បុរសពីរនាក់ក្នុងចំណោមបីនាក់ដែលត្រូវបានចោទប្រកាន់ពីបទប្រើប្រាស់និងជួញដូរថ្នាំមេតំហ្វេតាមីននៅក្នុងពន្ធនាគារព្រៃសដែលមានការយាមកាមតឹងរ៉ឹងនោះ បានបដិសេធការចោទប្រកាន់ពីបទជួញដូរថ្នាំញៀន អំឡុងសវនាការជំនុំជម្រះនៅសាលាដំបូងរាជធានីភ្នំពេញកាលពីម្សិលមិញ។
អ្នកទោសឈ្មោះ នុត កែវរចនា និង ទូច សុវណ្ណ ដែលមានអាយុ៣២ឆ្នាំដូចគ្នា និង លី ធៀនម៉ម អាយុ៣៩ឆ្នាំ ត្រូវបានចោទប្រកាន់ពីបទប្រើប្រាស់និងជួញដូរថ្នាំញៀន ខណៈពេលជាប់ឃុំក្នុងពន្ធនាគារព្រៃសកាលពីឆ្នាំ២០១៣។
បច្ចុប្បន្ននេះ កែវរចនា កំពុងអនុវត្តទោសរបស់ខ្លួននៅខេត្តពោធិ៍សាត់ ហើយមិនបានចូលរួមក្នុងសវនាការកាលពីម្សិលមិញឡើយ។ សុវណ្ណ និង ធៀនម៉ម បានសារភាពនៅក្នុងតុលាការថា បានប្រើប្រាស់ថ្នាំមេតំហ្វេតាមីនមែន ប៉ុន្តែ បានបដិសេធថា មិនបានជួញដូរថ្នាំញៀនទេ។
សុវណ្ណ បាននិយាយថា គាត់ធ្លាប់ទទួលបានប្រាក់៥០ដុល្លារពីអ្នកទោសម្នាក់ដែលមានជំងឺ ដែលបានស្លាប់តាំងពីពេលនោះ ឲ្យទិញថ្នាំពេទ្យឲ្យគាត់ ប៉ុន្តែបានអះអាងថា ថ្នាំពេទ្យនោះមិនមែនជាថ្នាំញៀនខុសច្បាប់ទេ។
គាត់បានប្រាប់តុលាការថា “ខ្ញុំមិនទទួលយកការចោទប្រកាន់ពីបទជួញដូរថ្នាំញៀនទេ។ នគរបាលពន្ធនាគាររកមិនឃើញថ្នាំញៀនជាប់ខ្លួនរបស់ខ្ញុំឡើយ។ ខ្ញុំមិនដឹងថា ហេតុអ្វីបានជាពួកគេចោទប្រកាន់ខ្ញុំ”។
ទោះជាយ៉ាងណា នៅក្នុងការផ្តល់សក្ខីកម្មរបស់ខ្លួន ធៀនម៉ម បាននិយាយថា គាត់ធ្លាប់ផ្តល់ប្រាក់៥០ដុល្លារទៅ សុវណ្ណ ដើម្បីទិញថ្នាំញៀនពីអ្នកទោសម្នាក់ឈ្មោះ ហាក់ ឡេង ដែលឥឡូវនេះបានស្លាប់ទៅហើយ។
គាត់បាននិយាយថា “ខ្ញុំបានសុំឲ្យ ទូច សុវណ្ណ ទិញថ្នាំពី ហាក់ ឡេង ហើយខ្ញុំបានផ្តល់ប្រាក់២០០.០០០រៀល។ ខ្ញុំបានប្រើប្រាស់ថ្នាំញៀន ពីព្រោះខ្ញុំតានតឹងក្នុងអារម្មណ៍”។
បើទោះជាការធ្វើបែបនេះទូទៅទៅហើយក៏ដោយ ក៏លោក កែវ មុនី ចៅក្រមប្រធានក្រុមប្រឹក្សាជំនុំជម្រះ បានហៅការលក់ថ្នាំញៀននៅក្នុងពន្ធនាគារថា “ជារឿងមិនគួរឲ្យជឿ”។ លោកចៅក្រម មុនី បានមានប្រសាសន៍ថា តុលាការនឹងប្រកាសសាលក្រមនៅថ្ងៃទី៣ ខែមីនា។
នៅក្នុងករណីដាច់ដោយឡែកមួយទៀត នគរបាលខេត្តត្បូងឃ្មុំ បានចាប់ខ្លួនស្ត្រីអាយុ៤៦ឆ្នាំម្នាក់កាលពីថ្ងៃច័ន្ទពីបទប៉ុនប៉ងជួញដូរថ្នាំមេតំហ្វេតាមីនទៅឲ្យប្តីរបស់ខ្លួននៅក្នុងពន្ធនាគារត្រពាំងផ្លុងដោយលាក់នៅក្នុងសម្លសាច់គោ។
លោក គា សុវណ្ណា ប្រធានពន្ធនាគារបានមានប្រសាសន៍ថា ស្ត្រីឈ្មោះ ឃិន សាង ត្រូវបានចាប់នៅច្រកទ្វារពន្ធនាគារនៅពេលសន្តិសុខបានឆែកសម្លរបស់គាត់ ហើយបានរកឃើញថ្នាំមេតំហ្វេតាមីន២៨គ្រាប់ និងម៉ាទឹកកក៥ក្រាមលាក់ទុកក្នុងនោះ។
លោកបានមានប្រសាសន៍ថា “យើងបានរកឃើញថ្នាំញៀននៅក្នុងឆ្អឹងគោធំមួយ។ គាត់បានរុំវានៅក្នុងថង់ប្លាស្ទីក”។ លោកបានបន្ថែមថា ស្ត្រីឈ្មោះ សាង បានសារភាពថា បានធ្វើដូចនេះបួនលើកមកហើយ៕សារុន