ថ្លែងលើកឡើងពីប្រទេសឥណ្ឌូនេស៊ី និងម៉ាឡេស៊ី ដែលជាប្រទេសមូស្លីម យកជាឧទាហរណ៍សម្រាប់កម្ពុជានោះ មេដឹកនាំគណបក្សប្រឆាំង លោក សម រង្ស៊ី បានដឹកនាំអ្នកតំណាងរាស្ត្រមួយក្រុម ដើម្បីកៀងគរសន្លឹកឆ្នោតនៅក្នុងភូមិខ្មែរឥស្លាមក្នុងខេត្តត្បូងឃ្មុំកាលពីថ្ងៃសៅរ៍។
គណបក្សប្រជាជនកម្ពុជាដែលកំពុងកាន់អំណាច មានឥទ្ធិពលយ៉ាងខ្លាំងទៅលើសន្លឹកឆ្នោតខ្មែរឥស្លាម ដោយមានចាស់ព្រឹទ្ធាចារ្យ សហគមន៍ដ៏មានឥទ្ធិពល ដែលនៅតែមានភក្តីភាពចំពោះគណបក្សកាន់អំណាចនេះ ដោយសារតែមានការស្រឡាញ់រាប់អានចំពោះឥស្លាម ក្រោយពីការដួលរលំនៃរបបខ្មែរក្រហម។
ទោះជាយ៉ាងណាក៏ដោយ ខ្មែរឥស្លាមពីរបីរយនាក់ បានមកស្តាប់លោក សម រង្ស៊ី មានប្រសាសន៍នៅក្នុងឃុំ សេដា ស្រុក តំបែរ កាលពីថ្ងៃសៅរ៍ ដោយមេដឹកនាំគណបក្សប្រឆាំងរូបនេះបានកោតសរសើរប្រព័ន្ធនយោបាយរបស់ប្រទេសឥណ្ឌូនេស៊ី និងប្រទេសម៉ាឡេស៊ី។
លោក សម រង្ស៊ី បានមានប្រសាសន៍មុននឹងលើកឡើងអំពីមេរៀន ដែលលោកបានមានប្រសាសន៍ថា ប្រទេសកម្ពុជាគួររៀនពីប្រទេសជិតខាងរបស់ខ្លួនថា “ខ្ញុំគោរពប្រទេសទាំងពីរ ដែលយើងអាចយកជាគំរូសម្រាប់ប្រទេសកម្ពុជានាពេលនេះ ដើម្បីធ្វើឲ្យប្រទេសស្អាតស្អំ”។
លោក រង្ស៊ី បានមានប្រសាសន៍ថា “កំុប្រព្រឹត្តអំពើពុករលួយ ដូចសព្វថ្ងៃនេះ។ កុំបំផ្លាញជាតិ ដូចសព្វថ្ងៃនេះ។ កុំបំផ្លាញជីវភាពរស់នៅរបស់ប្រជារាស្ត្រ ដូចសព្វថ្ងៃនេះ។ កុំបំផ្លាញអនាគតកូនចៅរបស់យើង ដូចសព្វថ្ងៃនេះ”។
លោក រង្ស៊ី បានមានប្រសាសន៍ដោយរិះគន់ចំពោះការរឹបអូសយកដីធ្លីនៅក្នុងប្រទេសថាជា “អំពើអាក្រក់ ដោយមិនគិតពីសាសនាដែលយើងកាន់” ថា ”ក្រឡេកមើលប្រទេសឥណ្ឌូនេស៊ី និងម៉ាឡេស៊ី។ មិនមានការបំផ្លិចបំផ្លាញបែបនេះ នៅទីនោះទេ”។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានមានប្រសាសន៍ថា លោកមិនមានការព្រួយបារម្ភអំពីការនិយាយរឿងនយោបាយកាលពីចុងសប្តាហ៍របស់លោក រង្ស៊ី ទេ ដោយចោទមេដឹកនាំគណបក្សសង្គ្រោះជាតិរូបនេះ ថានិយាយបំផ្លើស។
លោក ឥសាន បានមានប្រសាសន៍ថា “អ្វីដែលគាត់និយាយ គឺជាសកម្មភាពប្រចាំថ្ងៃរបស់គណបក្សប្រឆាំង។ ប្រសិនបើគាត់មិនបាននិយាយដូច្នេះទេ តើគាត់ធ្វើជាគណបក្សប្រឆាំងម្តេ៉ចកើត”?
អ្នកនាំពាក្យគណបក្យប្រជាជនកម្ពុជារូបនេះ បានមានប្រសាសន៍ថា “យើងមិនមានកង្វល់ទេ។ ប្រជាពលរដ្ឋ មិនអាចចាញ់បោកគេងាយៗទេ ឥឡូវនេះ ពីព្រោះគេគិតពិចារណាចំពោះអ្វី ដែលគេឮ។ រដ្ឋាភិបាល កំពុងប្រឹងប្រែងរាល់ថ្ងៃដើម្បីធ្វើឲ្យប្រទេសក្លាយជានីតិរដ្ឋ និងប្រជាធិបតេយ្យ”។
ទាក់ទងកាលពីម្សិលមិញ លោក រង្ស៊ី បានមានប្រសាសន៍ថា ភក្តីភាពរបស់សហគមន៍ខ្មែរឥស្លាម កំពុងតែមានការផ្លាស់ប្តូរ ដោយសារតែមានយុវជនកាន់តែច្រើនឡើងទៅសិក្សានៅក្រៅប្រទេស”។
លោក រង្ស៊ី បានមានប្រសាសន៍ថា “ចាមភាគច្រើនទៅប្រទេសម៉ាឡេស៊ី ឬ កំពុងនៅក្នុងប្រទេសម៉ាឡេស៊ីនៅឡើយ ហើយនៅក្នុងប្រទេសម៉ាឡេស៊ី ពួកគេមើលឃើញប្រទេសខុសគ្នា។ ប្រទេសគេសំបូរសប្បាយ ហើយមានការងារធ្វើច្រើន ហើយពួកគេចង់ឲ្យប្រទេសកម្ពុជាសំបូរសប្បាយនិង អភិវឌ្ឍដូចប្រទេសម៉ាឡេស៊ីដែរ”។
លោក រង្ស៊ី បានមានប្រសាសន៍បន្ថែមថា “កត្តាផ្សេងទៀត ត្រង់ថា ចាមគឺជាជនរងគ្រោះនៃ ការរំលោភដីធ្លី និងសម្របសម្រួលខ្លួនរស់នៅជាមួយសហគមន៍ផ្សេងទៀត ដែលចង់ឲ្យមានការផ្លាស់ប្តូរនៅក្នុងប្រព័ន្ធដឹកនាំ ដែលមានអំពើពុករលួយតិចតួច។ ជារឿងគួរឲ្យចាប់ អារម្មណ៍ និងជាការប្រកួតប្រជែងសម្រាប់គណបក្សសង្គ្រោះជាតិ ដើម្បីចូលទៅក្នុងសហគមន៍របស់ពួកគេ”៕ រើន