គិតមកដល់ថ្ងៃនេះ សង្គ្រាមរុស្ស៊ីឈ្លានពានអ៊ុយក្រែនមានរយៈពេល ៣៤ថ្ងៃហើយ។ ការវាយប្រយុទ្ធគ្នាកើតមានពាសពេញប្រទេស ទោះបីជាទីក្រុងខ្លះធ្លាក់នៅក្រោមការកាន់កាប់ដោយកងទ័ពរុស្ស៊ីក៏ដោយ។ នៅទីក្រុងកំពង់ផែ Mariupol អង្គការសហប្រជាជាតិបានរកឃើញរណ្ដៅសាកសពរួមមានមនុស្សស្លាប់ជាង ១ពាន់នាក់ (១០៨១នាក់)។
ប្រធានបេសកកម្មរបស់អង្គការសហប្រជាជាតិប្រចាំអ៊ុយក្រែន អ្នកស្រី Matilda Bogner បានបញ្ជាក់បន្ថែមថា អ្នកស្រីបានទទួលដំណឹងអំពីរណ្តៅសាកសពរួមនៅទីក្រុងកំពង់ផែ Mariupol គឺមនុស្សស្លាប់ ១០៨១នាក់ ក្នុងនោះមានទាំងកុមារផងដែរ។ តែដំណឹងចុងក្រោយមកនេះដែលចុះផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី២៩ ខែមីនា បានឱ្យដឹងថា មនុស្សស្លាប់នៅពាសពេញទីក្រុងមួយនេះដល់ទៅ ៥ពាន់នាក់ ចាប់តាំងពីការឡោមព័ទ្ធរបស់កងទ័ពរុស្ស៊ី កាលពី ៣សប្ដាហ៍មកនេះ។
អាជ្ញាធរទីក្រុង Mariupol បាននិយាយថា មនុស្ស ៥ពាន់នាក់ ក្នុងនោះរួមមានកុមារ ២១០នាក់។ នេះបើតាមអភិបាលក្រុង Mariupol។
បើតាមលោក Vadym Boichenko តួលេខអ្នកស្លាប់ទាំងនេះមិនទាន់រាប់បញ្ចូលទាំងចំនួនអ្នកស្លាប់នៅក្នុងការវាយប្រហាររបស់កងទ័ពរុស្ស៊ី ក្នុងរយៈពេលជាង ១ខែមកនេះ គឺចាប់តាំងពីលោក ពូទីន ប្រកាសធ្វើសង្គ្រាមកាលពីថ្ងៃទី២៤ ខែកុម្ភៈ មកនោះទេ ដែលបានបំផ្លាញទីក្រុងមួយនេះ និងធ្វើឱ្យប្រជាជនរាប់ម៉ឺននាក់កំពុងជាប់គាំងដោយគ្មានអគ្គិសនីប្រើប្រាស់។
លោក Boichenko ក៏បានឱ្យដឹងដែរថា ៩០% នៃអគារក្នុងទីក្រុង Mariupol រងការខូចខាត និង ៤០% ត្រូវបានបំផ្លាញ ក្នុងនោះរួមមានទាំងសាលារៀន មន្ទីរពេទ្យ រោងចក្រ។ល។ ចំណែកឯប្រជាជនជាង ១៦ម៉ឺននាក់បន្តជាប់គាំងនៅក្នុងទីក្រុងនេះនៅឡើយ។
ចំណែកឯរបាយការណ៍របស់អ្នកស្រី Matilda Bogner តំណាងអង្គការសហប្រជាជាតិផ្នែកសិទ្ធិមនុស្ស បានបញ្ចេញឱ្យដឹងថា កាលពីថ្ងៃទី២៨ ខែមីនា ចំនួនមនុស្សស្លាប់ និងការរងការវាយប្រហារដោយការវាយប្រយុទ្ធគ្នារវាងកងទ័ពរុស្ស៊ី និងអ៊ុយក្រែន ទាំងទីក្រុងតូច ទាំងទីក្រុងធំ និងនៅតាមភូមិនានាទូទាំងប្រទេសអ៊ុយក្រែន កំពុងកើនឡើងពីមួយថ្ងៃទៅមួយថ្ងៃ។ អ្នកស្រី Matilda Bogner គឺជាប្រធានបេសកកម្មឃ្លាំមើលសិទ្ធិមនុស្សប្រចាំប្រទេសអ៊ុយក្រែន។
អ្នកស្រីសម្ដែងក្ដីបារម្ភជាខ្លាំងចំពោះការប្រើប្រាស់សព្វាវុធ និងគ្រឿងផ្ទុះវាយប្រយុទ្ធគ្នាលើតំបន់ដែលមានមនុស្សរស់នៅច្រើន ហើយពួកគេមិនព្រមរត់ចេញពីសហគមន៍ និងលំនៅឋានដែលអ្នកស្រីថាគឺជាការងាយគ្រោះថ្នាក់បំផុត។
បើតាមអ្នកស្រី Bogner កងទ័ពរុស្ស៊ី បានប្រើប្រាស់មីស៊ីល កាំភ្លើងត្បាល់ធុនធ្ងន់ គ្រាប់រ៉ុក្កែត និងសព្វាវុធ និងគ្រាប់បែកចង្កោម រួមនឹងការវាយប្រហារតាមអាកាសទៅលើតំបន់ដែលមានមនុស្សរស់នៅច្រើន ហើយក៏មានការវាយប្រហារទៅលើតំបន់សហគមន៍រស់នៅច្រើនកុះករដែរ។
អ្នកស្រីពន្យល់ថា លំនៅឋានឯកជន អគារច្រើនជាន់ អគាររដ្ឋបាល មជ្ឈមណ្ឌលសុខាភិបាល សាលារៀន ស្ថានីយបូមទឹក ប្រព័ន្ធអគ្គិសនី ហើយសូម្បីទីផ្សារក៏ត្រូវបានបំផ្លាញយ៉ាងធ្ងន់ធ្ងរដោយគ្រាប់កាំភ្លើងរបស់កងទ័ពរុស្ស៊ីដែរ។
អ្នកស្រី Bogner បន្ថែមថា មិនតែប៉ុណ្ណោះ កងទ័ពរុស្ស៊ីបានប្រើប្រាស់គ្រាប់បែកចង្កោមដែលងាយសម្លាប់មនុស្សបំផុត។ អ្នកស្រីថានេះការប្រព្រឹត្តឧក្រិដ្ឋកម្មសង្គ្រាម។
អ្នកស្រី Bogner បានឱ្យដឹងទៀតថា ប្រជាជនរាប់ពាន់នាក់ដែលបានរត់គេចពីទីក្រុង Mariupol និងទីក្រុងនានា ត្រូវបានបញ្ជូនដោយបង្ខំឱ្យទៅប្រទេសរុស្ស៊ី ហើយពួកគេអាចក្លាយជាចំណាប់ខ្មាំងរបស់រុស្ស៊ី។
អ្នកស្រីតំណាងអង្គការសហប្រជាជាតិផ្នែកសិទ្ធិមនុស្ស បានរកឃើញកងទ័ពរុស្ស៊ីបានបាញ់ និងសម្លាប់ជនស៊ីវិលនៅក្នុងរថយន្ត នៅពេលពួកគេកំពុងជម្លៀសមនុស្ស ដោយពុំមានការព្រមានជាមុនឡើយ។ បន្ថែមលើសពីនេះ កងទ័ពរុស្ស៊ីបានសម្លាប់ជនស៊ីវិលក្នុងអំឡុងពេលពួកគេជួបជុំគ្នាតវ៉ាប្រឆាំងនឹងកងទ័ពរុស្ស៊ី ដែលចូលកាន់កាប់ទីក្រុងរបស់ពួកគេ ជាពិសេសនៅទីក្រុងកំពង់ផែ Mariupol។
លោក Vadym Boychenko អភិបាលក្រុង Mariupol និយាយថា ៥០% នៃប្រជាជនសរុបរបស់ទីក្រុងមាន ៥៤ម៉ឺននាក់ បានភៀសខ្លួន ហើយជិត ៣ម៉ឺននាក់ត្រូវកងទ័ពរុស្ស៊ី ចាប់បង្ខំឲ្យចាកចេញទៅនៅតំបន់ណាដែលកងទ័ពរុស្ស៊ីគ្រប់គ្រងបានយ៉ាងរឹងមាំ ខណៈ ១៦ម៉ឺននាក់ផ្សេងទៀតត្រូវបានបង្ខំឲ្យចូលទៅក្នុងទឹកដីរុស្ស៊ី។
ដោយមើលឃើញអំពីកំណើនជនស៊ីវិលស្លាប់កាន់តែច្រើនឡើង តុលាការយុត្តិធម៌អន្តរជាតិបានចេញដីកាបង្គាប់ទៅកាន់របបក្រុងមូស្គូ ឲ្យបញ្ឈប់សង្គ្រាមនៅអ៊ុយក្រែនជាបន្ទាន់ ដែលតុលាការអន្តរជាតិនេះចាត់ទុកថា សង្គ្រាមនេះកងទ័ពរុស្ស៊ីកំពុងតែប្រព្រឹត្តឧក្រិដ្ឋកម្មសង្គ្រាមយ៉ាងធ្ងន់ធ្ងរ ហើយជាការបំបាត់ជាតិសាសន៍មួយដែលហៅថាជាអំពើប្រល័យពូជសាសន៍៕