សមាជិកសភាអ៊ុយក្រែនមួយរូបដែលអាជ្ញាធរកម្ពុជាកំពុងតែតាមស្វែងរកជុំវិញការចោទប្រកាន់ពីបទរំលោភបំពានផ្លូវភេទកុមារត្រូវបានលុបឈ្មោះចេញពីបញ្ជីឈ្មោះដែលនគរបាលអាំងទែប៉ូលតាមចាប់ខ្លួនបំផុតកាលពីយប់ថ្ងៃអង្គារ ព្រោះបើយោងតាមការិយាល័យនគរបាលអាំងទែប៉ូលកម្ពុជាបានឲ្យដឹងថា “ករណីនេះមានជាប់ពាក់ព័ន្ធនឹងរឿងនយោបាយនៅក្នុងប្រទេសអ៊ុយក្រែន និងរុស្សី”។
នគរបាលអាំងទែប៉ូល បានចេញនិវេទន៍ក្រហមសម្រាប់លោក មីកូឡា ខ្ញាហ្សុឺស្គី (Mykola Kniazhytsky) អាយុ៤៦ឆ្នាំ កាលពីថ្ងៃច័ន្ទ ពីបទរំលោភអនីតិជននៅក្នុងរាជធានីភ្នំពេញកាលពីថ្ងៃទី៩ ខែកញ្ញា ឆ្នាំ២០១១។
តែទោះជាយ៉ាងណា នៅពេលទាក់ទងកាលពីម្សិលមិញ មន្ត្រីកម្ពុជាជាច្រើននាក់ដែលជាធម្មតាដោះស្រាយបញ្ហាពាក់ព័ន្ធនឹងបទល្មើសរំលោភបំពានផ្លូវភេទលើកុមារបានលើកឡើងថា ខ្លួនមិនដឹងអ្វីឡើយអំពីករណីនេះ។ កាលពីម្សិលមិញ លោក លឹម ឈាងឡេង ជំនួយការប្រធានការិយាល័យនគរបាលអាំងទែប៉ូលកម្ពុជាបានបញ្ជាក់ថា និវេទន៍ក្រហមនេះត្រូវបានលុបចោលហើយ។
លោក ឈាងឡេង បានមានប្រសាសន៍ថា “នគរបាលអន្តរជាតិអាំងទែប៉ូលបានលុបចោលនិវេទន៍ក្រហមរួចហើយ ព្រោះករណីនេះជាប់ពាក់ព័ន្ធនឹងរឿងនយោបាយនៅក្នុងប្រទេសអ៊ុយក្រែន និងរុស្សី ។ យើងមិនបានដឹងអ្វីបន្ថែមទៀតឡើយអំពីករណីនេះព្រោះវាជាសំណុំរឿងរបស់តុលាការ”។
លោក ឈាងឡេង បានបដិសេធមិនផ្តល់ព័ត៌មានលម្អិតអំពីករណីរបស់លោក ខ្ញាហ្សុឺស្គី ឡើយ គឺបានត្រឹមតែលើកឡើងថា ការិយាល័យនគរបាលអាំងទែប៉ូលកម្ពុជាបានទទួលដីកាចាប់ខ្លួនជនជាតិអ៊ុយក្រែនរូបនេះពីសាលាដំបូងរាជធានីភ្នំពេញកាលពីថ្ងៃទី១០ ខែមីនា ប៉ុណ្ណោះ។ នៅពេលត្រូវបានសួរថា តើគេដាក់ពាក្យបណ្តឹងអំពីការចាប់រំលោភនេះនៅពេលណា លោកបានមានប្រសាសន៍ថា ”អស់លោកគួរតែទៅសួរតុលាការទៅ”។
ចៅក្រម ឆែ វីរៈ បានលើកឡើងត្រឹមតែថា លោកបានបញ្ចប់ការសើុបអង្កេត ហើយចេញដីកាចាប់ខ្លួន។
លោកបានមានប្រសាសន៍ថា “ខ្ញុំមិនអាចផ្តល់អត្ថាធិប្បាយបានឡើយ ព្រោះខ្ញុំគ្មានឯកសារក្នុងដៃ”។
នៅពេលការចោទប្រកាន់ពីបទចាប់រំលោភបានលេចឡើងកាលពីថ្ងៃច័ន្ទ លោក ខ្ញាហ្សុឺស្គី បានលើកឡើងម្តងហើយម្តងទៀតថា ករណីនេះត្រូវបានប្រឌិតឡើងដោយលោក កុនស្តានទីន កាហ្គាឡូវស្គី (Konstantin Kagalovsky) មហាសេដ្ឋីជនជាតិរុស្សី ដែលធ្លាប់គ្រប់គ្រងបណ្តាញទូរទស្សន៍អ៊ុយក្រែនឈ្មោះថា TVi ជាទីដែលសមាជិកសភាអ៊ុយក្រែនរូបនេះ[លោក ខ្ញាហ្សុឺស្គី]ធ្លាប់ធ្វើជានាយកប្រតិបត្តិ។
លោក ខ្ញាហ្សុឺស្គី បានអះអាងថា លោក កាហ្គាឡូវស្គី មានទំនាក់ទំនងយ៉ាងជិតស្និទ្ធជាមួយអ្នកនយោបាយរុស្សី ហើយបានគូសបញ្ជាក់ថា លោក ហោ ណាំហុង រដ្ឋមន្ត្រីក្រសួងការបរទេសបានទៅទីក្រុងម៉ូស្គូសម្រាប់កិច្ចប្រជុំមួយចំនួនជាមួយសមភាគីរុស្សីរបស់លោក គឺលោក សេរហ្គេ ឡាវរ៉ូវ (Sergei Lavrov) កាលពីថ្ងៃទី២ដល់ថ្ងៃទី៤ ខែមីនា ដោយអំឡុងពេលនោះពួកគាត់ទាំងពីរបានពិភាក្សាអំពីការបង្កើតសន្ធិសញ្ញាបត្យាប័នរវាងប្រទេសទាំងពីរ។
នៅពេលទាក់ទងកាលពីម្សិលមិញ លោក កុយ គួង អ្នកនាំពាក្យក្រសួងការបរទេសបានលើកឡើងថា លោក ខ្ញាហ្សុឺស្គី មិនត្រូវបានលើកយកមកពិភាក្សាទាល់តែសោះអំឡុងកិច្ចប្រជុំទាំងនោះ។
លោកបានមានប្រសាសន៍ថា “លោក ហោ ណាំហុង មិនបានលើកឡើងពីបញ្ហានេះឡើយ អំឡុងពេលលោកបំពេញទស្សនកិច្ចនៅក្នុងប្រទេសរុស្សី”។
នៅក្នុងអីុម៉េលមួយដែលរៀបរាប់ពីប្រវត្តិរវាងលោក កាហ្គាឡូវស្គី និងរូបលោកផ្ទាល់ លោក ខ្ញាហ្សុឺស្គី បានលើកឡើងថា ជនជាតិរុស្សុីរូបេនះគឺជាវិនិយោគិនដ៏ធំនៅក្នុងប្រទេសកម្ពុជា ហើយមានទំនាក់ទំនងមិត្តភាពជាមួយមន្ត្រីជាន់ខ្ពស់នៅក្នុងប្រទេសនេះ។
កាលពីម្សិលមិញ គេមិនអាចរកបានអំពីប្រវត្តិនៃការវិនិយោគរបស់លោក កាហ្គាឡូវស្គី នៅប្រទេសកម្ពុជាឡើយ។ ប៉ុន្តែ កាលពីឆ្នាំ២០០៦លោកបានជួបជាមួយលោកនាយករដ្ឋមន្ត្រី ហ៊ុន សែន ដើម្បីពិភាក្សាអំពីឱកាសនៃការអភិវឌ្ឍដ៏មានសក្ដានុពល។
លោក ខ្ញាហ្សុឺស្គី ក៏បានជំទាស់ផងដែរថា លោកមិនបានរំលោភនរណាម្នាក់នៅក្នុងប្រទេសកម្ពុជាឡើយកាលពីថ្ងៃទី៩ ខែកញ្ញា ឆ្នាំ២០១១ ព្រោះលោកកំពុងតែដំណើរការកម្មវិធីផ្សាយផ្ទាល់មួយឈ្មោះថា “Evening With Mykola Kniazhysky” នៅយប់មុនពេលមានការចោទប្រកាន់នេះ។
ទីភ្នាក់ងារព័ត៌មាន Interfax-Ukraine បានរាយការណ៍កាលពីថ្ងៃអង្គារថា ការិយាល័យនគរបាលអាំងទែប៉ូលនៅក្នុងទីក្រុងកៀវ បានរកឃើញថា “មានភាពខុសគ្នាដ៏ចម្លែក” នៅក្នុងករណីដាក់បន្ទុកលើលោក ខ្ញាហ្សុឺស្គឺ ។ ប្រធានការិយាល័យនគរបាលអាំងទែប៉ូលនៅក្នុងទីក្រុងលីយ៉ុង ប្រទេសបារាំងមិនបានឆ្លើយតបនឹងសំណួរអំពីថា តើហេតុអ្វីបានជានិវេទន៍ក្រហមត្រូវបានលុបចោលនោះឡើយ។
ករណីរបស់លោក ខ្ញាហ្សុឺស្គឺ គឺទំនងជាឧទាហរណ៍ថ្មីៗបំផុតនៃការរំលោភបំពានលើសេវាកម្មរបស់នគរបាលអាំងទែប៉ូល ដែលគេហទំព័ររបស់ខ្លួនលើកឡើងថា ទីភ្នាក់ងារនគរបាលអន្តរជាតិនេះមិនដោះស្រាយ “សកម្មភាពទាក់ទិននឹងរឿងនយោបាយ យោធា សាសនា និងពូជសាសន៍នោះ”។
នៅក្នុងអត្ថបទកាលពីខែវិច្ឆិកា ឆ្នាំ២០១៣ ទស្សនាវដ្ដី The Ecomist បានចុះផ្សាយករណីជាបន្តបន្ទាប់ ដែលក្នុងនោះនគរបាលអាំងទែប៉ូលត្រូវបានគេប្រើប្រាស់ដើម្បីធ្វើការចាប់ខ្លួនជាលក្ខណៈអន្តរជាតិដ៏ចម្រូងចម្រាស។ អត្ថបទនោះបានចុះផ្សាយដូច្នេះថា “រុស្សុីហាក់ដូចជាចូលចិត្តលេងស្នៀតនេះ”។
នៅក្នុងអីុម៉េលមួយកាលពីយប់មិញ លោក ខ្ញាហ្សុឺស្គឺ បានលើកឡើងថា ការលុបចោលនិវេទន៍ក្រហមនេះរឹតតែបញ្ជាក់ឲ្យឃើញថា លោកគ្មានទោសកំហុសអ្វីឡើយ។
លោកបានមានប្រសាសន៍ថា “ការពិតទៅព័ត៌មាននេះបានរលាយសាបសូន្យនៅថ្ងៃបន្ទាប់ ក្រោយពេលពីខ្ញុំបានដាក់សំណើទៅកាន់នគរបាលអាំងទែប៉ូលអ៊ុយក្រែន ដើម្បីបញ្ជាក់ថា វាគឺជា [ការប៉ុនប៉ងមួយ] ដើម្បីបង្ខូចកេរ្តិ៍ឈ្មោះខ្ញុំជាប្រធានគណៈកម្មការមួយរូបនៅក្នុងសភា”។
លោកបានមានប្រសាសន៍បន្ថែមថា “នេះគឺជាការចោទប្រកាន់ដ៏ធ្ងន់ធរណាស់សម្រាប់អ្នកយោបាយមួយរូប ហើយយើងសង្ឃឹមថា នឹងអាចរកឃើញអ្នកដែលផ្តួចផ្តើមបង្កើតករណីនេះក្នុងពេលឆាប់ៗ”៕ស៊ុយឈាង (រាយការណ៍បន្ថែមដោយ Ben Woods)