លោកនាយករដ្ឋមន្ត្រី ហ៊ុន សែន ជិតឈានដល់ការទទួលបានប្រជាប្រិយភាពខ្លាំងបំផុតតាមបណ្តាញទំនាក់ទំនងសង្គមនៅកម្ពុជាដោយឥឡូវនេះបានវ៉ាដាច់លោក សម រង្ស៊ី មេដឹកនាំគណបក្សប្រឆាំងនៅក្នុងការប្រកួតប្រជែងដ៏ក្តៅគគុក ដើម្បីទទួលបានការចុចចូលចិត្ត (Like) តាមទំព័រហ្វេសប៊ុក។
គិតត្រឹមល្ងាចម្សិលមិញ ទំព័រហ្វេសប៊ុកផ្លូវការរបស់លោក ហ៊ុន សែន មានការកើនឡើង នូវការចុច Likeដល់ទៅជាង២.១០៨.៨០០ នាក់ ដោយវ៉ាដាច់ទំព័រហ្វេសប៊ុកផ្លូវការរបស់លោក សម រង្ស៊ី ដែលទទួលបានការចុច Likeប្រហែល ២.០៩៤.៨០០ នាក់ ។
ដោយទទួលបានចំនួននៃការចុច Like ជិត៣៧០.០០០នាក់ កាលពីមួយខែមុន ទំព័រហ្វេសប៊ុករបស់លោក ហ៊ុន សែន ដែលបានបង្កើតឡើងនៅក្នុងឆ្នាំ២០១៣ ប៉ុន្តែ ទើបតែមានការទទួលស្គាល់ដោយខុទ្ទកាល័យរបស់លោកនាយករដ្ឋមន្ត្រី ហ៊ុន សែន នៅខែកញ្ញា នោះ ឥឡូវនេះទទួលបានប្រជាប្រិយភាពខ្លាំងបំផុតទី៣នៅកម្ពុជាពោលគឺចាញ់តែទំព័រហ្វេសប៊ុករបស់វីអូអេ(VOA)និងទំព័រហ្វេសប៊ុករបស់តារាចម្រៀង មាស សុខសោភា ប៉ុណ្ណោះ ។
ចាប់តាំងពីមានការទទួលស្គាល់ទំព័រហ្វេសប៊ុករបស់ខ្លួនជាផ្លូវការមក លោក ហ៊ុន សែន មានភាពសកម្មយ៉ាងខ្លាំងនៅលើបណ្តាញទំនាក់ទំនងសង្គម ដោយបានបង្ហោះជាប្រចាំនូវរូបថតស្តីពីកិច្ចប្រជុំផ្លូវការ និងដំណើរកម្សាន្តផ្ទាល់ខ្លួន ក៏ដូចជាការព្រមានអ្នកដែលធ្វើមិនគប្បីចំពោះរូបលោកផងដែរ។
ត្រឹមតែសប្តាហ៍មុនតែមួយគត់ លោក ហ៊ុន សែន បានបង្ហោះរូបថតជាច្រើនសន្លឹកស្តីពីលោកថតរូបសែលហ្វីជាមួយអ្នកគាំទ្រ រុញស្ត្រីម្នាក់ដែលកំពុងជិះរទេះរុញ ប្រើទុយោបាញ់ទឹកស្រោចផ្កា និងទទួលទាននំបញ្ចុកជាមួយអ្នកលក់ដូរតាមផ្លូវម្នាក់។
នៅក្នុងកិច្ចសម្ភាសន៍កាលពីម្សិលមិញ អ្នកលេងហ្វេសប៊ុកទូទាំងរាជធានីភ្នំពេញបានសន្មតថា ជោគជ័យរបស់ទំព័រហ្វេសប៊ុក “Samdech Hun Sen, Cambodian Prime Minister” គឺបានដោយសារការបង្ហាញពីភាពសាមញ្ញរបស់លោក ហ៊ុន សែន តាមរយៈបណ្តាញទំនាក់ទំនងសង្គម ប៉ុន្តែ មានការបញ្ចេញទស្សនៈផ្សេងៗគ្នាជុំវិញយុទ្ធនាការរបស់លោកនាយករដ្ឋមន្ត្រី។
នៅឯហាងកាហ្វេមួយកន្លែងក្នុងខណ្ឌចំការមនកាលពីម្សិលមិញ ម្ចាស់ក្រុមហ៊ុនលក់ផលិតផលសុខភាពក្នុងស្រុកម្នាក់ឈ្មោះ ទេព សានពិសី អាយុ២៤ឆ្នាំបានលើកឡើងថា នាងមានការចាប់អារម្មណ៍ចំពោះភាពសាមញ្ញដែលលោក ហ៊ុន សែន បានបង្ហាញតាមអីុនធឺណិត ប៉ុន្តែបានសន្និដ្ឋានថា អ្វីដែលជាកង្វល់ដ៏សំខាន់របស់លោក ហ៊ុន សែន គឺទំនាក់ទំនងសាធារណៈ។
ម្ចាស់ហាងរូបនេះបាននិយាយថា “ខ្ញុំគិតថា សម្តេច ហ៊ុន សែន ទទួលបានការចុច Like ច្រើនក្នុងពេលនេះ ដោយសារគាត់បន្ទាបខ្លួនមកធ្វើជាមនុស្សសាមញ្ញ។ គាត់ទទួលទានជាមួយប្រជាពលរដ្ឋ។ គាត់និយាយលេងជាមួយប្រជាពលរដ្ឋ”។ សានពិសី បានបន្ថែមថា នាងបានចុច Like លើទំព័រហ្វេសប៊ុករបស់លោក ហ៊ុន សែន ប្រហែល២ខែមុន។
នាងបាននិយាយបន្តទៀតថា “កាលពីម្សិលមិញ ខ្ញុំឃើញគាត់ធ្វើសកម្មភាពសាមញ្ញ ដូចជាទទួលទាននំបញ្ចុកនៅសួនមុខវត្តបទុម។ដំបូងគាត់ទទួលទានតែម្នាក់ឯង បន្ទាប់មកគាត់បានហុចចាននំបញ្ចុកទៅឲ្យស្ត្រីម្នាក់ទៀត។ ខ្ញុំគិតថា កំពុងធ្វើដូច្នេះគឺដើម្បីទទួលបានប្រជាប្រិយភាព… និងដើម្បីទទួលបានផលប្រយោជន៍ពីការធ្វើដូច្នេះ ប៉ុន្តែ ខ្ញុំមិនច្បាស់នោះទេ”។
អ្នករត់រ៉ឺម៉កម៉ូតូកង់បីម្នាក់ឈ្មោះ ប៊ុន ផានសី អាយុ៤២ឆ្នាំ ដែលកំពុងរង់ចាំអ្នកដំណើរក្បែរផ្សារកាប់គោបានលើកឡើងថា គាត់ទើបតែងាកមកលេងហ្វេសប៊ុកវិញក្នុងពេលថ្មីៗនេះប៉ុណ្ណោះ បន្ទាប់ពីផ្អាកអស់ជាច្រើនខែ ដោយឃើញថា នៅលើទំព័រហ្វេសប៊ុករបស់គាត់ត្រង់ចំណុចទិន្នន័យព័ត៌មានថ្មី មានសុទ្ធតែការបង្ហោះរបស់សម្តេច ហ៊ុន សែន ដែលមិត្តភក្តិ (Friends) ក្នុងហ្វេសប៊ុកជាអ្នកចែករំលែក (Share)ឲ្យ។
លោក ប៊ុន ផានសី បាននិយាយថា “ពេលដែលខ្ញុំយកទូរស័ព្ទថ្មីរបស់ខ្ញុំមកមើលឬលេងហ្វេសប៊ុក ខ្ញុំឃើញគាត់ឲ្យលុយទៅអ្នកលក់នំបញ្ចុក និងដើរហាត់ប្រាណតាមសួនច្បារ”។
អ្នករត់រឺុម៉កម៉ូតូកង់បីរូបនេះបាននិយាយបន្ថែមថា “ខ្ញុំគិតថាអ្វីដែលគាត់ធ្វើ គឺកំពុងតែបំភ័ន្តភ្នែក។ ប្រហែលជាគ្រាន់តែដើម្បីឲ្យប្រជាពលរដ្ឋគិតថា គាត់ស្រឡាញ់ប្រជាពលរដ្ឋប៉ុណ្ណោះ។ ប៉ុន្តែ ធាតុពិតប្រហែលជាមិនអ៊ីចឹងទេ”។
ដោយកំពុងរង់ចាំអតិថិជននៅតូបរបស់ខ្លួនដែលស្ថិតនៅលើមជ្ឈមណ្ឌលផ្សារទំនើបសុរិយា ជាន់ទី៤ លោក ចាប វិសាល អាយុ៣៦ឆ្នាំបានលើកឡើងថា រូបគាត់ក៏កត់សម្គាល់អំពីការបង្ហោះរូបភាព”មិនផ្លូវការ” ជាបន្តបន្ទាប់របស់លោកនាយករដ្ឋមន្ត្រីដែរ។ គាត់បាននិយាយថា “ជួនកាលខ្ញុំមិនច្បាស់ទេថា តើនេះគឺជាទំព័រហ្វេសប៊ុកផ្លូវការរបស់គាត់ ឬគ្រាន់តែជាទំព័រហ្វេសប៊ុកផ្ទាល់ខ្លួន។ ខ្ញុំមិនច្បាស់ទេថា តើមេដឹកនាំ នៅក្នុងប្រទេសផ្សេងទៀតលេងហ្វេសប៊ុកដូចេនះ ឬអត់នោះ”។
គាត់បានសង្កត់ធ្ងន់ថា ខណៈគាត់ចុច Likeទាំងទំព័រហ្វេសប៊ុករបស់លោក ហ៊ុន សែន និងរបស់លោក សម រង្ស៊ី ដែរនោះ នេះមិនមែនជាការគាំទ្រមេដឹកនាំទាំងពីររូបនេះឡើយ។ “វាមិនមែនមានន័យថា ខ្ញុំគាំទ្រ [ពួកគាត់] ឬមិនគាំទ្រនោះទេ។ យើងគ្រាន់តែចង់ដឹងតើរឿងនយោបាយមានការវិវឌ្ឍដល់ណាហើយប៉ុណ្ណោះ។ ជូនកាលខ្ញុំមើលរូបថតរបស់ពួកគាត់ខ្ញុំក៏ចុច Like ទៅ ប៉ុន្តែ ខ្ញុំមិនបានគិតឲ្យស៊ីជម្រៅនោះទេ”។
ពេលនិយាយតាមទូរស័ព្ទកាលពីម្សិលមិញ អ្នកសរសេរគេហទំព័រក្នុងស្រុកម្នាក់ឈ្មោះ ថារុំ ប៊ុន បានលើកឡើងថា ប្រជាប្រិយភាពតាមហ្វេសប៊ុករបស់លោក ហ៊ុន សែន ទំនងជាមិនមែនដោយសារតែការបង្ហាញពីភាពសាមញ្ញនោះទេ ដោយលោកបានគូសបញ្ជាក់ថា លោកបានឃើញការបង្ហោះមួយចំនួនដែលប្រើលុយសម្រាប់ទំព័រហ្វេសប៊ុករបស់លោកនាយករដ្ឋមន្ត្រីលេចឡើងត្រង់ចំណុចទិន្នន័យថ្មីៗ។
អ្នកសរសេរគេហទំព័ររូបនេះបាននិយាយថា “បើយើងចង់ឲ្យការបង្ហោះរបស់យើងគេមើលឃើញច្រើនគឺត្រូវតែចំណាយប្រាក់មួយចំនួន នោះការបង្ហោះរបស់យើងគេមើលឃើញកាន់តែច្រើនទៅៗ។ មនុស្សគ្រប់រូបអាចផ្ញើសារលក្ខណៈធ្វើទីផ្សារ សារពាក់ព័ន្ធនយោបាយ ឬអ្វីក៏បានដោយងាយស្រួល”។
នៅពេលសួរថា តើគណបក្សប្រឆាំងមានការព្រួយបារម្ភអំពីការកើនឡើងប្រជាប្រិយភាពយ៉ាងឆាប់រហ័សរបស់លោក ហ៊ុន សែន តាមហ្វេសប៊ុកដែរ ឬទេ កញ្ញា កឹម មនោវិទ្យា អនុប្រធានផ្នែកកិច្ចការសាធារណៈរបស់គណបក្សសង្គ្រោះជាតិបានលើកឡើងតាមរយៈអីុម៉េលមួយថា កញ្ញាមានការព្រួយបារម្ភជាខ្លាំងចំពោះអ្វីដែលអ្នកនយោបាយដ៏លេចធ្លោបំផុតនៅកម្ពុជា ចាត់ទុកហ្វេសប៊៊ុកថាមានតម្លៃ។
កញ្ញាបាននិយាយថា “ហ្វេសប៊ុកគឺជាកម្មវិធីមួយក្នុងចំណោមកម្មវិធីផ្សេងៗទៀតដើម្បីទាក់ទងគ្នា មិនថាមានខ្លឹមសារយ៉ាងណានោះទេ។ ខ្ញុំចង់ឃើញភាគីទាំងអស់មានហេតុផលជាក់ស្តែង និងមិនមានការងប់ងល់ពេកចំពោះកម្មវិធីនេះ”៕ ស៊ុយឈាង