 ឱ្យឈប់ប្រើប្រាស់ដងផ្លូវសាធារណៈសម្រាប់ធ្វើការជួបជុំគ្នាដែលនាំឱ្យប៉ះពាល់ដល់សិទ្ធិអ្នកដទៃ និងសន្តិសុខសណ្ដាប់ធ្នាប់ទីក្រុង។){kind=link}
រដ្ឋបាលរាជធានីភ្នំពេញ ព្រមានក្រុមកូដករបុគ្គលិកក្រុមហ៊ុន ណាហ្គាវើលដ៍ (Naga World) ឱ្យឈប់ប្រើប្រាស់ដងផ្លូវសាធារណៈសម្រាប់ធ្វើការជួបជុំគ្នាដែលនាំឱ្យប៉ះពាល់ដល់សិទ្ធិអ្នកដទៃ និងសន្តិសុខសណ្ដាប់ធ្នាប់ទីក្រុង។
សាលាក្រុងភ្នំពេញ បានចេញសេចក្តីប្រកាសព័ត៌មានកាលពីថ្ងៃទី២៧ ខែមិថុនា ឆ្នាំ២០២២ ថា រដ្ឋបាលរាជធានីភ្នំពេញសូមធ្វើការណែនាំដល់ក្រុមកូដករនៃក្រុមហ៊ុន ណាហ្គាវើលដ៍សាជាថ្មីថា ក្នុងករណីក្រុមកូដករទាំងនោះមានបំណងធ្វើការសម្ដែងមតិជាសាធារណៈ ត្រូវតែនាំគ្នាអនុវត្តតាមនីតិវិធីដែលមានចែងក្នុងច្បាប់ស្ដីពីការធ្វើបាតុកម្មដោយសន្តិវិធី និងត្រូវជូនដំណឹងជាលាយលក្ខណ៍អក្សរមកអាជ្ញាធររាជធានីភ្នំពេញ និងត្រូវសម្ដែងមតិនៅទីលានប្រជាធិបតេយ្យតែមួយប៉ុណ្ណោះ។
ប្រភពដដែលអះអាងថា អ្វីដែលគួរឱ្យកត់សម្គាល់នោះ គឺនៅពេលនេះ ក្រុមកូដករបាននាំគ្នាចងក្រណាត់ពណ៌ខៀវរុំក្បាលភ្ជាប់នូវពាក្យស្លោកដូចៗគ្នាថា «កុំយកលុយទិញសិទ្ធិ» បង្ហាញឲ្យឃើញថា ក្រុមកូដករទាំងនោះបានត្រៀមលក្ខណៈរួចជាស្រេចក្រោមការរៀបចំផែនការទុកជាមុនរបស់មនុស្សមួយក្តាប់តូច ដើម្បីបង្កើតព្រឹត្តិការណ៍មិនល្អមកលើអាជ្ញាធរមានសមត្ថកិច្ចក្នុងផែនការរបស់ពួកគេ។ ជាងនេះទៀត ក៏ជាហេតុនាំឱ្យប៉ះពាល់ដល់សណ្ដាប់ធ្នាប់ និងរបៀបរៀបរយសាធារណៈរហូតឈានដល់ការប្រើអំពើហិង្សាមកលើសមត្ថកិច្ចផងដែរ ដែលបណ្តាលឱ្យសមត្ថកិច្ចមួយចំនួនរងរបួសស្រាល ព្រមទាំងបាត់បង់វិទ្យុទាក់ទងចំនួន ០៥គ្រឿង និងនាឡិកាដៃចំនួន ០១គ្រឿងថែមទៀតក្នុងអំឡុងពេលចុះហាមឃាត់ក្រុមកូដករទាំងនោះ។
កាលពីថ្ងៃទី២៧ ខែមិថុនា ឆ្នាំ២០២២ ក្រុមកូដករនៃក្រុមហ៊ុន ណាហ្គាវើលដ៍ ប្រមាណជាង ១០០នាក់ដែលមានចងក្រណាត់ពណ៌ខៀវរុំក្បាលភ្ជាប់នូវពាក្យស្លោកថា «កុំយកលុយទិញសិទ្ធិ» បាននាំគ្នាទៅប្រមូលផ្ដុំនៅក្បែរអគារក្រុមហ៊ុន ណាហ្គាវើលដ៍ ដើម្បីទាមទាររកដំណោះស្រាយពីក្រុមហ៊ុននេះដែលបានរំលោភសិទ្ធិការងាររបស់ពួកគេអស់រយៈពេលជាង ១ឆ្នាំកន្លងមកនេះ ប៉ុន្តែក្រុមកូដករទាំងនោះត្រូវអាជ្ញាធរក្រុងភ្នំពេញបង្ក្រាប និងប្រើអំពើហិង្សាដើម្បីរារាំងការជួបជុំរបស់ពួកគេយ៉ាងធ្ងន់ធ្ងរ។
នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក មឿន តុលា បានប្រាប់សារព័ត៌មាន The Cambodia Daily នៅថ្ងៃទី២៨ មិថុនា ថា ការចេញនូវសារព្រមាន ឬការបង្ក្រាបលើកម្មករនិយោជិតដែលអនុវត្តសិទ្ធិរបស់ខ្លួនដូចមានចែងក្នុងរដ្ឋធម្មនុញ្ញ ដូចជាមាត្រា៣៥ ដែលចែងអំពីកាតព្វកិច្ចរបស់អង្គការរដ្ឋដែលត្រូវដោះស្រាយសំណើរបស់ពលរដ្ឋ ជាដើម កាន់តែបង្ហាញឱ្យឃើញនូវការអនុវត្តច្បាប់ដែលមានស្តង់ដារពីរនៅកម្ពុជា ហើយក៏រំលេចនូវចំណុចអសមត្ថភាពរបស់អាជ្ញាធរក្នុងការដោះស្រាយវិវាទនៃក្រុមហ៊ុនណាហ្គាវើលដ៍នេះផងដែរ។
លោក មឿន តុលា លើកឡើងថា សិទ្ធិក្នុងការធ្វើកូដកម្មដោយស្របច្បាប់ គឺជាសិទ្ធិដែលមានចែងក្នុងរដ្ឋធម្មនុញ្ញ ហើយការអនុវត្តកន្លងមករបស់ក្រុមកូដករណាហ្គាវើលដ៍ ក៏មិនប្រឆាំងទៅនឹងច្បាប់ស្ដីពីការធ្វើកូដកម្មនោះដែរ។ ប៉ុន្តែផ្ទុយទៅវិញ អាជ្ញាធរតែងតែរារាំងការសម្ដែងមតិរបស់កម្មករនិយោជិតរហូតមក ដែលបញ្ហានេះបានបង្កទៅជាមូលហេតុដ៏សំខាន់នាំឱ្យភាគីខាងក្រុមហ៊ុនណាហ្គាវើលដ៍ អាងទៅលើអាជ្ញាធរដែលបង្ហាញចេតនាមួយថា អាជ្ញាធរកំពុងតែការពារផលប្រយោជន៍ឱ្យក្រុមហ៊ុន ជាជាងការពារផលប្រយោជន៍ និងសិទ្ធិតវ៉ារបស់កម្មករដែលមានចែងក្នុងច្បាប់របស់កម្ពុជា។
លោកបញ្ជាក់ថា វិធានការដ៏មានប្រសិទ្ធភាពសម្រាប់ដោះស្រាយវិវាទនៃក្រុមហ៊ុនណាហ្គាវើលដ៍នៅពេលនេះ គឺអាជ្ញាធរត្រូវជំរុញឱ្យភាគីក្រុមហ៊ុនអនុវត្តតាមសេចក្តីបង្គាប់របស់ក្រុមប្រឹក្សាអាជ្ញាកណ្ដាលដែលបានណែនាំដល់ក្រុមហ៊ុនកន្លងមក។ បន្ថែមពីនេះ ត្រូវតែអនុញ្ញាតឱ្យកម្មករនិយោជិតទាំងនោះអាចធ្វើកូដកម្មតវ៉ានឹងក្រុមហ៊ុនបានដោយគ្មានការរារាំង។ នោះក្រុមហ៊ុនណាហ្គាវើលដ៍ដែលបានរំលោភសិទ្ធិការងារកម្មករកន្លងមក នឹងចេញមុខដោះស្រាយផ្តល់យុត្តិធម៌ជូនកម្មករនិយោជិតទាំងនោះជាមិនខាន។
កាលពីថ្ងៃទី១៨ ខែធ្នូ ឆ្នាំ២០២១ កម្មករនិយោជិតរបស់ក្រុមហ៊ុន ណាហ្គាវើលដ៍ ចំនួន ៣៦៥នាក់ត្រូវបានបញ្ឈប់ពីការងារដោយបង្ខំ និងមិនបានផ្តល់សំណងទៅតាមច្បាប់ការងារ ដែលជាមូលហេតុនាំឱ្យមានការតវ៉ាទាមទារពីកម្មករនិយោជិត ដោយការធ្វើកូដកម្មនៅមុខក្រុមហ៊ុន ប៉ុន្តែអាជ្ញាធររដ្ឋមិនបានជួយរកយុត្តិធម៌ឱ្យកម្មករនិយោជិតដែលជាជនរងគ្រោះនោះទេ បែរជានាំគ្នាបង្ក្រាបលើកម្មករទាំងនោះទៅវិញរហូតឈានដល់ការចាប់ឃុំខ្លួនតំណាងកម្មករជាច្រើនរូបថែមទៀត៕