លោក ហ៊ុន សែន អះអាងថា ការដកហូរផ្នែកខ្លះនៃប្រព័ន្ធអនុគ្រោះពន្ធEBA របស់អឺរ៉ុប មកលើកម្ពុជាចំពេលពេលពិភពលោក ព្រមទាំងកម្ពុជា កំពុងប្រឈមនឹងការរីករាលដាលដោយជំងឺកូវីដ១៩ គឺ បង្ហាញពីកង់ប្រវត្តិសាស្ត្រដដែលៗ កើតឡើងនៅកម្ពុជា។
សេចក្តីថ្លែងការណ៍ របស់លោក ហ៊ុន សែន ធ្វើឡើងក្នុងឱកាសកិច្ចពិភាក្សាទូទៅ នៃមហាសន្និបាតអង្គការសហប្រជាជាតិ លើកទី៧៥ នាថ្ងៃទី២៦ ខែកញ្ញា ដែលThe Cambodia Daily ទើបទទួលបាននៅថ្ងៃនេះ បានលើកឡើងថា ប្រទេសមហាអំណាចមួយចំនួនប្រើប្រាស់និន្នាការឯកតោភាគីនិយម និងកម្លាំងបាយគាបសង្កត់ប្រទេសទន់ខ្សោយ ធ្វើឱ្យប៉ះពាល់ដល់សណ្តាប់ធ្នាប់អន្តរជាតិ និងវិធានពហុភាគីនិយម។
បុរសខ្លាំងនៅកម្ពុជារូបនេះ បន្ថែមថា វាជារឿងគួរឱ្យសោកស្តាយ ដែលជារឿយៗ អាស្រ័យដោយមហិច្ឆតានយោបាយ និងរបៀបវារៈ ឱកាសនិយមលាក់ពុធរបស់ប្រទេសមួយចំនួន កម្ពុជាត្រូវប្រឈមមុខនឹងស្តង់ដារទេ្វ ដែលប្រកបដោយកលល្បិច និងការសម្រេចចិត្តដែលមានភាពលម្អៀង និងមានចេតនានយោបាយ ពោលគឺភាពអយុត្តិធម៌។
លោកបន្តថា រឿងអយុត្តិធម៌នោះ បានរំលឹកលោក ពីស្លាកស្នាមប្រវត្តិសាស្ត្រ កាលពីប្រមាណ៤០ឆ្នាំមុន ដែលកម្ពុជាត្រូវបានរំដោះចេញពីរបបប្រល័យពូជសាសន៍ខ្មែរក្រហម ដែលធ្វើឱ្យប្រជាជនស្លាប់យ៉ាងច្រើន។
ដោយឡែកអ្នករស់រានមានជីវិតពីរបបនេះ រស់នៅទាំងបាក់ស្បាត និងសល់តែបាតដៃទទេ គឺជាអ្នកស្តារប្រទេសជាតិពីគំនរផះផង់ ប៉ុន្តែគួរឱ្យសោកស្តាយដែលអ្នករស់រានមានជីវិតទាំងនោះ បែរជាទទួលរងទណ្ឌកម្មពីសមាជិកភាគច្រើននៃអង្គការសហប្រជាជាតិ និងថែមទាំងអនុញ្ញាតឱ្យមេឃាតករខ្មែរក្រហម អាចកាន់កាប់អាសនៈរបស់កម្ពុជានៅអង្គការកំពូលមួយនេះទៅវិញ។
លោក ហ៊ុន សែន ថា រដ្ឋាភិបាលដដែលទាំងនោះហើយ បានផ្សព្វផ្សាយឥតឈប់ឈរអំពីលទ្ធិប្រជាធិបតេយ្យ និងសិទ្ធិមនុស្ស គឺជាអ្នករារាំងប្រជាជនកម្ពុជា មិនឱ្យទទួលបានចំណីអាហារ សុខុមាភាព ការអប់រំ ផ្ទះសម្បែង ការអភិវឌ្ឍ និងជាពិសេសសន្តិភាពអស់រយៈពេលជាង១២ឆ្នាំ។
ក្នុងសេចក្តីថ្លែងការណ៍របស់កម្ពុជាដដែល លោកហ៊ុន សែន លើកឡើងទៀតថាការណ៍ដែលសហភាពអឺរ៉ុបដកហូត EBA មួយផ្នែកពី កម្ពុជា នៅពេលដែលប្រទេសនេះកំពុងប្រឹងប្រែងតស៊ូជម្នះជំងឺរាតត្បាតកូវី១៩ គឺជារឿងច្រំដែលនៃប្រវត្តិសាស្ត្រ។
កាលពីថ្ងៃទី១២ ខែសីហា សភាពាណិជ្ជកម្មអឺរ៉ុប បានសម្រេចអនុវត្តន៍នីតិវិធីដកប្រព័ន្ធអនុគ្រោះពន្ធEBA ២០%ពីកម្ពុជា។ អឺរ៉ុប នឹងយកពន្ធលើមុខទំនិញរបស់កម្ពុជានាំចូលទៅទឹកដីខ្លួនប្រមាណ៤០ប្រភេទ ដែលធ្វើឱ្យកម្ពុជាត្រូវខាតប្រាក់បង់ពន្ធប្រមាណ១០០លានដុល្លារអាមេរិកក្នុងមួយឆ្នាំ។
ការសម្រេចនេះ បន្ទាប់ពីអឺរ៉ុបមើលឃើញថារដ្ឋាភិបាលលោក ហ៊ុន សែន មិនបានធ្វើឱ្យប្រសើរឡើងនូវការគោរពសិទ្ធិមនុស្ស សិទ្ធិការងារ ពិសេសស្តារស្ថានភាពនយោយបាយតាមការស្នើសុំរបស់ខ្លួននោះឡើយ។
អឺរ៉ុបព្រមានទៀតថា ការដកហូតEBA ២០% គ្រាន់តែជាចំណុចចាប់ ផ្តើមប៉ុណ្ណោះ ប៉ុន្តែរដ្ឋាភិបាលឯកបក្សនេះអាចនឹងទទួលបានភាពអនុគ្រោះពន្ធពេញលេញឡើងវិញ ប្រសិនបើស្ថានភាពលទ្ធិប្រជាធិបតេយ្យ ការគោរពសិទ្ធិមនុស្ស សិទ្ធិការងារ កើតមានពិតប្រាកដនៅក្នុងប្រទេសក្រីក្រមួយនេះ។
យ៉ាងណាក៏ដោយចុះ ចាប់តាំងពីអឺរ៉ុបសម្រេចអនុវត្តនីតិវិធីដកប្រព័ន្ធអនុគ្រោះពន្ធEBA ជាផ្លូវការពីកម្ពុជាមក ស្ថានភាពនយោបាយកាន់តែអាក្រក់ ហើយការរំលោភសិទ្ធិមនុស្សនៅតែកើតមានឥតឈប់។
ជាក់ស្តែងការចាប់ឃុំខ្លួនសកម្មជននយោបាយ អ្នកការពារសិទ្ធិមនុស្ស និងយុវជនស្រលាញ់បរិស្ថានប្រមាណ២០នាក់ នាប៉ុន្មានសប្តាហ៍ចុងក្រោយនេះ កាន់តែមានភាពរូបអាក្រក់ និងគួរឱ្យបារម្ភ បើទោះបីជាពួកគេបានអនុវត្តន៍សិទ្ធិស្របច្បាប់ដែលមានចែងក្នុងរដ្ឋធម្មនុញ្ញស្តីពីសេរីភាពនៃការបញ្ចេញមតិក្តី។
លើសពីនេះ សំណុំរឿងប្រធានគណបក្សសង្រ្គោះជាតិលោកកឹម សុខា ត្រូវបានលោកហ៊ុន សែន បង្ហើបមុនតុលាការថានឹងត្រូវពន្យាពេលរហូតដល់ ឆ្នាំ២០២៤ ពោលគឺក្រោយពេលបោះឆ្នោតក្រុមប្រឹក្សាឃុំសង្កាត់ឆ្នាំ២០២២ និងក្រោយការបោះឆ្នោតជាតិឆ្នាំ២០២៣ទៅទៀត។
ការប្រកាសពន្យារពេលនេះ បានធ្វើឱ្យមានការរិះគន់ចំពោះការរំលោភអំណោចតុលាការពីសំណាក់លោកហ៊ុន សែន និងជាការបន្តបំផ្លាញមូលដ្ឋានគ្រឹះលទ្ធិប្រជាធិបតេយ្យថែមទៀត ព្រោះគ្មានវត្តមានបក្សប្រឆាំងធំជាងគេចូលរួមប្រកួតប្រជែង ហើយសំណុំរឿងនេះសហគមន៍អន្តរជាតិ ពិសេសអាមេរិកធ្លាប់អះអាងថា ជារឿងអយុត្តិធម៌ និងគ្មានភស្តុតាងអ្វីទាំងអស់៕