ស្ថានទូតកម្ពុជាប្រចាំសហរដ្ឋអាមេរិក អះអាងថា ខ្លួនកំពុងជំរុញឲ្យមានទំនាក់ទំនងអាស៊ាន-អាមេរិកកាន់តែល្អប្រសើរ និងរួមទាំងទាញយកផលប្រយោជន៍ពីឥណ្ឌូ-ប៉ាស៊ីហ្វិក ផងដែរ។
ឯកអគ្គរាជទូតកម្ពុជាប្រចាំសហរដ្ឋអាមេរិក លោក កែវ ឈា បានសរសេរលើទំព័រហ្វេសប៊ុកស្ថានទូតកម្ពុជាប្រចាំសហរដ្ឋអាមេរិក នៅថ្ងៃទី១៥ ខែមីនា ថា លោកបានពិភាក្សាផ្លាស់ប្ដូរយោបល់ជាមួយឯកអគ្គរាជទូតប្រ៊ុយណេ ប្រចាំសហរដ្ឋអាមេរិក លោក Dato Serbini Ali ដើម្បីជំរុញទំនាក់ទំនងអាស៊ាន-អាមេរិកឱ្យកាន់តែល្អប្រសើរបន្ថែមទៀត។
លោក កែវ ឈា បញ្ជាក់ថា ការជួបពិភាក្សានេះក៏ដើម្បីជំរុញការអនុវត្តយុទ្ធសាស្ត្រអាមេរិក និងឥណ្ឌូ-ប៉ាស៊ីហ្វិក ឬ US Indo-Pacific Strategy ដែលហៅកាត់ថា IPS ឲ្យកាន់តែមានប្រសិទ្ធភាព និងដើម្បីរក្សាតួនាទីស្នូលរបស់អាស៊ាននៅក្នុងតំបន់ រួមទាំងទាញយកផលប្រយោជន៍ពីឥណ្ឌូ-ប៉ាស៊ីហ្វិកផងដែរ។
ការអះអាងនេះ ធ្វើឡើងស្របពេលដែលទំនាក់ទំនងកម្ពុជា-អាមេរិកកំពុងស្ថិតក្នុងភាពចម្រូងចម្រាសនៅឡើយ ខណៈមេដឹកនាំរដ្ឋាភិបាលឯកបក្សនៅកម្ពុជា តែងតែប្រកាសជំហរគាំទ្រមហាអំណាចកុម្មុយនីស្តចិន រិះគន់សហរដ្ឋអាមេរិករហូតមក។
ទំនាក់ទំនងកម្ពុជា និងអាមេរិកនៅពេលនេះ ត្រូវគេមើលឃើញថា មានភាពរកាំរកូសយ៉ាងខ្លាំង ក្នុងនោះកិច្ចប្រជុំកំពូលអាស៊ាន-អាមេរិកដែលរដ្ឋាភិបាលកម្ពុជារំពឹងថាអាចជួយឱ្យកម្ពុជាមានទំនាក់ទំនងល្អជាមួយអាមេរិកឡើងវិញនោះ ត្រូវបានលើកពេល។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី នៅព្រឹកថ្ងៃទី១០ ខែមីនា កន្លងមកបានថ្លែងថា កិច្ចប្រជុំកំពូលអាស៊ាន-អាមេរិកដែលគ្រោងធ្វើនៅសហរដ្ឋអាមេរិក នាថ្ងៃទី២៨-២៩ ខែមីនា នេះ ត្រូវបានលើកពេលដោយសារតែថ្នាក់ដឹកនាំប្រទេសជាសមាជិកអាស៊ានមួយចំនួនជាប់រវល់ ដែលមិនទាន់អាចកំណត់ពេលជួបគ្នាបាន។
បើយោងតាមអ្នកវិភាគកិច្ចការការទូត និងនយោបាយមួយចំនួនក្នុងប្រទេសកម្ពុជា ក្នុងតំបន់អាស៊ី និងសហរដ្ឋអាមេរិក បានលើកឡើងកន្លងមកថា ទំនាក់ទំនងទ្វេភាគីរវាងសហរដ្ឋអាមេរិក និងកម្ពុជា ដែលបានឈានចូលដល់គម្រប់ ៧០ឆ្នាំនៅឆ្នាំ២០២០ នេះ ហាក់មានភាពល្អប្រសើរជាងពេលមុន ជាពិសេសចាប់តាំងពីការចូលកាន់តំណែងរបស់ឯកអគ្គរដ្ឋទូតសហរដ្ឋអាមេរិកថ្មីប្រចាំកម្ពុជា។
សហរដ្ឋអាមេរិក នឹងនៅតែបន្តជំរុញរដ្ឋាភិបាលកម្ពុជាឲ្យបើកឡើងវិញនូវលំហប្រជាធិបតេយ្យ ដើម្បីឲ្យកម្ពុជាអាចក្លាយជាប្រទេសប្រជាធិបតេយ្យពិតប្រាកដមួយ ដែលគោរពតាមគោលការណ៍សិទ្ធិមនុស្ស និងលទ្ធិប្រជាធិបតេយ្យ។
ជុំវិញការស្ដារទំនាក់ទំនងល្អរវាងកម្ពុជា-អាមេរិកឡើងវិញ រដ្ឋាភិបាលកម្ពុជារបស់លោក ហ៊ុន សែន បានចំណាយលុយជាតិអស់រាប់លានដុល្លាអាមេរិកលើក្រុមហ៊ុន អាឃីន ហ្គាំ (AKIN GUMP STRAUSS HAUER & FELD LLP) ក្រុមហ៊ុន ខ័រវីស (Qorvis LLC) ក្រុមហ៊ុន ប៉ាករីម ប្រ៊ីជីស (PacRim Bridges) និងក្រុមហ៊ុន ប្រោនស្តាញ ហៃយ៉ាត់ ហ្វាប៊័រ ស្រិក (Brownstein Hyatt Farber Schreck) ជាដើម ឲ្យជួយបញ្ចុះបញ្ចូលរដ្ឋាភិបាលអាមេរិក ដើម្បីស្ដារទំនាក់ទំនងទ្វេភាគីកម្ពុជា និងអាមេរិកឡើងវិញ ដែលត្រូវក្រសួងយុត្តិធម៌អាមេរិក លាតត្រដាងជាសាធារណៈកាលពីថ្ងៃទី២១ ខែមករា ឆ្នាំ២០២២ កន្លងទៅនេះ។
ក្រុមអ្នកសង្កេតការណ៍អះអាងថា សហរដ្ឋអាមេរិកមានការប្រយ័ត្នប្រយែងណាស់ចំពោះការចងមិត្តជាមួយមេដឹកនាំខ្មែរ ពីព្រោះប្រវត្តិនៃការដឹកនាំរបស់លោក ហ៊ុន សែន ដែលហ៊ុមព័ទ្ធទៅដោយអំពើឧក្រិដ្ឋធ្ងន់ធ្ងរដល់កម្រិតអន្តរជាតិ ដូចជាឧក្រិដ្ឋសង្គ្រាមកាលពីឆ្នាំ១៩៩៧ ជាដើម។ ជាងនេះទៀត លោក ហ៊ុន សែន បានសម្លាប់ប្រជាធិបតេយ្យ រំលោភសិទ្ធិមនុស្សយ៉ាងធ្ងន់ធ្ងរ ជាពិសេសតំណែងនាយករដ្ឋមន្ត្រីរបស់គាត់សព្វថ្ងៃនេះបានក្លាយជាសត្រូវនៃឆន្ទៈរបស់ប្រជាពលរដ្ឋខ្មែរភាគច្រើនលើសលប់ទៅហើយ។
ប្រភពដដែលបញ្ជាក់ថា ក្រោមការដឹកនាំដែលគ្មានសមត្ថភាពធ្វើជាមេដឹកនាំល្អស្របតាមគោលការណ៍លទ្ធិប្រជាធិបតេយ្យ លោក ហ៊ុន សែន គ្មានជម្រើសផ្សេងក្រៅពីបំផ្លាញជាតិតាមវិធីពុករលួយ ទៅជួលក្រុមហ៊ុនឯកជនដើម្បីបញ្ចុះបញ្ចូលក្រុមប្រទេសសេរីប្រជាធិបតេយ្យ ឲ្យជួយស្ដារទំនាក់ទំនងរវាងអាមេរិក-កម្ពុជាឡើងវិញនោះទេ៕