នៅក្នុងរដ្ឋធានីគៀវ ប្រទេសអ៊ុយក្រែន អាជ្ញាធរបានដាក់បម្រាមគោចរពីរថ្ងៃមកហើយរហូតដល់ថ្ងៃចន្ទ ទី២៨ កុម្ភៈ ហើយបម្រាមនេះនៅតែបន្ត ខណៈកងកម្លាំងរុស្ស៊ីនៅតែមានផែនការវាយកាន់កាប់រដ្ឋធានីនេះមួយលើកទៀត ប្រសិនបើការចរចាដែលចាប់ផ្ដើមធ្វើនៅក្នុងទឹកដីប្រទេសបេឡារូស ជាប់ព្រំដែនអ៊ុយក្រែន មិនអាចរកដំណោះស្រាយបាននោះ។
កាលពីយប់ថ្ងៃសៅរ៍ សប្ដាហ៍កន្លងមកនេះ កងទ័ពរុស្ស៊ីវាយរុលចូលរដ្ឋធានីគៀវ ដោយមានការបាញ់កាំជ្រួចដាក់ទីក្រុងមួយនេះផង តែមិនអាចវាយកាន់កាប់បានឡើយ។
ប្រធានាធិបតីអ៊ុយក្រែន លោក Volodymyr Zelenskiy បានធានាចំពោះពលរដ្ឋរបស់លោកថា លោកនៅតែស្ថិតនៅក្នុងរដ្ឋធានីគៀវ និងបានស្នើប្រជាជនឱ្យនៅបន្តនៅក្នុងរដ្ឋធានីដើម្បីសាមគ្គីគ្នាប្រឆាំងនឹងកងទ័ពឈ្លានពាន។
សាររបស់លោក Zelenskiy បានរៀបរាប់ដូចនេះថា៖ «ខ្ញុំនៅទីនេះ។ យើងនឹងមិនដាក់អាវុធចុះទេ។ យើងនឹងការពារប្រទេសការពារទីក្រុងរបស់យើង។ ដោយសារតែអាវុធរបស់យើង គឺពួកយើងអាចការពារដែនដីយើងបាន។ សូមជនរួមជាតិនៅជាមួយគ្នា ជាពិសេសយុវជន។ អាវុធរបស់យើងនៅក្នុងដៃយើងអាចរារាំងបាននូវចលនារបស់ពួកឈ្លានពាន»។
លោក Zelenskiy បានបង្រួបបង្រួមប្រជាជនអ៊ុយក្រែនឱ្យគាំទ្រលោក ព្រោះលោកតាំងចិត្តថាមិនរត់ចោលប្រទេសដាច់ខាត។ លោកថាគ្រួសាររបស់លោក ក៏មិនរត់ដែរ គឺពួកយើងកាន់អាវុធក្នុងដៃហើយដើម្បីការពារទីក្រុង។
នៅក្នុងស្ថានភាពដែលទ័ពរុស្ស៊ីរុលចូលរដ្ឋធានីមិនបាន ហើយមានទ័ពខ្លះចូលបាន ហើយក៏ត្រូវបានបាញ់សម្លាប់តាមផ្លូវដោយកម្លាំងរបស់ប្រជាជន។ ការវាយដោយគ្រាប់កាំជ្រួច និងរថក្រោះទោះជាធ្លាក់មកលើរដ្ឋធានីនេះក្ដី តែកងទ័ពរុស្ស៊ីពុំអាចរុលចូលបានឡើយ។
មិនថាឡើយនៅរដ្ឋធានីគៀវនោះទេដែលកងទ័ពរុស្ស៊ីជួបផលវិបាក នៅបណ្ដាក្រុងធំៗខ្លះក៏មិនងាយយកបានដែរ ហើយទីតាំងខ្លាំងកងទ័ពរុស្ស៊ីមិនគ្រប់គ្រងសភាពការណ៍បានទាំងស្រុងឡើយ ហើយពេលខ្លះក៏រងការវាយបកពីកងទ័ពអ៊ុយក្រែនទៀតផង។
នៅខណៈលោកប្រធានាធិបតីអ៊ុយក្រែន ប្រកាសឱ្យក្រុមបស្ចិមប្រទេសផ្ដល់គ្រាប់កាំភ្លើង និងកាំភ្លើង ដែលលោកថាប្រជាជនអ៊ុយក្រែន ជាពិសេសយុវជនសម្រេចការពារទឹកដីរបស់ពួកគេហើយនោះ ឃើញថាប្រទេសជាច្រើនដែលជាសមាជិកណាតូ (NATO) និងអូស្ត្រាលី បានសម្រេចបញ្ជូនអាវុធទៅជួយកងទ័ពអ៊ុយក្រែនតាមការអំពាវនាវរបស់លោកប្រធានាធិបតី Zelenskiy។
ប្រទេសដែលចេញមុខផ្ដល់អាវុធទៅឱ្យអ៊ុយក្រែន មានអាល្លឺម៉ង់ អង់គ្លេស សាធារណរដ្ឋឆេក ប្រទេសអូស្ត្រាលី ហើយមានប្រទេសច្រើនទៀត។ ចំណែករដ្ឋមន្ត្រីការបរទេសសហរដ្ឋអាមេរិកលោក Antony Blinken បានប្រកាសកាលពីថ្ងៃសៅរ៍ ថា សហរដ្ឋអាមេរិកផ្ដល់ជំនួយយោធាគិតជាសាច់ប្រាក់ គឺ ៣៥០លានដុល្លារបន្ថែមទៀតទៅឱ្យប្រទេសអ៊ុយក្រែន ដើម្បីជួយឱ្យអ៊ុយក្រែនការពារអធិបតេយ្យភាពរបស់ខ្លួន។ ចំណែកសហភាពអឺរ៉ុប ២៧ប្រទេសក៏បានប្រកាសផ្ដល់ទាំងជំនួយយោធា និងជំនួយមនុស្សធម៌ផងដែរ។
អ្វីដែលមានការរួមគ្នាខ្លាំង គឺការសម្រេចដាក់ទណ្ឌកម្មលើប្រទេសរុស្ស៊ី គឺមានភាពធ្ងន់ធ្ងរ ដោយការផ្ដាច់ប្រព័ន្ធចរាចរណ៍ធនាគារទាំងឡាយណាដែលមានភាគហ៊ុនជាមួយនឹងក្រុមហ៊ុនរបស់ធនាគាររុស្ស៊ី គឺនៅអឺរ៉ុប និងអាមេរិក ត្រូវកាត់ផ្ដាច់ទាំងស្រុង។
ចំណែកឯទណ្ឌកម្មបង្កកប្រាក់លើលោកប្រធានាធិបតី ពូទីន និងមន្ត្រីជាន់ខ្ពស់ ក៏បានធ្វើឡើងទន្ទឹមនឹងការបិទខ្ទប់បំពង់បង្ហូរឧស្ម័នរបស់រុស្ស៊ីចូលទីផ្សារអឺរ៉ុប ក៏បានធ្វើទៅហើយដោយអាល្លឺម៉ង់។ ទាំងអស់នេះសុទ្ធតែជួបផលវិបាកដែលប្រទេសរុស្ស៊ី ជួបនៅពេលនេះ ខណៈកងទ័ពរបស់មហាអំណាចមួយនេះមិនអាចរុលកាន់កាប់រដ្ឋធានីគៀវបានទៀតនេះ បាននាំឱ្យមានសញ្ញានៃការប្រកាសចរចារុស្ស៊ី និងអ៊ុយក្រែន។ តាមដំណឹងពីសារព័ត៌មាន Politco ឱ្យដឹងថា កិច្ចចរចារវាងប្រតិភូរុស្ស៊ី និងអ៊ុយក្រែន បានចាប់ផ្ដើមហើយនៅក្នុងទីក្រុង Gomel នៃតំបន់ព្រំដែនរវាងបេឡារូស និងអ៊ុយក្រែន នៅថ្ងៃចន្ទ ទី២៨ ខែកុម្ភៈ។ ខាងភាគីប្រតិភូអ៊ុយក្រែន ក្នុងនោះរួមមានទាំងមន្ត្រីជាន់ខ្ពស់ជាច្រើនរូប ក្នុងនោះមានរដ្ឋមន្ត្រីការពារជាតិ។
នៅមុនការចរចា ភាគីអ៊ុយក្រែនបានស្នើឱ្យមានបទឈប់បាញ់ និងការដកកងទ័ពរុស្ស៊ីចេញជាបន្ទាន់ ប៉ុន្តែពុំមានចម្លើយភ្លាមៗពីរុស្ស៊ីនោះទេ។ តែយ៉ាងណា កងទ័ពអ៊ុយក្រែន នៅថ្ងៃចន្ទនេះបានអះអាងថា កងទ័ពរុស្ស៊ីបានបន្ថយល្បឿននៃការវាយលុក ខណៈប្រតិបត្តិការយោធារបស់រុស្ស៊ី បានចូលដល់ថ្ងៃទី៥ ហើយ។
នៅក្នុងសេចក្ដីថ្លែងការណ៍របស់ខ្លួន នាយសេនាធិការកងទ័ពអ៊ុយក្រែន បានបញ្ជាក់ថា កងទ័ពរុស្ស៊ី បានបន្ធូរបន្ថយការវាយលុករបស់ខ្លួន ប៉ុន្តែនៅតែបន្តព្យាយាមបើកការវាយប្រហាររុលទៅមុខក្នុងតំបន់មួយចំនួនរបស់អ៊ុយក្រែន និងនៅក្បែររដ្ឋធានីគៀវ។ តែនៅជាមួយគ្នានេះ ប្រធានាធិបតីរុស្ស៊ី លោក វ៉្លាឌីមៀរ ពូទីន បានចេញបញ្ជាឱ្យកងទ័ពដាក់ពង្រាយគ្រាប់នុយក្លេអ៊ែរ ហើយប្រុងជើងការកម្រិតខ្ពស់ដែលលោកថាត្រូវប្រយ័ត្នគ្រប់ស្ថានការណ៍ទាំងអស់។
សហរដ្ឋអាមេរិក និងអង្គការ NATO បានថ្កោលទោសការបញ្ជារបស់ប្រធានាធិបតីរុស្ស៊ី លោក ពូទីន ដោយបានហៅការធ្វើបែបនេះថាជារឿងគ្រោះថ្នាក់ និងមិនអាចទទួលយកបានឡើយ។ តែលោក ពូទីន បានលើកឡើងថា គឺជាការឆ្លើយតបចំពោះសេចក្តីថ្លែងការណ៍ដ៏គឃ្លើនរបស់ក្រុមប្រទេសសម្ពន្ធមិត្តអង្គការ NATO និងការបង្កើនការដាក់ទណ្ឌកម្មពីសំណាក់ប្រទេសលោកខាងលិចមកលើរុស្ស៊ី ដែលលោកថារុស្ស៊ីនឹងសងសឹក។
ក្នុងស្ថានភាពនេះ អ្នកស្រី Linda Thomas-Greenfield អគ្គរដ្ឋទូតអាមេរិកប្រចាំនៅអង្គការសហប្រជាជាតិ បានថ្លែងថា សកម្មភាពរបស់លោក ពូទីន គឺជាការបង្កើនជម្លោះ និងជារឿងដែលមិនអាចទទួលយកបាន។ បែបនេះហើយដែលក្រុមប្រឹក្សាសន្តិសុខនៃអង្គការសហប្រជាជាតិ បានអនុម័តកាលពីថ្ងៃអាទិត្យ ទី២៧ ខែកុម្ភៈ ប្រាប់ទៅមហាសន្និបាតអង្គការសហប្រជាជាតិ បើកកិច្ចប្រជុំបន្ទាន់មួយតបតាមការទទូចរបស់ប្រទេសអ៊ុយក្រែន។
នៅក្នុងកិច្ចប្រជុំនៃប្រទេសសមាជិកទាំង ១៥ របស់ក្រុមប្រឹក្សាសន្តិសុខឱ្យបើកសម័យប្រជុំពិសេសនៃមហាសន្និបាត គេឃើញប្រទេសចំនួន១១ បានបោះឆ្នោតគាំទ្រ។ ចំណែករុស្ស៊ី បានបោះឆ្នោតប្រឆាំង ខណៈប្រទេសចិន ឥណ្ឌា និងអេមីរ៉ាត់អារ៉ាប់រួម បានបោះឆ្នោតអនុប្បវាទ៕