ស្ត្រី​និង​ទារក​នៅ​ឃុំដែល​ផ្ទុះ​មេរោគ​ហ៊ីវ​បាន​ស្លាប់

ក្រុម​មន្ត្រី​និង​បុគ្គលិក​អង្គការ​មិន​មែន​រដ្ឋាភិបាល​ម្នាក់​បាន​និយាយ​កាលពី​ថ្ងៃ​ព្រហស្បតិ៍​ថា ស្ត្រី​អាយុ​៧៣​ឆ្នាំ​និង​ទារក​អាយុ​ប្រាំពីរ​ខែ ទាំងពីរ​នាក់​ស្ថិត​ក្នុង​ចំណោម​អ្នក​ភូមិ​ជាង​២៣០​នាក់​ក្នុង​ឃុំ​រកា ខេត្ត​បាត់ដំបង ដែល​ធ្វើ​តេស្ត​មាន​វីរុស​ហ៊ីវ បាន​ស្លាប់​កាលពី​សប្តាហ៍​មុន​ហើយ។

​បុគ្គលិក​​​មណ្ឌល​​​សុខភាព​​​ឃុំ​​​រកា​​​ កំពុងផ្តល់​លទ្ធ​ផល​ធ្វើ​​​តេស្ត​​​​​​មេរោគ​​​អេដស៍​ដល់ប្រជា​ពលរដ្ឋ​​ កាលពីម្សិលមិញ។ អេឡិក ខុនស៊ីកលីអូ​​​
​បុគ្គលិក​​​មណ្ឌល​​​សុខភាព​​​ឃុំ​​​រកា​​​ កំពុងផ្តល់​លទ្ធ​ផល​ធ្វើ​​​តេស្ត​​​​​​មេរោគ​​​អេដស៍​ដល់ប្រជា​ពលរដ្ឋ​​ កាលពីម្សិលមិញ។ អេឡិក ខុនស៊ីកលីអូ​​​

មូលហេតុ​នៃ​ការ​ឆ្លង​រាលដាល​នេះ​នៅ​មិន​ទាន់​ដឹង​ច្បាស់​នៅឡើយ​ទេ ប៉ុន្តែ​ក្រុម​មន្ត្រី​បាន​ដាក់​កំហុស​លើ​លោក យ៉ែម ជ្រិន គ្រូពេទ្យ​គ្មាន​អាជ្ញាប័ណ្ណ​ដែល​តែង​តែ​ទៅ​ព្យាបាល​អ្នក​ភូមិ​ ដោយ​ការ​ចាក់​ថ្នាំ​ ហើយ​លោក​បាន​សារភាព​ថា ​លោក​បាន​ប្រើ​សឺរ៉ាំង​ឡើង​វិញ​ជាច្រើន​លើក​ច្រើន​សា។ កាលពី​ថ្ងៃ​ទី​២២​ខែធ្នូ​ តុលាការ​ខេត្ត​បាន​ដាក់​ពន្ធនាគារ លោក យ៉ែម ជ្រិន ពី​បទ​ឃាតកម្ម។

លោក មាន​ ឈី​វុន នាយក​មជ្ឈមណ្ឌល​ជាតិ​ ប្រយុទ្ធ​នឹង​ជំងឺអេដស៍​ សើ​ស្បែក​ និង​កាមរោគ បាន​មាន​ប្រសាសន៍​កាលពី​ថ្ងៃ​ព្រហស្បតិ៍​ថា ស្ត្រី​ចំណាស់​នោះ​បាន​ចាប់​ផ្តើម​លេប​ថ្នាំ ដើម្បី​ព្យាបាល​ជំងឺ​របេង​របស់​គាត់ មុន​ពេល​គាត់​ស្លាប់​នៅ​ថ្ងៃ​ទី​២២​ខែ​មករា។

លោក មាន​ ឈី​វុន បាន​បន្ថែម​ថា ស្ត្រី​នោះ​មិន​ទាន់​បាន​ចាប់​ផ្តើម​លេប​ថ្នាំ​ប្រឆាំង​អេដស៍​នៅ​ឡើយ​ទេ។

លោក ឈីវុន បាន​មាន​ប្រសាសន៍​ថា “ខ្ញុំ​ទើប​ដឹង​ថា គាត់​ស្លាប់ ប៉ុន្តែ​គាត់​មិន​មែន​ស្លាប់​ដោយសារ​តែ​គាត់​បាន​ប្រើ​ថ្នាំ​ប្រឆាំង​វីរុស​ទេ”។

លោក​បាន​ឲ្យ​ដឹង​ទៀត​ថា ទារិកា​អាយុ​ប្រាំពីរ​ខែ​បាន​ស្លាប់​ដោយសារ​រោគ​រលាក​សួត​រ៉ាំរ៉ៃ​នៅ​មន្ទីរ​ពេទ្យ​កុមារ ជ័យវរ្ម័នទី​៧​ ក្នុង​ក្រុង​សៀមរាប​កាលពី​ថ្ងៃ​អង្គារ ប៉ុន្តែ​បាន​បដិសេធ​មិន​អធិប្បាយ​បន្ថែម​ទេ។

លោក សឿម ឆុំ ជា​ជំទប់​​ឃុំរកា បាន​ប្រាប់​ថា​ ស្ត្រី​ដែល​ស្លាប់​នោះ​ឈ្មោះ ឈឹម ភឿក និង​បាន​និយាយ​ថា លោក​មិន​បាន​ស្គាល់​ឈ្មោះ​ទារិកា​នោះ​ទេ។

លោក ហេង មុន្នីចិន្តា នាយក​អង្គការ​ពុទ្ធសាសនា​ដើម្បី​ការអភិវឌ្ឍន៏ ជា​អង្គការ​មិនមែន​រដ្ឋាភិបាល​ដែល​កំពុង​ផ្តល់​ជំនួយ​ដល់​អ្នកភូមិ​ឃុំ​រកា​ដែល​ឆ្លង​វីរុស​ហ៊ីវ បាន​មាន​ប្រសាសន៍​ថា វា​មិន​ច្បាស់​ថា​ ឈឹម ភឿក បាន​ស្លាប់​ដោយសារ​អ្វី​នោះ​ទេ។

លោក​បាន​និយាយ​នៅ​កិច្ច​ពិភាក្សា​តុមូល​ស្តីពី​ការ​ផ្ទុះ​វីរុស​ហ៊ីវ​ ឯសណ្ឋាគារ​កាំបូឌីយ៉ាណា​ ក្នុង​ក្រុង​ភ្នំពេញ​កាលពី​ថ្ងៃ​ព្រហស្បតិ៍​ថា “យើង​មិន​ទាន់​បាន​ពិនិត្យ​មើល ថាតើ​គាត់​ស្លាប់​ដោយសារ​ថ្នាំ​របេង ឬ​ដោយសារ​សុខភាព​ខ្សោយ​ខ្លាំង​នោះ​ទេ”។

លោក​បាន​និយាយ​ថា “អ្វី​ដែល​យើង​ដឹង​គឺ​ថា គាត់​មាន​រោគ​របេង​និង​ហ៊ីវ។ ពេល​នោះ​គាត់​បាន​និយាយ​ថា ‘ខ្ញុំ​ល្ហិតល្ហៃ​ណាស់’ ហើយ​គាត់​បាន​ស្លាប់”។ លោក​បាន​បន្ថែម​ថា អ្នក​ភូមិ​ឃុំ​រកា​២៣៤​នាក់​ឥឡូវ​នេះ​ធ្វើ​តេស្ត​មាន​មេរោគ​ហ៊ីវ ចាប់តាំងពី​វីរុស​នេះ​ត្រូវ​បាន​រោគ​ឃើញ​ដំបូង​កាលពី​ចុង​ខែវិច្ឆិកា​មក។

លោក ម៉ាសាមិ ហ្វូជីតាក់ (Masami Fujita) ប្រធាន​ក្រុម​ការងារ​ទទួល​បន្ទុក​មេរោគ​ហ៊ីវ​នៅ​អង្គការ​សុខភាព​ពិភព​លោក​ប្រចាំ​ប្រទេស​កម្ពុជា បាន​មាន​ប្រសាសន៍​ថា រោគ​របេង​ជា​កង្វល់​ធ្ងន់ធ្ងរ​សម្រាប់​មនុស្ស​មាន​វីរុស​ហ៊ីវ។

លោក​បាន​មាន​ប្រសាសន៍​ថា “ជា​ធម្មតា​របេង​ជា​មូលហេតុ​​ចម្បង​ជាងគេ​ដែល​បណ្តាល​ឲ្យ​ស្លាប់។ របេង​ចាំបាច់​ត្រូវតែ​បង្ការ​និង​ព្យាបាល​ ប្រសិនបើ​ពួកគេ​មាន​ជំងឺ​នេះ បញ្ហា​នេះ​សំខាន់​ណាស់”។

លោក​វេជ្ជបណ្ឌិត ហ្វូជីតាក់ បាន​មាន​ប្រសាសន៍​ថា ប្រសិនបើ​មនុស្ស​ម្នាក់​លេប​ថ្នាំ​ប្រឆាំង​អេដស៍​ហើយ វា​មាន​សុវត្ថិភាព​សម្រាប់​ពួកគេ​ក្នុង​ការ​លេប​ថ្នាំ​របេង​ដែរ។

លោក​បាន​បន្ថែម​ថា ទោះជា​យ៉ាង​នេះ​ក្តី ក្នុង​ករណី​ដែល​មិន​បាន​លេប​ថ្នាំ​ណា​មួយ​ទេ ថ្នាំ​របេង​គួរ​ត្រូវ​ឲ្យ​លេប​ពីរ​សប្តាហ៍​មុន​នឹង​ចាប់ផ្តើម​លេប​ថ្នាំ​ប្រឆាំង​អេដស៍។

លោក​បាន​ឲ្យ​ដឹង​ទៀត​ថា “ជា​ធម្មតា​ទាក់ទិន​នឹង​ករណី​ហ៊ីវ ការ​ព្យាបាល​រោគ​របេង​ត្រូវ​ចាប់​ផ្តើម​ជាមុន​សិន បន្ទាប់មក​ទើប​ចាប់ផ្តើម​ការ​ព្យាបាល​ហ៊ីវ”។ លោក​បាន​មាន​ប្រសាសន៍​ថា ប្រសិនបើ​លេប​ថ្នាំ​របេង​ក្រោយ​ថ្នាំ​ហ៊ីវ ដូចជា​ក្នុង​ករណី​ស្ត្រី​អាយុ​៧៣​នេះ ជំងឺ​របេង​អាច​កាន់តែ​ធ្ងន់​ឡើង។

លោក​វេជ្ជបណ្ឌិត ហ្វូជីតាក់ បាន​មាន​ប្រសាសន៍​ថា ជាទូទៅ​ចំពោះ​ជំងឺ​សួត ដូចជា​ការ​រលាក​សួត ឬ​រោគ​រលាក​ទងសួត មុខជា​បណ្តាល​ឲ្យ​អ្នក​ផ្ទុក​អេដស៍​ស្លាប់​បាន៕ មានិត

 

© 2015, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.