ក្រោយការធ្វើកូដកម្មមួយថ្ងៃកាលពីថ្ងៃពុធ គ្រូបង្រៀនប្រហែល១៧០នាក់បានចូលធ្វើការវិញនៅវិទ្យាល័យមួយក្នុងក្រុងសៀមរាបកាលពីម្សិលមិញ ខណៈគ្រូបង្រៀនម្នាក់ដែលត្រូវបានចោទប្រកាន់ពីបទវាយនាយករងនៅពិធីមង្គលការមួយកាលពីពេលថ្មីៗនេះ ត្រូវបានប្តូរទៅកាន់មន្ទីរអប់រំខេត្ត។
លោក ហង់ ជួន ណារ៉ុន រដ្ឋមន្ត្រីក្រសួងអប់រំបានលើកឡើងថា លោក ជាន សន គ្រូបង្រៀនភាសាអង់គ្លេសនៅវិទ្យាល័យ១០ មករា ១៩៧៩ ដែលតាមចោទថា បានវាយលោក លី ប៊ុនសុផុននី នៅក្នុងពិធីមង្គលការមួយកាលពីដើមខែមករាត្រូវបានផ្ទេរជាបណ្តោះអាសន្នទៅកាន់មន្ទីរអប់រំខេត្ត។
លោកបានមានប្រសាសន៍ថា “យើងបានសម្រេចបញ្ជូន [ជាន សន] ទៅកន្លែងផ្សេង ព្រោះយើងមិនចង់ខ្ជះខ្ជាយពេលវេលារៀនសូត្ររបស់សិស្សបន្តទៀតឡើយ ប៉ុន្តែ នេះមិនមែនជាការសម្រេចចុងក្រោយទេ”។
លោក ជួន ណារ៉ុន បានលើកឡើងទៀតថា លោកក៏បានស្នើឲ្យ លោក អុ៊ង សិរីឌី ប្រធានមន្ទីរអប់រំស៊ើបអង្កេតករណីវាយតប់នេះដែរ។
លោកបានមានប្រសាសន៍បន្ថែមថា “យើងនៅតែត្រូវការស្វែងរកយុត្តិធម៌សម្រាប់បុរសទាំងពីរនេះ ហើយយើងត្រូវការឲ្យគ្រូមកបង្រៀនសិស្ស។ តើខ្ញុំអាចនិយាយបានថា នរណាខុស នរណាត្រូវយ៉ាងម៉េចទៅ?”។
កាលពីថ្ងៃពុធ គ្រូបង្រៀននៅវិទ្យាល័យនេះបានធ្វើកូដកម្មមិនចូលបង្រៀនដើម្បីគាំទ្រលោក សុផុននី ដែលតាមការរាយការណ៍ថា ក៏ទទួលបានការគាំទ្រពីមាតាបិតាសិស្សមួយចំនួនផងដែរនោះ។
លោក ជាន សន បានបដិសេធការចោទប្រកាន់ដែលថា លោកជាអ្នកវាយនាយករងមុននៅពិធីមង្គលការដោយអះអាងថា អ្នករួមការងាររូបនេះទេដែលជាអ្នកវាយខ្លួនដោយសារការច្រណែន បន្ទាប់ពីខ្លួនទទួលបានចំណាត់ថ្នាក់ល្អជាងគេក្នុងការស្ទាប់ស្ទង់មតិនៅវិទ្យាល័យ។
លោក ជាន សន បាននិយាយថា “ហេតុផលដែលនាយករងមិនសប្បាយចិត្តនឹងខ្ញុំព្រោះគាត់មិនឈ្នះនៅក្នុងការស្ទាបស្ទង់មតិដែលគ្រូទាំងអស់ត្រូវតែវាយតម្លៃគ្រូផ្សេងៗទៀត ហើយខ្ញុំជាប់ចំណាត់ថ្នាក់លេខ១”។
លោក គឹម ឡេង នាយកវិទ្យាល័យនេះបានបញ្ជាក់ថា គ្រូបង្រៀនបានត្រឡប់មកធ្វើការវិញកាលពីម្សិលមិញ ហើយថា លោក ជាន សន ត្រូវបានផ្តល់ការងារឲ្យនៅក្នុងការិយាល័យកីឡានៅមន្ទីរអប់រំ។
លោក ព្រំ ប៊ុនលី គ្រូបង្រៀនម្នាក់ទៀតនៅវិទ្យាល័យនេះបានលើកឡើងថា លោកស្វាគមន៍ចំពោះការផ្លាស់លោក ជាន សន ឲ្យទៅកន្លែងផ្សេង។ លោកបាននិយាយថា “ខ្ញុំសប្បាយចិត្តដែលគាត់ [លោក ជាន សន] ត្រូវបានផ្លាស់ចេញពីវិទ្យាល័យនេះ ព្រោះឥឡូវនេះសាលាចាំបាច់ត្រូវរក្សាកេរ្តិ៍ឈ្មោះរបស់ខ្លួន”៕ស៊ុយឈាង