សកម្មជននិងមន្ត្រីគណបក្សសង្គ្រោះជាតិប្រហែល៣០០នាក់ បានជួបជាមួយប្រធានគណបក្សសង្គ្រោះជាតិ លោក សម រង្ស៊ី និងអនុប្រធាន លោក កឹម សុខា ក្នុងខេត្តសៀមរាបដើម្បីដោះស្រាយបញ្ហាទាក់ទិននឹងការចោទប្រកាន់ លោកស្រី កែ សុវណ្ណរតន៍ ប្រធានក្រុមការងារបក្សខេត្តថា បក្ខពួកនិយម និងចាយវាយថវិកាមិនមានតម្លាភាព។
លោក ឈួន វិទ្យា សមាជិកក្រុមសម្របសម្រួលគណបក្សសង្គ្រោះជាតិស្រុកក្រឡាញ់ ដែលបានចូលរួមក្នុងកិច្ចប្រជុំរយៈពេល៣ម៉ោងនោះ បាននិយាយថា លោក រង្ស៊ីបានមានប្រសាសន៍នៅក្នុងអង្គប្រជុំថា លោកនឹងយកការអះអាងរបស់ក្រុមអ្នកគាំទ្រនិងអ្នកប្រឆាំងនឹងអ្នកស្រី សុវណ្ណរតន៍ ទៅពិចារណាជាមុនសិន មុននឹងធ្វើការសម្រេចចិត្តបែបណានោះ។
លោក វិទ្យា បាននិយាយដកស្រង់សំដីរបស់លោក រង្ស៊ីថា “ឯកឧត្តម រង្ស៊ីបានមានប្រសាសន៍ថា ភាគីទាំងសងខាងមានហេតុផលរៀងៗខ្លួន ដូច្នេះ គាត់នឹងយកហេតុផលទៅពិចារណា។ យើងនឹងជួបគ្នានៅលើកទីពីរទៀត”។
លោក វិទ្យាបាននិយាយថា “ប្រសិនបើមិនមានការប្តូរ កែ សុវណ្ណរតន៍ទេ យើងនឹងតវ៉ាកាន់តែខ្លាំងឡើង”។
លោកស្រី សុវណ្ណរតន៍ បានមានប្រសាសន៍ថា លោកស្រី មិនបានប្រព្រឹត្តកំហុសអ្វីឡើយ។ លោកស្រី សុវណ្ណរតន៍ បានមានប្រសាសន៍ថា “តើគាត់មានឯកសារ ឬភ័ស្តុតាងឬអត់? បើមានឯកសារ និងភ័ស្តុតាង ហើយបើខ្ញុំមានកំហុស អាស្រ័យលើថ្នាក់ដឹកនាំជាអ្នកសម្រេច” ។
កាលពីថ្ងៃច័ន្ទ មន្ត្រីគណបក្សសង្គ្រោះជាតិជាង៥០នាក់មកពីខេត្តសៀមរាប បានតវ៉ានៅខាងក្រៅទីស្នាក់ការកណ្តាលគណបក្សក្នុងខណ្ឌមានជ័យ ដើម្បីសុំឲ្យដកលោកស្រី សុវណ្ណរតន៍។រើន