ក្រុងបាត់ដំបង-សវនាការជំនុំជម្រះរឿងក្ដីគ្រូពេទ្យគ្មានអាជ្ញាប័ណ្ណម្នាក់ដែលជាប់ចោទថា បានធ្វើឲ្យអ្នកភូមិជាង២៧០នាក់ ឆ្លង មេរោគអេដស៍នោះ បានបន្តកាលពីម្សិល មិញនៅសាលាដំបូងខេត្តបាត់ដំបង ដោយលោកព្រះរាជអាជ្ញារង ហេង លុយ បានហៅ អ្នកភូមិ២៥នាក់ដែលឆ្លងមេរោគអេដស៍មកផ្ដល់សក្ខីកម្មអំឡុងសវនាការរយៈពេល១ ថ្ងៃនេះ។
ជាការខំប្រឹងប្រែងដើម្បីដំណើរការឲ្យបានឆាប់រហ័សនូវបញ្ជីឈ្មោះសាក្សីដ៏ច្រើននោះ លោកស្រី យិច ឈាណាវី ចៅក្រមប្រធានក្រុមប្រឹក្សាជំនុំជម្រះបានកែសម្រួលនីតិវិធីតុលាការកាលពីម្សិលមិញ ដោយអនុញ្ញាតឲ្យមេធាវីរបស់លោក យ៉ែម ជ្រិន ដាក់សំណួរទៅកាន់សាក្សី អមដោយការចោទសួរខ្លីៗដោយលោកស្រី ឈាណាវី និងសហ ចៅក្រមពីររូបទៀត។ សាក្សីសរុប៣៥នាក់ត្រូវបានហៅឲ្យមកផ្តល់សក្ខីកម្មក្នុងសវនាការ ជំនុំជម្រះរយៈពេលពីរថ្ងៃដំបូងនេះ។
លោក យ៉ែម ជ្រិន ត្រូវបានចោទប្រកាន់ ពីបទមនុស្សឃាតមានស្ថានទម្ងន់ទោសចំពោះការជាប់ពាក់ព័ន្ធក្នុងការធ្វើឲ្យមានការរាលដាលឆ្លងមេរោគអេដស៍ដ៏ច្រើនក្នុង ឃុំរកា ស្រុកសង្កែ ដែលបានផ្ទុះឡើងកាលពីខែធ្នូឆ្នាំមុន។ ចាប់តាំងពីពេលនោះមក មានអ្នកភូមិ១០នាក់ហើយ បានស្លាប់ដោយសារមេរោគអេដស៍។
អាជ្ញាធរលើកឡើងថា លោក យ៉ែម ជ្រិន ដែលតែងតែចាក់ថ្នាំ និងព្យួរសេរ៉ូមដល់អ្នកជំងឺអំឡុងពេលលោកទៅពិនិត្យព្យាបាល នោះ បានប្រើសឺរ៉ាំងដដែលៗ ដោយបណ្ដាល ឲ្យមេរោគនេះឆ្លងពីអ្នកភូមិម្នាក់ទៅអ្នកភូមិម្នាក់ទៀត។
ប្រសិនបើត្រូវបានកាត់ឲ្យជាប់ទោស គ្រូពេទ្យវ័យ៥៦ឆ្នាំរូបនេះ ដែលក៏ត្រូវបានចោទប្រកាន់ពីបទបើកកន្លែងព្យាបាលគ្មានអាជ្ញាប័ណ្ណផង និងបានធ្វើឲ្យឆ្លងមេរោគអេដស៍ដោយចេតនាផងនោះ ប្រឈមការផ្ដន្ទាទោសឲ្យជាប់ពន្ធនាគារអស់មួយជីវិត។
នៅក្នុងការផ្ដល់សក្ខីកម្មកាលពីម្សិលមិញ កញ្ញា រឿម ស្រីយ៉ា អាយុ២៥ឆ្នាំបានប្រាប់តុលាការថា គាត់ជឿថា លោក យ៉ែម ជ្រិន ដែលបានពិនិត្យព្យាបាលគាត់តាំងពីគាត់នៅកុមារមកម្លេ៉ះ ក៏ត្រូវបានបន្ទោសចំពោះការធ្វើឲ្យគាត់ឆ្លងមេរោគនេះដែរ ពីព្រោះគាត់មិនដែលឲ្យគ្រូពេទ្យផ្សេងព្យាបាលឡើយ។
កញ្ញា ស្រីយ៉ា ដែលមិនទាន់រៀបការនោះបាននិយាយថា គាត់កំពុងទាមទារសំណង ពីលោក យ៉ែម ជ្រិន ពីព្រោះមេរោគនេះបានប៉ះពាល់យ៉ាងខ្លាំងដល់ជីវិតរបស់គាត់។
ស្ត្រីរូបនេះបាននិយាយបន្ទាប់ពីផ្ដល់សក្ខីកម្មថា ”ខ្ញុំទាមទារសំណងជំងឺចិត្ត៧.០០០ ដុល្លារពីគាត់ ពីព្រោះខ្ញុំគិតថា ខ្ញុំនឹងមិនមានអនាគតល្អឡើយ ហើយកេរ្តិ៍ឈ្មោះរបស់ខ្ញុំត្រូវបានប៉ះពាល់ទៀត។ ខ្ញុំនៅលីវនៅឡើយ ហើយខ្ញុំគិតថា ឥឡូវ នេះគ្មាននរណាម្នាក់ហ៊ានរៀបការជាមួយខ្ញុំទេ”។
បន្ទាប់ពីសវនាការកាលពីម្សិលមិញ លោក ឯម សុវណ្ណ មេធាវីរបស់លោក យ៉ែម ជ្រិន បានមានប្រសាសន៍ថា ការចោទប្រកាន់ ពីបទមនុស្សឃាតមានស្ថានទម្ងន់ទោសលើកូនក្ដីរបស់ខ្ញុំ មិនយុត្តិធម៌ឡើយ។ លោកបានថ្លែងថា “កូនក្ដីរបស់ខ្ញុំមិនបានធ្វើទារុណកម្ម ឬបំពារបំពានដល់ជនរងគ្រោះណាម្នាក់ឡើយ”៕ សារុន