​នៅ​ក្នុង​ឆ្នាំ​២០១២ និង​២០១៣​។

ការ​ឆ្លង​រាល​ដាល​នៃ​មេរោគ​អេដស៍

​នៅ​ពេល​ណា​ដែល​អ្នកស្រី​ យ៉ុម ណារី ​ឈឺក្បាល​ឬ​គ្រុនក្ដៅ អ្នកស្រី​តែង​តែ​​ហៅ​លោក​ យ៉ែម ជ្រិន​ ឲ្យ​មក​ចាប់​ថ្នាំ​​ឬព្យួរ​សេរ៉ូម​ដល់​ផ្ទះ​តែម្ដង។

អ្នកស្រី ណារី អាយុ​២៥​ឆ្នាំ បាន​លើក​ឡើង​ថា អ្នកស្រី​​មិន​ចាំទេ​ថា តើ​គ្រូពេទ្យ​រូប​នេះ​បាន​ចាក់​ថ្នាំ​អ្វី​ឲ្យ​គាត់ ប៉ុន្តែ​ថា ការ​ព្យាបាល​របស់​គ្រូពេទ្យ​រូប​នេះ​​​អាច​ជួយ​គាត់​បាន ហើយ​តែង​តែ​មាន​ការ​លើក​លែង​ខ្លះៗ​នៅ​ពេល​គាត់​មិន​មាន​ប្រាក់​គ្រប់គ្រាន់​សម្រាប់​​បង់​ថ្លៃ​ព្យាបាល​។ អ្នកស្រី​បាន​និយាយ​ថា “គាត់​តែង​តែ​ចាក់​ថ្នាំ និង​ព្យួរ​សេរ៉ូម​ឲ្យ​ខ្ញុំ នៅ​ពេល​ខ្ញុំឈឺ​ក្បាល​ឬ​គ្រុន​ក្ដៅ។ គាត់​ចិត្ត​ល្អ ហើយ​មាន​បទ​ពិសោធន៍​ច្រើន”​។

លោក​​​ Chris Grundmann នាយក​ប្រចាំ​ប្រទេស​​នៅ​ក្រុម​ហ៊ុន​ University Research Co.​ ដែល​អនុវត្ត​កម្មវិធី​ផ្ដល់​មូលនិធិ​ដោយ​​​ទីភ្នាក់​ងាយ​អាមេរិក​សម្រាប់​ការ​អភិវឌ្ឍន៍​ (USAID) ដើម្បី​ធ្វើ​ឲ្យ​ការ​ធ្វើ​ឲ្យ​ការ​ផ្ដល់​សេវា​កម្ម​ផ្នែក​សុខភាព​មាន​ភាព​ប្រសើរ​ឡើង​ បាន​លើក​ឡើង​ថា ពលរដ្ឋខ្មែរ​តែង​តែ​មាន​អារម្មណ៍​ថា ខ្លួន​មិន​ទទួល​បាន​ការ​ព្យាបាល​ដោយ​ត្រឹម​ត្រូវ​ ប្រសិន​បើ​​​ពេល​ព្យាបាល​​គ្រូពេទ្យ​មិន​ចាក់​ថ្នាំ​។

លោក​បាន​មាន​ប្រសាសន៍​ថា “អ្វីដែល​ពលរដ្ឋ​ខ្មែរ​ភាគ​ច្រើន​ចង់​បាន​នៅ​​ពេល​ពួក​គាត់​ទៅ​ឲ្យ​គ្រូពេទ្យ​ភូមិ​ព្យាបាល​នោះ​ គឺ​ការ​ចាក់​ថ្នាំឬ​ព្យួរ​សេរ៉ូម”។ លោក​បាន​មាន​ប្រសាសន៍​បន្ថែម​ថា “ភាគច្រើន​​គឺ​ការ​ចាក់​ថ្នាំ​វីតាមីន ដែល​​មិន​សូវ​ជា​មាន​ប្រយោជន៍​ឡើយ​ ប៉ុន្តែ​​ពលរដ្ឋ​ចង់​បាន​​បែប​នេះ”។

លោក ស្រ៊ុន សុក បាន​លើក​ឡើង​ទៀត​ថា អ្នក​ភូមិ​ឃុំរកា ​ទំនង​ជា​ជ្រើស​រើស​ការ​ព្យាបាល​ដោយ​គ្រូពេទ្យ​ឯកជន​ ឬ​គ្រូពេទ្យ​គ្មាន​អាជ្ញាប័ណ្ណ​ព្រោះ​​មណ្ឌល​សុខភាព​ឃុំ​ចាក់​ថ្នាំ​ឲ្យ​ពួកគាត់​នៅ​​ក្នុង​ស្ថានភាព​​បន្ទាន់​តែ​ប៉ុណ្ណោះ ឬ​នៅ​ក្នុង​កម្មវិធី​ផ្ដល់​វាក់សាំង​ណាមួយ។

លោក​បាន​មាន​ប្រសាសន៍​ថា “អ្នក​ដែលធ្វើ​ការ​នៅ​មណ្ឌល​សុខភាព​ឃុំ​មិន​មាន​​ចំណេះ​ដឹង​ច្រើន​ទេ។ ​យើង​ជឿជាក់​ថា ​ចំណេះ​ដឹង​ សមត្ថភាព និង​ជំនាញ​របស់​ពួកគេ​មិន​ទាន់​គ្រប់​គ្រាន់​​សម្រាប់​ចាក់​ថ្នាំ​​ឲ្យ​ពលរដ្ឋ​ [តាម​​តម្រូវ​ការ​]​​នៅ​ឡើយ​ទេ​”។

លោក​​វេជ្ជបណ្ឌិត Sten Vermund អ្នក​ជំនាញ​ផ្នែក​មេរោគ​អេដស៍​នៅ​​សាកល​វិទ្យាល័យ Vanderbilt University School of Medicine ក្នុង​​ក្រុង​ Nashville រដ្ឋ​​​ Tennessee ដែល​​ផ្ដោត​លើ​ប្រទេស​កំពុង​អភិវឌ្ឍ​បាន​លើក​ឡើង​ថា ​មនុស្ស​រាប់រយ​នាក់ដែល​ឆ្លង​មេរោគ​អេដស៍​តាម​រយៈ​​សឺរ៉ាង​ដែល​ប្រើ​ឡើង​វិញ​គឺ​វា​ប្រហែល​ជា​ត្រូវ​ការ​ពេល​វេលា​យូរ។

លោក​វេជ្ជបណ្ឌិត​បាន​មាន​ប្រសាសន៍​ថា “ខ្ញុំ​គិត​ថា វា​មិន​អាច​ទៅ​រួច​ទេ​ដែល​មនុស្ស​ប្រហែល​២០០​នាក់​ឆ្លង​​​មេរោគ​អេដស៍​តាម​រយៈ​ការ​ប្រើ​ប្រាស់​សឺរ៉ាង​​មិន​ស្អាត​តែ​មួយ​ ព្រោះ​ការ​ឆ្លង​​តាម​រយៈ​បែប​នេះ​វា​មាន​កម្រិត​ខ្សោយ​។ ប៉ុន្តែ​​វា​អាច​​​មាន​ការ​ធ្វើ​បែប​នេះ​ម្ដង​ហើយ​ម្ដង​ទៀត​​ដោយ​គ្រូពេទ្យ​”។

អ្នកភូមិ​​ឃុំរកា ដែល​ធ្វើ​តេស្ត​ឈាម​ឃើញ​ថា មាន​ផ្ទុក​មេរោគ​អេដស៍​​រួម​មាន​ទាំង​ក្មេង​អាយុ​៤​ខែ និង​លោក​តា​អាយុ​ខ្ទង់​៨០​ឆ្នាំ​ម្នាក់។ ព្រមទាំង​ពលករ​ចំណាក​ស្រុក​ដែល​ចាក​ចេញ​ពី​ប្រទេស​អស់រយៈ​ពេល​ប្រហែល​១ឆ្នាំ​ផង​ដែរ​​។

ដោយ​មើល​ឃើញ​ថា មាន​អ្នក​ភូមិ​យ៉ាង​ច្រើន​ត្រូវ​បាន​ធ្វើ​តេស្ត​ឈាម​រក​ឃើញ​ថា មាន​ផ្ទុក​មេរោគ​អេដស៍​នោះ លោក​វេជ្ជបណ្ឌិត Vermund បាន​លើក​ឡើង​ថា ប្រភព​ដែល​អាច​ទៅ​រួច​ផ្សេង​ទៀត​នៃ​ការ​ឆ្លង​​​តាម​រយៈ​ការ​ចាក់​ថ្នាំ​ អាច​ជា​ការ​ប្រើ​ប្រាស់​មិន​ត្រឹម​ត្រូវ​នៃ​ដប​ថ្នាំ​មួយ​ដុស​ប្រើ​ច្រើន​សារ។

លោក​​បាន​លើក​ឡើង​ទៀត​ថា ប្រសិន​បើ​លោក យ៉ែម ជ្រិន បាន​ប្រើ​​ដប​ថ្នាំ​មួយ​ដុស​ប្រើ​ច្រើន​សារ លោក​ប្រហែល​ជា​ធ្លាប់​បាន​ចាក់​ថ្នាំ​អ្នក​ជំងឺ​ដែល​មាន​ផ្ទុក​មេរោគ​អេដស៍ ហើយ​បន្ទាប់​មក​យក​ម្ជុល​នេះ​​ទៅបូម​ថ្នាំ​ចេញ​ពី​ដុស​មួយ​ផ្សេង​ទៀត។ លោក​បានមាន​ប្រសាសន៍​ថា “គេ​អាច​ធ្វើ​ឲ្យ​មាន​កំហុស​បែប​នេះ។ ប្រសិន​បើ​គេ​ប្រើ​​ដប​ថ្នាំ​មួយ​ដុស​ប្រើ​ច្រើន​សារ​បែប​នេះ​ មេរោគ​វា​បាន​ឆ្លង​រួច​ទៅ​ហើយ ទោះបី​ជា​ប្រើ​ម្ជុល​ថ្មីឬ​សឺរ៉ាង​ថ្មី​ក៏ដោយ​។ ហេតុ​ដូច្នេះ​អ្នក​មាន​កំហុស​តែ​មួយ​លើ​ទេ តែ​អ្នក​ផ្សេង​ៗ​ទៀត​នឹង​មាន​ការ​ឆ្លង​ជា​បន្ត​​បន្ទាប់​គ្នា ទោះ​បី​ជា​ម្ជុល​ឬសឺរ៉ាង​នោះ​មាន​ការ​សម្លាប់​មេរោគ​ក៏ដោយ​”។

លោក​វេជ្ជបណ្ឌិត​ Vermund បាន​បន្ថែម​ទៀត​ថា ប្រសិន​បើ​លោក​ យ៉ែម ជ្រិន បាន​ប្រើ​សេរ៉ូម​ប្រៃ​លាយ​ជាមួយ​ថ្នាំ​ដើម្បី​ចាក់​ថ្នាំ​ឲ្យ​គេ គាត់​ប្រហែល​ជា​ក៏​ធ្វើ​ឲ្យ​មាន​ភាព​មិន​ស្អាត​​នៅ​ក្នុង​សេរ៉ូម​ប្រៃ​នោះ​ ដោយ​លោក​យក​ម្ជុល​ដែល​មិន​ស្អាត​​ទៅ​បូម​សេរ៉ូម​ប្រៃ​នោះ​ម្ដង​ទៀត​។

លោក​បាន​មាន​ប្រសាសន៍​ថា ” ​វា​គួរ​តែ​មាន​វិធីសាស្ត្រ​ក៏​ល្អ​បំផុត​សម្រាប់​ការ​ពារ​កុំ​ឲ្យ​មេរោគ​ឆ្លង​​។ ក្នុង​ចំណោម​១០​លើក​​​ប្រសិន​បើ​​មាន​កំហុស​​តែ​មួយ​លើក​នោះ​វា​ក៏​មិន​បាន​ដែរ​ អ្នក​ត្រូវ​ធ្វើ​យ៉ាង​ណា​កុំ​ឲ្យ​មាន​កំហុស​ទាល់​តែ​សោះ”។

គ្រូពេទ្យ​បរទេស​​ម្នាក់​ដែល​ធ្វើ​ការ​នៅ​ក្នុង​ប្រទេស​កម្ពុជា​ និង​ដែល​និយាយ​ក្នុង​លក្ខខណ្ឌ​អនាមិក ​ដោយ​ខ្លាច​ប៉ះពាល់​ដល់​ការ​ងារ​​​របស់​ខ្លួន​នៅ​ក្រសួងសុខាភិបាល​បាន​លើក​ឡើង​ថា ការ​ព្យាបាល​ប្រកប​ដោយ​គ្រោះ​ថ្នាក់​ដែល​លោកវេជ្ជបណ្ឌិត​ Vermund បាន​លើក​ឡើង​នេះ​ គឺ​ជា​រឿង​​ធម្មតា​ទៅ​ហើយ​ក្នុង​ប្រទេស​កម្ពុជា​។

គ្រូពេទ្យ​បរទេស​រូប​នេះ​បាន​និយាយ​ថា ​”ការ​ព្យាបាល​​ទម្លាប់​អាក្រក់​​បែប​នេះ​កើត​មាន​យ៉ាង​សាមញ្ញ​ទៅ​ហើយ​​ក្នុង​ប្រទេស​កម្ពុជា​ ព្រោះ​ថា គ្មាន​ការ​ផ្គត់​ផ្គង់​ត្រឹម​ត្រូវ​ឡើយ​។ នៅ​ក្នុង​ប្រទេស​កម្ពុជា​គេ​គ្មាន​ដប​ថ្នាំ​មួយ​ដុស​ប្រើ​តែ​ម្ដង​នោះ​ទេ។ គេ​តែង​តែ​ប្រើ​ដប​ថ្នាំ​មួយ​ដុស​ប្រើ​ច្រើន​សារ​បែប​នេះ​”។

លោក Vermund បាន​លើក​ឡើង​បន្ត​ទៀត​ថា ប្រសិន​បើ​អាជ្ញាធរ​​រឹប​អូស​យក​ឧបករណ៍​ពេទ្យ​​របស់​លោក​ យ៉ែម ជ្រិន ដែល​មាន​ផ្ទុក​មេរោគ​អេដស៍នោះ មេរោគ​នេះ​អាច​យក​ទៅ​ប្រៀប​ធៀប​នឹង​ឈាម​​របស់​អ្នកភូមិ​។

លោក​បាន​មាន​ប្រសាសន៍​ថា “យើង​អាច​​ធ្វើ​ការ​វាយ​តម្លៃ​មូ៉លេគុលដើម្បី​ចង់​​ដឹង​ថា តើ​ម្ជុល​របស់​គ្រូពេទ្យ​រូប​នេះ​មាន​ផ្ទុក​មេរោគ​ដូច​គ្នា​ដែរ​ឬអត់។ ការ​​ធ្វើ​ដូច្នេះ​នឹង​អាច​ទទួល​បាន​ភ័ស្តុ​តាង​កាន់​តែ​ច្បាស់​។ ប្រសិន​បើ​គេ​ចង់​វាយ​តម្លៃ​អំពី​ការ​ឆ្លង​រាល​ដាល​នេះ​ប្រាកដ​មែន​នោះ វា​អាច​មាន​ប្រសិទ្ធភាព​”៕ ស៊ុយឈាង​​​​​​​​​​​​​​​​​​​​​​​​​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស