រយៈពេលជាង ១០ខែមកហើយចាប់តាំងពីពួកយោធាធ្វើរដ្ឋប្រហារប្លន់អំណាចពីរដ្ឋាភិបាលស៊ីវិល មនុស្សស្លាប់ដែលជាក្រុមប្រឆាំងរដ្ឋប្រហារកើនឡើងជាង ១៣៥០នាក់ និងចាប់ខ្លួនកើនឡើងជាង ១ម៉ឺន ១ពាន់នាក់។ កាលពីថ្ងៃទី២៤ ធ្នូ ករណីឃាតកម្មមួយដ៏ឃោរឃៅកើតឡើងទៅលើក្បួនរថយន្តស៊ីវិលដោយដុតមនុស្សទាំងរស់ចំនួន ៣៥នាក់។
ករណីនេះនាំឲ្យកងទ័ពប្រឆាំងរបបសឹក បើកយុទ្ធនាការសងសឹកដោយដាក់គោលដៅវាយប្រហារបែបទ័ពព្រៃទៅលើគោលដៅរបស់ពួកយោធា និងក្រុមមន្ត្រីទាំងឡាយណាដែលមានទំនាក់ទំនងនឹងពួកយោធា។ ដោយសភាពការណ៍សឹកកាន់តែធ្ងន់ធ្ងរ គឺផ្ទុះឡើងសឹងទូទាំងប្រទេស ខណៈអំពើហិង្សាក៏កាន់តែសាហាវ បាននាំឱ្យអគ្គលេខាធិការរងម្នាក់នៃអង្គការសហប្រជាជាតិ ចេញសេចក្ដីថ្លែងការណ៍ជាបន្ទាន់ឱ្យភាគីពាក់ព័ន្ធទាំងអស់ ជាពិសេសពួកយោធាឲ្យបញ្ចប់ការវាយប្រយុទ្ធគ្នា។ អគ្គលេខាធិការរងអង្គការសហប្រជាជាតិទទួលបន្ទុកកិច្ចការមនុស្សធម៌រូបនេះ គឺលោក ម៉ារតាំង គ្រីហ្វ៊ី។
សេចក្ដីថ្លែងការណ៍របស់អគ្គលេខាធិការរងអង្គការសហប្រជាជាតិទទួលបន្ទុកផ្នែកមនុស្សធម៌ បានសម្ដែងក្តីរន្ធត់បន្ទាប់ពីទទួលបានសេចក្តីរាយការណ៍ពីប្រទេសភូមាមកថា ជនស៊ីវិលយ៉ាងតិច ៣៥នាក់ត្រូវបានដុតសម្លាប់នៅភាគខាងកើតប្រទេសភូមា។ ឧបទ្ទវហេតុនេះកើតឡើងកាលពីថ្ងៃទី២៤ ធ្នូ ដោយគេបានប្រទះឃើញសាកសពមនុស្សទាំងនោះឆេះខ្លោចនៅក្នុងរថយន្តជាច្រើនគ្រឿង ដែលអង្គការក្នុងស្រុកភូមាបានរាយការណ៍ថា គឺជាស្នាដៃរបស់កងទ័ពនៃរបបសឹកដែលវាយប្រហារមិនរើសគូប្រយុទ្ធ សូម្បីតែជនស៊ីវិលក៏ក្រុមនេះវាយប្រហារដែរ។
ហេតុការណ៍ដុតសម្លាប់មនុស្ស បានកើតនៅរដ្ឋកាយ៉ា (Kayah) ភាគខាងកើតប្រទេសភូមា ជាទីដែលកំពុងមានការវាយប្រយុទ្ធគ្នាយ៉ាងខ្លាំងរវាងកងទ័ពកម្លាំងការពារជនជាតិដើម និងកងទ័ពតាតម៉ាដាវ នៃរបបសឹក។
មិនមែនតែរដ្ឋមួយនេះទេធ្លាក់ក្នុងសង្គ្រាមស៊ីវិល គឺបណ្ដារដ្ឋធំៗជាច្រើន ដូចជារដ្ឋការ៉េន រដ្ឋឈីន រដ្ឋកាឈីន រដ្ឋសាន រដ្ឋម៉ន និងរដ្ឋអាការ៉ាកាន ក៏កំពុងធ្លាក់ក្នុងការវាយប្រយុទ្ធគ្នាខ្លាំងក្លាដែរ ហើយសូម្បីនៅក្រុងធំៗក៏មានការវាយឆ្មក់ពីកងទ័ពព្រៃដែលប្រឆាំងនឹងរបបសឹកផងដែរ។
នៅថ្ងៃទី២៨ ធ្នូ នេះ សារព័ត៌មានរបស់ប្រទេសភូមាជាច្រើនបានធ្វើសេចក្ដីរាយការណ៍ថា កងកម្លាំងទ័ពព្រៃនៃក្រុមយុទ្ធជនប្រឆាំងរបបសឹកនៅក្រោមរដ្ឋាភិបាលឯកភាពជាតិ កំពុងហ្វឹកហាត់ទ័ពជំនាន់ថ្មី និងកំពុងរៀបចំវាយប្រហារសម្ងាត់ ឬវាយឆ្មក់ទៅលើគោលដៅនៃរបបសឹក និងក្រុមមនុស្សគាំទ្ររបបរដ្ឋប្រហារនេះ ហើយផែនការនេះអាចជាការសងសឹកចំពោះពួកយោធាដែលបានវាយកម្ទេចរថយន្តរបស់ជនស៊ីវិលដោយដុតមនុស្សទាំងរស់ ៣៥នាក់ កាលពីថ្ងៃទី២៤ ខែធ្នូ នៅរដ្ឋកាយ៉ា។
អគ្គលេខាធិការរងអង្គការសហប្រជាជាតិទទួលបន្ទុកផ្នែកមនុស្សធម៌ លោក ម៉ារតាំង គ្រីហ្វ៊ី បានថ្លែងថា ការសម្លាប់ជនស៊ីវិលភូមាដែលនៅក្នុងនោះយ៉ាងហោចមានម្នាក់ជាកុមារ ដែលលោកថាជាអំពើព្រៃផ្សៃខ្លាំងណាស់។
ខណៈសោកនាដកម្មកើតឡើងភ្លាម រូបថតជាច្រើនសន្លឹកដែលបង្ហោះផ្សាយនៅលើបណ្ដាញសង្គម បានបង្ហាញរថយន្តដឹកអ្នកដំណើរពីរគ្រឿង និងរថយន្តធុនធ្ងន់មួយគ្រឿងឆេះសល់តែគ្រោងឆ្អឹង។
កងកម្លាំងការពារប្រជាជនដែលជាក្រុមប្រដាប់អាវុធប្រឆាំងរបបសឹកភូមា បាននិយាយថា នៅពេលពួកគាត់ទៅដល់កន្លែងកើតហេតុ ពួកគេបានប្រទះឃើញសាកសពមនុស្ស ២៧នាក់ដែលដុតឆេះខ្លោចនៅក្នុងរថយន្តដឹកអ្នកដំណើរ ២គ្រឿង ហើយជាមួយគ្នានេះ អង្គការក្នុងស្រុកមួយឈ្មោះថា Myanmar Witness បានឱ្យដឹងថា មនុស្ស ៣៥នាក់ដែលក្នុងនោះមានទាំងស្ត្រី និងកុមារ ត្រូវបានសម្លាប់ និងដុតឆេះខ្លោចនៅក្នុងហេតុការណ៍នេះ។ អង្គការនេះចោទថា ការដុតសម្លាប់មនុស្សយ៉ាងព្រៃផ្សៃនេះ គឺជាស្នាដៃរបស់កងទ័ពនៃឧត្តមសេនីយ៍ មីន អ៊ុងឡាំង។
ដោយក្ដីដ៏រន្ធត់ លោក ម៉ារតាំង គ្រីហ្វ៊ី បានថ្កោលទោសហេតុការណ៍នេះដោយបានទាមទារឱ្យរបបសឹកភូមា បើកការស៊ើបអង្កេតជាបន្ទាន់ដោយចាប់ខ្លួនឱ្យបានជនដៃដល់។ អគ្គលេខាធិការរងអង្គការសហប្រជាជាតិរូបនេះបានអំពាវនាវដល់កងទ័ពភូមា និងគ្រប់ក្រុមប្រដាប់អាវុធនៅភូមា ចាត់វិធានការបន្ទាន់ដើម្បីការពារអាយុជីវិតជនស៊ីវិល ដែលលោកស្នើឱ្យមានភាពអត់ធ្មត់ខ្ពស់បំផុត។
ជាមួយគ្នានេះ អង្គការអន្តរជាតិ Save The Children បានឱ្យដឹងថា បុគ្គលិកពីររូបរបស់អង្គការនេះដែលធ្វើដំណើរនៅក្នុងតំបន់នោះ បានបាត់ខ្លួន ចំណែករថយន្តរបស់ពួកគេត្រូវដុតបំផ្លាញនៅក្នុងហេតុការណ៍នោះ។
របបសឹកភូមា ដែលត្រូវបានចោទថាសម្លាប់មនុស្សមិនរើសគូប្រយុទ្ធ គឺសូម្បីកុមារតូចៗក៏ត្រូវបានសម្លាប់ដែរ។ របបសឹកនេះកំពុងតែស្ថិតក្នុងបញ្ជីរបស់តុលាការព្រហ្មទណ្ឌអន្តរជាតិ ICC ដោយចាត់ទុកថាជារបបមួយបានកំពុងប្រព្រឹត្តអំពើប្រល័យពូជសាសន៍ និងឧក្រិដ្ឋកម្មប្រឆាំងមនុស្សជាតិទៅលើសហគមន៍ជនជាតិភាគតិចរ៉ូហ៊ីងយ៉ា នៅរដ្ឋរ៉ាកខើយ និងចុងក្រោយនេះ របបរដ្ឋប្រហារនេះក៏កំពុងស្ថិតក្នុងការចោទប្រកាន់មួយករណីទៀត គឺសម្លាប់មនុស្សក្រៅប្រព័ន្ធច្បាប់ជាង ១៣០០នាក់ចាប់ពីថ្ងៃរដ្ឋប្រហារទី១ ខែកុម្ភៈ។ បទឧក្រិដ្ឋថ្មីនេះបាននាំឲ្យរបបសឹករងការចោទថ្មីមួយករណីទៀតដោយរដ្ឋអាជ្ញាតុលាការព្រហ្មទណ្ឌអន្តរជាតិ គឺឧក្រិដ្ឋកម្មប្រឆាំងមនុស្សជាតិក្រោមបណ្ដឹងរបស់ប្រជាជនភូមា៕