មេដឹកនាំបក្សប្រឆាំងដែលកំពុងរងការរឹតត្បិតសេរីភាពដោយរដ្ឋាភិបាលឯកបក្ស លោក កឹម សុខា បានបង្ហាញនូវក្តីសង្ឃឹមថា ប្រទេសអូស្ត្រាលី ដែលជាប្រទេសប្រជាធិបតេយ្យសេរីពហុបក្ស នឹងជួយដល់ពលរដ្ឋខ្មែរឲ្យទទួលបាននូវអ្វីៗគ្រប់យ៉ាង ស្របតាមស្មារតីនៃកិច្ចព្រមព្រៀងទីក្រុងប៉ារីស និងរដ្ឋធម្មនុញ្ញកម្ពុជាដែលមានចែង។
ប្រធានគណបក្សសង្គ្រោះជាតិ លោក កឹម សុខា បានសរសេរលើទំព័រ Facebook របស់លោកនៅថ្ងៃទី១៣ ខែតុលា ឆ្នាំ២០២១ នេះថា អូស្ត្រាលី គឺជាប្រទេសប្រកាន់លទ្ធិប្រជាធិបតេយ្យសេរីពហុបក្សជឿនលឿនដ៏ធំមួយដែលស្ថិតនៅមិនឆ្ងាយពីប្រទេសកម្ពុជានេះទេ។
លោកអះអាងថា ប្រទេសអូស្ត្រាលី គឺជាតួអង្គមួយដែលបានចូលរួមយ៉ាងសកម្មជួយដល់កម្ពុជាក្នុងការបង្កើត និងអនុវត្តនូវកិច្ចព្រមព្រៀងសន្តិភាពទីក្រុងប៉ារីស ២៣ តុលា ឆ្នាំ១៩៩១ រហូតមក ដូច្នេះបើគិតមកទល់នឹងពេលនេះ ប្រទេសអូស្ត្រាលីដែលប្រកាន់ជំហរប្រជាធិបតេយ្យមួយនេះបានរួមចំណែកជួយកម្ពុជាអស់រយៈពេល ៣០ឆ្នាំមកហើយ។
ការអះអាងនេះ ធ្វើឡើងបន្ទាប់ពីមេបក្សប្រឆាំងដែលមិនទាន់មានសេរីភាពពេញលេញ បានជួបពិភាក្សាជាមួយឯកអគ្គរាជទូតរបស់ប្រទេសអូស្ត្រាលី ប្រចាំនៅកម្ពុជា នៅថ្ងៃពុធ សប្តាហ៍នេះ។
ប្រធានគណបក្សសង្គ្រោះជាតិ លោក កឹម សុខា ត្រូវបានឯកអគ្គរាជទូតរបស់ប្រទេសអូស្ត្រាលី ប្រចាំនៅកម្ពុជា លោក Pablo Kang អញ្ជើញឱ្យទៅទទួលទានអាហារពេលព្រឹក និងពិភាក្សាការងារនៅឯនិវាសដ្ឋានរបស់ស្ថានទូតអូស្ត្រាលី ក្នុងទីក្រុងភ្នំពេញ នៅថ្ងៃទី១៣ ខែតុលា ឆ្នាំ២០២១។
ស្ថានទូតប្រទេសអូស្ត្រាលី ប្រចាំនៅកម្ពុជា បានសរសេរលើទំព័រហ្វេសប៊ុករបស់ខ្លួន នៅថ្ងៃទី១៣ ខែតុលា ឆ្នាំ២០២១ នេះថា ឯកអគ្គរាជទូត និងបុគ្គលិកស្ថានទូត បានជួបជាមួយមេដឹកនាំបក្សប្រឆាំង លោក កឹម សុខា ដើម្បីពិភាក្សាអំពីប្រធានបទមួយចំនួនទាក់ទងនឹងការស្ដារឡើងវិញពីជំងឺកូវីដ-១៩ នៅកម្ពុជា និងការអភិវឌ្ឍនាពេលអនាគត។
ប្រភពដដែលបញ្ជាក់ថា អូស្ត្រាលីបានជំរុញរដ្ឋាភិបាលកម្ពុជាជាបន្តបន្ទាប់ រួមទាំងពេលថ្មីៗនេះនៅក្រុមប្រឹក្សាសិទ្ធិមនុស្សអង្គការសហប្រជាជាតិ ក្នុងទីក្រុងហ្សឺណែវ ដើម្បីធានាឱ្យមានការដោះស្រាយឱ្យបានឆាប់រហ័សប្រកបដោយតម្លាភាព និងយុត្តិធម៌ អំពីស្ថានភាពនយោបាយរបស់ប្រធានគណបក្សសង្គ្រោះជាតិ លោក កឹម សុខា។
ជុំវិញបញ្ហានេះ សកម្មជនបក្សប្រឆាំង លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី១៣ តុលា នេះថា មិនមែនជារឿងចៃដន្យនោះទេដែលលោក កឹម សុខា បានជួបអង្គទូតចំនួនពីរក្នុងរយៈពេលមិនដល់មួយសប្តាហ៍ ហើយសុទ្ធសឹងតែជាអង្គទូតតំណាងប្រទេសប្រកាន់លទ្ធិប្រជាធិបតេយ្យថែមទៀត។
លោកអះអាងថា នេះជាសញ្ញាវិជ្ជមានមួយបង្ហាញថា បណ្តាអង្គទូតជាមិត្តរបស់កម្ពុជាទាំងអស់បានយកចិត្តទុកដាក់តាមដានពីសុខមាលភាព និងត្រូវការយោបល់នានាពាក់ព័ន្ធនឹងអនាគតរបស់កម្ពុជាពីមេដឹកនាំបក្សប្រឆាំង ដែលពួកគេចាត់ទុកថាជាមេដឹកនាំតំណាងឱ្យប្រជាធិបតេយ្យនៅកម្ពុជានោះ។
លោក ហ៊ុន កុសល បញ្ជាក់ថា ជំនួបជាមួយបណ្តាអង្គទូតទាំងនោះក៏បង្ហាញឱ្យឃើញពីជំហរនយោបាយអហិង្សា មិនយកខ្មែរណាជាសត្រូវរបស់លោក កឹម សុខា ថាជាយុទ្ធសាស្ត្រត្រឹមត្រូវតាមរបត់នយោបាយពិភពលោក ហើយក៏ជាជំហរនយោបាយដែលអាចដំណោះស្រាយដោយសន្តិវិធីសម្រាប់កម្ពុជា ដែលអាចឱ្យខ្មែររួបរួមសាមគ្គីគ្នាឡើងវិញថែមទៀតផង។
ចំណែកមន្ត្រីជាន់ខ្ពស់គណបក្សសង្គ្រោះជាតិ លោក សួន សុរីដា បានសរសេរលើគណនី Facebook របស់លោកនៅថ្ងៃទី១៣ តុលា នេះថា កិច្ចការបរទេសរបស់មេបក្សប្រឆាំង លោក កឹម សុខា គឺជាការងារពន្លត់ភ្លើង ស្វែងរកដំណោះស្រាយតាមបែបអហិង្សា មិនចេះសម្ដែង មិនចេះអួតអាង និងមិនចេះឆ្កឹះឆ្កៀលឌឺដង ឬបង្កជាអណ្ដាតភ្លើងបង្កើនកម្ដៅនយោបាយសម្រាប់កម្ពុជានោះទេ។
ប្រធានគណបក្សសង្គ្រោះជាតិ លោក កឹម សុខា ត្រូវអាជ្ញាធរក្រុងភ្នំពេញចាប់ខ្លួនកាលពីដើមខែកញ្ញា ឆ្នាំ២០១៧ ពីបទឃុបឃិតជាមួយរដ្ឋបរទេស ប៉ុន្តែតុលាការកម្ពុជានៅតែពន្យារសវនាការរបស់លោកជាបន្តបន្ទាប់ចាប់តាំងពីខែមីនា ឆ្នាំ២០២០ មកម្ល៉េះ ខណៈមេធាវីបក្សប្រឆាំងតែងជំរុញតុលាការឱ្យជំនុំជម្រះក្តីលើករណីនេះម្តងហើយម្តងទៀតជាប់រហូតមក។
ក្រុមអ្នកសង្កេតការណ៍លើកឡើងថា ប្រសិនបើសំណុំរឿងលោក កឹម សុខា ជាសំណុំរឿងស្ថិតក្នុងការចាត់ចែងរបស់តុលាការ នោះករណីនេះនឹងត្រូវបានជំនុំជម្រះកាត់សេចក្តីរួចស្រេចទៅហើយ ព្រោះថាតុលាការអាចឃុំខ្លួនជនសង្ស័យយ៉ាងយូរបានតែ ១៨ខែប៉ុណ្ណោះ។
ប៉ុន្តែករណីរបស់លោក កឹម សុខា បានអូសបន្លាយពេលជំនុំជម្រះក្តីជាបន្តបន្ទាប់ នៅតែមិនទាន់បើកសវនាការបានទៀត ដូច្នេះសំណុំរឿងនេះត្រូវគេមើលឃើញថាជារឿងនយោបាយសុទ្ធសាធ៕