មេដឹកនាំខ្មែរដែលប្ដេជ្ញាកាន់អំណាចតត្រកូល លោក ហ៊ុន សែន ព្រមានថា បើប្រទេសសមាជិកអាស៊ានចង់រិះគន់គម្រោងទស្សនកិច្ចរបស់លោកទៅជួបលោក មីន អ៊ុងឡាំង សូមប្រទេសទាំងនោះដកស្ថានទូតរបស់ខ្លួនចេញពីប្រទេសភូមាជាមុនសិន ចាំនាំគ្នាមករិះគន់លោក។
លោក ហ៊ុន សែន បានអះអាងក្នុងពិធីសម្ពោធអគាររដ្ឋបាលអគ្គនាយកដ្ឋានគយ និងរដ្ឋាករកម្ពុជា ក្នុងទីក្រុងភ្នំពេញ នៅថ្ងៃព្រហស្បតិ៍ ទី២៣ ធ្នូ នេះថា លោកនឹងខិតខំធ្វើយ៉ាងណាឲ្យអាស៊ាន ៩ មកក្លាយជាអាស៊ាន ១០ វិញ នៅពេលដែលកម្ពុជាធ្វើជាប្រធានអាស៊ាននៅពេលខាងមុខនេះ។ មេដឹកនាំកម្ពុជារូបនេះរិះគន់ថា អ្នកដែលចង់ឲ្យប្រទេសភូមា ចាកចេញពីសមាជិកអាស៊ាន គឺជាគំនិតចង់បំផ្លាញអាស៊ាន និងចង់ឲ្យភូមា ធ្លាក់ក្នុងសង្គ្រាមស៊ីវិលប៉ុណ្ណោះ។
មេដឹកនាំកម្ពុជារូបនេះអះអាងថា នៅពេលលោកធ្វើជាប្រធានអាស៊ាន លោកមិនអាចទុកឱ្យអាស៊ាននៅមិនគ្រប់ទឹកដូចសព្វថ្ងៃនេះទេ។ ជាងនេះទៀត អាស៊ានដែលមានតែ ៩ប្រទេសបែបនេះ ក៏មិនអាចសម្រេចជាឯកច្ឆន្ទបានដែរ ព្រោះថាដែលហៅថាអាស៊ានត្រឹមត្រូវ គឺត្រូវតែមានប្រទេសទាំង ១០ ចូលរួមជាមួយគ្នា ហើយការធ្វើដំណើរទៅកាន់ប្រទេសភូមារបស់លោក ក៏មិនមែនជារឿងខុសនោះដែរ ដរាបណាប្រទេសផ្សេងៗនៅលើពិភពលោកមិនទាន់ផ្តាច់ទូតចេញពីប្រទេសភូមា នោះ។
ការអះអាងរបស់មេដឹកនាំបក្សកាន់អំណាចបែបនេះ ធ្វើដើម្បីប្រតិកម្មទៅនឹងការរិះគន់មួយចំនួនមុនពេលលោកក្លាយជាប្រធានអាស៊ានប្តូរវេន ដែលបានប្ដេជ្ញាថានឹងជួយឱ្យមេដឹកនាំផ្ដាច់ការយោធាភូមា អាចចូលក្នុងកិច្ចប្រជុំអាស៊ានវិញឱ្យទាល់តែបាននៅពេលកម្ពុជាដឹកនាំអាស៊ានខាងមុខនេះ។
អ្នកវិភាគនយោបាយ សង្គម និងជាអនុប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក គឹម សុខ បានសរសេរលើគណនី Facebook របស់លោកនៅថ្ងៃទី២៣ ធ្នូ នេះថា នៅពេលដែលលោក ហ៊ុន សែន ជំរុញឱ្យប្រទេសនានាដកស្ថានទូតពួកគេចេញពីប្រទេសភូមា ដោយសារតែពួកគេរិះគន់គម្រោងទស្សនកិច្ចរបស់គាត់ទៅជួបមេយោធាផ្ដាច់ការភូមានោះ ចុះហេតុអ្វីលោក ហ៊ុន សែន មិនដកទូតចេញពីសមាគមអាស៊ាន ៩ប្រទេស ដែលលោកបានរិះគន់ថាមិនគ្រប់ទឹកនោះទៅវិញ?
លោក គឹម សុខ អះអាងថា ការចេញមុខរបស់លោក ហ៊ុន សែន ទៅជួបមេយោធាផ្ដាច់ការភូមា លោក មីន អ៊ុងឡាំង ដែលពិភពលោកជាង ១០០ប្រទេស និងសមាគមអាស៊ានថ្កោលទោសមិនទទួលស្គាល់នោះ ធ្វើឡើងក្នុងចេតនាផ្គាប់ផ្គុននយោបាយចិន ដើម្បីបានជាខ្នងបង្អែកផង និងមានចេតនាលុបលាងមុខរបស់ខ្លួនដែលធ្លាប់តែរំលោភសិទ្ធិមនុស្ស និងជាន់ឈ្លីប្រជាធិបតេយ្យកន្លងមកផងដែរ។
អ្នកវិភាគរូបនេះបញ្ជាក់ថា ការខិតខំរបស់លោក ហ៊ុន សែន យកមុខមាត់ក្នុងការជួយមេយោធាផ្ដាច់ការភូមា លោក មីន អ៊ុងឡាំង ឲ្យជាតំណាងប្រទេសភូមា នៅក្នុងសមាគមអាស៊ានទាំងដែលមេយោធារដ្ឋប្រហាររូបនោះមិនព្រមអនុវត្តតាមគោលការណ៍ ៥ចំណុចរបស់អាស៊ាន ដែលបានសម្រេចកាលពីពេលថ្មីៗនេះ ត្រូវគេមើលឃើញថា លោក ហ៊ុន សែន ប៉ុនប៉ងបំបែកបំបាក់អាស៊ានឲ្យស្ថិតនៅក្រោមការគ្រប់គ្រងរបស់មហាយក្សចិនតែប៉ុណ្ណោះ។
ជុំវិញបញ្ហានេះ ប្រទេសប្រ៊ុយណេ ព្រះចៅ ស៊ុលតង់ ជាប្រធានអាស៊ានប្តូរវេនក្នុងឆ្នាំ២០២១ នេះ និងប្រទេសស្ថាបនិកអាស៊ានមួយចំនួនទៀត មានដូចជាម៉ាឡេស៊ី សិង្ហបុរី និងឥណ្ឌូនេស៊ី ជាដើម បានជំទាស់ក្នុងការអញ្ជើញមេដឹកនាំរដ្ឋប្រហារភូមា ចូលរួមជំនួបកំពូលអាស៊ាន ជាពិសេសបន្ទាប់ពីមេដឹកនាំយោធាភូមាបរាជ័យក្នុងការអនុវត្តកិច្ចព្រមព្រៀងប្រាំចំណុច ដែលត្រូវបានអនុម័តដោយជំនួបកំពូលមេដឹកនាំអាស៊ាន នៅរដ្ឋធានីហ្សាកាតា ប្រទេសឥណ្ឌូនេស៊ី កាលពីខែមេសា ឆ្នាំ២០២១ កន្លងទៅនោះ៕