អ្នកឃ្លាំមើលសិទ្ធិមនុស្សម្នាក់បានលើកឡើងថា ព្រះសង្ឃដែលត្រូវបានផ្សឹកមួយអង្គដែលត្រូវបានផ្តន្ទាទោសដាក់ពន្ធនាគារមួយឆ្នាំពីបទរារាំងក្រុមមន្ត្រីអំឡុងការចាប់ខ្លួនសកម្មជន និងឥស្សរជនគណបក្សប្រឆាំងក្នុងរាជធានី ភ្នំពេញកាលពីឆ្នាំមុននោះ កាលពីម្សិលមិញត្រូវបានធ្វើការសាកសួរជុំវិញការចោទប្រកាន់បន្ថែមពីបទ “ចូលរួមក្នុងសមាគមជនទុច្ចរិត”។
លោក សឹង ហៃ អាយុ ២៨ឆ្នាំ ត្រូវបានឃុំខ្លួននៅពន្ធនាគារព្រៃស ចាប់តាំងពីត្រូវបានផ្តន្ទាទោសកាលពីថ្ងៃទី១២ ខែវិច្ឆិកា មួយថ្ងៃបន្ទាប់ពីគាត់បានចូលរួមតវ៉ានៅមុខសាលាដំបូងរាជធានីភ្នំពេញប្រឆាំងនឹងការចាប់ខ្លួនសកម្មជនប្រឆាំងការបណ្តេញចេញពីដី៧នាក់ពីតំបន់បឹងកក់។
ព្រះសង្ឃពីរអង្គទៀតត្រូវបានចោទប្រកាន់នៅថ្ងៃបន្ទាប់ពីបទ “ចូលរួមក្នុងសមាគមជនទុច្ចរិត” ដោយបានដឹកបាវទង់ជាតិទៅកន្លែងតវ៉ា ហើយលោក សឹង ហៃ ត្រូវបានកោះហៅទៅតុលាការកាលពីម្សិលមិញដើម្បីធ្វើការសាកសួរជុំវិញការចោទប្រកាន់ថា គាត់ជាអ្នកផ្តល់ដងទង់ជាតិទាំងនោះ។
មុនពេលនគរបាលរុញចេញផុតពីក្រសែភ្នែក លោក សឹង ហៃ បានស្រែកសំដៅអ្នកយកព័ត៌មានខណៈពេលចេញពីបន្ទប់តុលាការថា “ខ្ញុំត្រូវបានកោះហៅមកសាកសួរទាក់ទងការចូលរួមក្នុងសមាគមជនទុច្ចរិត”។
លោក អំ សំអាត អ្នកគ្រប់គ្រងជាន់ខ្ពស់ផ្នែកបច្ចេកទេសនៅអង្គការលីកាដូបានមានប្រសាសន៍ថា លោក សឹង ហៃ ត្រូវបានចោទប្រកាន់ពីបទចូលរួមក្នុងសមាគមជនទុច្ចរិតកាលពីខែវិច្ឆិកា បន្តិចបន្ទាប់ពីព្រះសង្ឃពីរអង្គទៀតបានប្រាប់ថា គាត់ជាអ្នកផ្តល់ដងទង់ជាតិ ប៉ុន្តែថា ការចោទប្រកាន់លើគាត់ត្រូវបានបញ្ជាក់ជាសាធារណៈកាលពីម្សិលមិញ។
ក្រៅពីចោទប្រកាន់ពីបទរារាំងមន្ត្រីសាធារណៈ លោក សឹង ហៃ ក៏ត្រូវបានចោទប្រកាន់កាលពីឆ្នាំមុនថា បានគ្រងស្បង់ចីវរនិងប្រើឆាយាខុសច្បាប់ផងដែរ។ លោក សំអាត បាន
មានប្រសាសន៍ថា អង្គការលីកាដូបានតំណាងលោក សឹង ហៃ ជុំវិញការចោទប្រកាន់ទាំងពីរនេះ ហើយទំនងជាផ្តល់មេធាវីដល់គាត់សម្រាប់បទចោទប្រកាន់នេះ។
លោក សំអាត បានមានប្រសាសន៍ថា ”ពេលនេះ ការចោទប្រកាន់ទី៣ គឺការចូលរួមក្នុងសមាគមជនទុច្ចរិត។ យើងនឹងជួបគាត់ដើម្បីពិចារណាផ្តល់មេធាវីដល់គាត់ ពីព្រោះនេះគឺជាបទល្មើសថ្មី និងជាការចោទប្រកាន់បន្ថែម”។
លោកបានបន្ថែមថា “យើងប្រហែលជាស្នើឲ្យមេធាវីដែលការពារគាត់ក្នុងករណីពីរមុនការពារគាត់ក្នុងករណីទី៣នេះដែរ”។
លោក សឹង ហៃ ដែលជាខ្មែរក្រោម កាលពីដើមឆ្នាំមុន បានដុតទង់ជាតិវៀតណាមអំឡុងការតវ៉ានៅខាងក្រៅស្ថានទូតរបស់ប្រទេសនេះក្នុងរាជធានីភ្នំពេញ ហើយបានចាត់ទុកប្រព័ន្ធតុលាការកម្ពុជាថា ជា “អាយ៉ង” របស់វៀតណាម៕សារុន