លោកនាយករដ្ឋមន្ត្រី ហ៊ុន សែន បានឆ្លៀតឱកាសក្នុងពិធីបុណ្យចូលឆ្នាំថ្មីប្រពៃណីសាសនាអុិស្លាមកាលពីម្សិលមិញ ដើម្បីក្រើនរំឭកសាសនិកខ្មែរអុិស្លាមនៅក្នុងប្រទេសថា ការផ្លាស់ប្ដូររដ្ឋាភិបាលអាចឈានទៅរកការកាប់សម្លាប់យ៉ាងរាលដាល និងការធ្វើទុក្ខបុកម្នេញចំពោះសាសនិកអុិស្លាមដូចក្រោមរបបខ្មែរក្រហមក្នុងទសវត្សរ៍ឆ្នាំ១៩៧០។
អំឡុងសុន្ទរកថាលើកទី២របស់លោកកាលពីពេលថ្មីៗនេះដែលហាក់ដូចជាប្រៀបធៀបគណបក្សសង្គ្រោះជាតិទៅនឹងខ្មែរក្រហម លោក ហ៊ុន សែន បានលើកឡើងតាមរយៈសារបង្ហោះលើទំព័រហ្វេសប៊ុកផ្ទាល់ខ្លួនថា រដ្ឋាភិបាលរបស់លោកជាអ្នកដែលបានសង្គ្រោះសាសនិកអុុិស្លាមនៅក្នុងប្រទេស ចំណែកឯគណបក្សនយោបាយមួយដែលមិនបញ្ចេញឈ្មោះ អាចនឹងនាំពួកគេឲ្យធ្លាក់ចូលក្នុងគ្រោះមហន្តរាយ។
នៅក្នុងសារជាភាសាខ្មែរ និងភាសាអង់គ្លេសនោះ លោកបានសរសេរថា “រាជរដ្ឋាភិបាលកម្ពុជា តែងតែគាំទ្រ និងលើកតម្កើងសិទ្ធិសេរីភាព ជំនឿសាសនា និងសិទ្ធិប្រកបការងារ និងសិទ្ធិចូលរួមក្នុងកិច្ចការសង្គមទូទៅរបស់សាសនិកខ្មែរអុិស្លាមទាំងអស់នៅក្នុងប្រទេស។ យើងគ្រប់គ្នាសុទ្ធតែដឹងច្បាស់ហើយថា កាលពីជាង៣០ឆ្នាំមុន នយោបាយផ្លាស់ប្ដូររបស់ខ្មែរក្រហម គឺបានធ្វើឲ្យសាសនិកខ្មែរអុិស្លាមត្រូវបានកម្ទេចស្ទើរទាំងស្រុង។ នៅពេលនេះ សូមបងប្អូនខ្មែរអុិស្លាមប្រុងប្រយ័ត្នជាថ្មីម្ដងទៀតចំពោះការឃោសនាញុះញង់ អូសទាញឲ្យមានការផ្លាស់ប្ដូរដែលស្រដៀងទៅនឹងការផ្លាស់ប្ដូរសម័យខ្មែរក្រហម”។
លោកបានគូសបញ្ជាក់ថា សាសនិកអុិស្លាមនៅក្នុងប្រទេសគួរតែសម្លឹងមើលការបំផ្លិចបំផ្លាញដែលបានកើតមានក្នុងប្រទេសដូចជាស៊ីរី អុីរ៉ាក់ និងអេហ្ស៊ីបជាដើម ចាប់តាំងពីផ្ទុះបដិវត្តន៍ផ្កាម្លិះដែលបានចាប់ផ្ដើមពីក្រុមតូចៗដែលធ្វើការតវ៉ាទាមទារលទ្ធិប្រជាធិបតេយ្យមក។
លោកបានសរសេរទៀតថា “ប្រាកដណាស់ វាបានផ្លាស់ប្ដូរពីមានទៅក្រ ពីមានវិហារទៅជាអត់វិហារ ពីមានសាលាទៅជាអត់សាលា ពីមានពេទ្យទៅជាអត់ពេទ្យ ពីមានផ្ទះរស់នៅបែរជាទៅរស់នៅតាមតង់កៅស៊ូនៅតាមព្រំដែន រត់លូនកាត់សង្គ្រាមស្ទើររាល់ថ្ងៃយ៉ាងលំបាកវេទនា។ យើងមិនត្រូវការការផ្លាស់ប្ដូរប្រភេទនេះទេនៅក្នុងប្រទេសយើង។ ខ្ញុំសង្ឃឹមថា សាសនិកខ្មែរអុិស្លាមនឹងយកចិត្តបន្ថែមទៀតលើការឃោសនានេះនៅក្នុងសហគមន៍របស់បងប្អូន”។
ប្រជាជនខ្មែរអិុស្លាមបានរងកាប់សម្លាប់យ៉ាងរង្គាល និងការធ្វើសមាហរណកម្មទាំងបង្ខិតបង្ខំដោយប្រើហិង្សាក្រោមរបបខ្មែរក្រហម។ លោក ហ៊ុន សែន ដែលធ្លាប់ជាទាហានក្នុងជួរកងទ័ពខ្មែរក្រហម ត្រូវបានអង្គការឃ្លាំមើលសិទ្ធិមនុស្ស (Human Rights Watch) ចោទប្រកាន់តាមរយៈរបាយការណ៍មួយដែលបញ្ចេញកាលពីដើមឆ្នាំនេះថាមានជាប់ពាក់ព័ន្ធយ៉ាងសកម្មក្នុងការសម្លាប់ខ្មែរអុិស្លាមយ៉ាងរង្គាលនៅខេត្តកំពង់ចាម ក្នុងឆ្នាំ១៩៧៥ បន្ទាប់ពីពួកគេបានចាប់ផ្ដើមការបះបោរហិង្សានៅលើកោះផល នៅទីនោះ។
លោក ហ៊ុន សែន គឺជាមេបញ្ជាការរងនៃកងវរសេនាតូចលេខ៥៥ក្នុងតំបន់២១នៃភូមិភាគបូព៌ារបស់ខ្មែរក្រហម ដែលរងការចោទប្រកាន់ថាជាអ្នកអនុវត្តការសម្លាប់រង្គាលនេះ ប៉ុន្តែលោកនាយករដ្ឋមន្ត្រី និងអ្នកដែលជំនិតនឹងលោកតែងតែបដិសេធថា លោកមិនជាប់ពាក់ព័ន្ធឡើយ។
ចាប់តាំងពីខ្មែរក្រហមដួលរលំក្នុងឆ្នាំ១៩៧៩មក ខ្មែរអុិស្លាមត្រូវបានគណបក្សប្រជាជនកម្ពុជា ផ្ដល់សេរីភាពយ៉ាងទូលំទូលាយផ្នែកសាសនា។ ដោយសារតែបណ្ដាមេដឹកនាំសាសនាអុិស្លាមទូទាំងប្រទេសសុទ្ធតែស្និទ្ធនឹងគណបក្សកាន់អំណាច សំឡេងឆ្នោតរបស់សាសនិកខ្មែរអុិស្លាមក្នុងប្រទេសដែលមានចំនួនប្រមាណ៤០០.០០០នាក់ ត្រូវបានគេចាត់ទុកថាជាជ័យជម្នះសម្រាប់គណបក្សប្រជាជនកម្ពុជាជាយូរមកហើយ។
ទោះជាយ៉ាងណា គណបក្សសង្គ្រោះជាតិបាននិងកំពុងខិតខំអូសទាញការគាំទ្រនោះ ដោយបញ្ជ្រាបគំនិតមិនពេញចិត្តក្នុងចំណោមខ្មែរអុិស្លាមមួយចំនួនដើម្បីឲ្យពួកគេយល់ដឹងអំពីបញ្ហានានាដូចជាការអភិវឌ្ឍសេដ្ឋកិច្ច និងការបោះឆ្នោតជ្រើសរើសមេដឹកនាំសាសនាដោយផ្ទាល់ជាដើម។
លោក សម រង្ស៊ី ប្រធានគណបក្សប្រឆាំងបានមានប្រសាសន៍ថា គណបក្សសង្គ្រោះជាតិបានតម្រង់គោលដៅទៅរកយុវជនខ្មែរអុិស្លាមដែលសិក្សានៅក្នុងប្រទេសអភិវឌ្ឍន៍ដូចជាប្រទេសម៉ាឡេស៊ីជាដើម មុនពេលពួកគេវិលត្រឡប់មកកាន់សហគមន៍របស់ខ្លួនវិញ ហើយ ខកចិត្តចំពោះកង្វះការរីកចម្រើន។
លោក ម៉ាំ ស្លេះម៉ាន់ អាយុ៤៨ឆ្នាំ ដែលជាសាសនិកខ្មែរអុិស្លាមមកពីខេត្តកំពង់ចាម និយាយថា ប្រជាជនកាន់តែច្រើននៅក្នុងសហគមន៍របស់គាត់ទទួលយកការអំពាវនាវសុំការគាំទ្រពីសំណាក់គណបក្សសង្គ្រោះជាតិកាន់តែច្រើន ទោះបីជាពួកគាត់នៅដឹងគុណគណបក្សប្រជាជនកម្ពុជា ចំពោះសេរីភាពសាសនារបស់ពួកគាត់ក្ដី។
គាត់និយាយថា “យើងចង់ផ្លាស់ប្ដូរ ពីព្រោះយើងមិនអាចមានមេដឹកនាំដដែលៗបានទេ។ យើងចង់ឃើញមេដឹកនាំថ្មីដែលអាចនាំគំនិតថ្មីៗដើម្បីអភិវឌ្ឍប្រទេស។ ប្រជាជនរបស់យើងនឹងមិនធ្វើបដិវត្តន៍ដូចនៅមជ្ឈិមបូព៌ាទេ ពីព្រោះយើងជានិកាយផ្សេងគ្នា ហើយយើងមិនចង់បានសង្គ្រាមទេ។ យើងនឹងផ្លាស់ប្ដូរតាមរយៈការបោះឆ្នោត”។
ទោះជាយ៉ាងណា លោក សុះ គីមរី ដែលជាមេដឹកនាំកំពូលក្នុងសាសនាអុិស្លាមប្រចាំប្រទេសកម្ពុជា បានមានប្រសាសន៍ថា លោកពេញចិត្តនឹងអ្វីដែលលោក ហ៊ុន សែន បានធ្វើដើម្បីប្រទេស ហើយលើកឡើងថា សាសនិកអុិស្លាមក្នុងប្រទេសមិនគួរចាត់ទុកសមិទ្ធផលរបស់រដ្ឋាភិបាលមិនសំខាន់ឡើយ។
លោកបានបន្តថា “ដោយបច្ចុប្បន្នមានរបបលោក ហ៊ុន សែន ដែលដឹកនាំចេញពីរបបរំដោះ ប្រជាជនយើងមានសិទ្ធិសេរីភាពគ្រប់គ្រាន់ ហើយយើងអាចដើរហើរបានដោយសេរីតាមលទ្ធិប្រជាធិបតេយ្យ។ សព្វថ្ងៃយើងគ្មានអ្វីត្រូវព្រួយបារម្ភទេ”។
លោកគូសបញ្ជាក់ថា លោករីករាយចង់ឃើញរដ្ឋាភិបាលដែលដឹកនាំដោយលោក ហ៊ុន សែន បន្តដឹកនាំប្រទេសនៅពេលអនាគតជាជាងប្រថុយប្រថានជាមួយរដ្ឋាភិបាលថ្មី ទោះបីជារដ្ឋាភិបាលថ្មីសន្យាបែបណាក៏ដោយ។ “បើយើងធៀបរឿងនេះទៅការផ្លាស់ប្ដូរកង់ឡានវិញ យើងនឹងផ្លាស់ប្ដូរ បើវាខូច ឬមិនដំណើរការ។ បើវានៅល្អ តើប្ដូរធ្វើអី? បើយើងប្ដូរ ហើយបានអាអន់ វានឹងមានបញ្ហា”។
កាលពីសប្ដាហ៍មុន លោក ហ៊ុន សែន បានប្រៀបធៀបគោលនយោបាយកំណែទម្រង់ដីធ្លីរបស់ដែលគាំទ្រដោយលោក សម រង្ស៊ី ទៅនឹងគោលនយោបាយកំណែទម្រង់ដីធ្លីដែលអនុម័តដោយ ប៉ុល ពត បន្ទាប់ពីខ្មែរក្រហមឡើងកាន់អំណាច ហើយលើកឡើងថា វានឹងនាំទៅរកសង្គ្រាមស៊ីវិលជាថ្មី។
ទាក់ទិនការលើកឡើងបែបនេះ លោក យ៉ែម បុញ្ញរិទ្ធ អ្នកនាំពាក្យគណបក្សសង្គ្រោះជាតិបានមានប្រសាសន៍ថា លោកងឿងឆ្ងល់ថា ហេតុអ្វីបានជាលោក ហ៊ុន សែន ចេះតែបន្តប្រៀបធៀបគណបក្សប្រឆាំងទៅនឹងរបបកុម្មុយនីស្តផ្ដាច់ការបែបនេះ។
លោកបានគូសបញ្ជាក់ថា “ខ្ញុំមិនយល់ ដោយសារគោលនយោបាយរបស់គណបក្សសង្គ្រោះជាតិមិនដែលមានគំនិតបែបនេះទេ ពីព្រោះយើងបានសិក្សា និងយល់ដឹងអំពីការអភិវឌ្ឍពីបស្ចិមប្រទេស។ បស្ចិមប្រទេសបានបង្ហាញវិធីសម្រាប់អភិវឌ្ឍប្រទេស សង្គម សេដ្ឋកិច្ច នយោបាយ និងការផ្លាស់ប្ដូរតាមរយៈសន្តិភាព និងអហិង្សា”៕ សុខុម