 បាននិយាយកាលពីថ្ងៃអង្គារ ទី១២ ខែមេសា ថា ប្រតិបត្តិការយោធារបស់រុស្ស៊ីក្នុងប្រទេសអ៊ុយក្រែន នឹងសម្រេចបានយ៉ាងពិតប្រាកដតាមគោលបំណងរបស់ខ្លួនដែលលោកអះអាងថា នឹងជិតដល់គោលដៅហើយ។){kind=link}
ប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) បាននិយាយកាលពីថ្ងៃអង្គារ ទី១២ ខែមេសា ថា ប្រតិបត្តិការយោធារបស់រុស្ស៊ីក្នុងប្រទេសអ៊ុយក្រែន នឹងសម្រេចបានយ៉ាងពិតប្រាកដតាមគោលបំណងរបស់ខ្លួនដែលលោកអះអាងថា នឹងជិតដល់គោលដៅហើយ។
ថ្លែងនៅក្នុងពិធីប្រគល់រង្វាន់មួយនៅកីឡដ្ឋាន Vostochny Cosmodrome នៅភាគខាងកើតនៃប្រទេសរុស្ស៊ី លោក ពូទីន និយាយថា រដ្ឋាភិបាលរុស្ស៊ីគ្មានជម្រើសអ្វីផ្សេងក្រៅពីការបើកប្រតិបត្តិការយោធាដើម្បីការពារប្រទេសរុស្ស៊ីនោះទេ ហើយថាការប៉ះទង្គិចគ្នាជាមួយនឹងកងទ័ពអ៊ុយក្រែន គឺជារឿងដែលមិនអាចចៀសរួចឡើយ។ ប៉ុន្តែលោកថា ផែនការរបស់លោកដើម្បីបញ្ចប់របបយោធាណាហ្ស៊ីនៅលើទឹកដីអ៊ុយក្រែន នឹងដើរដល់គោលដៅ។ នេះបើយោងតាមទីភ្នាក់ងារសារព័ត៌មាន Reuters បានចុះផ្សាយនៅថ្ងៃទី១៣ ខែមេសា។
ចំពោះពាក់ព័ន្ធនឹងដំណើរការចរចាវិញ ជនផ្ដាច់ការនៃប្រទេសរុស្ស៊ី ថាអ៊ុយក្រែនមានចិត្តមិនស្មោះនោះទេក្នុងការបង្ហាញឆន្ទៈទៅរកការបញ្ចប់សង្គ្រាម ដែលលោកថាការទាមទាររបស់ប្រទេសអ៊ុយក្រែនមានភាពមិនច្បាស់លាស់។ លោកព្រមានថា ការចរចាដើរដល់ចំណុចស្លាប់ហើយ។
បើតាមលោក ពូទីន ភាគីអ៊ុយក្រែនបានកែប្រែការទាមទារម្ដងហើយម្ដងទៀតមិនចេះចប់ឡើយ។ ភាពមិនស៊ីសង្វាក់គ្នានៃចំណុចសំខាន់ៗ បាននាំឱ្យមានការលំបាកមួយចំនួននៅក្នុងការសម្រេចឱ្យបាននូវការព្រមព្រៀងចុងក្រោយ។
ប្រធានាធិបតីរុស្ស៊ីរូបនេះក៏ឆ្លៀតវាយប្រហារពួកបស្ចិមប្រទេសដែរ។ លោកចំអកថា អតិផរណា និងការកើនឡើងនៃតម្លៃម្ហូបអាហារ និងប្រេងឥន្ធនៈនៅក្នុងបណ្ដាបស្ចិមប្រទេស នឹងចាប់ផ្ដើមដាក់សម្ពាធលើអ្នកនយោបាយរបស់ប្រទេសទាំងនោះ។ ជាមួយគ្នានេះ លោក ពូទីន ក៏បានផ្ញើសារព្រមានក្រុមបស្ចិមប្រទេសថា ការប៉ុនប៉ងនៅក្នុងការធ្វើឱ្យរុស្ស៊ីនៅឯកោ នឹងទទួលបរាជ័យ។
លោកព្រមានដូចនេះ ដោយលើកយកភាពជោគជ័យរបស់កម្មវិធីដែនអវកាសរបស់សូវៀត មកធ្វើជាភស្តុតាងថា រុស្ស៊ីអាចសម្រេចបានដ៏អស្ចារ្យឆ្ពោះទៅមុខនៅក្នុងស្ថានភាពនៅលើពិភពផ្សេងៗនៃគន្លងផែនដី។ លោក ពូទីន ព្រមានថា ការដាក់ទណ្ឌកម្មសំដៅកាត់ផ្ដាច់រុស្ស៊ីឱ្យនៅឯកោ គឺពួកលោកខាងលិចបានធ្វើឡើងរួចរាល់ហើយ ប៉ុន្តែសហភាពសូវៀតនៅតែនាំមុខផ្នែកអវកាស។
សម្រាប់សហរដ្ឋអាមេរិក កំពុងតែកៀរគរកម្លាំងថែមទៀតពង្រីកការដាក់ទណ្ឌកម្មលើរុស្ស៊ី។
កាលពីថ្ងៃចន្ទ ទី១១ ខែមេសា ប្រធានាធិបតីសហរដ្ឋអាមេរិក លោក ចូ បៃដិន (Joe Biden) និងនាយករដ្ឋមន្ត្រីឥណ្ឌា លោក Narendra Modi បានជួបសន្ទនាគ្នាតាមរយៈបណ្ដាញអ៊ីនធឺណិត។ ក្នុងជំនួបនេះ មេដឹកនាំទាំងពីរបានដោះដូរទស្សនៈអំពីសង្គ្រាមនៅអ៊ុយក្រែន។
រដ្ឋមន្ត្រីការបរទេសអាមេរិក លោក Antony Blinken ដែលតាមដានការសន្ទនាគ្នារវាងលោក បៃដិន និងលោក Modi បានប្រាប់អ្នកកាសែតបន្ទាប់ពីជំនួបថា៖ ជាការសំខាន់ដែលប្រទេសទាំងអស់ ជាពិសេសប្រទេសដែលមានឥទ្ធិពល និងមានប្រៀប គួរត្រូវចូលរួមដាក់សម្ពាធលើប្រធានាធិបតីរុស្ស៊ី ឱ្យបញ្ចប់សង្គ្រាមនៅអ៊ុយក្រែន។
តែជាមួយគ្នានេះ នាយករដ្ឋមន្ត្រីឥណ្ឌា លោក Narendra Modi បាននិយាយថា លោកបានស្នើឱ្យមានការចរចាដោយផ្ទាល់រវាងប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) និងប្រធានាធិបតីអ៊ុយក្រែន លោក Volodymyr Zelenskiy។ លោកយល់ថា ស្ថានការណ៍នៅក្នុងប្រទេសអ៊ុយក្រែនមានលក្ខណៈគួរឱ្យព្រួយបារម្ភខ្លាំង។ លោក Modi ចង់ឃើញរុស្ស៊ី និងអ៊ុយក្រែន ទៅរកការបញ្ចប់សង្គ្រាម។
ដោយឡែកសម្រាប់ប្រធានាធិបតីអ៊ុយក្រែន លោក Volodymyr Zelenskiy បានបន្តអំពាវនាវឱ្យសហភាពអឺរ៉ុប ពង្រីកការដាក់ទណ្ឌកម្មលើធនាគារទាំងអស់ និងប្រេងឥន្ធនៈរបស់ប្រទេសរុស្ស៊ី ដោយដាក់កាលបរិច្ឆេទកំណត់ដើម្បីបញ្ឈប់ការនាំចូលឧស្ម័នពីប្រទេសរុស្ស៊ី។ លោកលើកឡើងដូច្នេះនៅក្នុងការថ្លែងរបស់លោកទៅកាន់សភាប្រទេសលីទុយអានី កាលពីថ្ងៃចន្ទក្នុងសប្ដាហ៍នេះ។
សម្រាប់អ្នកនាំពាក្យរដ្ឋាភិបាលអ៊ុយក្រែន លោក Oleksandr Motuzyanyk បាននិយាយនៅក្នុងសន្និសីទកាសែតមួយដោយលោកបានព្រមានថា ប្រទេសរុស្ស៊ីនឹងបើកការវាយប្រហារដ៏ធំមួយនៅភាគខាងកើតប្រទេសអ៊ុយក្រែន នៅក្នុងពេលឆាប់ៗនេះ។
គិតត្រឹមថ្ងៃទី១៣ មេសា នេះ សង្គ្រាមរុស្ស៊ីលើកទ័ពឈ្លានពានអ៊ុយក្រែន មានរយៈពេល ៤៩ថ្ងៃហើយ។
ក្រសួងការពារជាតិចក្រភពអង់គ្លេស បានឱ្យដឹងថា កងទ័ពរុស្ស៊ីបានបន្តបាញ់ផ្លោងដាក់តំបន់ Donetsk និងតំបន់ Luhansk នៅភាគខាងកើតប្រទេសអ៊ុយក្រែន តែលោកថាកងទ័ពអ៊ុយក្រែនបានវាយរុញច្រានទៅវិញជាច្រើនដង ដោយធ្វើឱ្យរថក្រោះ រថយន្តដឹកយោធា និងកាំភ្លើងធំរបស់រុស្ស៊ីជាច្រើនរងការបំផ្លាញ។
ចំពោះឧត្តមស្នងការសហប្រជាជាតិ ទទួលបន្ទុកកិច្ចការសិទ្ធិមនុស្ស បានបញ្ជាក់ថា ជនភៀសខ្លួនអ៊ុយក្រែនកើនឡើងជាង ៤លាន ៥សែននាក់។ ពួកគេបានភៀសខ្លួនតាំងពីរុស្ស៊ីបានឈ្លានពានអ៊ុយក្រែនកាលពីថ្ងៃទី២៤ ខែកុម្ភៈ៕