រដ្ឋាភិបាលឥណ្ឌា នៅថ្ងៃព្រហស្បតិ៍ទី ១៨មិថុនានេះ បានធ្វើពិធិបុណ្យសពជូនវិញ្ញណក្ខន្ធកងទ័ពរបស់ខ្លួន២០នាក់ ដែលបានស្លាប់នៅក្នុងការប៉ះទង្គិចមួយប្រ៉ាវជាមួយកងទ័ពចិន នៅតាមព្រំដែនកាលពីថ្ងៃទី១៥មិថុនា។
ពិធីបុណ្យនេះ គឺជាការគោរពដល់ការលះបង់របស់កងទ័ពឥណ្ឌាដែលបានស្លាប់ ដើម្បីទឹកដី របស់ខ្លួន។បណ្ដាញផ្សាយព៏ត៌មាន Channel News Asia ដែលស្រង់ពីទីភ្នាក់ងារសារព័ត៌មានReuters បានចុះផ្សាយថា ខណៈនេះ នៅតំបន់ដែលកងទ័ពចិន និងឥណ្ឌាវាយប្រហារគ្នានៅជ្រលងភ្នំ Galwan ភាគខាងលិច នៃជួរភ្នំ ហិម៉ាឡៃ ក្នុងរយៈពេល៣ថៃមកនេះគឺនៅតែ ប្រឈមមុខដាក់គ្នានៅឡើយទេ បើទោះជាប្រទេសទាំងពីរស្វែងរកការកាត់បន្ថយភាពតឹងតឹងក៏ដោយ។
នៅក្នុងការប៉ះទង្គិចគ្នា នេះសម្រាប់ ឥណ្ឌា បានអោយដឹងថា កងទ័ពរបស់ខ្លួនស្លាប់២០នាក់ ប៉ុន្តែប្រទេសចិន វិញមិនបានអោយដឹងថាកងទ័ពរបស់ខ្លួនស្លាប់ឬរបួសប៉ុន្មាននាក់នោះទេ។ សារព័ត៌មានរបស់ ឥណ្ឌាបានចុះផ្សាយថា កងទ័ពចិនស្លាប់ដល់ទៅ ៤៣នាក់។
នេះជាលើកទី៣ ដែលប្រទេស មហាយក្សធំ២នេះ មានការប៉ះទង្គិចគ្នា តាមព្រំដែន បណ្ដាលអោយស្លាប់កងទ័ពជាច្រើននាក់។ កងទ័ពនៃប្រទេសទាំង២នេះធ្លាប់ប៉ះទង្កីចគ្នាជាទ្រង់ទ្រាយធំនៅឆ្នាំ១៩៦២ ម្ដង និងនៅឆ្នាំ១៩៦៧ ម្ដងទៀត។
រដ្ឋមន្ត្រីការបរទេសឥណ្ឌាលោក Subrahmanyam Jaishankarបាននិយាយទៅកាន់សមភាគីចិន លោក វាំងយី កាលពីថ្ងៃពុធទី១៧ ខែមិថុនាថា ភាគីទាំងពីរយល់ព្រមនឹងគ្នាថា នឹងមិនមានសកម្មភាពកងទ័ពអ្វីជាថ្មីទៀតទេដោយធានា អោយមានសន្តិភាព និងស្ថិរភាពតាមព្រំដែនឡើងវិញ។តាមរដ្ឋមន្ត្រីការបរទេសឥណ្ឌា លោកវាំងយី រដ្ឋមន្ត្រីការបរទេស ចិន សន្យាថានឹង ពិនិត្យមើលសកម្មភាពរបស់កងទ័ពចិនឡើងវិញដែលនៅក្នុងតំបន់មានការប៉ះទង្គិចគ្នានេះ។
ប៉ុន្តែលោកថា ប្រទេសចិនបានទាមទារអោយឥណ្ឌាដាក់ទណ្ឌកម្មលើកងទ័ពឥណ្ឌាដែល ជាអ្នកបង្កការប៉ះទង្គិច។ចាប់តាំងពីលោកណារិនឌ្រាម៉ូឌី ឡើងកាន់តំណែងជានាយករដ្ឋមន្ត្រីនៅឆ្នាំ២០១៤ មនាសិកាជាតិខ្ពស់របស់កងទ័ពឥណ្ឌា បានកើនឡើង ដែលមិនបានទុកអោយចិនបង្កការរំលោភព្រំដែនបានឡើយ។ចិនជាប្រទេស មានសេដ្ឋកិច្ចធំជាងឥណ្ឌាដល់ទៅ៥ដង ហើយ វិស័យយោធា ក៏ធំជាងឥណ្ឌាច្រើនដងដែរ។
ប៉ុន្តែប្រទេសធំ២នេះ មានអាវុធនុយក្លេអ៊ែរដូចគ្នា។ សម្រាប់លោកណារិនឌ្រាម៉ូឌី មិនដែលខ្លាចឡើយទោះជាចិន មានកម្លាំងទ័ពច្រើន លើសលុបក៏ដោយ។នៅក្នុងពិធីបុណ្យសព កងទ័ពឥណ្ឌាដែលបានពលីជីវិតដើម្បីមាតុភូមិ ធ្វើឡើងនៅរដ្ឋបីហា ភាគខាងកើតប្រទេស លោកណារិនឌ្រាម៉ូឌីបាន ថ្លែងថា៖ ពលីជីវិតរបស់កងទ័ពឥណ្ឌានឹងមិនអត់ន័យនោះទេ ហើយថា ជីវិតរបស់ពួកគេគឺសម្រាប់ពលរដ្ឋឥណ្ឌាគ្រប់គ្នា។ ក្នុងពេលដែលលោកណារិនឌ្រាម៉ូឌីសម្ដែងដូចនេះ សម្រាប់គណបក្ស Bharatiya Janata ដែលជាគណបក្សកាន់អំណាចបានអំពាវនាសុំអោយពលរដ្ឋឥណ្ឌា ធ្វើពហិកា កុំទិញទំនិញរបស់ចិន។
សមា្រប់លោកណារិនឌ្រាម៉ូឌី បានប្រកាសលុបចោលព្រឹត្តិការណ៍របស់គណបក្ស Bharatiya Janata រយៈពេល២ថ្ងៃដែលលោកថា លោកយកពេលវេលានេះ ដើម្បី ពិនិត្យ មើលឡើងវិញស្ថានភាពកងទ័ពឥណ្ឌា ដែលឈរជើងនៅតាមព្រំដែនជាមួយប្រទេសចិន។
នៅខណៈនេះ ស្ថានការណ៍តាមព្រំដែន ឥណ្ឌា-ចិន ជាពិសេស ក្នុងតំបន់វាយប្រហារគ្នា មានសេចក្ដីរាយការណ៍ជាច្រើន បានចុះផ្សាយថា ភាពផុយស្រួចនៃការពើបប្រយុទ្ធគ្នា រវាងកងទ័ពទាំង២នៅតែអាចកើតមាន ដោយសារតែសកម្មភាពកងទ័ពនៃប្រទេសទាំង២កំពុងស្ថិតក្នុងការត្រៀមប្រយុទ្ធខណៈ គ្រឿងសព្វាវុធជាច្រើនឃើញមាននៅទីតាំងរៀងៗខ្លួនហើយនោះ៕