មន្ត្រីជាន់ខ្ពស់រដ្ឋាភិបាលកម្ពុជាអះអាងថា កិច្ចព្រមព្រៀងពាណិជ្ជកម្មសេរីរវាងកម្ពុជា-ចិន ឬហៅកាត់ថា FTA បានបញ្ចប់កិច្ចចរចាជាផ្លូវការហើយ ក្រោយប្រើពេលជាងកន្លះឆ្នាំដើម្បីសម្រេចលើកិច្ចចរចានេះ។
ទំព័រហ្វេសប៊ុកជាផ្លូវការរបស់ក្រសួងពាណិជ្ជកម្មកាលពីដើមសប្តាហ៍នេះ បានឱ្យដឹងថា ជំនួបរវាងរដ្ឋមន្ត្រីក្រសួងពាណិជ្ជកម្មកម្ពុជាលោកប៉ាន សូរស័ក្ដិ ជាមួយរដ្ឋមន្ត្រីក្រសួងពាណិជ្ជកម្មនៃសាធារណរដ្ឋប្រជាមានិតចិនចុង ស្សាន (Zhong Shan) កាលពីថ្ងៃទី២០ ខែកក្កដា តាម រយៈវីដេអូខនហ្វ្រិន(Conference) បានសម្រេចប្រកាសជាផ្លូវការ ដោយបញ្ចប់ការចរចាលើកិច្ចព្រមព្រៀងពាណិជ្ជកម្មសេរីកម្ពុជា-ចិន ។ប្រភពដដែលបន្តថា នៅក្នុងកិច្ចប្រជុំនោះ រដ្ឋមន្ត្រីនៃប្រទេសទាំងពីរ បានសម្តែងនូវការវាយតម្លៃខ្ពស់ចំពោះកិច្ចព្រមព្រៀងពាណិជ្ជកម្មសេរីកម្ពុជា-ចិន ដែលជាកិច្ចព្រមព្រៀងមួយឆ្លុះបញ្ចាំងអំពីទំនាក់ទំនងយូរអង្វែងជាប្រពៃណី ក៏ដូចជាកិច្ចសហប្រតិបត្តិការក្នុងភាពជាដៃគូគ្រប់ជ្រុងជ្រោយរវាងប្រទេសទាំងពីរ។
ក្រសួងពាណិជ្ជកម្មអះអាងថា ការបញ្ចប់កិច្ចចរចាលើកិច្ចព្រមព្រៀងពាណិជ្ជកម្មសេរីមួយនេះដោយជោគជ័យ ក្នុងរយៈពេលមួយដ៏ខ្លីគឺបានបង្ហាញពីឆន្ទៈថ្នាក់ដឹកនាំនៃប្រទេសទាំងពីរ ក្នុងការពង្រឹងទំនាក់ទំនងឱ្យកាន់តែជិតស្និត និងទូលំទូលាយ។បន្ថែមពីនេះ កិច្ចព្រមព្រៀងពាណិជ្ជកម្មសេរីនេះ នឹងផ្ដល់ផលប្រយោជន៍សេដ្ឋកិច្ច និងសង្គមជាច្រើន ដល់ប្រជាជននៃប្រទេសទាំងពីរ តាមរយៈការធ្វើសេរីភាវូបនីយកម្មពាណិជ្ជកម្មទំនិញ និងសេវា ការជំរុញការវិនិយោគទូលំទូលាយ ក៏ដូចជាកិច្ចសហប្រតិបត្តិការលើ វិស័យមួយចំនួនទៀតផងដែរ។
ក្រសួងឱ្យដឹងថា ជាជំហានបន្ទាប់ ភាគីទាំងពីរនឹងអនុវត្តនីតិវិធីផ្ទៃក្នុងរៀងៗខ្លួន ដើម្បីឈានទៅចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី នៅក្នុងឆ្នាំ២០២០ នេះ។កម្ពុជា-ចិន បានចាប់ផ្តើមពិភាក្សាអំពីលទ្ធភាពនៃកិច្ចព្រមព្រៀងពាណិជ្ជកម្មសេរីទ្វេភាគីតាំងពីខែធ្នូឆ្នាំ ២០១៩ និងបានចាប់ផ្តើមការចរចារលើកដំបូងនៅខែមករាឆ្នាំ២០២០។ការរុញច្រានកិច្ចចរចាស្តីពីកិច្ចព្រមព្រៀងពាណិជ្ជកម្មសេរីឱ្យចេញជាផ្លូវការនេះ ក្រោយពេលកម្ពុជាកំពុងប្រឈមនឹងការព្យួរប្រព័ន្ធអនុគ្រោះពន្ធ EBA ពីសំណាក់សហភាពអឺរ៉ុប។
បើគ្មានអ្វីប្រែប្រួលទេ នៅថ្ងៃទី ១២ខែសីហា ខាងមុខគណៈកម្មាធិការពាណិជ្ជកម្មអឺរ៉ុបនឹងសម្រេចនីតិវិធីជាផ្លូវការលើការព្យួរប្រព័ន្ធអនុគ្រោះពន្ធ EBA ២០%ពីកម្ពុជា ដែលនឹងធ្វើឱ្យប្រទេសក្រីក្រមួយនេះត្រូវបង់ពន្ធលើមុខទំនិញប្រមាណ៤០ប្រភេទនៅពេលនាំទំនិញចូលទៅទឹកដីអឺរ៉ុប ក្នុងទំហំទឹកប្រាក់ប្រមាណ១រយលានដុល្លារសហរដ្ឋអាមេរិកក្នុងមួយឆ្នាំៗ។
ការសម្រេចដាក់ទណ្ឌកម្មពីសំណាក់សហភាពអឺរ៉ុបនេះ ក្រោយពេលពួកគេរកឃើញថារដ្ឋាភិបាលលោកហ៊ុន សែន បានដើរខុសពីលក្ខខណ្ឌដែលព្រមព្រៀងជាមួយអឺរ៉ុបជាថ្នូរនឹងការនាំទំនិញទៅទឹកដីលោកសេរីមួយនេះដើម្បីរួចផុតពីកាតព្វកិច្ចបង់ពន្ធនេះ។ អឺរ៉ុបធ្លាប់លើកឡើងថា ការដើរខុសលក្ខខណ្ឌរបស់ខ្លួននោះ ដូចជាការបំផ្លាញមូលដ្ឋានគ្រឹះលទ្ធិប្រជាធិបតេយ្យ ការរំលោភសិទ្ធិមនុស្សជាប្រព័ន្ធ សិទ្ធិការងារ ពិសេសការបំផ្លាញគណបក្សប្រឆាំងដ៏ធំជាងគេនៅកម្ពុជា និងចាប់ខ្លួនមេបក្សសង្រ្គោះជាតិលោក កឹម សុខា ដាក់ឃុំអស់រយៈពេល២ឆ្នាំ ដោយចោទពីរឿងក្បត់ជាតិ ទាំងអយុត្តិធម៌ ខណៈសំណុំរឿងនេះបន្តអូសបន្លាយរហូតមកទល់ពេលបច្ចុប្បន្ន ទោះបីសហគមន៍អន្តរជាតិចាត់ទុកសំណុំរឿងនេះជាការប្រឌិតឡើងដោយតុលាការក៏ដោយ៕