យោងតាមតំណាងសហជីព និងមន្ត្រីនគរបាលបានឲ្យដឹងថា កម្មករដែលបានធ្វើកូដកម្មនៅរោងចក្រ Quantum Clothing ក្នុងរាជធានីភ្នំពេញ បានដាក់ពាក្យបណ្ដឹងប្ដឹងអ្នកគ្រប់គ្រងរបស់ខ្លួនតាមចោទថា បានវាយកម្មករពីរនាក់អំឡុងការតវ៉ាកាលពីម្សិលមិញ នៅខាងក្រៅរោងចក្រ។
កម្មករប្រហែល៣.០០០នាក់បានធ្វើកូដកម្មកាលពីថ្ងៃព្រហស្បតិ៍ តវ៉ាចំពោះការដំឡើងប្រាក់ខែគោលរបស់រដ្ឋាភិបាលកាលពីខែមករា ដែលមិនរាប់បញ្ចូលកម្មករដែលមានប្រាក់ខែលើសពី១២៨ដុល្លាររួចទៅហើយនោះ។
លោកស្រី ទូច សឿ អនុប្រធានសហជីពសេរីកម្មករបានមានប្រសាសន៍ថា នៅម៉ោងប្រហែល៧និង១០នាទីព្រឹកម្សិលមិញ ខណៈដែលកម្មករប្រហែល១.០០០នាក់បានធ្វើការតវ៉ានៅខាងក្រៅរោងចក្រ ដែលស្ថិតនៅតាមផ្លូវវេងស្រេង បុគ្គលិករោងចក្របានវាយអ្នកតវ៉ាពីរនាក់។
លោកស្រី ទូច សឿ បានមានប្រសាសន៍ថា “ស្ត្រីពីរនាក់ត្រូវបានចាប់បោចសក់ ហើយអូសចូលក្នុងរោងចក្រ ប៉ុន្តែម្នាក់អាចរត់គេចខ្លួនរួច ចំណែកម្នាក់ទៀតត្រូវបានទះកំផ្លៀងរហូតមានស្នាមជាំ”។ លោកស្រីបានបន្ថែមថា ភ្លាមៗនោះសហជីពបានដាក់ពាក្យបណ្ដឹងទៅនគរបាលសង្កាត់ចោមចៅ។
អ្នកស្រី វណ្ណ កក្កដា អ្នកគ្រប់គ្រងផ្នែកធនធានមនុស្សនៅរោងចក្រ Quantum Clothing បានបដិសេធការចោទប្រកាន់នេះ។ អ្នកស្រីបាននិយាយថា ការចោទប្រកាន់របស់ពួកគេមិនពិតឡើយ ពីព្រោះគ្មានបុគ្គលិករោងចក្រណាវាយកម្មករឡើុយ។ កម្មករបានយកម៉ូតូបិទច្រកទ្វារចូលរោងចក្រ ដែលធ្វើឲ្យកម្មករមានកំហឹងសហការជាមួយរោងចក្រ”។
អ្នកស្រី កក្កដា បានអះអាងថា លោក សុខ ប៊ុនឡេង ប្រធានផ្នែកនាំចូលនិងនាំចេញនៅរោងចក្រនេះ ដែលតាមចោទថា បានវាយកម្មករនោះ គឺជាអ្នកព្យាយាមជួយអន្តរាគមន៍ក្នុងការប៉ះទង្គិចគ្នារវាងកម្មករដែលធ្វើការតវ៉ានិងសហសេវិករបស់ខ្លួនដែលព្យាយាមចូលក្នុងរោងចក្រតែប៉ុណ្ណោះ។អ្នកស្រីបាននិយាយថា ” គាត់បានទៅឃាត់កម្មករកុំឲ្យវាយគ្នា។ គាត់មិនបានវាយនរណាម្នាក់ទេ”។
លោក រឿង ចាន់រុង មន្ត្រីនគរបាលសង្កាត់ចោមចៅបានអះអាងថា នគរបាលបានទទួលពាក្យបណ្ដឹងហើយ។
លោក ចាន់រុង បានមានប្រសាសន៍ថា “យើងទទួលបានពាក្យបណ្ដឹងពីកម្មការិនីពីរនាក់នៅព្រឹកនេះ ដោយចោទប្រកាន់បុគ្គលិករោងចក្រថា បានប្រើអំពើហិង្សាមកលើពួកគេ”។ លោកបានបន្ថែមថា តំណាងរោងចក្រនឹងត្រូវហៅមកសាកសួរនៅថ្ងៃនេះ៕ សារុន