រដ្ឋាភិបាលបានលើកលែងទោសនិងដោះលែងបុរសបីនាក់ដែលត្រូវបានកាត់ឲ្យជាប់ទោសជាមួយលោក សួន សេរីរដ្ឋា អ្នកប្រឆាំងដែលនិរទេសខ្លួនឯងកាលពីខែមករា ជុំវិញការចោទប្រកាន់ពីបទភេរវកម្មដែលត្រូវបានអង្គការសិទ្ធិមនុស្សចាត់ទុកថា គ្មានមូលដ្ឋាននិងជាហេតុផលនយោបាយ។
ចំណាត់ការនេះដែលធ្វើឡើងកាលពីសប្ដាហ៍មុន បំពេញលក្ខខណ្ឌចុងក្រោយក្នុងចំណោមលក្ខខណ្ឌបី ដែលលោក សួន សេរីរដ្ឋា បានស្នើសម្រាប់ការវិលត្រឡប់របស់លោកមកប្រទេសកម្ពុជាវិញនៅថ្ងៃទី១ ខែតុលា។ រដ្ឋាភិបាលបានលើកលែងទោសលោក សួន សេរីរដ្ឋា កាលពីខែកក្កដា ហើយបានចុះឈ្មោះគណបក្សនយោបាយរបស់លោក គឺគណបក្សអំណាចខ្មែរនៅប៉ុន្មានថ្ងៃក្រោយមក។
លោក សួន សេរីរដ្ឋា បាននិយាយកាលពីម្សិលមិញ នៅពេលលោកធ្វើដំណើរទៅទីក្រុងបាងកកវិញពីព្រំដែនកម្ពុជា-ថៃ ទីដែលលោកបានជួបជាមួយបុរសទាំងបីនាក់នេះកាលពីថ្ងៃអាទិត្យថា ”ខ្ញុំរីករាយណាស់ដែលពួកគាត់ត្រូវបានដោះលែងវិញ។ ពួកគាត់ត្រូវបានចាប់ដាក់ពន្ធនាគារដោយមិនយុត្តិធម៌ ពីព្រោះពួកគាត់មិនបានប្រព្រឹត្តបទឧក្រិដ្ឋណាមួយឡើយ”។
រូបថតដែលបង្ហោះតាមទំព័រហ្វេសប៊ុករបស់លោក សួន សេរីរដ្ឋា បង្ហាញពីអ្នកទាំងបួន ឈរជាមួយគ្នា និងញញឹមយ៉ាងស្រស់ស្រាយ។
អ្នកទាំងបួនត្រូវបានសាលាដំបូងរាជធានីភ្នំពេញកាត់ឲ្យជាប់ទោសពីបទរារាំងការបោះឆ្នោត និងមានផែនការសម្ងាត់ប្រឆាំងរដ្ឋាភិបាលដោយបានបោះពុម្ពអាវយឺតដែលមានសរសេរសារជំរុញប្រជាពលរដ្ឋកុំឲ្យទៅបោះឆ្នោត និងមានផែនការចែកចាយអាវយឺតទាំងនោះនៅមុនការបោះឆ្នោតជាតិឆ្នាំ២០១៣។
បុរសទាំងបីនាក់ដែលត្រូវបានលើកលែងទោសកាលពីសប្ដាហ៍មុន ត្រូវបានចាប់ខ្លួនក្នុងខេត្តបាត់ដំបង ជាមួយអាវយឺតជាប់នឹងខ្លួនពួកគេ ហើយត្រូវបានផ្ដន្ទាទោសឲ្យជាប់ពន្ធនាគារ៥ឆ្នាំឬ៦ឆ្នាំ។ លោក សួន សេរីរដ្ឋា ដែលត្រូវបានផ្ដន្ទាទោសកំបាំងមុខ ត្រូវបានកាត់ឲ្យជាប់ទោសតាមការចោទប្រកាន់បន្ថែមពីបទញុះញង់ ហើយត្រូវបានផ្ដន្ទាទោសឲ្យជាប់ពន្ធនាគារ៧ឆ្នាំ។
លោក សុក សំអឿន មេធាវីដែលតំណាងអ្នកទាំងបួននៅក្នុងតុលាការបានអះអាងថា អ្នកទាំងនេះមិនបានប្រព្រឹត្តបទឧក្រិដ្ឋទេ ហើយថា ការចោទប្រកាន់ទាំងនេះគឺជាហេតុ ផលនយោបាយច្បាស់ក្រឡែត។ លោកបានមានប្រសាសន៍ថា “ពួកគេត្រូវបានចាប់ខ្លួនដោយសារពាក្យស្លោកនៅលើអាវយឺតរបស់ពួកគេទាក់ទងទៅនឹងការបោះឆ្នោត”។
លោក សេង សុខម៉េង ដែលត្រូវបានលើកលែងទោសជាមួយលោក សេរី បុ៊នឡុង និង អ៊ុំ ភារុណ បាននិយាយថា ពួកគាត់ត្រូវបានដោះលែងកាលពីថ្ងៃសុក្រ។ សុខម៉េង បាននិយាយថា លោកបានត្រឡប់មកខេត្តបាត់ដំបងជាមួយក្រុមគ្រួសារ ហើយមានគម្រោងស្នើសុំប្រាក់សំណងចំពោះការជាប់ពន្ធនាគាររបស់លោក។
លោកបាននិយាយថា ”វាអយុត្តិធម៌ណាស់សម្រាប់ពួកយើង ព្រោះយើងមិនបានប្រព្រឹត្តខុសឡើយ។ ខ្ញុំគិតថា ខ្ញុំនឹងប្ដឹងទាមទារសំណងពីរដ្ឋាភិបាលសម្រាប់រយៈពេលជាប់ពន្ធនាគាររបស់ខ្ញុំ ពីព្រោះខ្ញុំបានបាត់បង់ប្រាក់ចំណូល និងប៉ះពាល់ដល់កេរ្តិ៍ឈ្មោះរបស់ខ្ញុំយ៉ាងខ្លាំង”។
អំឡុងសវនាការជំនុំជម្រះ បុរសទាំងបីនាក់បដិសេធថា ពួកគេមិនជាប់ពាក់ព័ន្ធជាមួយបុព្វហេតុរបស់លោក សួន សេរីរដ្ឋា ឡើយ។ ទោះយ៉ាងណា កាលពីម្សិលមិញ សុខម៉េង និយាយថា លោកនឹងគាំទ្រគណបក្សអំណាចខ្មែរថ្មីនោះ ដោយសារស្បៀងអាហារ និងលុយកាក់ ដែលលោក សួន សេរីរដ្ឋា បានផ្គត់ផ្គង់ដល់រូបលោកអំឡុងការជាប់ពន្ធនាគាររយៈពេលជាង២ឆ្នាំ។
នៅមុនសវនាការជំនុំជម្រះរបស់អ្នកទាំងបួន លោកនាយករដ្ឋមន្ត្រី ហ៊ុន សែន បានចាត់ទុកលោក សួន សេរីរដ្ឋា ម្តងហើយម្តងទៀតថាជាភេរវករ ដែលមានផែនការផ្ដួលរំលំរដ្ឋាភិបាលដោយប្រើអាវុធ។ លោក សួន សេរីរដ្ឋា បានអំពាវនាវដោយបើកចំហឲ្យមានចលនាបះបោរផ្កាម្លិះប្រឆាំងលោក ហ៊ុន សែន ដែលលោកបានចោទប្រកាន់ថា តំណាងឲ្យរដ្ឋាភិបាលខុសច្បាប់តាមរយៈការបោះឆ្នោតដោយលួចបន្លំ ប៉ុន្តែបានបដិសេធថា លោកមិនគាំទ្រមធ្យោបាយហិង្សាឡើយ។
លោក ជិន ម៉ាលីន អ្នកនាំពាក្យក្រសួងយុត្តិធម៌បានបញ្ជាក់ពីការលើកលែងទោសនេះ ហើយបានថ្លែងថា វាមានការស្វះស្វែងដោយលោកនាយករដ្ឋមន្ត្រី ប៉ុន្តែលោកមិនធ្វើអត្ថាធិប្បាយអំពីមូលហេតុដែលនៅពីក្រោយចំណាត់ការរបស់លោក ហ៊ុន សែន ឡើយ។ លោកបានថ្លែងថា “ពួកគេត្រូវបានលើកលែងទោសនៅពេលមួយកាលពីសប្ដាហ៍មុន”។
អង្គការសិទ្ធិមនុស្សបានលើកឡើងថា អ្នកទាំងបួនត្រូវបានចាត់ជាក្រុមភេរវកម្មដោយរដ្ឋាភិបាលនៅមុនការបោះឆ្នោតឆ្នាំ២០១៣ ជាផ្នែកមួយនៃការវាយប្រហារដោយគណបក្សប្រជាជនកម្ពុជាទៅលើគណបក្សសង្គ្រោះជាតិ។ ឥឡូវនេះ ក្រុមដូចគ្នានេះអះអាងថា លោក ហ៊ុន សែន បានរៀបចំឲ្យមានការដោះលែងបុរសទាំងនេះ និងការចុះបញ្ជីគណបក្សអំណាចខ្មែរ ដោយសង្ឃឹមថា គណបក្សនេះនឹងបំបែកសំឡេងឆ្នោតពីគណបក្សសង្គ្រោះជាតិនៅក្នុងការបោះឆ្នោតនាពេលខាងមុខ។
លោក សួន សេរីរដ្ឋា បានលើកឡើងថា លោកមិនទាន់សម្រេចថាតើត្រូវចូលរួមនៅក្នុងការបោះឆ្នោតឬយ៉ាងណានោះឡើយ ហើយលោកចង់ឃើញកំណែទម្រង់មួយចំនួន សិន រួមមានគណៈកម្មាធិការជាតិរៀបចំការបោះឆ្នោតដែលមិនជាប់ពាក់ព័ន្ធនឹងបក្សណាមួយ នាយករដ្ឋមន្ត្រីត្រូវបានជ្រើសរើសពីសំណាក់ប្រជាពលរដ្ឋ និងការកំណត់អាណត្តិ សម្រាប់តួនាទីនេះជាដើម៕ សារុន