សកម្មជនបក្សប្រឆាំងរិះគន់ការឆ្មក់ចាប់ខ្លួនលោក គង់ ឃៀង ទាំងស្រុងក្នុងករណីលោកចោទប្រកាន់លោក ជា សុផារ៉ា ព្រោះការធ្វើបែបនេះគឺជាការបង្កើននូវការសង្ស័យលើលោក ជា សុផារ៉ា កាន់តែខ្លាំងទៅវិញ ស្របពេលដែលតុលាការសម្រេចឃុំខ្លួនសមាជិកបក្សកាន់អំណាចរូបនេះទាំងមិនបានបើកការស៊ើបអង្កេតឱ្យបានច្បាស់លាស់ថែមទៀត។
សកម្មជនគណបក្សសង្គ្រោះជាតិ លោក ហ៊ុន កុសល បានប្រាប់សារព័ត៌មាន The Cambodia Daily នៅថ្ងៃទី១ វិច្ឆិកា នេះថា ក្នុងសង្គមប្រជាធិបតេយ្យ ការអនុវត្តច្បាប់គ្មានការបែងចែកឋានៈបុណ្យស័ក្តិអ្វីនោះទេ ជាពិសេសក្នុងករណីលោក ជា សុផារ៉ា បែបនេះ តុលាការត្រូវព្យួរតួនាទីរបស់គាត់សិន បន្ទាប់មកត្រូវបើកការស៊ើបអង្កេតទាំងភាគីលោក គង់ ឃៀង ដែលបានរិះគន់ និងលោក ជា សុផារ៉ា ដែលជាបុគ្គលដែលកំពុងរងការសង្ស័យ ដើម្បីឱ្យបុគ្គលទាំងពីរបានតតាំងគ្នាដោយយុត្តិធម៌ចំពោះមុខច្បាប់។ ក្រោយការស៊ើបអង្កេតរកឃើញខុសត្រូវហើយនោះ ជនល្មើសនឹងត្រូវមានទោសស្របទៅតាមច្បាប់ រីឯជនរងគ្រោះនឹងទទួលបានយុត្តិធម៌។
លោកបន្តថា ប្រសិនបើលោក ជា សុផារ៉ា មិនបានប្រព្រឹត្តដូចការលើកឡើងរបស់លោក គង់ ឃៀង ទេនោះ គាត់ក៏មិនគួរខ្លាចក្នុងការបើកឱ្យមានការស៊ើបអង្កេតរបស់តុលាការនោះឡើយ ប៉ុន្តែក៏មិនមែនជាតុលាការដែលបានរៀបចំទុកមុននោះដែរ។
លោក ហ៊ុន កុសល បញ្ជាក់ថា គួរឲ្យសោកស្តាយដែលលោក ជា សុផារ៉ា មានចិត្តចង្អៀតចង្អល់មិនអាចបញ្ជាក់ពីភាពស្អាតស្អំរបស់ខ្លួនឱ្យស្របទៅតាមច្បាប់បាន តែបែរជាបញ្ជាកម្លាំងឱ្យចាប់ខ្លួនលោក គង់ ឃៀង ទាំងកម្រោលដោយគ្មានពាក្យបណ្តឹង គ្មានដីកាចាប់ខ្លួន ខណៈកម្ពុជាគឺជាប្រទេសដែលមានច្បាប់ទម្លាប់ត្រឹមត្រូវ និងប្រកាន់យករបបលទ្ធិប្រជាធិបតេយ្យដែលអនុញ្ញាតឱ្យមនុស្សគ្រប់គ្នាមានសិទ្ធិស្មើគ្នាក្នុងការស្វែងរកយុត្តិធម៌តាមផ្លូវតុលាការ។
កាលពីថ្ងៃទី២៥ ខែតុលា ឆ្នាំ២០២១ វីដេអូរបស់លោក គង់ ឃៀង ដែលបាននិយាយបកអាក្រាតពីទង្វើទុច្ចរិតរបស់សមាជិកជាន់ខ្ពស់បក្សកាន់អំណាច និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ថាបានប្រព្រឹត្តអំពើពុករលួយតាមរយៈស្រីកំណាន់របស់ខ្លួនឈ្មោះ ហេង សុវត្តី ដោយការទទួលយកលុយពីសមាជិកខ្លួនជាថ្នូរនឹងការជួយជ្រោមជ្រែងឱ្យមានមុខនាទីនៅក្នុងបក្សនាពេលកន្លងមក។
ក្រោយបង្ហោះវីដេអូបាន ២ថ្ងៃ លោក គង់ ឃៀង ត្រូវមន្ត្រីបក្សកាន់អំណាចបញ្ជាកម្លាំងឱ្យទៅចាប់ខ្លួនដល់គេហដ្ឋានរបស់លោក ទាំងមិនមានដីការបស់តុលាការ និងត្រូវតុលាការក្រុងភ្នំពេញសម្រេចចោទប្រកាន់ពីបទ «បរិហារកេរ្តិ៍ និងញុះញង់ឱ្យមានការរើសអើង»។
កាលពីចុងសប្តាហ៍មុន លោក គង់ សំអុន ជាមេធាវីការពារក្តីឱ្យលោក គង់ ឃៀង បានឱ្យដឹងថា កូនក្តីរបស់លោកត្រូវបានឃុំខ្លួននៅពន្ធនាគារព្រៃសហើយនៅពេលនេះ បន្ទាប់ពីសមត្ថកិច្ចបានចាប់បញ្ជូនលោក គង់ ឃៀង ឱ្យទៅអគ្គស្នងការនគរបាលជាតិ និងបន្ទាប់មកបានបញ្ជូនទៅសាលាដំបូងរាជធានីភ្នំពេញនោះ។
ប្រភពដដែលបញ្ជាក់ថា នៅពេលនេះ លោក គង់ ឃៀង មានសុខភាពចុះខ្សោយខ្លាំង ព្រោះគាត់មានការតក់ស្លុតធ្ងន់ធ្ងរ ក្នុងនោះ លោកត្អូញត្អែរថា បញ្ហានេះប្រហែលជាគាត់បានដើរឆ្លងកាត់បន្ទាត់ក្រហមរបស់គណបក្សហើយ។
ក្រុមអ្នកសង្កេតការណ៍លើកឡើងថា បក្សកាន់អំណាចរបស់លោក ហ៊ុន សែន មិនមែនជាគណបក្សគំរូក្នុងការដឹកនាំប្រទេសជាតិឱ្យមានយុត្តិធម៌សង្គមនោះទេ ដូច្នេះការចាប់ខ្លួនសមាជិកខ្លួនឯងដែលបានបកអាក្រាតពីទង្វើមន្ត្រីជាន់ខ្ពស់បក្សនេះ ក៏មិនមែនជាលើកទីមួយដែរ ត្បិតគណបក្សដែលមានសារជាតិចេញពីពួកកុម្មុយនីស្ត គឺតែងដឹកនាំតាមបែបកុម្មុយនីស្ត ជាជាងការអនុវត្តច្បាប់ដោយត្រឹមត្រូវរបស់ប្រទេសដែលមាននីតិរដ្ឋ។
មកទល់នឹងពេលនេះ សមាជិកជាន់ខ្ពស់បក្សកាន់អំណាច និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា មិនទាន់ត្រូវបានតុលាការកម្ពុជាព្យួរតួនាទីដើម្បីបើកការស៊ើបអង្កេតលើករណីនេះនៅឡើយទេ ប៉ុន្តែលោក គង់ ឃៀង ត្រូវតុលាការចោទប្រកាន់ និងសម្រេចឱ្យឃុំខ្លួនភ្លាមៗក្រោយការរិះគន់របស់ខ្លួន។
ទោះយ៉ាងណា មកទល់នឹងម៉ោងផ្សាយនេះ សារព័ត៌មាន The Cambodia daily នៅតែមិនទាន់អាចទាក់ទងរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោក ជា សុផារ៉ា ដើម្បីសុំការបំភ្លឺជុំវិញការចោទប្រកាន់នេះបាននៅឡើយទេ៕