 ដែលគេស្គាល់ថាអង្គការអាគីរ៉ា ចំនួន ៣នាក់ស្លាប់ បាត់ខ្លួនម្នាក់ និងរងរបួសមនុស្ស ២នាក់ក្នុងហេតុការណ៍ផ្ទុះមីន ២កន្លែងផ្សេងគ្នា ក្នុងស្រុកជាំក្សាន្ត ខេត្តព្រះវិហារ នៅថ្ងៃទី១០ ខែមករា ឆ្នាំ២០២២។){kind=link}
អ្នកជំនាញផ្នែកដោះមីនរបស់អង្គការដោះមីនកម្ពុជា (Cambodian Self Help Demining) ដែលគេស្គាល់ថាអង្គការអាគីរ៉ា ចំនួន ៣នាក់ស្លាប់ បាត់ខ្លួនម្នាក់ និងរងរបួសមនុស្ស ២នាក់ក្នុងហេតុការណ៍ផ្ទុះមីន ២កន្លែងផ្សេងគ្នា ក្នុងស្រុកជាំក្សាន្ត ខេត្តព្រះវិហារ នៅថ្ងៃទី១០ ខែមករា ឆ្នាំ២០២២។
អគ្គនាយកមជ្ឈមណ្ឌលកម្ចាត់មីនកម្ពុជា (CMAC) លោក ហេង រតនា បានសរសេរនៅលើគណនីហ្វេសប៊ុករបស់លោកថា ហេតុការណ៍នេះបានកើតលើបុគ្គលិកជំនាញដោះមីនរបស់អង្គការ CSHD ដែលគេស្គាល់ថាជាអង្គការអាគីរ៉ា ដែលមានទីតាំងស្នាក់ការនៅខេត្តសៀមរាប។ លោកបញ្ជាក់ទៀតថា ករណីចៃដន្យមួយទៀតដែរ គឺនៅមុនគ្រោះថ្នាក់ស្លាប់អ្នកដោះមីននេះបានកើតឡើងតែប្រមាណ ២០នាទីប៉ុណ្ណោះនៅភូមិដដែលនេះ ក៏មានករណីផ្ទុះគ្រាប់ទៀតក្នុងហេតុការណ៍របស់ពលរដ្ឋបានដុតសម្អាតដីចម្ការដាំដំឡូង ដែលបណ្ដាលឲ្យស្លាប់ពលរដ្ឋមួយរូបផងដែរ។
តាមសារព័ត៌មានក្នុងស្រុកបានផ្សាយដោយដកស្រង់របាយការណ៍របស់លោក សាយ ដេត អធិការនគរបាលស្រុកជាំក្សាន្ត ខេត្តព្រះវិហារ បានប្រាប់ឱ្យដឹងថា មានករណីផ្ទុះគ្រាប់ និងផ្ទុះមីនតោន ២ករណីផ្សេងគ្នាក្នុងភូមិតែមួយ។ ករណីទី១ កើតឡើងនៅវេលាម៉ោង ១០ព្រឹក ដោយសារពលរដ្ឋដុតភ្លើងសម្អាតគល់ឈើក្នុងចម្ការដំឡូងបណ្តាលឱ្យផ្ទុះគ្រាប់ស្លាប់ម្នាក់។ ចំណែកឯករណីទី២ ផ្ទុះមីនតោនកើតឡើងនៅវេលាម៉ោង ១១ព្រឹកនៅចំណុចវាលជាស ជើងភ្នំមុំ៣ បណ្តាលឱ្យកងកម្លាំងរបស់អង្គការដោះមីនកម្ពុជា ស្លាប់ ២នាក់ បាត់ខ្លួនម្នាក់ និងរបួសធ្ងន់ស្រាលចំនួន ២នាក់។ លោកថា ករណីនេះមិនទាន់ដឹងមូលហេតុពិតប្រាកដនោះទេ។
មន្ត្រីរដ្ឋាភិបាលដែលធ្វើការពាក់ព័ន្ធនឹងការបោសសម្អាតមីន បានសម្ដែងការសោកស្ដាយចំពោះការបាត់បង់អាយុជីវិតអ្នកជំនាញដោះមីន និងប្រជាពលរដ្ឋក្នុងករណីទាំងពីរនោះ។
របាយការណ៍ស៊ីម៉ាក់ (CMAC) កាលពីពេលកន្លងមកបានឱ្យដឹងថា ចាប់ពីឆ្នាំ១៩៧៩ ដល់ឆ្នាំ២០២០ ពលរដ្ឋជិត ២ម៉ឺននាក់ (១៩៧៩៧នាក់) បានស្លាប់ និងរងរបួសពិការដាច់ដៃជើងចំនួនជាង ៤ម៉ឺន ៥ពាន់នាក់ (៤៥១២៣នាក់) ផ្សេងទៀតដោយសារគ្រាប់មីន និងគ្រាប់សំណល់ជាតិផ្ទុះ៕