មន្ត្រីជាន់ខ្ពស់នៃគណបក្សក្រៅរដ្ឋាភិបាល យល់ស្របចំពោះការផ្អាកជ្រើសរើសមន្ត្រីរាជការថ្មីដើម្បីចូលបម្រើការងារតាមក្រសួងស្ថាប័នជាតិនៅឆ្នាំ២០២២ តែការផ្អាកនេះក៏ជាសញ្ញាមួយឆ្លុះបញ្ចាំងឲ្យឃើញពីការខ្វះខាតថវិការបស់រដ្ឋាភិបាលកម្ពុជាផងដែរ។
អគ្គលេខាធិការគណបក្សប្រជាធិបតេយ្យមូលដ្ឋាន បណ្ឌិត សាម អ៊ីន បានប្រាប់សារព័ត៌មាន The Cambodia Daily នៅថ្ងៃទី១៩ ខែសីហា ថា បច្ចុប្បន្ននេះស្ថាប័នរដ្ឋនៅកម្ពុជាសម្បូរមន្ត្រីដែលមិនមានឆន្ទៈក្នុងការបម្រើការងារជាតិ ខណៈថវិកាជាតិត្រូវចំណាយលើមន្ត្រីទាំងអស់នោះអស់រាប់ពាន់លានដុល្លារក្នុង១ឆ្នាំៗ រីឯប្រសិទ្ធភាពការងារទទួលបានតិចតួចប៉ុណ្ណោះ។
លោកអះអាងថា ដើម្បីធានាប្រសិទ្ធភាពការងាររបស់រដ្ឋឲ្យមានគុណភាព និងប្រសិទ្ធភាព រដ្ឋាភិបាលមិនគួរឲ្យមានរចនាសម្ព័ន្ធគណបក្សក្នុងជួរមន្ត្រីរាជការរបស់រដ្ឋបន្តទៀតនោះទេ ព្រោះថារចនាសម្ព័ន្ធនេះនឹងមិនជួយអ្វីដល់ជាតិនោះឡើយ គឺមានតែបំផ្លាញផលប្រយោជន៍ជាតិ និងជួយចម្រុងចម្រើនគណបក្សដែលកំពុងប្រើវិធីសាស្ត្រនេះក្នុងប្រព័ន្ធរដ្ឋបាលរបស់រដ្ឋតែប៉ុណ្ណោះ។
បណ្ឌិត សាម អ៊ីន បញ្ជាក់ទៀតថា ដើម្បីប្រមូលធនធានមនុស្សសម្រាប់ជាតិពិតប្រាកដ រដ្ឋាភិបាលត្រូវលុបបំបាត់ការជ្រើសរើសមន្ត្រីថ្មី ឬការដំឡើងមុខងារលើមន្ត្រីចាស់តាមរយៈបណ្ដាញគណបក្សតទៅទៀត ព្រោះថាយន្តការជ្រើសរើសមន្ត្រីមកបម្រើជាតិតាមបណ្ដាញគណបក្សបែបនេះ នឹងមិនអាចរកបានធនធានមនុស្សប្រកបដោយគុណភាពសម្រាប់ជាតិឡើយ គឺរើសបានតែមនុស្សដែលស្មោះស្ម័គ្រនឹងគណបក្សរបស់ពួកគេតែប៉ុណ្ណោះ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន បានចេញលិខិតមួយកាលពីថ្ងៃទី១៨ ខែសីហា ឆ្នាំ២០២១ ទៅកាន់រដ្ឋមន្ត្រីក្រសួងមុខងារសាធារណៈ ស្ដីពីការផ្អាកជ្រើសរើសក្របខ័ណ្ឌមន្ត្រីថ្មីសម្រាប់ឆ្នាំ២០២២ គ្រប់ក្រសួងស្ថាប័នទាំងអស់ លើកលែងតែក្រសួងសុខាភិបាលមួយប៉ុណ្ណោះ។
រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុរូបនេះបញ្ជាក់ថា ការផ្អាកនេះធ្វើឡើងតាមការសម្រេចរបស់ប្រមុខរដ្ឋាភិបាលកម្ពុជា កាលពីថ្ងៃទី២២ ខែកក្កដា ឆ្នាំ២០២១ ក្រោមហេតុផលថា ដោយសារតែការអូសបន្លាយនៃវិបត្តិជំងឺ Covid-19 ជាពិសេសព្រឹត្តិការណ៍សហគមន៍ ២០ កុម្ភៈ ដែលកំពុងបន្តរីករាលដាលនៅពេលបច្ចុប្បន្ននេះ។
ទាក់ទិននឹងបញ្ហានេះ កាលពីថ្ងៃទី២៣ ខែមេសា ឆ្នាំ២០២០ ក្រសួងមុខងារសាធារណៈ ក៏ធ្លាប់បានចេញសេចក្ដីប្រកាសព័ត៌មានមួយស្តីអំពីការផ្អាកជ្រើសរើសមន្ត្រីក្របខ័ណ្ឌថ្មីជាបណ្ដោះអាសន្នសម្រាប់ឆ្នាំ២០២០ ក្នុងការចូលបម្រើការងារជាមន្ត្រីរាជការនៅតាមក្រសួងស្ថាប័ន អង្គភាពថ្នាក់ជាតិ និងថ្នាក់ក្រោមជាតិផងដែរ ក្រោមហេតុផលថា ដោយសារការរាតត្បាតនៃជំងឺ Covid-19។
រដ្ឋលេខាធិការក្រសួងមុខងារសាធារណៈ លោក យក់ ប៊ុនណា កាលពីពេលថ្មីៗនេះអះអាងថា រដ្ឋាភិបាលកម្ពុជាតែងតែជ្រើសរើសមន្ត្រីរាជការជាមធ្យមប្រមាណ ៦ពាន់នាក់ ឬក្រោម ១ម៉ឺននាក់ក្នុង ១ឆ្នាំៗសម្រាប់បម្រើការងារតាមក្រសួងស្ថាប័ននានារបស់រដ្ឋ។
លោកអះអាងថា សព្វថ្ងៃនេះ មន្ត្រីរាជការទាំងថ្នាក់ជាតិ និងថ្នាក់ក្រោមជាតិមានចំនួនប្រមាណ ២២ម៉ឺននាក់ហើយនៅទូទាំងប្រទេស ខណៈមន្ត្រីរាជការទាំង ២២ម៉ឺននាក់នេះ គឺត្រូវបម្រើការងារក្នុងក្រសួងស្ថាប័នដែលចំណុះឲ្យរដ្ឋាភិបាលទាំងអស់ ដោយឡែកមន្ត្រីកងកម្លាំងប្រដាប់អាវុធ មន្ត្រីក្នុងអង្គការនីតិប្បញ្ញត្តិ មន្ត្រីក្នុងគណៈកម្មាធិការជាតិរៀបចំការបោះឆ្នោត និងមន្ត្រីក្នុងប្រព័ន្ធតុលាការ មិនត្រូវបានរាប់បញ្ចូលនោះទេ។
ប្រទេសកម្ពុជា មានក្រសួងស្ថាប័នទាំងអស់ចំនួន ២៨ក្រសួង ហើយក្រសួងនីមួយៗ គឺមានរដ្ឋលេខាធិការដ្ឋានរបស់ខ្លួនចំនួនមួយដូចៗគ្នាទាំងអស់ ក្នុងនោះមានក្រសួងការពារជាតិ ក្រសួងមហាផ្ទៃ និងក្រសួងការបរទេស និងសហប្រតិបត្តិការអន្តរជាតិ ជាដើម ដើម្បីដំណើរកិច្ចការរដ្ឋបាលរបស់ជាតិសព្វថ្ងៃនេះ៕