28 C
Phnom Penh

សាលា​ដំបូង​​​ចោទ​សកម្ម​ជន​​បក្ស​សង្គ្រោះជាតិ​បី​រូប​​​ទៀត​​ពាក់​ព័ន្ធ​នឹង​ការ​តវ៉ា​នៅ​ទីលាន​ប្រជាធិបតេយ្យ​

ដោយ ឌឹ ខេមបូឌា ដេលី

បទវិភាគ

​កាលពី​ម្សិលមិញ សកម្មជន​គណបក្ស​ប្រឆាំង​បី​រូប​​ទៀត​​​ត្រូវ​បាន​ចោទ​ប្រកាន់ពី​បទ​ ​”​ចូល​រួម​កុបកម្ម​” ចំពោះ​ការ​ចូល​រួម​ការ​តវ៉ា​មួយ​ដឹកនាំ​ដោយ​គណបក្ស​សង្គ្រោះជាតិ​ ដែល​បាន​ផ្ទុះ​អំពើ​ហិង្សា​កាលពី​ឆ្នាំ​មុន ដោយ​​​សកម្ម​ជន​ពីរ​​រូប​​​ត្រូវ​បាន​បញ្ជូន​​ខ្លួន​ទៅ​ពន្ធនា​គារ​ព្រៃស​ ចំណែក​ឯ​សកម្ម​ជន​ទី៣​ត្រូវ​បាន​ឃុំខ្លួន​មួយ​យប់​​នៅ​ស្នងការដ្ឋាន​​នគរ​បាល​រាជធានី​ភ្នំ​ពេញ​។

លោក រឿន ចិត្រា (ឆ្វេង) និង​​លោក យន់ គឹមហួរ ​សកម្មជន​គណបក្ស​សង្គ្រោះជាតិ ​ត្រូវ​នគរ​បាល​​ក្រៀក​​ចូល​ទៅ​ក្នុង​សាលា​ដំបូង​រាជធានី​ភ្នំពេញ​កាលពី​ម្សិលមិញ មុន​ពេល​ត្រូវ​តុលាការ​ចោទ​ប្រកាន់ពីបទ​ចូល​រួម​​កុបកម្ម​។ រូបថតៈ ស៊ីវ ចាន់ណា/The Cambodia Daily
លោក រឿន ចិត្រា (ឆ្វេង) និង​​លោក យន់ គឹមហួរ ​សកម្មជន​គណបក្ស​សង្គ្រោះជាតិ ​ត្រូវ​នគរ​បាល​​ក្រៀក​​ចូល​ទៅ​ក្នុង​សាលា​ដំបូង​រាជធានី​ភ្នំពេញ​កាលពី​ម្សិលមិញ មុន​ពេល​ត្រូវ​តុលាការ​ចោទ​ប្រកាន់ពីបទ​ចូល​រួម​​កុបកម្ម​។ រូបថតៈ ស៊ីវ ចាន់ណា/The Cambodia Daily

លោក សំ សុគង់ មេធាវី​របស់​ពួក​គាត់ និយាយថា នៅ​ក្នុង​ចំណាត់​ការ​ដែល​គណបក្ស​ប្រឆាំង​​​​ចាត់​ទុក​ថាជា​ការ​គំរាម​កំហែង​ផ្នែក​នយោ​បាយ​ សាលា​ដំបូង​រាជធានី​​ភ្នំ​ពេញ បាន​ចំណាយ​ពេល​​តិច​តួច​ប៉ុណ្ណោះ​កាលពី​ព្រឹក​ម្សិលមិញ ​ដើម្បី​​ចោទ​ប្រកាន់​លោក ​យន់ គឹមហួរ អាយុ​២៨​ឆ្នាំ និង​លោក រឿន ចិត្រា អាយុ​៣៣​ឆ្នាំ ដែល​ត្រូវ​បាន​ចាប់​ខ្លួន​កាលពី​យប់​ថ្ងៃ​អង្គារនេះ​​។

មេធាវី​រូប​េនះ​មាន​ប្រសាសន៍​ថា “​ពួក​គាត់​​​ត្រូវ​បាន​ចោទ​ប្រកាន់​​ពីបទ​ចូល​រួម​កុបកម្ម។ កូនក្ដី​របស់​យើង​បាន​ប្រាប់​តុលាការ​ថា ពួក​គាត់​​​បាន​ចូលរួម​​ការ​តវ៉ា​​ដោយ​សន្តិវិធី​មួយ​​ ហើយ​​​មិន​បាន​ប្រព្រឹត្ត​បទ​ល្មើស​​ ឬបង្ក​អំពើ​ហិង្សា​ដូច​​តុលាការ​​បាន​ចោទ​ប្រកាន់​នោះ​ទេ​”។

លោក​លើក​ឡើង​ទៀត​​ថា ចៅក្រម​បាន​បង្ហាញ​រូបភាព​វីដេអូ​​​​​កូនក្ដី​របស់​លោក​​មាន​វត្តមាន​នៅ​ឯ​​​​ការ​តវ៉ា​នោះ ដែល​សកម្មជន​គណ​បក្ស​សង្គ្រោះ​ជាតិ បាន​​​វាយ​បក​ទៅ​លើ​កង​​​កម្លាំង​សន្តិសុខ​របស់​រដ្ឋាភិបាល​​អំឡុង​ការ​តវ៉ា​នៅ​ជិត​ទីលាន​ប្រជាធិបតេយ្យ​ ដោយ​វាយ​ទៅ​លើ​សន្តិសុខ​​ស្លៀក​ពាក់​ឯកសណ្ឋាន​​មួយ​ចំនួន​យ៉ាង​ដំណំ។

​​លោក​មាន​ប្រសាសន៍​បន្ត​​​ថា ​”​ចៅក្រម​បាន​បង្ហាញ​វីដេអូ​ឃ្លីប​​​មួយ​ដែល​បង្ហាញ​ពី​សកម្ម​​ភាព​​កូនក្ដី​របស់​ខ្ញុំ​កាន់ទង់ជាតិ ប៉ុន្តែ​​ពួកគាត់​មិន​បាន​​​ប្រើ​ដំបង​ដើម្បី​បង្ក​អំពើ​ហិង្សា​​​​ទេ។ ភ័ស្តុ​តាង​របស់​ពួកគេ​គឺ​វីដេអូ​ឃ្លីប​​​នោះ។​ពួកគេ​ចាប់​ខ្លួន​​ប្រជា​ពល​រដ្ឋ​​​យោង​ទៅ​​​លើ​វីដេអូ​ឃ្លីប​នោះ”។

​យោង​តាម​នគរ​បាល​បាន​​​ឲ្យ​ដឹង​ថា នៅ​ពេល​រសៀល​ សកម្ម​ជន​ទី៣​​ដែល​លោក​ អ៊ូ ច័ន្ទរិទ្ធ អ្នកនាំ​ពាក្យ​ស្ដីទី​របស់​គណបក្ស​សង្គ្រោះ​​​ជាតិ ​ប្រាប់​ថា​មាន​​​ឈ្មោះ យា ថុង ក៏​ត្រូវ​បាន​ចាប់​ខ្លួន និង​ចោទ​ប្រកាន់​តាម​ក្រោយ​ដែរ។

​នៅ​​មុន​ពេល​​​សកម្មជន​​ទី៣​​ត្រូវ​តុលាការ​ចោទ​ប្រកាន់​ លោក អេង សោភា នាយ​ការិយា​​ល័យ​ព្រហ្មទណ្ឌ​កម្រិត​ធ្ងន់​នៃ​ស្នងការដ្ឋាន​នគរ​​​បាល​រាជធានី​ បាន​មាន​ប្រសាសន៍​​​​ថា ”​យើង​ក៏​​​កំពុង​​​តាម​ចាប់​ខ្លួន​មនុស្ស​ពីរ​នាក់​ទៀត​ដែរ​”។

មេធាវី​ សំ សុគង់ បាន​មាន​ប្រសាសន៍​ថា ​កាលពី​ម្សិលមិញ លោក យា ថុង ​ក៏​ត្រូវ​បាន​សាលា​ដំបូង​រាជធានី​​ចោទ​ប្រកាន់​ពីបទ​ចូល​រួម​កុបកម្ម​​ដែរ ហើយ​ត្រូវ​បាន​ឃុំខ្លួន​បណ្ដោះ​អាសន្ន​។

កាលពី​​ចុង​​ខែ​មុន សាលា​ដំបូង​រាជធានី​​បាន​​​សម្រេច​​ផ្ដន្ទាទោស​​​ភ្លាមៗ​​ឲ្យ​​​​​​សកម្មជន​​ និង​មន្ត្រី​គណបក្ស​សង្គ្រោះជាតិ​​ចំនួន​​​​​១១​រូប​ផ្សេងទៀត​​​ដែល​មាន​វត្តមាន​​ក្នុង​​​​ការ​តវ៉ា​​​​​នោះ ជាប់​ពន្ធនាគារ​​ពី​៧​ឆ្នាំ​ដល់​​​២០​​​ឆ្នាំ។

លោក សម រង្ស៊ី ប្រធាន​គណបក្ស​ប្រឆាំង​បាន​មាន​ប្រសាសន៍​ថា លោក​ជឿ​ថា ​ការ​ផ្ដន្ទា​ទោស​ទាំង​នេះ​គឺ​ជា​ការ​ព្រមាន​​ឲ្យ​គណបក្ស​សង្គ្រោះជាតិ ​បញ្ចប់​យុទ្ធនាការ​របស់​ខ្លួន​ក្នុង​ការ​​លាត​ត្រដាង​ការ​ឈ្លាន​ពាន​របស់​វៀត​ណាម​​ ​ចូល​ក្នុង​ទឹក​ដី​កម្ពុជា​ ប៉ុន្តែ​រដ្ឋាភិបាល​បាន​បដិ​សេធ​ថា ការ​ផ្ដន្ទាទោស​ទាំង​នេះ​មិន​មែន​ជា​រឿង​នយោបាយ​ឡើយ​​។

កាលពី​ថ្ងៃ​ច័ន្ទ​ លោក​នាយករដ្ឋមន្ត្រី ហ៊ុន សែន បាន​ប្រកាស​ជាសាធារណៈ​ឲ្យ​នគរ​បាល​ ​និង​តុលាការ​បន្ត​តាម​ចាប់​ខ្លួន​អ្នក​ដែល​បាន​ចូល​រួម​ការ​តវ៉ា​កាលពី​ឆ្នាំ​មុន ​ដោយព្រមាន​​គណបក្ស​សង្គ្រោះ​ជាតិ​ថា លោក​មាន​វីដេអូ​ជាច្រើន​​​បង្ហាញ​ថាអ្នក​ណា​​ខ្លះ​មាន​វត្ត​មាន​​នៅ​ទីនោះ​។

​ការ​តវ៉ា​នេះ​គឺ​ជា​លើកទី១​ហើយ​ដែល​​អ្នក​​​តវ៉ា​​របស់​គណបក្ស​ប្រឆាំង​​បាន​វាយ​បក​ទៅ​លើ​កម្លាំង​សន្តិសុខ​ពាក់​មួក​ការ​ពារ​សុវត្ថិ​ភាព​របស់​រដ្ឋាភិបាល ដែល​ល្បី​ខាង​​​ប្រើ​វិធី​ឃោរ​​ឃៅ​​​ក្នុង​ការ​បំបែក​​ហ្វូង​ប្រជាពលរដ្ឋ​ ដើម្បី​អនុវត្ត​តាម​​បទ​បញ្ជា​របស់​រដ្ឋាភិបាល​​ប្រឆាំង​ការ​ប្រមូល​ផ្ដុំគ្នា​នៅ​តាម​ទីសាធារណៈ។

សកម្មជន​គណបក្ស​សង្គ្រោះ​ជាតិ​ប្រាំពីរ​រូប ​ដែល​ពេល​នោះ​មិន​ទាន់​ទទួល​យក​អាសនៈ​សភា​របស់​ខ្លួន​​​​​នៅ​ក្នុង​ការ​ធ្វើ​ពហិការ​​មិន​ចូល​សភា​នោះ​ ត្រូវ​បាន​ចាប់​ខ្លួន​ប៉ុន្មាន​ថ្ងៃ​ក្រោយ​មក ប៉ុន្តែ​ត្រូវ​បាន​ដោះលែង​វិញ​ក្នុង​រយៈ​ពេល​​​១​សប្ដាហ៍​ក្រោយ​ពី​​​មាន​កិច្ចព្រម​ព្រៀង​​​នយោ​​បាយ​ថ្ងៃ​​២២ កក្កដា រវាង​លោក ហ៊ុន សែន និង​លោក សម រង្ស៊ី។

នៅ​ខាង​ក្រៅ​សាលា​ដំបូង​រាជធានី​កាល​ពី​​ម្សិលមិញ លោក យន់ គឹមហួរ និង​លោក រឿន ចិត្រា ដែល​ត្រូវ​បាន​ចាប់​ខ្លួន​កាលពី​យប់​​ថ្ងៃ​អង្គារ ​​បាន​បដិសេធ​ថា ខ្លួន​មិន​ជាប់​ពាក់​ព័ន្ធ​នឹង​​ការ​ប្រើ​អំពើ​ហិង្សា​ទេ។

​លោក យន់ គឹមហួរ និយាយ​ថា “​ខ្ញុំ​ជឿ​ថា ​ការ​ចោទ​ប្រកាន់​នេះ​គឺ​ជា​រឿង​នយោបាយ​។ ខ្ញុំ​ចង់​ឲ្យ​ស្ថាប័ន​គ្រប់​ជាន់​ថ្នាក់​ជួយ​ខ្ញុំ​​ផង​ ព្រោះ​​​ខ្ញុំ​មិន​ដឹង​អ្វី​ទាំង​អស់​”។

ចំណែក​ឯ​លោក រឿន ចិត្រា ​និយាយ​ថា “​វា​មិន​ពិត​ទេ។ យើង​សុំស្នើ​ឲ្យ​​ថ្នាក់​ដឹកនាំ​គណ​​​បក្ស​ជួយ​ផង​។ ខ្ញុំ​​​ពិត​ជា​​​បាន​​ចូល​រួម​ការ​តវ៉ា​​​​​នោះ​មែន ប៉ុន្តែ​មិន​បាន​បង្ក​អំពើ​ហិង្សា​ទេ”។

នៅ​ក្នុង​សេចក្ដី​ថ្លែងការណ៍​មួយ​ គណបក្ស​សង្គ្រោះ​ជាតិ​បាន​​អំពាវ​នាវ​ឲ្យ​​ ”ដោះលែង​​សកម្មជន​ទាំង​នេះ​ដោយ​គ្មាន​លក្ខខណ្ឌ” ព្រមទាំង​ “​បញ្ឈប់​ជា​បន្ទាន់​ក្នុង​ការ​ប្រើ​ប្រាស់​ប្រព័ន្ធ​តុលាការ​ដើម្បី​ចោទ​ប្រកាន់ និង​ចាប់​ខ្លួន​​ក្នុង​បំណង​គំរាម​កំហែង​​សកម្មជន​គណ​បក្ស​សង្គ្រោះ​ជាតិ​ មិន​ឲ្យ​បំពេញ​តួនាទី​របស់​ខ្លួន​បាន​”។

លោក អ៊ូ ច័ន្ទរិទ្ធ បាន​មាន​ប្រសាសន៍​ថា ការ​ចាប់​ខ្លួន​សកម្មជន​​បី​រូប​ទៀត​បន្ទាប់ពី​​​ការ​ផ្ដន្ទាទោស​កាលពី​ខែ​មុន បាន​គំរាម​ធ្វើ​ឲ្យ​​អន្តរាយ​ដល់​​ស្ថាន​​ភាព​ធូរស្រាល​ខាង​នយោ​បាយ​រវាង​គណបក្សប្រឆាំង និង​គណបក្ស​កាន់​អំណាច​។

លោក​បាន​​លើក​ឡើង​យ៉ាង​ដូច្នេះ​ថា “​ការ​​​ចាប់​ខ្លួន​ជា​បន្តបន្ទាប់ ​បាន​រំលោភ​កិច្ចព្រម​ព្រៀង​​​​​​ចុះ​ថ្ងៃ២២ កក្កដា ឆ្នាំ​២០១៤ រវាង​គណបក្ស​​ប្រជាជន​កម្ពុជា និង​គណបក្ស​សង្គ្រោះ​ជាតិ​ ដើម្បី​បញ្ចប់​ភាព​តាន​តឹង​​​ខាង​នយោបាយ​​តាម​​រយៈ​ការ​បញ្ឈប់​ការ​ចាប់​ខ្លួន​​​ដោយ​ការ​ប្រើ​​ប្រាស់​ប្រព័ន្ធ​តុលាការ​។ ប្រសិន​បើ​​ភាព​តាន​តឹង​នេះ​នៅ​តែ​បន្ត​ វា​នឹង​មិន​ផ្ដល់​ផល​ចំណេញ​​​​​​​ដល់​សង្គម​កម្ពុជា​ទេ។ វា​នឹង​ជះ​ផល​ប៉ះពាល់​​ទៅ​លើ​ប្រជាពលរដ្ឋ​គ្រប់​រូប​ វិនិយោគិន និង​សេដ្ឋកិច្ច ​ដូច្នេះ​​ហើយ ដើម្បី​​ប្រទេស​ជាតិ​ ​គណបក្ស​ប្រជាជន​កម្ពុជា និង​តុលាការ​ចាំ​បាច់​​​ត្រូវ​ពិចារណា​ឡើង​វិញ​។

លោក សុខ ឥសាន អ្នក​នាំពាក្យ​គណបក្ស​ប្រជាជន​កម្ពុជា ​បាន​មាន​ប្រសាសន៍​ថា ​សេចក្ដី​​​សម្រេច​​នេះ ​គឺ​ជា​សេចក្ដី​សម្រេច​របស់​តុលា​ការ​តែ​ម្នាក់​ឯង ហើយ​វា​​នឹង​​មាន​​ផល​ប៉ះ​ពាល់​​​​តែ​ទៅ​លើ​គណបក្ស​សង្គ្រោះជាតិ​ប៉ុណ្ណោះ។

អ្នក​​នាំពាក្យ​រូប​នេះ​​បាន​លើក​ឡើង​បន្ថែម​​​ទៀត​​ថា ”​កិច្ច​ព្រម​ព្រៀង​​​នោះ​មិន​និយាយ​​អំពី​​​ការ​បញ្ឈប់​​ការ​ចាប់​ខ្លួន​​សកម្មជន​គណបក្ស​សង្គ្រោះ​​​​​​ជាតិ​ ដែល​បាន​បំពាន​ច្បាប់​នោះ​ទេ។ ​​គណ​បក្ស​​​​​​​​ប្រជាជន​កម្ពុជា​​​​ចែក​​ដាច់អ្វី​ជា​នយោ​​បាយ អ្វី​ជា​ច្បាប់។ [គណ​បក្ស​សង្គ្រោះ​​ជាតិ​] តែង​តែ​​​ទាញ​រឿង​​គ្រប់​យ៉ាង​​​​​​​ឲ្យ​ចូល​ក្រោម​ ’ហេតុ​ផល​​​​​នយោបាយ​’។ វា​នឹង​មិន​​ជះ​​ផល​ប៉ះ​ពាល់​​ទៅ​លើ​សេដ្ឋកិច្ច និង​សង្គម ឬ​ប្រទេស​​​ជាតិ​ឡើយ វា​នឹង​​ជះ​ផល​​​​​​ប៉ះពាល់​​តែ​​ទៅ​លើ​គណបក្ស​របស់​ពួកគេ​ប៉ុណ្ណោះ។ ចាំស្អែក​យើង​ទៅ​ញ៉ាំ​គុយទាវ​ទាំង​​​អស់​​គ្នា​ ហើយ​មើល​​​ថា តើ​ហាង​គុយ​ទាវ​ទាំង​អស់​បិទ​ ​​ឬ​ក៏​អត់​។ ខ្ញុំ​​ទទួល​ស្គាល់​ថា នឹង​មាន​ភាព​តាង​តឹង ប៉ុន្តែ​បើ​​ផ្សារ​ធំថ្មី​​ និង​ផ្សារ​អូឫស្សី​នៅ​តែ​បើក​​ មាន​​​​ន័យ​ថា សង្គម​នៅ​តែ​​​​ដំណើរ​ការ​។ ​វា​នឹង​ធ្វើ​ឲ្យ​ភ្ញាក់​ផ្អើល​​តែ​គណបក្ស​សង្គ្រោះ​ជាតិ​​​ប៉ុណ្ណោះ”៕ សុខុម​​​​​​​​​​​​​​​​​​​

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស